Efesios 3

Ruchak ri Pablo kuk' taq ri na e ta aj judi'ab'

1Ri'in in Pablo, in k'o pa cárcel ruma xintzijoj rub'i' ri Qanimajawal Jesucristo che ralaq ri na alaq ta aj judi'ab'. 2Lik tom chi k'u alaq ri chak uya'om ri Dios chwe: Wa' e ri kantzijoj che alaq ri unimal rutzil uk'u'x ri Dios. 3Ma ri Dios xuk'ut chinuwach ri na eta'matal ta ojertan, yey puwi wa' nutz'ib'am chi pan jub'iq' che alaq. 4We xajilaj alaq wa nutz'ib'am, kamaj alaq usuk' sa' ri xq'alajisax chwe puwi ri Cristo. 5Ojertan wa' na q'alajisam ta chikiwach ri tikawex; no'j wo'ora ruma ri Ruxlab'ixel ri Dios xq'alajisax chikiwach ri e taqo'n y ri q'alajisanelab' echa'tal ruma ri Dios. 6Ruk'u'xib'al ri q'alajisam chik e wa': Ri b'i'tisim lo ruma ri Dios na xew ta ke raj judi'ab', ma ke ne ri na e ta aj judi'ab'; u'anom k'u xa jun chike y junam koye'em janipa rub'i'tisim lo ri Dios chike ri kakikoj ri Utzilaj Tzij re ri Qanimajawal Jesucristo. 7Ruma k'u ri unimal rutzil uk'u'x ri Dios wuk' ri'in, xya'taj chwe xinu'an raj chak ri Cristo re kantzijoj ri Utzilaj Tzij. Y xew k'u ruma ruchuq'ab' ri Dios, kel pan chi utz ri chak chwi nuq'ab'.

8Ri'in tob' lik na jinta ko nuwach chikiwa konoje ri echa'tal ruma ri Dios; na ruk' ta k'u ri', xya'taj chwe rutzijoxik ri Utzilaj Tzij chike ri na e ta aj judi'ab'. Kantzijoj k'u chike sa' taq ri chomilaj b'eyomalil re ri Cristo, ri na jinta ne junoq kach'ijow uch'ob'ik ruchomalil taq wa'. 9Y ya'om chwe kanq'alajisaj chikiwach konoje ri tikawex sa' ri uch'ob'om lo ri Dios, ri x'anaw re ronoje ri k'olik. Kanq'alajisaj k'u ri na eta'matal ta lo rojertan, ri k'a e wo'ora kel lo chi saq. 10Ma ri karaj ri Dios wo'ora e cha' ruma riglesia kilitaj chi utz ruk'iyal taq uwach una'oj Rire chikiwach taq ri k'o kiwach y ri k'o kichuq'ab', wa' e ri ketaqan xa pa tew. 11E janipa k'u ri uch'ob'om lo ri Dios echiri' k'amaja' ne ku'an ruwachulew, e u'anom ri' ruma ri Jesucristo, ri Qanimajawal. 12Ruma k'u ri Cristo xya'taj chiqe kojopon chwach ri Dios; lik k'u jikil uwach, ri Dios kojuk'ul chi utz ruma ri kub'ulib'al qak'u'x ruk' ri Cristo. 13E uwari'che kamb'i'ij che alaq, mapax k'u'x alaq ruma wa k'axk'ob'ik in k'o wi, e ne ki'kota alaq ma uma ralaq na jinta kub'i'ij nuk'u'x kinik'ow chupa wa'.

Chojtikila chi utz chupa ri unimal rutzil uk'u'x ri Dios

14Ruma taq k'u wa', kanxuk wib' chwach Ruqaw ri Qanimajawal Jesucristo, 15ma che ri Qaqaw e petinaq wi konoje taq ri familia e k'o chila' chikaj kuk' ri e k'o che ruwachulew. 16Kantz'onoj che ri Qaqaw cha' e chirij taq ri chomilaj ub'eyomalil, kuya lo unimal chuq'ab' pa ri anima' alaq y jek'ula' kachuq'ub'ej ib' alaq ruma ri Ruxlab'ixel Rire. 17Kantz'onoj che ri Dios cha' kajeqi' ri Cristo pa anima' alaq ruma ri kub'ulib'al k'u'x alaq y katiki' k'u alaq chi utz chupa ri rutzil uk'u'x pacha' juna che' lik naj b'enaq wi ri ratz'ayaq. 18Chuya'a k'u che alaq junam kuk' konoje ri e re Rire, ri keta'maj alaq chi utz ri rutzil uk'u'x ri Cristo cha' jela' kamaj alaq usuk' janipa runimal uwach, runajtijil raqan, ruchoyil upa y runajtijil uwi' ri rutzil uk'u'x. 19Cheta'maj k'u alaq ri unimal rutzil uk'u'x ri Cristo, tob' na jinta junoq lik kumaj usuk' ronoje wa'. 'Ana k'u e alaq che janipa ri utz k'o ruk' Rire cha' kaq'alajin taq wa' che ri b'inik silab'ik alaq. 20Ruma ruchuq'ab' ri Dios quk', Rire kuya más uwi' ronoje ri kaqatz'onoj che o ri kaqach'ob'o ku'ano. 21¡Cheta'maxoq nim uq'ij ri Dios ruma ri ku'an ruk' ru iglesia ruma ri Qanimajawal Jesucristo! Kaloq'nimax k'u uq'ij waq'ij ora y chiqawach apanoq na jinta chi utaqexik. Amén.

Currently Selected:

Efesios 3: acrN

Highlight

Copy

Compare