2 Mbaije 1
1
Ala gaŋgta dɔ Ahajia’g, mbai gə́ Israɛl gə goo nérea
1Loo gə́ Akab wəi mba̰ ndá Moabje d’ḭ d’ɔs Israɛlje rəw.
2Ndɔ kára bèe Ahajia teḛ kəmbolè kəi-mbai’g ləa gə́ Samari gə́ to dɔ maree’g oso ar rəa tée yaa̰, yen ŋga yeḛ ula njékulaje ləa pana: Awje aw dəjije Baal-Jebub, magə gə́ Ekro̰ ooje, see doo gə́ m’iŋga neelé m’a kaji ne ya wa. 3Nɛ kura lə Njesigənea̰ ree ula Eli dəw gə́ Tisbe pana: Uba naŋg ḭta aw iŋga njékulaje lə mbai gə́ Samari lé dəji dee pana: See Ala lə Israɛlje godo ŋga ɓa seḭ aw dəjije Baal-Jebub, magə gə́ Ekro̰ ɓa ta wa. 4Gelee gə́ nee ɓa Njesigənea̰ pa ne togə́bè pana: Dɔ tira gə́ i to keneŋ lé i a kuba naŋg kḭ tar el mbata i a gə kwəi ya.
Tɔɓəi Eli ɔd aw. 5Njékulaje lé tel ree rɔ Ahajia’g ndá yeḛ dəji dee pana: See ban ɓa seḭ tel reeje ɓəi wa.
6Deḛ d’ilá keneŋ pana: Dəw kára ya iŋga sí ula sí pana: Gə́ telje awje rɔ mbai’d gə́ ula sí lé uláje pajena: Njesigənea̰ pa togə́bè pana: See Ala lə Israɛlje godo ɓa i ula sí rɔ Baal-Jebub’d gə́ to magə gə́ Ekro̰ lé wa. Gelee gə́ nee ɓa dɔ tira gə́ i to keneŋ lé i a kuba naŋg keneŋ kḭ tar el mbata i a gə kwəi ya.
7Ahajia dəji dee pana: Dəw gə́ ree iŋga sí ula sí ta neelé to dəw gə́ ban wa.
8Deḛ d’ilá keneŋ pana: Yeḛ ula kubu gə́ d’ṵji gə bḭ da ləm, yeḛ wa mée gə ndar ləm tɔ.
Yen ŋga Ahajia pana: To Eli, dəw gə́ Tisbe lé ya .
Ahajia saŋg loo mba kwa Eli
9Yeḛ ula ɓé-njérɔje gə njérɔje ləa gə́ rɔ-mi lé rɔ Eli’g loo gə́ yeḛ si dɔ sém mbal’g lé. Ɓé-njérɔje neelé al aw rɔ Eli’g si dɔ sém mbal’g lé ndá yeḛ ulá pana: I dəw lə Ala, gə́ risi ur naŋg gə goo ndukun lə mbai lé.
10Eli tel ila ɓé-njérɔje gə́ rɔ-mi’g lé pana: Ɓó lé ma m’to dəw lə Ala ya ndá maji kar pər ḭ dara ree rooi gə njérɔje ləi gə́ rɔ-mi lé na̰’d ya.
Léegəneeya pər ḭ dara ree rée gə njérɔje ləa gə́ rɔ-mi lé ya tɔ . 11Ahajia ula ɓé-njérɔje gə́ raŋg gə njérɔje ləa rɔ-mi rɔ Eli’g ya ɓəi. Ɓé-njérɔje lé un ta ula Eli pana: I dəw lə Ala, mbai pa togə́bè pana: Ɔs rɔi ɓad risi ur naŋg.
12Eli tel ilá keneŋ pana: Ɓó lé ma m’to dəw lə Ala ya ndá maji kar pər ḭ dara rooi gə njérɔje ləi gə́ rɔ-mi lé na̰’d ya.
Léegəneeya pər lə Ala ḭ dara ree rée gə njérɔje ləa gə́ rɔ-mi lé na̰’d ya tɔ. 13Ahajia ula kula ar ɓé-njérɔje ləa gə́ rɔ-mi gə́ njekɔm’g munda, aree ree rɔ Eli’g ya tɔɓəi. Ɓé-njérɔje gə́ njekɔm’g munda neelé ree ɔs kəjee naŋg no̰ Eli’g ra ndòo rəa’g pana: I dəw lə Ala, m’ra ndòo rɔi’g mba kar si kəmba ləm-ma gə ka̰ njérɔje ləm gə́ rɔ-mi nee gə́ to kuraje ləi lé to né gə́ əḭ kəmi’g ya kari. 14Aa oo, pər ḭ dara roo ɓé-njérɔje gə́ kudu joo gə njérɔje lə deḛ gə́ rɔ-mi rɔ-mi lé mba̰, nɛ ɓasinè, maji kar si kəmba ləm tɔ né gə́ əḭ kəmi’g ya kari.
15Kura lə Njesigənea̰ lé ula Eli pana: Maji kari risi ur naŋg aw səa ɓó ɓəlee el.
Eli risi ur naŋg aw səa rɔ mbai’g lé. 16Yeḛ ulá pana: Njesigənea̰ pa togə́bè pana: Mbata kula gə́ i ula njékulaje ar dee d’aw dəji Baal-Jebub, magə lə Ekro̰je ta to gə́ lə Ala gə́ kəm dəjee ta godo ɓee lə Israɛlje bèe neelé, dɔ tira gə́ i to keneŋ lé i a kḭ keneŋ kur naŋg el ŋga, i a kwəi kən ya.
17Ahajia wəi gə goo ta lə Njesigənea̰ gə́ Eli pa lé ya. Ndá Joram ɓa un kudu ko̰ɓee toree’g mee ləb gə́ njekɔm’g joo gə́ Joram, ŋgolə Josapat to ne mbai gə́ Juda lé, mbata ŋgolə Ahajia godo.
18Ges sor-néraje lə Ahajia gə néje gə́ yeḛ ra lé ndaŋg taree mee Maktub-sorta néraje’g lə mbaije gə́ Israɛl ya.
Currently Selected:
2 Mbaije 1: SBA2015
Highlight
Share
Copy
Want to have your highlights saved across all your devices? Sign up or sign in
Ngambai Bible © Alliance Biblique du Tchad 1989, 2015.