Hebreos 3

Ri Jesús más k'o uwach chwa ri Moisés

1E uwari'che hermanos, kamb'i'ij che alaq, ri ya'om chi ib' alaq puq'ab' ri Dios yey cha'tal lo alaq ruma Rire cha' ke'k'ola alaq ruk' Rire chila' chikaj: Lik ch'ob'o k'u alaq puwi ri Cristo Jesús, ri Taqo'n re ri Dios y ri Qajawal kach'aw paqawi' chwach ri Dios. 2Ma ri Jesús lik jusuk' ri xu'an chwach ri Dios, ri xtaqaw lo re che wa chak, jela' pacha' ri Moisés lik jusuk' xuk'am kiwach rutinamit ri Dios.#3:2 “Xuk'am kiwach rutinamit ri Dios”: Pa ri ch'a'tem griego kub'i'ij “puwi ri Rocho Dios”. Pa ri ch'a'tem griego ri ch'a'tem “rocho” na xew ta e ke'elawi “ri ja”, ma también ke'elawi ri ejeqel chupa. 3No'j ri Jesús e más k'o yakb'al uq'ij chwa ri Moisés, jela' pacha' ri kayakaw juna ja e más k'o yakb'al uq'ij chwa ri ja kuyako. 4Ma ronoje ja 'anatal ruma juna achi, pero ri 'anayom re ronoje ri k'olik e ri Dios. 5Ri Moisés e jun aj chak lik jusuk' ma xuk'am kiwach chi utz rutinamit ri Dios yey xutzijoj puwi ri kuq'alajisaj na ri Dios chiqawach apanoq. 6No'j ri Cristo na xa ta e jun raj chak ri Dios, ma e Uk'ajol y ruma wa' kataqan puwi ri Rocho Dios. Yey ri Rocho Dios e ri'oj oj utinamit, we e la' lik tikil chi utz ri kub'ulib'al qak'u'x ruk' y ruk' ki'kotemal qoye'em ri kuya ri Dios chiqe chiqawach apanoq.

Ri uxlanem kaya'taj che rutinamit ri Dios

7E uwari'che, ri Santowilaj Ruxlab'ixel ri Dios kub'i'ij che alaq:

We kita ri'ix waq'ij ora

janipa ri kub'i'ij ri Dios chiwe,

8mi'an ko che ri iwanima'

jela' pacha' ri xki'an ri tinamit ojertan

echiri' xki'an kititz'itikil

y xkik'am upa ri Dios chupa ri luwar katz'intz'otik.

9Ruma wa' ri Dios xub'i'ij chike:

Chila' k'u ri', riwati'-imam xkitij wi nuq'ij

y xkik'am nupa,

tob' ne pa cuarenta junab' xkil ronoje

ri k'utub'al re ri nuchuq'ab' xin'an Ri'in chikiwach.

10Ruma k'u ri xki'ano, lik xpe woyowal chikij

y jewa' ximb'i'ij:

“Rike xaqi na tikil ta chi utz ri kanima'

y na xkaj taj kaketa'maj ri nub'e.”

11E uwari'che, ruma woyowal lik xinjikib'a' uwach:

“Rike na keb'ok ta k'ana pa ri uxlanem kanya Ri'in.”#3:11 “Ri uxlanem kanya Ri'in”: Wa' e ke'elawi, ri e aj Israel ri xeb'e'jeqela pa ri luwar ub'i'tisim ri Dios chike, e xeb'uxlan che taq ri k'axk'ob'ik xkik'owib'ej Egipto y che taq ri luwar katz'intz'otik pa xeb'in wi cuarenta junab' y che ri ch'a'oj xki'ano pa taq xeb'ik'ow wi. Sal. 95:7-11

12Tape k'u alaq hermanos, lik chajij ib' alaq cha' na jinta junoq che alaq ku'an itzel uk'u'x y na kukoj ta chi utzij ri Dios y jek'ula' karesaj rib' chirij ri Dios k'aslik. 13E ri 'ana alaq e lik pixab'aj ib' alaq chiwach alaq ronoje q'ij, xaloq' k'a k'o paq'ab' alaq ka'an alaq wa', cha' na jinta junoq che alaq ku'an ko che ri ranima' ruma ri sokoso'nik re ri mak. 14Ma ri'oj 'anom xa jun chiqe ruk' ri Cristo we e la' e tikil chi utz ri kub'ulib'al qak'u'x ruk' Rire; ek'u pacha' xqajeqeb'ej loq echiri' xqakoj rub'i', jek'ula' chirajawaxik kaqak'isb'ej wi. 15Ruma k'u wa', ri Dios kuya wa pixab'anik:

We kita ri'ix waq'ij ora

janipa ri kub'i'ij ri Dios chiwe,

mi'an ko che ri iwanima'

jela' pacha' ri xki'an ri tinamit ojertan

echiri' xki'an kititz'itikil Sal. 95:7-8

kacha'.

16¿China k'u ri xetaw re ruqul ri Dios yey tek'uchiri' xkipetisaj royowal ruk' ri kititz'itikil? ¿Na e ta neb'a konoje ri xeb'eresaj lo ri Moisés chila' Egipto? 17¿Yey china kuk' xpe wi royowal ri Dios la' la cuarenta junab'? ¿Na e ta neb'a kuk' ri xemakun chirij? Yey ruma wa' xekamik y ri kicuerpos xemuq kan chupa ri luwar katz'intz'otik. 18¿China k'u chike xujikib'a' wi uwach ri Dios na keb'ok ta pa ri uxlanem kuya Rire? ¿Na e ta neb'a chike ri xkipalajij Rutzij Rire? 19Lik q'alaj k'u ri', na xya' ta chike rike keb'ok pa ri uxlanem kuya ri Dios ruma na jinta kub'ulib'al kik'u'x ruk' Rire.

Currently Selected:

Hebreos 3: acrN

Highlight

Copy

Compare