Juan 9
9
Ri Jesús kukunaj jun achi ralaxib'em potz'
1Ri Jesús echiri' katajin chi b'e, xril jun achi ralaxib'em potz'. 2Ek'u rutijo'n xkitz'onoj che:
—Lal tijonel, ¿wa jun achi xalaxik potz' ruma nawi kimak ruchu-uqaw o ruma umak rire? —xecha'.
3Ri Jesús xuk'ul uwach chike:
—Na ruma ta umak rire y na ruma tane kimak ruchu-uqaw; wa' e u'anom cha' ruchuq'ab' ri Dios kaq'alajin ruk' rire.
4Lik chirajawaxik chwe kan'an ruchak ri taqayom lo we'in xaloq' k'a paq'ij, ma kak'un lo raq'ab' echiri' na jinta chi junoq utz kachakunik. 5Xaloq' k'u in k'o ri'in wara che wu'wachulew, in ri in Q'ijsaq che ruwachulew —xcha'.
6Echiri' ub'i'im chi wa', ri Jesús xchub'an chwa rulew, xu'an jub'iq' xoq'o'l ruk' ruk'axaj. Tek'uchiri', xusoq' che ruwach ri potz'. 7Ek'uchiri', xub'i'ij che:
—Jat, ja'ch'aja rawach pa ri ya' re Siloé —xcha'. (Siloé ke'elawi “ri Taqom loq”.)
Ri potz' e xu'ano; xe'ek y xu'ch'aja ruwach. Ek'uchiri' xtzelej loq, katzu'n chik.
8Ek'u ri ejeqel lo chunaqaj ri potz' y ri kilom xaqi ku'an ulimoxna, jewa' kakib'i'ij: «¿Na e ta neb'a achi wa' katz'uyi' chi' b'e y ku'an ulimoxna?» kecha'.
9Jujun chik kakib'i'ij: «Qatzij, are'» kecha'.
Jujun chik kakib'i'ij: «Na e ta rire, tob' lik e katzu'nik» kecha'.
No'j rachi kunutajinaq chik, lik kujikib'a' uwach, jewa' kub'i'ij: «Qatzij, in wa' k'ut» kacha'.
10Xkitz'onoj k'u che:
—¿Cha'ta la' xat-tzu'nik? —xecha che.
11Rire xuk'ul uwach:
—E ri jun achi Jesús ub'i', xu'an jub'iq' xoq'o'l, xusoq' che ri nuwach y xub'i'ij chwe: “Jat pa k'o wi ri ya' re Siloé y ja'ch'aja rawach chupa.” Xin'ek k'u ri', y echiri' xinch'aj ri nuwach, xinjeq kintzu'nik —xcha'.
12Xkitz'onoj k'u che:
—¿Pa k'o wi ri' la' la'chi? —xecha che.
Rire xuk'ul uwach:
—Na weta'am taj pa k'o wi —xcha'.
Ri fariseos kakita uchi' ri potz' kunutajinaq chik
13Ek'uchiri' xkik'am b'i ri potz' kunutajinaq chik chikiwach ri fariseos; 14ma e pa jun q'ij re uxlanib'al echiri' ri Jesús xu'an xoq'o'l y xukunaj ri potz'.
15Jenela' ri fariseos xkitz'onoj che cha'taj xtzu'nik.
Rire xuk'ul uwach chike:
—Rachi xusoq' xoq'o'l che ri nuwach, xinch'aj k'u ri nuwach y wo'ora kintzu'nik —xcha'.
16Ek'uchiri', jujun chike ri fariseos kakib'i'ij chikiwach: «La' la'chi x'anaw re wa', na ruk' ta ri Dios petinaq wi; ma e ku'an ri na ub'e taj ka'ani' chupa ri q'ij re uxlanib'al» kecha'.
Jujun chik kakib'i'ij: «We rire aj mak, ¿su'anik k'u ri' ku'an wa k'utub'al re ruchuq'ab' ri Dios?» kecha'.
Ruma k'u la', xkijach kipa ri fariseos chikiwach.
17Ek'uchiri', xkitz'onoj che rachi kunutajinaq chik:
—¿Sa' ri kab'i'ij ri'at chwi rachi xutzu'nisaj rawach? —xecha'.
Rire xuk'ul uwach:
—Ri'in kamb'i'ij e jun q'alajisanel —xcha'.
18Pero raj judi'ab' na xkaj taj kakikojo we rachi xex potz' wi y wo'ora katzu'nik. Ruma wa' xekisik'ij ruchu-uqaw, 19y xkitz'onoj k'u chike:
—¿E alk'o'al alaq wa', ri kab'i'ij alaq ralaxib'em potz'? ¿Cha'taj katzu'n wo'ora? —xecha'.
20Ruchu-uqaw rachi xkik'ul uwach:
—Ri'oj lik qeta'am e qalk'o'al wa' y xalaxik potz'. 21No'j na qeta'am taj cha'taj katzu'n wo'ora, y na qeta'am ta nenare' china xkunan re. Tz'onoj alaq che, ma rire nim chik —xecha'.
22Ruchu-uqaw rachi xkib'i'ij wa' ruma kakixi'ij kib', ma wa aj wach ke raj judi'ab' ki'anom chi tzij chikiwach cha' na kek'ul ta chi pa ri sinagoga janipa ri kakijikib'a' uwach ri Jesús e ri Cristo, Rucha'o'n lo ri Dios. 23E uwari'che ruchu-uqaw rachi xkib'i'ij: «Tz'onoj alaq che, ma rire nim chik.»
24Ek'uchiri', raj judi'ab' xkitaq tanchi usik'ixik rachi kunutajinaq chik y xkib'i'ij che:
—Wo'ora chajikib'a' uwach chwach ri Dios ri kab'i'ij. Ma ri'oj qeta'am wa' wa'chi lik aj mak —xecha'.
25Ek'u rire xub'i'ij:
—We rire aj mak na weta'am ta k'u ri' ri'in, xew weta'am e ri petinaq loq in potz' yey wo'ora kintzu'nik —xcha'.
26Xkitz'onoj tanchi che:
—¿Sa' ri xu'an chawe? ¿Su'anik xutzu'nisaj rawach? —xecha'.
27Rachi xuk'ul uwach:
—Ri'in ya ximb'i'ij che alaq y na x'aj ta kata alaq. ¿Su'chak k'u ri' ka'aj alaq kamb'i'ij tanchik? ¿Ka'aj kami ralaq ku'an alaq utijo'n? —xcha'.
28Ek'u rike xkiyajo, jewa' xkib'i'ij che:
—Ri'at e kataqej la' la jun achi, no'j ri'oj e kaqataqej rutz'ib'am kan ri Moisés. 29Ma ri'oj qeta'am ri Dios xch'a't ruk' ri Moisés; no'j la' la jun achi, na qeta'am taj pa petinaq wi —xecha che.
30Ek'u rire xub'i'ij chike:
—¡E la' la lik kakam wanima' ri'in che! Ma ralaq na eta'am ta alaq pa petinaq wi wa'chi, yey rire xutzu'nisaj ri nuwach ri'in. 31Qeta'am k'u chi utz, ri Dios na keb'uta ta raj makib', xew keb'uta ri kakiloq'oj uq'ij y kaki'an ri rajawal uk'u'x Rire. 32Chwi lo ri jeqeb'al ruwachulew, na jinta tatajinaq wi we k'o junoq utzu'nisam juna tikawex potz' chwi ralaxik. 33We tamaji wa jun achi petinaq ruk' ri Dios, ri' na jinta puq'ab' ku'an wa' —xcha'.
34Xkib'i'ij k'u che:
—Ri'at lik pa mak xatalax wi. ¿Kawaj kami ri' katk'utun chiqawach? —xecha che.
Chwi k'u ri' la', na xkik'ul ta chi pa ri sinagoga.
Ri potz' kunutajinaq chik kukoj rub'i' ri Jesús
35Ek'u ri Jesús xreta'maj na kakik'ul ta chi pa ri sinagoga rachi kunutajinaq. Uwari'che echiri' xuk'ulu, jewa' xub'i'ij che:
—¿Kub'ul ak'u'x ri'at ruk' Ralaxel Chikixo'l Tikawex? —xcha'.
36Rachi xuk'ul uwach:
—Wajawal, b'i'ij la chwe china rire cha' kakub'i' nuk'u'x ruk' —xcha'.
37Ri Jesús xub'i'ij che:
—Awilom chi uwach; ma in ri' ri kinch'a't awuk' —xcha'.
38Ek'uchiri', rachi xuxukub'a' rib' chwach y xuloq'nimaj uq'ij, jewa' xub'i'ij che:
—Wajawal, ri'in kakub'i' nuk'u'x uk' la —xcha'.
39Ek'u ri Jesús xub'i'ij:
—Ri'in in k'uninaq che ruwachulew cha' wuma ri'in kaq'alajinik china ri kakik'ul ri Q'ijsaq y china ri na kakik'ul taj. In k'uninaq k'u ri' cha' e ri na ketzu'n taj, kajaqataj ri kiwach y jela' kakil ri Q'ijsaq; yey ek'u ri “ketzu'nik”, kach'uqutaj ri kiwach y na kakil ta ri Q'ijsaq —xcha'.
40Jujun k'u chike ri fariseos, ri e k'o pan chunaqaj ri Jesús, echiri' xkita wa', xkitz'onoj che:
—¿E kami ke'elawi ri' oj potz' ri'oj? —xecha'.
41Ri Jesús xuk'ul uwach:
—We ta kaya ib' alaq chupa na kil ta alaq ri Q'ijsaq, na jinta mak alaq ri'. No'j ruma ri kab'i'ij alaq kil alaq chi utz ri Q'ijsaq, e kakanaj k'u alaq ri' chupa ri mak alaq#9:41 Juna aj mak we kuya rib' chupa rumak y kutzukuj ri Q'ijsaq, kuk'ul k'u ri' ri kuyb'al mak. No'j ri fariseos xkil ri Q'ijsaq re ri Cristo yey na xkaj taj kakik'ulu. Chikiwach rike na jinta kimak y lik keta'am chi ronoje puwi ri Dios; e uwari'che na utz taj kakik'ul ri kuyb'al mak re ri Dios. —xcha'.
Currently Selected:
Juan 9: acrN
Highlight
Share
Copy
Want to have your highlights saved across all your devices? Sign up or sign in
© 2009, Wycliffe Bible Translators, Inc. All rights reserved.