2 Pedro 1
1
Ri Pedro kuya pan rutzil kiwach ri kikojom rub'i' ri Cristo
1Ri'in, Simón Pedro, in jun aj chak y taqo'n re ri Qanimajawal Jesucristo. Kantz'ib'aj pan wa carta che alaq, janipa ri ya'tal che alaq kakub'i' k'u'x alaq ruk' ri Cristo jela' pacha' qa'anom ri'oj. Wa' wa chomilaj kub'ulib'al k'u'xaj xya' chiqe qonoje ruma ri qa Dios y Kolob'enel Jesucristo, ma Rire lik jusuk' ri ku'an quk'. 2E lik k'iyar na pawi' alaq ri unimal rutzil k'u'xaj y ri utzil chomal re ri Dios, yey wa' kak'ul alaq ruma eta'am alaq uwach ri Dios y ri Qanimajawal Jesucristo.
Ri karaj ri Dios che ri qab'inik qasilab'ik
3Ri Dios ruk' ri unimal uchuq'ab', uya'om chiqe ronoje taq ri kajawax che ri qak'aslemal y ri qab'inik qasilab'ik chwach Rire. Yey ku'an wa' ruma ri xuya chiqe kaqeta'maj uwach Rire, ri xojusik'ij ruk' ri unimal uchomalil y ri unimal uwach uq'ij. 4Jek'uri'la', ri Dios uya'om nima'q y chom taq b'i'tisinik chiqe cha' ruma wa' koju'ana pacha' Rire, ma elinaq lo alaq puq'ab' ri rayib'al na chom ta uwach, ri kakitaqej ri winaq re ruwachulew.
5Ruma k'u xkub'i' k'u'x alaq ruk' ri Cristo, chirajawaxik k'u ri' kachuq'ub'ej ib' alaq cha' ri b'inik silab'ik alaq ku'an lik jusuk'. Y na xew ta wa', ma lik ne chirajawaxik keta'maj alaq sa' ri karaj ri Dios che alaq. 6We eta'am chi k'u alaq sa' ri karaj ri Dios che alaq, e 'ana alaq ri'. Yey chajij ib' alaq chi utz cha' na katzaq ta alaq pa mak, y jek'uri'la' kak'oji' unimal k'u'x alaq. Yey ruk' k'u ri unimal k'u'x alaq, e k'utu alaq pa saqil wi ya'om ib' alaq che jun saqil b'inik silab'ik chwach ri Dios. 7Y ruma k'u lik ya'om ib' alaq che jun saqil b'inik silab'ik chwach ri Dios, k'ax na'a ib' alaq chiwach alaq. Yey na xew ta wa', ma lik ya'a ib' alaq che uk'utik ri rutzil k'u'x alaq chike konoje.
8Ma we k'o k'u taq wa' uk' alaq y ya'om ib' alaq che u'anik taq wa', ri' na kok ta xepuyil uk' alaq yey kaq'alajin k'u ri' lik k'o kutiqoj ri xeta'maj alaq uwach ri Qanimajawal Jesucristo. 9No'j e junoq na jinta taq wa' ruk', ri' e pacha' xew karil ri k'o chwach; e junam ruk' pacha' juna potz', ma xik'ow ne chuk'u'x e rojertan lik aj mak yey e ri Dios xkuyuw umak. 10E uwari'che hermanos, kamb'i'ij wa' che alaq: E ri Dios xcha'w e alaq yey e Rire sik'iyom e alaq. Ruma k'u ri', chuq'ub'ej ib' alaq che uk'utik pa ri b'inik silab'ik alaq, paqatzij wi sik'im alaq yey cha'tal alaq ruma ri Dios. We ka'an alaq wa', ri' na katzaq ta chi alaq pa mak. 11Jela' k'u ri' lik kak'ul alaq chi utz pa ri taqanik na jinta utaqexik re ri Qanimajawal y Qakolob'enel Jesucristo.
12Ruma k'u ri', na kanwoq'otaj ta ukuxtaxik wa' che alaq, tob' ne eta'am chi alaq wa Q'ijsaq y jikib'am chi k'u'x alaq che. 13Ma chinuwach ri'in, xaloq' k'a in k'aslik, lik usuk' kankoj pa jolom alaq taq wa pixab'anik. 14Ma weta'am ri nukamik xa naqaj chi k'o lo wi, yey wa' e ri Qanimajawal Jesucristo uq'alajisam lo chwe. 15E uwari'che lik inokinaq il che ukuxtaxik wa' che alaq, cha' echiri' na in jinta chi uk' alaq, xaqi kak'un chik'u'x alaq ronoje wa'.
Ri xeb'ilow runimal uwach uq'ij ri Qanimajawal Jesucristo
16Ma ri k'utunik xqa'an chiwach alaq chwi ruchuq'ab' y ruk'unib'al ri Qanimajawal Jesucristo, na e ta ruk' nuk'um ch'a'tem no'jital kuma tikawex; ma lik ruk' ri qawach xqil runimal uwach uq'ij Rire. 17Ma ri'oj xqilo echiri' xq'alajisax runimal uchomalil y lik xyak uq'ij ruma ri Qaqaw Dios. Xqata ne ruqul ri Dios xch'aw chupa ri chomilaj q'ijsaq k'o paqawi', jewa' xub'i'ij: «E Nuk'ajol wa', ri lik k'ax kanna'o y lik kinki'kot che» xcha'. 18Xqata k'u wa qulaj petinaq chila' chikaj echiri' oj k'o ruk' Rire chwa ri santowilaj juyub'.#1:17-18 Mt. 17:1-8; Mr. 9:7; Lc. 9:35 19Wa xqilo e kujikib'a' uwach ri tzij tz'ib'ital kan kuma ri q'alajisanelab' chupa Ruch'a'tem ri Dios. Y lik utz ri ka'an alaq we kok alaq il che wa', ma e pacha' juna aq' kawon pa q'equ'm k'a pa ri saqrib'al echiri' kel lo ri nimalaj ch'umil re ri saqrib'al.#Ap. 22:16 Wa' e ke'elawi ruk'unib'al ri Cristo, ri kutzij upa ri anima' alaq. 20Lik k'ut chirajawaxik nab'e na kamaj alaq usuk' wa': Ri tz'ib'ital kan chupa Ruch'a'tem ri Dios, na utz taj kaq'alajisaxik xa ruk' una'oj juna achi. 21Ma ri q'alajisam kan chupa Ruch'a'tem ri Dios, na petinaq ta ruma kino'jib'al tikawex, e petinaq ruma ri Santowilaj Ruxlab'ixel ri Dios. Ma taq ri santowilaj achijab' re ri Dios xech'a'tik e chirij janipa ri xuq'alajisaj ri Ruxlab'ixel ri Dios chike.
Currently Selected:
2 Pedro 1: acrN
Highlight
Share
Copy
Want to have your highlights saved across all your devices? Sign up or sign in
© 2009, Wycliffe Bible Translators, Inc. All rights reserved.