1 Pedro 2
2
1E uwari'che ya'a kan alaq ronoje ri na utz taj: ri sokoso'nik, ri xa keb' palaj alaq chiwach alaq, ri ku'an k'ax k'u'x alaq chikij jujun chik y ri kanuk' alaq ch'a'tem chikij jujun chik. 2Jela' pacha' juna ne' k'ak' alaxinaq lik e karaj rutz'um ruchu; jek'uri'la' ralaq, e lik rayij alaq ri saqil Uch'a'tem ri Dios, cha' ruma wa', ri Dios kuya ri k'iyib'al alaq y kukolob'ej k'u alaq chwach ronoje ri na utz taj. 3E 'ana k'u alaq wa' ma na'om chi alaq ri rutzil uk'u'x ri Qanimajawal pa anima' alaq.
Ri jun ab'aj k'aslik
4Qib' k'u alaq ri' ruk' ri Qanimajawal Jesucristo. Rire e pacha' jun ab'aj k'aqital kan kuma ri winaq, ma chikiwach rike na jinta uchak; no'j chwach ri Dios e jun chomilaj ab'aj k'aslik#2:4 “Ab'aj k'aslik”: Ri Cristo k'aslik y kuya k'aslemal chiqe. y cha'talik, pa katiki' wi lo ri ja kayakik. Yey juna ab'aj na jinta uk'aslemal, no'j Rire k'aslik. 5Jek'uri'la' ralaq alaq pacha' ab'aj k'aslik tz'aqom b'i che ri ja katajin ri Dios che uyakik re kajeqi' chupa. Rojertan raj chakunel xeniman pa Rocho Dios, ek'u wo'ora ri Dios uya'om che ralaq kaniman alaq chwach Rire y ruma k'u ri Qanimajawal Jesucristo ka'an alaq ri kuk'ul uk'u'x Rire. 6E uwari'che jewa' tz'ib'ital kan pa Ruch'a'tem ri Dios:
Kankoj k'u chila' Sion
ri jun chomilaj ab'aj cha'talik,
cha' puwi wa' katiki' ri ja kanyako. Is. 28:16
China k'u ri kakub'i' uk'u'x ruk',
ri' na kak'ixb'esax taj
ma kuk'ul na ri roye'em che Rire Is. 49:23
kacha'. 7Che ralaq ri kojom alaq rub'i', Rire lik k'o uwach; no'j chike ri na kekojow ta re, e ku'ana pacha' ri tz'ib'ital kan pa Ruch'a'tem ri Dios:
E rab'aj k'aqital kan kuma raj yakal ja,
e ab'aj ri' wa' xajawaxik cha' katiki' lo ri ja.#Is. 28:16 Sal. 118:22
8Yey kub'i'ij:
Rire e ri jun ab'aj kojotal chikiwach ri tikawex,
yey lik e k'o ri kakichiq kib' che,
y lik ek'o ri ketzaq puwi' Is. 8:14
kacha'. Jek'ula' xkik'ulumaj rike, ma e pacha' “kakichiq kib'” chwi Ruch'a'tem ri Dios echiri' na kakikoj taj.
9No'j ek'u ralaq alaq cha'tal lo ruma ri Dios, alaq aj chakunel chwach ri Nimalaj Taqanel Dios, alaq jun tinamit ya'om ib' alaq che uloq'nimaxik ri Dios#Éx. 19:6 y loq'otal alaq ruma ri Dios re ku'ana alaq utinamit#Dt. 7:6; Is. 43:21 cha' katzijoj alaq chike ri tikawex janipa taq ri u'anom ri Dios, ri xresaj lo alaq chupa ri q'equ'm y xuya alaq chupa ri chomilaj Q'ijsaq. 10Ralaq ojertan na alaq ta utinamit ri Dios, no'j wo'ora alaq chi utinamit Rire. Ma ojertan na xeta'maj ta alaq puwi ri relej uk'u'x ri Dios; no'j wo'ora ri Dios uk'utum chi wa' che ralaq.
Ri jusuk' b'inik silab'ik chwach ri Dios y chikiwach ri winaq
11Hermanos ri lik k'ax kanna' alaq, k'una chik'u'x alaq, ralaq na alaq ta re ruwachulew, ma alaq xa ik'owel. E uwari'che kampixab'aj alaq, maya ib' alaq che taq ri rayib'al re ri ti'jil alaq ma wa' kach'o'jin pa anima' alaq cha' kuyoj ri k'aslemal alaq. 12Ri 'ana alaq e k'utu alaq jun b'inik silab'ik lik jusuk' chikiwach ri winaq na keta'am ta uwach ri Dios. Jek'ula' echiri' kak'un tanchi ri Qanimajawal, rike kakiyak uq'ij ri Dios ruma kilom ri chomilaj chak 'anom alaq, tob' wo'ora kech'a't chi'ij alaq. 13Ruma k'u ri Qanimajawal, lik kojo alaq kitzij konoje ri ya'tal pakiq'ab' ketaqan che ruwachulew, e pacha' ri nimalaj taqanel k'o pakiwi uk'iyal tinamit 14y taq ri e aj wach ekojotal ruma ri nimalaj taqanel re kekiya pa k'ax ri kaki'an ri na utz taj y re kakiyak kiq'ij ri kaki'an ri utz. 15Ma ri lik karaj ri Dios che alaq e ka'an alaq ri utz cha' e kaq'atej alaq taq ri ch'a'tib'enik ka'an chi'ij alaq kuma ri tikawex na jinta kina'oj. 16Paq'ab' alaq k'o wi sa' ri ka'an alaq; yey wa' na e ta re ka'an alaq ri na utz taj, ma e re ku'ana alaq aj chakib' re ri Dios y jek'ula' e ka'an alaq ri karaj Rire. 17'Ana alaq chike konoje ri tikawex janipa ri taqal chike; mak'aq b'i alaq uq'ij junoq. K'ax chena'a alaq ri hermanos. K'ola xi'in ib' pa anima' alaq chwach ri Dios. Loq'nimaj alaq ri rey.
18Ralaq alaq aj chakib', kojo alaq kitzij ri patrón alaq y ya'a ib' alaq chitaqik kuma rike. Wa' na xew ta ka'an alaq kuk' ri lik utz kik'u'x ma jenela' 'ana alaq kuk' ri lik na jinta kakuyuw ke. 19Ma e lik utz ri' we junoq ruma kuna' chuk'u'x e ku'an ri karaj ri Dios che, kuya ranima' kuch'ij taq ri k'axk'ob'ik kape puwi' tob' wa' na taqal ta che. ¡Yey ri Dios kuyak uq'ij ri ka'anaw wa'! 20No'j we e la' lik chirij mak alaq xch'ay kan alaq yey lik xkuy alaq wa', ¿sa' k'u ri' ri yakb'al q'ij alaq? ¡Na jintaj! No'j we kakuy k'u alaq ri k'ax ka'an che alaq ruma ri utz katajin alaq che u'anik, ri' lik k'o yakb'al q'ij alaq chwach ri Dios. 21E ne ruma wa' xusik'ij alaq ri Dios, ma ri Cristo xutij k'ax quma ri'oj; yey taq ri xu'ano e k'utub'al chiqe ri'oj cha' kojb'in jela' pacha' xb'in Rire. 22Ma jewa' tz'ib'ital kan puwi ri Cristo pa Ruch'a'tem ri Dios:
Rire na xmakun taj,
y na jinta ne k'ana sokoso'nik xel puchi' Is. 53:9
kacha'. 23Echiri' ri winaq lik xkik'aq b'i uq'ij ruk' itzelilaj ch'a'tem, Rire na xuk'ul ta uwach ruk' itzelilaj ch'a'tem. Yey echiri' kiya'om pa k'axk'olil, Rire na xub'i'ij taj ku'an uk'axel chike ri kaki'an k'ax che; ri xu'ano, e xuya ronoje puq'ab' ri Dios, ri ku'an q'atb'al tzij chi jusuk'. 24Ek'u ri Cristo xuk'am b'i ri qamak che rucuerpo echiri' xkam chwa ri cruz. Xu'an k'u wa' cha' jela' kaqaya kan ri mak y e kaqaya qib' che ri jusuk' b'inik silab'ik.#2:24 Pa ri ch'a'tem griego kub'i'ij “cha' oj kaminaq chi chwa ri mak yey oj k'as che ri jusuk' b'inik silab'ik”. Ma jewa' tz'ib'ital kan pa Ruch'a'tem ri Dios:
Ruma k'u ri k'ax xutij Rire,
xixkunutaj ri'ix Is. 53:5
kacha'. 25Rojertan, alaq pacha' b'exex e sachinaq; no'j wo'ora xtzelej lo alaq ruk' ri Cristo, ri Aj K'amal Qawach y ri Chajinel re ri qak'aslemal chwach ri Dios.
Currently Selected:
1 Pedro 2: acrN
Highlight
Share
Copy
Want to have your highlights saved across all your devices? Sign up or sign in
© 2009, Wycliffe Bible Translators, Inc. All rights reserved.