1 Juan 1
1
Ri Tzij re k'aslemal
1Kaqatz'ib'aj pan wa carta che alaq chwi ri Jun xex chi k'o lo wi echiri' k'amaja' ne ka'an ruwachulew, puwi sa' taq ri xub'i'ij yey puwi ri qilom ruk' ri qawach. Ma paqatzij wi xqil uwach y xqachap ne ruk' ri qaq'ab'. Kojtz'ib'an k'u ri' puwi ri Jun paqatzij wi e ri Tzij,#Jn. 1:1 ri kuya k'aslemal. 2Wa Jun kuya k'aslemal xk'un che ruwachulew yey ri'oj xqil uwach. E uwari'che kaqab'i'ij sa' ri qilom y kaqaq'alajisaj k'u che alaq puwi wa Jun na jinta utaqexik ruk'aslemal. Rire xex chi k'o lo wi ruk' ri Qaqaw Dios yey xuq'alajisaj k'u rib' chiqawach ri'oj. 3Janipa k'u ri qilom y ri qatom, e kaqaq'alajisaj pan che alaq; ma e kaqaj ku'an alaq xa jun quk' ri'oj jela' pacha' ri'oj paqatzij wi xa jun qa'anom ruk' ri Qaqaw Dios y ruk' Ruk'ajol, wa' e ri Qanimajawal Jesucristo. 4Kaqatz'ib'aj pan wa carta che alaq cha' junam kaki'kot alaq quk'.
Ri lik chirajawaxik wi e kojb'in chupa ri Q'ijsaq
5Ek'u wa tzij qatom che ri Qanimajawal Jesucristo e kaqaq'alajisaj che alaq: Ri Dios e Q'ijsaq yey ruk' Rire na jinta k'ana q'equ'malil. 6We kaqab'i'ij xa jun qa'anom ruk' ri Dios yey kojb'in chupa ri q'equ'malil, ri' kojelik xa oj aj raq'ul y na kojb'in ta k'u chupa ri Q'ijsaq. 7No'j we kojb'in chupa ri Q'ijsaq jela' pacha' ri Dios k'o pa ri Q'ijsaq, ri' xa jun qa'anom chiqawach. Yey ronoje ri qamak kach'ajtaj#1:7 Echiri' kub'i'ij kach'ajtaj ronoje ri qamak, wa' e ke'elawi, ri Dios kukuy ri qamak y na kape ta chi k'u ruq'atb'al tzij paqawi'. k'u ri' ruma rukik'el ri Qanimajawal Jesucristo, Ruk'ajol ri Dios. 8Pero we kaqab'i'ij na jinta qamak, ri' xa e kaqasok qib' chiqib'il qib' y na qatzij ta ri kaqab'i'ij. 9No'j we kaqaq'alajisaj ri qamak chwach ri Dios, Rire kukuy qamak y kojuch'aj che ronoje ri na utz taj k'o pa qanima', ma Rire lik jusuk' y ujikib'am uwach ku'an wa' yey Rire na ku'an ta raq'ub'al. 10We kaqab'i'ij na oj ta makuninaq, ri' e pacha' kaqa'an aj raq'ul che ri Dios, ma kaqab'i'ij na qatzij ta ri ub'i'im kan Rire.#Pr. 20:9; Ecl. 7:20
Currently Selected:
1 Juan 1: acrN
Highlight
Share
Copy
Want to have your highlights saved across all your devices? Sign up or sign in
© 2009, Wycliffe Bible Translators, Inc. All rights reserved.