Abdias 1
1
Ta tuji gə́ a koso dɔ Edɔm’g lé
1Némḭdi gə́ Abdias oo lé ɓa nee: Mbaidɔmbaije gə́ Njesigənea̰ pata togə́bè wɔji ne dɔ Edɔm pana:
Jeḛ j’oo ta gə́ ḭ rɔ Njesigənea̰’g ləm,
D’ula njekaḭkula mbuna ginkoji dəwje gə raŋg’g ləm tɔ
Pana: Ubaje naŋg ḭje tar,
Ar sí j’aw j’iŋgaje Edɔm gə mba rɔ səa .
2Aa ooje, ma nja m’a rəm səi
Kari tel to gə́ lam ba bèe mbuna ginkoji dəwje gə raŋg’g ləm,
I a to kḛji karee al dɔ loo ləm tɔ.
3Ti gə́ i ti rɔi lé ɓa ari rəm ne ya,
I gə́ ra ɓee mee bolè mbalje’g,
I gə́ loo-sii to dɔ looje gə́ tar,
I gə́ ula rɔi pana:
See na̰ ɓa a kɔsi kalaŋ kilai naŋg wa lé,
4Ɓó lé i ula kəi-sii tar to gə́ ka̰ niŋgatə̰də bèe
Esé ula kəi ləi mbuna kéréméje’g kara
M’a kɔsi kalaŋ kilai naŋg ya,
Njesigənea̰ ɓa pa bèe.
5Ɓó lé njéɓogoje əsé gayim-ɓogoje ree kəi ləi loondul’g ndá
D’a tujii pugudu!
Nɛ see d’a kodo néje karee as dee ɓa el wa.
Ɓó lé njétḭja nduúje ree rɔi’g ndá
See yee gə́ ka̰ ɓuru ba ya ɓa d’a kya̰ el wa.
6Ai-i, seḭ ŋgaka Esawuje lé deḛ jagla mee kəije lə sí jagla-jagla ləm,
Nébaoje lə sí gə́ to loo-kiya’g kara
Deḛ teḛ dɔ’g ya ləm tɔ.
7Deḛ lai gə́ d’ɔm sə sí na̰’d lé
Deḛ korə sí njal
Teḛ sə sí rəw-nim-ɓee’g ləm,
Baokuraje lə sí kara
Su kəm sí dum ne dɔ sí ləma,
Deḛ gə́ d’o̰ muru lə sí kara
D’iya gumje no̰ sí’g ləm tɔ
Nɛ kəm sí inja dɔ’g ar sí gərje el ya saar.
8Njesigənea̰ pa pana:
Mee ndəa’g neelé see n’a tuji njékəmkàrje gə́ Edɔm ləm,
Gə njégosonégərje gə́ dɔ mbal’g lə Esawu ləm tɔ el wa.
9Ǝi Teman, njérɔje ləi lé ɓəl a kunda dee badə gaŋg dee
Mbata deḛ lai gə́ dɔ mbal’g lə Edɔm lé
D’a kwəi yoo-məs ya mburug-mburug.
10Gayim gə́ seḭ raje gə ŋgoko̰ sí Jakob lé
Rɔkul a dəb ne dɔ sí’g gə mbəa ləm,
Seḭ a kuduje ne bo̰ ləm tɔ.
11Mee ndəa gə́ seḭ aarje nea̰’g lé
Mee ndəa gə́ dəwje gə́ to dəw-dɔ-ɓeeje
D’wa bao-rɔje lə dee ɓər ləm,
Dəw-dɔ-ɓeeje d’andə tarəwɓee’g lə dee ləma,
D’un Jerusalem
D’ɔs ne na̰ mbarè dɔ’g ləm tɔ lé
Seḭ kara raje to gə́ deḛ ra sə dee bèe ya tɔ.
12Mee kàree gə́ némeeko̰ ra ŋgoko̰ sí lé
Kəm kar sí ooje gə́ nérɔlel el ləm,
Kəm kar sí alje rɔ sí dɔ ŋgaka Judaje’g ndɔ tuji’g lə dee el ləma,
Ndɔ gə́ néurti teḛ lé
Kəm kar sí teḛje ta sí
Ulaje ne sul dɔ dee’g el ləm tɔ.
13Ndɔ gə́ koso-dəwje ləm tuji pugudu lé
Kəm kar sí a̰dje tarəwɓee’g lə dee el ləm,
Ndɔ gə́ deḛ d’isi dan tuji’g lé
Kəm kar sí ooje gə́ nérɔlel el ləm tɔ.
14Ndɔ gə́ deḛ d’isi dan néurti’g lé
Kəm kar sí ɔrɔje rɔ nébaoje lə dee gə ji sí el ləm,
Kəm kar sí aarje tɔ-rəwje’g
Gə mba tɔl njékaḭje el ləma,
Njé’g lə dee gə́ teḛ ta yoo’g pəd-pəd lé kara
Kəm kar sí ɔm deeje ji dee’g ndɔ néurti’g el ləm tɔ.
15Mbata ndɔ lə Mbaidɔmbaije lé nai dəb mbata ginkoji dəwje gə raŋg lai,
Ndá gə goo néra sí lé ɓa
D’a tel ra ne sə sí-seḭ bèe ya tɔ.
Bèe ndá bo̰ néra síje d’a kɔs ta sí’g bɔsɔrɔ.
Israɛlje d’a dal ba̰ dɔ Edɔmje’g.
16Mbata kai gə́ seḭ aije né dɔ mbal’g ləm
Gə́ to gə kəmee lé
Ginkoji dəwje lai kara d’a kai né togə́bè saar-saar ya tɔ,
D’a kai ləm, d’a turu meḛ dee’g ləm tɔ ndá
D’a godo asəna gə deḛ gə́ d’isi kəmba kédé el,
17Nɛ kaji a to dɔ mbal gə́ Sio̰’d
Gə́ a to gə kəmee ləm,
Ginkoji Jakobje lé
D’a tel taa nénduba lə dee gogo ya ləm tɔ.
18Ginkoji Jakobje d’a to asəna gə pər bèe ləm,
Gel-bɔje lə Jisəb d’a to asəna gə ndo̰ pər bèe ləm tɔ,
Nɛ ginkoji Esawuje d’a to asəna gə ləm-mu
Gə́ d’a kila pər keneŋ karee o̰ hao̰ bèe,
Ndá ginkoji Esawuje d’a nai kára kara el
Mbata Njesigənea̰ ɓa pa bèe.
19Deḛ gə́ d’isi par gə́ dɔkɔl lé d’a taa dɔ mbalje lə Esawu gə́ né ka̰ dee-deḛ. Deḛ gə́ d’isi mee ndag-loo’g lé d’a taa ɓee lə Pilistije tɔ. D’a taa dɔ naŋg lə Eprayim ləm, gə ka̰ Samari ləm tɔ, tɔɓəi Bḛjamije d’a taa Galaad tɔ.
20Deḛ gə́ d’wa dee mbuna bao-rɔje’g lə Israɛlje lé d’a taa dɔ naŋg gə́ Kana̰je d’isi keneŋ njal teḛ ɓee gə́ Sarepta ləm, deḛ gə́ Jerusalem gə́ d’wa dee ɓər gə́ d’isi Separad lé kara d’a taa ɓee-booje gə́ par gə́ dɔkɔl ləm tɔ. 21Njétaa dee kɔm dee tarje lé d’a tuga loo kaw dɔ mbal gə́ Sio̰ gə mba gaŋg rəwta dɔ mbal’g lə Esawu.
Ndá loo ko̰ɓee lé a to ka̰ Njesigənea̰ ya.
Currently Selected:
Abdias 1: SBA2015
Highlight
Share
Copy
Want to have your highlights saved across all your devices? Sign up or sign in
Ngambai Bible © Alliance Biblique du Tchad 1989, 2015.