1 Timoteo 3
3
Pixab'anik puwi ri kib'inik kisilab'ik raj k'amal kiwach rutinamit ri Dios
1Lik usuk' wa kamb'i'ij: We k'o junoq lik karaj ku'an aj k'amal kiwach rutinamit ri Dios, ri' lik chomilaj chak ri kurayij. 2Pero lik chirajawaxik che juna aj k'amal kiwach rutinamit ri Dios e jusuk' rub'inik usilab'ik cha' na jinta k'o kach'a'tib'en re. E k'ola jusuk' ruk' ri rixoqil, lik chuch'ob'o chi utz ri ku'ano, chuchajij rib' chirib'il rib' cha' na katzaq ta pa mak y chom kilitaj rub'inik kuma ri jujun chik. Xaqi cheb'uk'ulu chi utz taq ri keb'opon chirocho, y k'ola una'oj che uk'utik Rutzij Upixab' ri Dios. 3Lik chirajawaxik che na q'ab'a'rel taj, na aj ch'a'oj taj, na rayinel ta re puaq kach'ak ruk' sokoso'nik, na ke'ek ta uk'u'x ruk' ri puaq; ma ri chirajawaxik wi e lik utz uk'u'x y ch'u'ch'uj uk'u'x. 4Chu'ana ri saqil taqanik pa rocho; chuk'utu k'u chike ri ralk'o'al cha' keb'u'an e kojol tzij y jek'ula' kek'oji' chi jusuk'. 5Ma e ri na kuriq ta ku'an saqil taqanik pa rocho, ¿su'anik k'u ri' keb'uchajij chi utz rutinamit ri Dios?
6Na utz taj we k'o junoq k'ak' ukojom ri Utzilaj Tzij yey kakojik aj wach chupa riglesia, ma k'axtaj ku'an nim che rib' y kaq'at k'u tzij puwi' jela' pacha' ri xuk'ulumaj ritzel winaq ruma xu'an nim che rib'.#Is. 14:12-14 7Ri lik chirajawaxik wi e chom rub'inik usilab'ik chikiwach taq ri na kikojom ta rub'i' ri Qanimajawal Jesucristo, cha' na jinta junoq kak'aqaw b'i uq'ij y na katzaq ta chupa juna pajtajib'al re ritzel winaq.
Pixab'anik puwi ri kib'inik kisilab'ik raj chakib' e to'b'el piglesia
8Jek'ula' raj chakib' e to'b'el piglesia lik chirajawaxik chike e jusuk' ri kib'inik kisilab'ik, na xa ta keb' kipalaj, na e ta q'ab'a'relab', na e ta rayinel re puaq kach'ak ruk' sokoso'nik. 9Chirajawaxik kakitaqej ri saqil k'utunik uq'alajisam ri Dios yey kakina' pa kanima' utz ki'anom chwach Rire. 10Nab'e na chirajawaxik kak'am kipa cha' kaq'alajinik we lik jusuk' ri kib'inik kisilab'ik; tek'uchiri' utz keb'u'an aj chakib' e to'b'el piglesia.
11Jek'ula', chirajawaxik chike rixoqib' e jusuk' ri kib'inik kisilab'ik, na e ta aj molot, lik kakich'ob' chi utz ri kaki'ano y kaki'an chi utz ronoje ri taqal chike.
12Ek'u rachi aj chak to'b'el piglesia, lik chirajawaxik k'ola jusuk' ruk' ri rixoqil y chu'ana saqil taqanik pakiwi taq ri ralk'o'al y pakiwi konoje taq ri e k'o pa ri rocho. 13We ku'an k'u chi utz ruchak, katak'ab'ax uq'ij chikiwach ri tikawex y kanimar uk'u'x che uq'alajisaxik ri kub'ulib'al uk'u'x ruk' ri Qanimajawal Jesucristo.
Ruk'u'xib'al ri Utzilaj Tzij puwi ri Qanimajawal Jesucristo
14Ri'in lik nukub'am pan nuk'u'x ki'nwila tan awach Timoteo, pero kantz'ib'aj na pan wa' chawe 15cha' we xinmayin che awilik, chaweta'maj sa' ri saqil b'inik silab'ik chirajawaxik chike ri e re ri Dios; ma rike e utinamit ri Dios k'aslik yey rutinamit e chapayom re y e katikib'an re ri Q'ijsaq. 16Paqatzij wi lik nim uq'ij ri Q'ijsaq re ri Dios q'alajisam chiqawach:
E ri Qanimajawal Jesucristo xu'an tikawex
echiri' xk'un che ruwachulew.
Ronoje ri xu'ano y ri xub'i'ij e lik jusuk'
y ri Ruxlab'ixel ri Dios e xq'alajisan re wa'.#Ro. 1:4
Xilitaj kuma ri ángeles.
Xtzijox rub'i' chike ruk'iyal kiwach taq ri tikawex che ruwachulew
y e k'i ri xkikoj rub'i'.
Yey xk'ul tanchi chila' chikaj ruk' yakb'al uq'ij.
Currently Selected:
1 Timoteo 3: acrN
Highlight
Copy
Compare
Share
Want to have your highlights saved across all your devices? Sign up or sign in
© 2009, Wycliffe Bible Translators, Inc. All rights reserved.
