Ləbije 7

Nékinjaməs gə́ ka̰ dəw gə́ ta wa dəa

1Aa ooje, godndu gə́ wɔji dɔ nékinjaməs gə́ ka̰ dəw gə́ ta wa dəa lé ɓa nee: To né gə́ to gə kəmee doi ya. 2Loo gə́ d’inja gwɔb nékinjaməs gə́ ka̰ roo lé keneŋ ndá lé neelé ɓa d’a kinja gwɔb nékinjaməs gə́ wɔji dɔ dəw gə́ ta wa dəa lé keneŋ tɔ. D’a saga məsee loo-nékinjaməs’g gugu ne dɔ loo neelé sub ya. 3D’a ree gə ubeeje lai ləm, gə ɓo̰gee ləm, gə ubee gə́ dolè dɔ ŋgan siḭyeje ləm, 4gə ɓɔlɔlɔ-duneeje gə́ joo ləm, gə ubee gə́ dolè dɔ dee gə́ ɔn dɔ ŋgel mée ləma, gə dəb wurndulee gə́ boi gə́ d’a kwa mbɔr ɓɔlɔlɔ-duneeje’g kɔr ləm tɔ. 5Njekinjanéməs a roo néje neelé loo-nékinjaməs’g karee to nékinjaməs gə́ ka̰ roo no̰ Njesigənea̰’g. To nékinjaməs gə́ wɔji dɔ ta gə́ wa dɔ dəw ya. 6Ŋgalə njékinjanéməsje lai gə́ diŋgam lé d’a sɔ da neelé, d’a sɔ mee loo gə́ to gə kəmee’g: to né gə́ to gə kəmee doi ya. 7Né gə́ deḛ ra mbata lə nékinjaməs gə́ wɔji dɔ ta gə́ wa dɔ dəw lé d’a ra togə́bè mbata lə nékinjaməs gə́ ka̰ kiŋga meekoso lemsé lé tɔ, godndu gə́ kára ba neelé ya wɔji dɔ nékinjanéməsje neelé joo bɔr to: Njekinjanéməs gə́ inja da gə́ wɔji dɔ kuga dɔ kaiya neelé ɓa a to njea ya.

Né gə́ kəm kar njékinjanéməsje d’iŋga

8Njekinjanéməs gə́ a kinja da-kul lə dəw gə́ nékinjaməs gə́ ka̰ roo lé yeḛ ɓa a to njendar da gə́ yeḛ inja gə́ məs lé ya. 9Nékarje gə́ rara gə́ nuŋga mee bwa-bṵda’g, əsé nuŋga gə́ nuŋga, əsé d’ɔb əb’d kara a to ka̰ njekinjanéməs gə́ un lé ya. 10Nékar gə́ rara gə́ to nduji gə́ mbɔḭ gə ubu ɓa tudu kurum-kurum ɓəi lé a to ka̰ ŋgalə Aaro̰ kar nana kara iŋga kea̰ asəna gə ka̰ maree bèe ya tɔ.

Nékinjaməs gə́ ka̰ kɔm na̰’d sad

11Aa ooje, godndu gə́ wɔji dɔ nékinjaməs gə́ ka̰ kɔm na̰’d sad gə Njesigənea̰ ɓa to nee:

12Ɓó lé dəw kára a gə ra né gə́ ka̰ kɔm na̰’d sad ndá yeḛ a ree gə mbə gə́ lal əm-tiné gə́ mbɔḭ gə ubu ləm, gə mbə gə́ lal əm-tiné gə́ saga ubu dɔ’g ləma, gə mbə gə́ ra gə nduji gə́ ndá léréré gə́ lal əm-tiné gə́ mbɔḭ gə ubu ɓa d’ila əb’g ɓəi ləm tɔ ndá a korè dee na̰’d més gə nékinjaməs gə́ ka̰ kɔm na̰’d sad lé tɔ. 13Tɔɓəi yeḛ a ree gə muru gə́ əm-tiné to keneŋ mba kɔm dɔ mbə’g neelé karee to nékinjaməs gə́ ka̰ ra Ala oiyo kɔm ne səa na̰’d sad. 14Nékarje kára-kára lai lé d’a kɔr təa kára-kára mba kula gə́ tar kar Njesigənea̰, yee neelé a to ka̰ njekinjanéməs gə́ saga məs da nékinjaməs gə́ ka̰ kɔm na̰’d gə Ala ya. 15Dakas da-kul gə́ d’ḭjá gə́ məs gə́ ka̰ ra Ala oiyo kɔm ne na̰’d sad lé d’a sɔ gə́ mee ndəa gə́ d’ḭjá gə́ məs’g lé ya, d’a kya̰ gesee saar kar loo àr dɔ’g el.

16Ɓó lé dəw kára ree gə nékinjaməs gə́ ka̰ tɔl ne ta manrɔ ləa əsé gə nékar gə́ yeḛ ḭ gə mée mba kar lé ndá d’a sɔ da neelé mee ndəa gə́ yeḛ ḭjá’g lé, tɔɓəi gesee gə́ nai lé kara bèlè lookàree d’a sɔ tɔ. 17Nuna̰ ndá dakas nékinjaməs gə́ nai lé d’a roo tɔ. 18Nɛ ɓó lé dəw sɔ da nékinjaməs ləa gə́ ka̰ kɔm na̰’d gə Ala mee ndɔ gə́ nuna̰ lé ndá nékinjaməs neelé a taa kəm Ala el, ta a kɔr dɔ yeḛ gə́ njekḭja’g el, to né gə́ mina̰ ya ar nana ɓa gə́ sɔ ndá taree a kwa dəa-yeḛ ya. 19Dakas da gə́ d’aree ɔrɔ rɔ né gə́ mina̰ ndá d’a sɔ el: d’a roo gə́ roo ya. 20Dəw gə́ rara gə́ rəa àr lé ɓa a kaskəm sɔ da neelé ya, nana ɓa gə́ rəa mina̰ ɓa sɔ da nékinjaməs gə́ ka̰ kɔm na̰’d sad gə Ala gə́ to ka̰ Njesigənea̰ ya doŋgɔ doi lé ndá d’a kɔree mbuna koso-dəwje’g ləa lé ya. 21Nana ɓa gə́ ɔrɔ rɔ né gə́ mina̰ gə́ to rɔ dəw gə́ rəa mina̰’g, əsé da gə́ mina̰, əsé né gə́ mina̰ gə́ ban-ban ɓa yeḛ sɔ ne da nékinjaməs gə́ ka̰ kɔm na̰’d gə Ala gə́ to ka̰ Njesigənea̰ doŋgɔ doi tɔɓəi lé ndá, debee neelé d’a kɔree mbuna dəwje’g ləa ya.

22Njesigənea̰ ula Moyis pana: 23Ula Israɛlje pana:

Seḭ a sɔje ubu maŋg əsé ubu ŋgon badə əsé ubu ko̰ bya̰ el. 24Ubu da gə́ wəi gə́ kwəi əsé yeḛ gə́ da maree gə́ wala wá tiee mbidi-mbidi ndá seḭ asjekəm raje ne né gə́ raŋg ɓa ɓó seḭ a sɔje el. 25Mbata nana ɓa gə́ sɔ ubu daje gə́ d’inja dee gə́ məs gə́ ka̰ roo kar Njesigənea̰ lé ndá debee neelé d’a kɔree mbuna koso-dəwje’g ləa ya. 26Loo gə́ rara gə́ seḭ a síje keneŋ lé seḭ a sɔje məs el, məs yel əsé məs da kara a sɔje el ya#Gn 9.4, Ləb 17.10-14, 19.26, TtG 12.16,23, 15.23. 27Nana ɓa gə́ a sɔ məs né gə́ rara kara ndá d’a kɔree mbuna koso-dəwje’g ləa ya.

28Njesigənea̰ ula Moyis pana: 29Ula Israɛlje pana:

Dəw gə́ a ree gə nékinjaməs gə́ ka̰ kɔm na̰’d gə Njesigənea̰ lé ndá a kɔr ta nékinjaməs ləa gə́ ka̰ kɔm na̰’d gə Ala kar Njesigənea̰ gə́ kea̰ yeḛ ya. 30Néje gə́ ka̰ roo lé yeḛ nja a ree ne gə rəa no̰ Njesigənea̰’g ya, yeḛ a ree gə ubu da gə kaaree na̰’d ndá kaaree lé a to mba ra nduree no̰ Njesigənea̰’g. 31Njekinjanéməs lé a roo ubu da loo-nékinjaməs’g ndá kaaree lé a to ka̰ Aaro̰ deḛ gə ŋganeeje ya. 32Da nékinjanéməsje lə sí gə́ ka̰ kɔm na̰’d lé seḭ a karje njekinjanéməs biŋgee gə́ dɔkɔl gə́ seḭ ulaje ndiŋ gə́ tar gə́ né kea̰-yeḛ lé. 33Yeḛ gə́ kára mbuna ŋgalə Aaro̰’g ree gə məs gə ubu da nékinjaməs gə́ ka̰ kɔm na̰’d sad lé biŋgee gə́ dɔkɔl lé a to kea̰-yeḛ ya. 34Mbata mbuna nékinjaməs gə́ ka̰ kɔm na̰’d gə́ Israɛlje d’a gə kinja lé ma nja m’un ndum mba kar kaar daje gə́ d’ula gə́ yo gə́ nee ləm, gə biŋgee gə́ deḛ d’ula ndiŋ gə́ tar ləm tɔ lé d’a to ka̰ Aaro̰ gə́ to njekinjanéməs gə ŋganeeje gə goo godndu gə́ to gə no̰ gə́ Israɛlje d’a ra lé ya. 35Gə goo kwa gə́ d’wa dɔ Aaro̰ gə ŋganeeje gə ubu lé yee ɓa to né gə́ ka̰ kar dee d’iŋga ne nékinjanéməsje gə́ ka̰ roo no̰ Njesigənea̰’g un kudee mee ndəa gə́ d’unda dee ne gə kəmee no̰ dəwje’g mba kar dee ra kula ləm gə́ wɔji dɔ nékinjaməs lé tɔ. 36Yee gə́ bèe ɓa to né gə́ Njesigənea̰ un ndia ar Israɛlje mba kar dee d’ar dee, un kudee mee ndəa gə́ d’wa dɔ dee gə ubu lé, a to godndu gə́ a to gə no̰ mbuna ŋgaka deeje’d gə́ kédé-kédé ya.

37Yee ɓa to godndu gə́ wɔji dɔ nékinjaməs gə́ ka̰ roo ləm, gə nékar gə́ to kó ləm, gə nékinjaməs gə́ wɔji dɔ kuga dɔ kaiya ləm, gə nékinjaməs gə́ wɔji dɔ kal dɔ godndu ləm, yee gə́ wɔji dɔ kɔr dee kunda dee gə kəmee gə mba kɔm kula ji dee’g ləma, gə nékinjaməs gə́ ka̰ kɔm na̰’d sad ləm tɔ. 38Njesigənea̰ un ne ndia ar Moyis dɔ mbal gə́ Sinai mee ndəa gə́ yeḛ un ne ndia ar Israɛlje mba kar dee ree ne gə nékarje lə dee d’ar Njesigənea̰ dɔdilaloo gə́ Sinai lé ya.

Currently Selected:

Ləbije 7: SBA2015

Highlight

Copy