Gosota-Kəmkàrje 1
1
1Gosota-kəmkàrje lə Salomo̰, ŋgolə Dabid, mbai gə́ Israɛl .
2Gə mba gər kəmkàr gə tandoo ləm,
Gə mba ndoo ne gintaje
Gə́ ka̰ gosonégər ləm tɔ,
3Gə mba kiŋga tandoo
Gə́ askəm kar kəmi àr ləm,
Néra gə́ gə dɔ najee ləm,
Kɔrkəmta gə́ gə goo rəbee ləma,
Néra gə́ danasur ləm tɔ,
4Gə mba kar deḛ gə́ meḛ dee tɔ kujitar el lé
Gər kɔr kəm né ləm,
Gə mba kar basa gər ne né
Karee la̰ji ne toree mée’g ləm tɔ.
5Maji kar njekəmkàr oo ta ndá
A kila ne négər ləa dɔ maree’g ləm,
Yeḛ gə́ to njegosonégər lé kara
A gər ne goso ra ne né ləm tɔ.
6Gə mba gər gin gosota-kəmkàrje lé
Esé nénaa gə́ to loo-kiya’g ləm,
Gə tapa njékəmkàrje ləma,
Gə taje lə dee gə́ to loo kiya’g ləm tɔ.
7Ɓəl Njesigənea̰ ɓa
To gin gosonégər gə́ dɔtar,
Mbəje lé d’ə̰ji takəmkàr
Gə tandoo lé bəḭ-bəḭ .
Məəi dɔ rɔi’g mbata basaje gə́ njémeeyèrje
8Ŋgonəm, oo tandoo lə bɔbije ləm,
Ɔs godndu kɔinje rəw el ləm tɔ,
9Mbata to dɔgugu-noji gə́ ka̰ kula dɔi’g ləm,
Gə nékuraje gə́ ka̰ kɔm gwɔsi’g ləm tɔ.
10Ŋgonəm, ɓó lé njékaiyaje
Ndigi su kəmi ndá
Maji kari ndigi sə dee dɔ’g el.
11Ɓó lé deḛ pana:
Gə ree aw sə sí!
Ar sí j’aw j’umje loo n’tɔl dee ləm,
Ar sí j’iyaje gum no̰ dəw’d gə́ ta wa dəa el ləm,
12Ar sí n’turu deeje kəmba ya
Asəna gə ɓee lə njé gə́ d’wəi bèe ləma,
Ar sí n’turu deeje bura
Asəna gə deḛ gə́ d’ɔm dee mee bwa’g ləm tɔ.
13Jeḛ j’a kiŋga némajije ɓəd-ɓəd
Gə́ gad dee to yaa̰ ləm,
J’a kar nébanrɔje rusu mee kəije lə sí njḭ-njḭ ləm tɔ,
14I a kiŋga né gə́ wɔji dɔi sə sí na̰’d ləm,
Jeḛ lai lé ɓɔl-lar lə sí a to gə́ kára ba ya ləm tɔ.
15Ŋgonəm, orè sə dee rəw na̰’d més el ləm,
Ila gɔli kila-rəw’g lə dee el ləm tɔ.
16Mbata gɔl dee un dee pélé-pélé gə́ loo néra gə́ majel’g ləm,
Deḛ d’ɔs rɔ dee ɓad
Gə mba kila məs ləm tɔ.
17Ɓó lé dəw ila jám no̰ néje’d
Gə́ d’aw gə bag dee lé ndá a kila pi,
18Deḛ lé darɔ dee-deḛ ya ɓa
D’umee gə mba tɔlee ləm,
Kisi kəmba lə dee-deḛ ya ɓa
D’iya gum nea̰’g ke’n ləm tɔ.
19Yee ɓa gə́ néra dəwje gə́ mal kiŋga né gə goo rəbee el lé
Wa meḛ dee,
Deḛ gə́ d’ula rɔ dee keneŋ mbiriri lé
Deḛ tuji ne tɔ.
Ooje ta ndəji kɔr lə Njesigənea̰
20Kəmkàr ɔr ndia gə tar wəl dan kila-rəwje’g ləm,
Yeḛ pata gə ndia gə́ ɓar dó-dò dan looje’g ləma ,
21Ndia ɓar ta loo-kunda-bulaje’g
Ar dee d’oo tapeaje tarəwkɔgje’d
Gə́ mee ɓee-boo’g lé ləm tɔ pana:
22Seḭ gə́ négər na meḛ sí tas lé
See ndɔ gə́ ra ɓa a kəwje rɔ sí raje né
Gə́ gə mḭdé ba lé wa.
Seḭ njékula sul dɔ loo’gje lé
See kula sul dɔ loo’d gə́ lel sí lé
A kundaje ŋgaŋgee ndɔ gə́ ra wa.
Seḭ mbəje kara see ndɔ gə́ ra ɓa
A kundaje ŋgaŋ mbad gər gin né lé wa.
23Telje gə́ goo tandəjije ləm gə́ nee!
Amje, m’ar ndiləm ɔm dɔ sí’g ləm,
M’a kar sí gərje tapamje ləm tɔ.
24Mbata ma m’ɓar sí
Nɛ seḭ mbad reeje ləm,
Ma m’ula jim ndiŋ
Nɛ dəw kára kara oo gə́ né el ləm,
25Takwɔji-kəmkàrje ləm lai lé
Seḭ ɔsje rəw ləma,
Ta̰dəjije ləm lé kara
Seḭ ndigije el ləm tɔ lé,
26Ndá ma nja kara m’a kogo sí
Loo gə́ seḭ a síje dan némeeko̰’g ləm,
M’a kula sul dɔ sí’g
Loo gə́ néɓəl-boo a teḛ dɔ sí’g ləm tɔ.
27Loo gə́ néɓəl-boo a biri sí
Asəna gə lel-boo bèe ləm,
Némeeko̰ a kaḭ dɔ sí sub
Asəna gə lel-mal bèe ləma,
Loo gə́ néurti gə nékila kúla
D’a ɓugu na̰ dɔ sí’g ləm tɔ lé ndá
28D’a ɓarm nɛ m’a kila dee keneŋ el ləm,
D’a saŋgəm pir-pir nɛ d’a kiŋgam el ləm tɔ.
29Mbata deḛ d’ə̰ji négər bəḭ-bəḭ ləm,
Deḛ ndigi ɓəl Njesigənea̰ el ləm,
30Deḛ ndigi takwɔji-kəmkàr ləm el ləma,
Ta̰dəjije ləm lai lé kara
D’oo gə́ né el ləm tɔ.
31Ndá d’a kul rɔ dee gə kandə né
Gə́ ḭ dan panjaa dee’g ləm,
Takwɔji-kəmkàrje lə dee-deḛ ya ɓa
A kas dee nag-nag ləm tɔ.
32Mbata kɔs ta rəw lə njégərnéelje lé
Tɔl dee ya ləm,
Jɔg-rɔ el lə mbəje lé
Tuji dee ya ləm tɔ.
33Nɛ yeḛ gə́ oo ta ləm ndá
A kwa rəa gə meendakaḭ ləm,
Yeḛ a si lɔm ɓó
A ɓəl né majel kára kara el ləm tɔ.
Currently Selected:
Gosota-Kəmkàrje 1: SBA2015
Highlight
Share
Copy
Want to have your highlights saved across all your devices? Sign up or sign in
Ngambai Bible © Alliance Biblique du Tchad 1989, 2015.