2 Timoteo 4

1Timoteo, kanya kan wa pixab'anik chawe chwach ri Dios y chwach ri Qanimajawal Jesucristo, ri kak'un tanchi wara che ruwachulew re ko'ltaqana pakiwi konoje y re kolu'q'ata tzij pakiwi taq ri tikawex, ri e k'aslik y ri ekaminaq. 2Chaya'a awib' che utzijoxik Ruch'a'tem ri Dios. Chatok il che utzijoxik wa' chupa ruq'ijol o tob' ne na chupa ta ruq'ijol. Chaq'alajisaj taq ri na utz taj, chach'a'b'ej kipa taq ri kaki'an ri na utz taj, cheb'apixab'aj ruk' saqil k'utunik cha' kakitzelej kitzij. Cha'ana k'u wa' ruk' unimal ak'u'x. 3Ma kopon ri q'ij echiri' taq ri winaq na kakaj taj kakita ri saqil k'utunik. Yey ruma taq ri kirayib'al kekitzukuj china kek'utuw chike sa' ri kakaj kakito. 4Rike na kakaj taj kakita ri Q'ijsaq y e kakiternab'ej taq tzijob'al xa no'jital kuma winaq. 5No'j ri'at Timoteo, e lik k'ola ana'oj puwi taq ri ka'ano. Chakuyu ronoje taq ri k'axk'ob'ik kape pawi'. E chaya'a awib' che utzijoxik ri Utzilaj Tzij re kolob'etajik. Cha'ana k'u chi utz ronoje ri chak ya'tal paq'ab'.

6Kamb'i'ij k'u wa' chawe ma ri'in na naj ta chi in k'aslik, ri nub'enam chila' chikaj xa naqaj chi k'o wi. 7Xinch'ij uchuq'ab' ronoje ri k'axk'ob'ik xinik'ow wi, xinopon k'u che ri k'isb'al re ri nuchak uya'om ri Dios, lik nutzijom chi jusuk' ri Utzilaj Tzij re ri Cristo. 8Ek'u wo'ora xew chi woye'em ri corona kaya' chwe ruma ximb'in jusuk' chwach ri Dios. Y ri kaya'w wa' chwe e ri Qanimajawal Jesucristo, ri Aj Q'atal Tzij lik jusuk'. Y wa' na xew ta chwe ri'in kuya'o, ma kuya chike konoje ri koye'em ruk'unib'al ruk' ronoje kanima'.

Ri Pablo karaj karil uwach ri Timoteo

9Matmayinik, e chatpeta tan che wilik. 10Ma ri Demas xinroq'otaj kanoq ruma lik xe'ek uk'u'x chwi taq ruqusil ruwachulew y xe'ek Tesalónica. Y ri Crescente b'enaq Galacia yey ri Tito b'enaq Dalmacia. 11Xew k'u ri Lucas inrachb'ilam wara. Echiri' katpetik, chak'ama lo ri Marcos#Hch. 15:37-39 awuk' ma rire lik to'b'el we chupa ruchak ri Dios. 12Ek'u ri Tíquico xintaq b'i Éfeso. 13Echiri' katpetik, chak'ama lo ri pisb'al wij nuya'om kan chirocho ri Carpo chupa ri tinamit Troas y chak'ama taq lo ri jub'otaj wuj;#4:13 “Jub'otaj wuj”: Kil “rollo” pa vocabulario. yey ri lik kajawax chwe e ri jutaq b'otaj tz'u'um tz'ib'ital uwach. 14Rachi Alejandro ri aj ch'ayal ch'ich' lik u'anom taq ri na utz taj chwe. Ek'u ri Dios katojow re che sa' taq ri u'anom. 15Lik chachajij k'u awib' ri'at chwach rire ma lik uyakom rib' chirij ri Utzilaj Tzij kaqatzijoj.

16Ri nab'e laj echiri' xinto'b'ej wib' pa q'atb'al tzij, na jinta junoq xto'w we ma konoje xinkoq'otaj kanoq; na ruk' ta k'u ri', ri'in na kuaj taj e ri Dios kuq'at tzij pakiwi' ruma wa'. 17No'j ri Qanimajawal xk'oji' wuk', xinuto'o y xuya nuchuq'ab' cha' wuma ri'in xel utzijoxik ri Utzilaj Tzij y xkita k'u wa' ri tikawex re uk'iyal tinamit. Jek'ula' xinkolob'ex ri'in chwa ri kamik, e pacha' junoq xesax puchi' juna koj. 18Yey e ri Qanimajawal kinkolob'en chwach taq ri na utz taj y kinuchajij k'ut cha' kinopon na ruk' chila' chikaj pa kataqan wi. Xew k'u che Rire taqal wi lik kayak uq'ij na jinta utaqexik. Amén.

K'isb'al uch'a'tem ri Pablo che ri Timoteo

19Chaya'a rutzil kiwach ri Priscila#Hch. 18:1-3 y ri Aquila#4:19 Ri Aquila e rachijil rixoq Priscila. junam kuk' konoje ri e k'o pa rocho ri Onesíforo. 20Ri Erasto xkanaj kan pa ri tinamit Corinto y ri Trófimo xinya kan pa ri tinamit Mileto ma lik yewa'. 21Matmayinik, e chatpeta tan echiri' k'amaja' kujeq ruq'ijol echiri' k'ax tew y k'o jab'. Kakiya pan rutzil awach ri Eubulo, ri Pudente, ri Lino, ri Claudia kuk' konoje ri hermanos e k'o wara. 22K'ola k'u ri Qanimajawal Jesucristo awuk'. Ri unimal rutzil uk'u'x Rire k'ola piwi' iwonoje ri'ix. Amén.

Currently Selected:

2 Timoteo 4: acrN

Highlight

Copy

Compare