Mark 1
1
Mber kila lə Ja̰ Njera-batɛm
Mat 3.1-12, Lug 3.1-18, Ja̰ 1.19-28
1Ta neelé to gin tagə́maji lə Jeju Kristi, Ŋgon-Ala lé. 2To gə goo ta gə́ deḛ ndaŋg mee maktub’g lə Esai, njetegginta lé pana:
Aa oo, ma m’ula njekaḭkula ləm nɔḭ’g
Ndá yeḛ ɓa a gɔl rəw ləi .
3To ndu yeḛ gə́ njekilamber gə dɔdilaloo lé pana:
Gɔlje rəw lə Mbaidɔmbaije lé
Gɔlje ŋgan rəwje ləa ar deeje d’asəna rai-rai .
4Ja̰ ɓa ree ra dəwje batɛm dɔdilaloo’g. Yeḛ ila mber ta gə́ wɔji dɔ batɛm ka̰ kwa ndòo rɔ dɔ kaiya’g mba kar mee Ala lé ti mbidi dɔ’g.
5Ndəa neelé dəwje gə́ Jude ləm, gə njé gə́ Jerusalem ləm tɔ d’aw rəa’g riba dɔ kaiya ra dee təsərə gə́ raga ɓa yeḛ ra dee batɛm ta baa gə́ Jurdɛ̰’g ɓəi.
6Ja̰ lé ula kubu gə́ d’ṵji gə bḭ jambal ɓa rəa’g ləm, yeḛ wa mée gə ndar ləm tɔ. Gabəraje gə ubu tə̰ji ɓa gə́ nésəa tɔ . 7Yeḛ ila mber ula dəwje taje nee pana: Dəw gə́ a gə ree goom’g lé debee neelé siŋgá ur dɔm’g ləm, m’as kula dɔm naŋg tudu ndar markob ləa gə dɔrɔm el ləm tɔ. 8Ma lé mán ɓa m’ra sí ne batɛm nɛ yeḛ lé Ndilmeenda ɓa yeḛ a ra sí ne batɛm.
Ja̰ ra Jeju batɛm
Mat 3.13-17, Lug 3.21-22
9Mee ndəa’g neelé Jeju ḭ Najaret gə́ wɔji dɔ ɓeeko̰ gə́ Galile aw rɔ Ja̰’g aree rəa batɛm mán baa gə́ Jurdɛ̰. 10Loo gə́ Jeju ḭ mán unda loo teḛ raga ndá léegəneeya yeḛ oo kəm dara teḛ yərərə, ndá Ndilmeenda ḭ dara nar asəna gə dərnda ree sí dəa’g. 11Tɔɓəi ndu ɓar dara wəl pana: I lé to ŋgonəm gə́ gəd-gəd gə́ m’undai dan kəm’g, i taa kəm rəgm ya .
Njekurai aḭ mee Jeju
Mat 4.1-11, Lug 4.1-13
12Léegəneeya Ndil ɔsee ɓɔḭ-ɓɔḭ aw səa dɔdilaloo’g. 13Yeḛ si keneŋ ndəa rɔ-sɔ ndá Njekurai aw rəa’g mba kaḭ mée. Yeḛ si dan daje gə́ yèr gə́ mee wala’g ndá kuraje lə Ala gə́ dara ɓa ree rəa’g ra né d’aree.
Jeju ɓar njékwakiláje gə́ dɔtar sɔ
Mat 4.12-22, Lug 4.14-15, 5.1-11
14Loo gə́ d’wa Ja̰ d’ilá daŋgai’g mba̰ ndá Jeju aw Galile tɔji dee tagə́maji lə Ala lé. 15Yeḛ ula dee pana: Rudee un ɗiao mba̰ ndá ɓeeko̰ lə Ala lé si aw gə́ nee dəb ŋga. Bèe ndá waje ndòo rɔ sí dɔ kaiya’g lə sí ɓó gə ɔmje meḛ sí dɔ tagə́maji’g lé jəb-jəb tɔ .
16Jeju njaa dɔ koŋgo baa-boo gə́ Galile, tɔɓəi yeḛ oo Simo̰ gə Andre, ŋgoko̰ Simo̰ lé d’aar d’ila bura mán baa’g neelé mbata deḛ lé to gə́ njékaw ndo̰ ka̰jije ya doŋgɔ doi. 17Jeju ula dee pana: Unje rəw goom’g ndá m’a tel sí gə́ njḛ́do̰-dəwje.
18Léegəneeya deḛ d’ya̰ buraje lə dee d’ɔm na̰ gée’g tɔ.
19Loo gə́ yeḛ ɔd gə kuree ɗegəse ba ndá yeḛ oo Jak ŋgon Jebede, deḛ gə́ ŋgokea̰ gə́ Ja̰. D’isi mee to’g d’isi gɔl kəm buraje lə dee. 20Léegəneeya, yeḛ ɓar dee ndá deḛ d’ya̰ bɔ deeje Jebede mee to’g gə njéboakulaje lé ndá d’ḭ d’aw gée’g tɔ.
Jeju tuba ndil gə́ yèr
Lug 4.31-37
21Deḛ d’ɔd d’aw ɓee gə́ Kapernawum. Ndɔ-kwa-rɔ lé Jeju andə aw mee kəi-kwa-dɔ-na̰’g ndá yeḛ ndoo dəwje ta keneŋ. 22Loo gə́ d’oo ta ləa gə́ yeḛ tɔji dee neelé ndá kaar dee wa dee paḭ mbata yeḛ ndoo dee asəna gə njedɔmoŋ ɓó asəna gə njéndaji-maktubje el .
23Dəw kára gə́ ndil gə́ yèr uru kəi mée’g lé si sə dee na̰’d mee kəi-kwa-dɔ-na̰’g lə dee neelé tɔ ndá yeḛ pata gə ndia gə́ boi wəl pana: 24Jeju gə́ Najaret, see ta lə síjeḛ səi aw na̰’d ra wa. See i ree mba tuji síjeḛ wa. Ma m’gəri gao, i lé to Njemeenda lə Ala ya.
25Jeju ndaŋg ndil gə́ yèr neelé ɓəgəgə ulá pana: Wa tai! ndá teḛ mee dəw’g neelé gə́ raga.
26Ndil gə́ yèr lé teḛ mee dəw’g neelé ndá yeḛ oree lərərə-lərərə aree no̰ wəl-wəl ɓa unda loo teḛ mée’g ɓəi. 27Deḛ gə́ d’aar keneŋ lé ta igi dee sel, d’aar jim. Tɔɓəi d’ula ta dee dəji na̰ mbuna na̰’d pana: See né neelé to gə́ ri ɓa bèe wa. See to ta gə́ sigi wa. Yeḛ nja ɓa wa ta ndilje gə́ yèr kara ar dee tel rɔ dee goo ta’g ləa.
28Léegəneeya no̰ néra Jeju oso gə loo mbidi-mbidi dɔ naŋg ɓeeko̰ gə́ Galile lai.
Jeju aji njérɔko̰je bula
Mat 8.14-17, Lug 4.38-41
29Loo gə́ deḛ d’unda loo mee kəi-kwa-dɔ-na̰’d teḛ raga mba̰ ndá deḛ d’aw gə Jak gə Ja̰ na̰’d mee kəi’g lə Simo̰ gə Andre. 30Məm Simo̰je gə́ dené to naŋg gə rɔko̰ rɔnuŋga kəd-kəd, nɛ waga ɓa d’ula Jeju taree ɓəi. 31Jeju rəm pər gə́ rəa’g ndá yeḛ wa jia unee ne uree tar ar rɔko̰ lé ḭ dəa’g kə̰geŋ ndá yeḛ ḭ ra né ar dee d’usɔ.
32Loo gə́ kàr andə mba̰ ndá d’odo njérɔko̰je gə deḛ gə́ ndilje gə́ yèr d’ula kəm dee ndòo ree sə dee rəa’g, 33Dəwje gə́ mee ɓee-boo’g neelé bula d’wa dɔ na̰ ko̰-ko̰ takəi’g. 34Yen ɓa yeḛ ɔr rɔko̰ gə́ gə ria-ria rɔ dəwje’g bula ləm, ndilje gə́ yèr kara yeḛ tuba dee meḛ dəwje’g ləm tɔ ndá yeḛ un ndia ar ndilje gə́ yèr neelé ɔg dee dɔ pa taree mbata deḛ gəree gao.
Jeju aw ila mber gə loo-loo mee ɓee gə́ Galile
Lug 4.42-44
35Taginloo gə́ loo àr el nja ɓəi ndá Jeju teḛ aw dɔdilaloo’g mba ra tamaji keneŋ. 36Simo̰ gə deḛ gə́ d’aar səa, d’ɔd d’aw ndolee. 37Loo gə́ d’iŋgá mba̰ ndá d’ula pana: Aa oo, dəwje lai neelé d’aw ndoli.
38Yeḛ tel ila dee keneŋ pana: Reeje ar sí j’ḭje j’awje dəb loo gə́ wɔji dɔ ɓeeje gə́ raŋg mba karm m’ndoo dee ta keneŋ tɔ mbata yee ɓa ma m’ree naŋg nee gə mbəa ya.
39Togə́bè yeḛ ɔd aw mee kəi-kwa-dɔ-na̰’dje lə deḛ gə́ wɔji dɔ ɓeeko̰ gə́ Galile bura. Yeḛ ndoo dee ta keneŋ ləm, yeḛ tuba ndilje gə́ yèr lé ləm tɔ .
Jeju aji njeba̰ji
Mat 8.1-4, Lug 5.12-16
40Dəw kára gə́ to njeba̰ji aw rɔ Jeju’g, unda barmba naŋg nea̰’g to ne təa’g pəgə-pəgə pana: Ɓó lé məəi ndigi ndá i askəm kar ba̰ji neelé godo rɔm’g péd-péd ya.
41Mee Jeju aw taḭ-taḭ ndá yeḛ ula jia ɔrɔ ne rɔ dəw neelé pana: Ma m’ndigi səi ya, maji kar rɔi tel ɔr ɓə̰dərə-ɓə̰dərə ya.
42Léegəneeya ba̰ji lé ɔr rɔ dəw’g lé ɓə̰dərə-ɓə̰dərə, ar rəa to kari péd-péd tɔ. 43Léegəneeya Jeju ula dəw neelé aree ɔd aw ndá yeḛ ndəjee bər-bər pana: 44Yen, i lé maji kari tɔs kəmi dɔ rɔi’g ɓó ar tai gə́ ja̰ kara teḛ ar dəw oo el. Nɛ aw gə darɔi aw tɔji njekinjanéməs ndá un né gə́ godndu Moyis wɔji lé mba karee to ne nékɔrkəmta mbata lə dee .
45Nɛ loo gə́ diŋgam neelé ɔd aw ndá yeḛ un kudu tɔs taree mbi dəwje’d gə́ kédé-kédé, ar Jeju oo loo kila rəa mee ɓee’g neelé el nja saar. Togə́bè ɓa yeḛ aw si dɔdilaloo’g walá ndá dəwje d’ḭ gə ɓee-ɓee ree rəa’g.
Currently Selected:
Mark 1: SBA2015
Highlight
Share
Copy
Want to have your highlights saved across all your devices? Sign up or sign in
Ngambai Bible © Alliance Biblique du Tchad 1989, 2015.