Juan 5
5
Ri Jesús kukunaj jun sik chuchi' ri atinib'al Betesda
1K'ate tanchi k'u ri', ri Jesús xtzelej Jerusalem echiri' raj judi'ab' k'o jun kinimaq'ij.
2Chupa k'u la' la tinamit, chunaqaj ri Okib'al ke B'exex, k'o jun nimalaj atinib'al, “Betesda” rub'i' pa ri ch'a'tem hebreo. Wa' wo'ob' uchi' ja k'o che. 3Chiri' e k'o uk'iyal yewa'ib' e kotz'erinaq; e k'o potz', jetz' y sik. Konoje rike koye'em echiri' kasilab' ri ya', 4ma xa chirij ora kaqaj lo jun ángel y kurujura' upa ri ya'. Ek'u ri' ri nab'e kuk'aq b'i rib' chupa, ri' kel loq kunutajinaq chik tob' sa' ri yab'il k'o che.
5K'o k'u jun achi e treinta y ocho junab' ri' yewa'. 6Echiri' ri Jesús xrilo kotz'ol chiri' y xreta'maj uk'iyal junab' jela' u'anom, xutz'onoj k'u ri' che:
—¿Kawaj katkunutajik? —xcha'.
7Rachi jewa' xuk'ul uwach:
—Wajawal, na jinta junoq kak'amaw b'i we chupa ri atinib'al echiri' karujurut upa ri ya'. Lik nutijom chi nuq'ij che kank'aq b'i wib' chupa; pero echiri' kuaj kan'ano, k'ate kanwilo jun chik kanab'ej chinuwach —xcha'.
8Ri Jesús xub'i'ij che:
—Chatyaktajoq, chak'ama b'i rach'at y chatb'inoq —xcha'.
9Chupa k'u la' la joq'otaj rachi xkunutajik, xuk'am b'i ruch'at y xujeqo kab'inik. Yey wa' xu'an pa jun q'ij re uxlanib'al.
10Ruma k'u ri', ri e aj judi'ab' xkib'i'ij che rachi xkunutajik:
—Waq'ij e q'ij re uxlanib'al, y na ub'e ta chawe kawuk'a'aj rach'at —xecha'.
11Rachi xuk'ul k'u uwach chike:
—Ri jun xinukunaj e xb'i'n re chwe: “Chak'ama b'i rach'at y chatb'inoq” —xcha'.
12Xkitz'onoj k'u che:
—¿China ri xb'i'n chawe: “Chak'ama b'i rach'at y chatb'inoq”? —xecha'.
13Ek'u rachi na reta'am taj china ri xkunaw re, ma ri Jesús xel b'i chikixo'l ri tikawex e k'o chiri'.
14Tek'uchiri', ri Jesús xu'riqa rachi pa ri Rocho Dios y xub'i'ij che:
—Chawilape': Wo'ora at kunutajinaq chik; matmakun chi k'u ri', ma k'axtaj kape juna k'axk'ob'ik más nim pawi' —xcha'.
15Xe'ek rachi y xu'tzijoj chike raj judi'ab' e ri Jesús xkunaw re. 16Ruma wa', raj judi'ab' xkijeq uternab'exik ri Jesús y kakitzukuj su'anik kakikamisaj, ma rire ku'an kunanik pa ri q'ij re uxlanib'al.
17Ek'u ri Jesús xub'i'ij chike:
—Ri Nuqaw na roq'otam taj kachakunik y jek'ula' ri' kan'an ri'in —xcha'.
18Ruma wa' raj judi'ab' más xkiya kib' che ukamisaxik ri Jesús, ma e chikiwach rike kupalajij ri taqanik puwi ri q'ij re uxlanib'al. Y na xew ta wa', ma kujunimaj ne rib' ruk' ri Dios echiri' kub'i'ij ri Dios e Uqaw.
Ruk'ajol ri Dios ya'tal puq'ab' kataqanik
19Ek'u ri Jesús xub'i'ij chike:
«Paqatzij wi kamb'i'ij che alaq: Ruk'ajol ri Dios na jinta k'o ku'an xa pa re Rire; ma xew ku'an pacha' ri karilo ku'an Ruqaw. Janipa taq ri ku'an Ruqaw, jek'ula' ku'an Ruk'ajol.
20»Ma ri Dios lik k'ax kuna' Ruk'ajol y kuk'ut k'u che ronoje ri ku'ano. Yey k'o ne ri más nimaq taq chak kuk'ut chwach. Y we xu'an k'u wa', lik kakam ne anima' ralaq che. 21Ma jela' pacha' ri Dios keb'uk'astajisaj ri ekaminaq y kuya kik'aslemal, jek'ula' Ruk'ajol kuya k'aslemal china che ri karaj kuya wi. 22Yey ri Dios na kuq'at tane tzij puwi junoq, ma puq'ab' Ruk'ajol uya'om wi kuq'at tzij pakiwi ri tikawex, 23cha' jela' konoje ri tikawex kakiyak uq'ij Ruk'ajol, jela' pacha' kaki'an che uyakik uq'ij ri Dios. Yey china ri na kuyak ta uq'ij Ruk'ajol ri Dios, na kuyak ta k'u uq'ij ri' ri Jun xtaqaw lo re, wa' e ri Dios.
24»Paqatzij wi kamb'i'ij che alaq: China ri lik kuta chi utz ri kamb'i'ij ri'in y kakub'i' uk'u'x ruk' ri xtaqaw lo we, ri' k'o uk'aslemal na jinta utaqexik y na kuk'ul ta ri k'axk'olil re ri q'atb'al tzij. Jek'ula', na jinta chi puq'ab' ri kamik, ma asu xq'ax chupa ri k'aslemal. 25Paqatzij wi kamb'i'ij che alaq: Kopon k'u ri ora y e chi uq'ijol wa' echiri' ri na jinta kik'aslem chwach ri Dios, kakita ruqul Ruk'ajol ri Dios. Yey china taq k'u ri' ri kakikoj utzij, k'o kik'aslemal na jinta utaqexik. 26Ma puq'ab' ri Qaqaw Dios k'o wi kuya k'aslemal; jek'ula' uya'om puq'ab' Ruk'ajol kuya k'aslemal. 27Yey ri Dios uya'om ne puq'ab' Ruk'ajol kuq'at tzij pakiwi ri tikawex, ma Ruk'ajol e Alaxel Chikixo'l Tikawex.
28»Makam anima' alaq che wa', ma kopon ri ora echiri' konoje ri ekaminaq kakita ruqul Rire. 29Janipa ri xki'an ri utz, ri' keyaktaj lo che jun k'astajib'al re k'aslemal. No'j janipa k'u ri xki'an ri na utz taj, ri' keyaktaj lo che ri q'atb'al tzij ka'an pakiwi'.
Ri keq'alajisan re sa' ruwach ri Jesús
30»Na jinta k'o kan'an xa pa we ri'in. Ri q'atb'al tzij kan'ano e ri kinutaq ri Nuqaw che u'anik. Yey lik jusuk' ri q'atb'al tzij kan'ano. Na e ta kan'an ri' ri kuaj ri'in; ma e kan'an janipa ri karaj ri Nuqaw, ri xtaqaw lo we. 31We ta e la' xa chiwib'il wib' ri'in kanq'alajisaj sa' ri nuwach, ri' na jinta uchak ri kamb'i'ij. 32K'o k'u Jun kaq'alajisan nuwach, wa' e ri Nuqaw, y weta'am k'ut ronoje ri kuq'alajisaj Rire panuwi ri'in, lik qatzij.
33»Ralaq xtaq ne b'i alaq utz'onoxik che ri Juan panuwi ri'in; y ri k'ulub'al uwach xu'an lo rire, lik qatzij. 34Pero ri'in na kajawax ta chwe k'o junoq kuq'alajisaj sa' ri nuwach. Xew k'u kankuxtaj che alaq ri xub'i'ij ri Juan panuwi ri'in cha' kakoj alaq y jela' kakolob'etaj alaq. 35Ma ri Juan e pacha' juna aq' karepowik y kawon chi utz. Pero ralaq xa joq'otaj xki'kot alaq che ri Q'ijsaq xutzijoj.
36»K'o k'u jun k'utub'al más k'o uwach chwa ri xuq'alajisaj ri Juan panuwi ri'in. Ma ronoje rub'i'im lo ri Nuqaw chwe re ko'lnu'ana', e ri kintajin che u'anik. Yey ruma taq ri kan'ano, kaq'alajinik, e ri Nuqaw ri xtaqaw lo we'in. 37Yey ri kaq'alajisan re sa' ri nuwach ri'in e ri Nuqaw, ri taqayom lo we'in. Pero lik q'alaj na tom ta k'ana alaq ruqul ri Dios y na ilom ta alaq uwach, yey 38Ruch'a'tem Rire na okinaq ta pa anima' alaq; ma na kub'ul ta k'u'x alaq ruk' ri jun utaqom lo ri Dios.
39»Lik k'u katijoj ib' alaq che Ruch'a'tem ri Dios tz'ib'ital kanoq; ma ralaq kach'ob' alaq e chupa wa' kariqitaj wi ri k'aslemal na jinta utaqexik. ¡Yey ek'u ri' Ruch'a'tem ri Dios ri kaq'alajisan nuwach ri'in! 40Na ruk' ta k'u ri', na ka'aj ta alaq kape alaq wuk' cha' jela' kak'ul alaq wa' wa k'aslemal.
41»Ri'in na e ta kantzukuj ri yakb'al nuq'ij kaki'an ri winaq. 42Yey lik ne weta'am ri k'u'x alaq, ma ralaq na k'ax ta kana' alaq ri Dios pa saqil wi. 43Ri'in in petinaq pa rub'i' ri Nuqaw yey ralaq na kakoj ta alaq nutzij. No'j we ta e la' kak'un chi lo jun chik y xa pa re katzijonik, ri' e kakoj alaq re.
44»¿Su'anik kakub'i' k'u'x alaq wuk' ri'in, we xew katzukuj yakb'al q'ij alaq chiwach ralaq yey na katzukuj ta alaq ri saqil yakb'al q'ij, ri xew kape ruk' ri Dios? 45E chiwach ralaq kankoj mak alaq chwach ri Nuqaw; na e ta ri'. Ma ri kakojow mak chi'ij alaq, e ri jun lik kub'am k'u'x alaq ruk'; wa' e ri Moisés. 46Ma we ta e la' lik kakoj alaq ri ub'i'im lo ri Moisés, ri' kakoj alaq ri kantzijoj ri'in. Ma rire panuwi ri'in xtz'ib'an wi. 47No'j we na kakoj ta alaq rutz'ib'am kan ri Moisés, ¿sa' k'u u'anik ri' kakoj alaq ri kamb'i'ij ri'in che alaq?» xcha ri Jesús.
Currently Selected:
Juan 5: acrN
Highlight
Share
Copy
Want to have your highlights saved across all your devices? Sign up or sign in
© 2009, Wycliffe Bible Translators, Inc. All rights reserved.