2 Ja̰ 1
1
Lapia gə́ ra dee
1Ma ŋgatɔg lé m’ndaŋg maktub nee m’ar Kyria, dəw gə́ to gə kəmee, deḛ gə ŋganee gə́ m’unda dee dan kəm’g gə goo kankəmta lé, ma gə karm el, nɛ deḛ lai gə́ gər kankəmta lé d’unda dee dan kəm dee’g to 2mbata kankəmta gə́ uru kəi meḛ sí’g lé a to meḛ sí’g gə no̰ ya. 3Maji kar meemaji, gə meekɔrjol, gə meelɔm lə Ala Bɔ-dəwje ləm, gə ka̰ Jeju Kristi Ŋgon Bɔ-dəwje ləm tɔ lé nai sə sí-seḭ nja gə goo kankəmta gə meenoji lé.
Kankəmta gə meenoji lé
4Loo gə́ ma m’iŋga ŋgani gə́ na̰je gə́ njaa dan kankəmta’g, gə goo godndu gə́ j’iŋga rɔ Bɔ-dəwje’g lé ndá rɔm sa ne rəw gə meendakaḭ ya. 5Ɓasinè Kyria, né gə́ ma m’dəjii lé ɓa nee: To mba kar sí j’undaje na̰ dan kəm na̰’d. Ta neelé to godndu gə́ jeḛ n’taa kédé gə́ dɔtar lé ɓó to godndu gə́ sigi el . 6Meenoji gə́ gəd lé yee ɓa wɔji dɔ ndolè goo godnduje lə Ala lé. Yee nja ɓa gə́ godndu gə́ seḭ taaje kédé gə́ dɔtar gə mba njaa danee’g ya.
7Mbata njésukəmlooje bula taa loo dɔ naŋg nee pəl-pəl. Deḛje neelé ta dee teḛ pana: Jeju Kristi lé ree naŋg nee gə darəa, deḛ pa bèe el. Dəw gə́ ra togə́bè lé to njesukəmloo ləm, yeḛ to Njendaji Kristi lé ləm tɔ. 8Aaje rɔ sí kər-kər mba kar kó kula lə sí tuji el ɓó gə mba kiŋgaje ne nédɔji lə sí doŋgɔ moŋgoŋgo̰ ya.
9Nana ɓa gə́ aw dəa gə́ kédé ɓó ai mée sam-sam dɔ kankəmta’g lə Kristi el ndá Ala nai səa el. Yeḛ gə́ ai mée sam-sam dɔ tandoo’g neelé ndá Bɔ-dəwje nai səa ləm, Ŋgon kara nai səa ləm tɔ. 10Ɓó lé dəw kára aw rɔ sí’g ɓa, un ta neelé ula sí el ndá wáje gə́ rɔ sí’g mee kəi’g lə sí el ləm, reaje lapia wɔjije ne kag noji el ləm tɔ. 11Nana ɓa gə́ rəa lapia wɔji ne kag noji ndá yeḛ oso gelee’g dɔ néreaje’g gə́ majel lé tɔ.
Rudu taje
12Ma m’aw gə taje gə́ raŋg bula gə mba kula sí ɓəi nɛ ma m’ndigi kula sí gə maktub əsé gə mán ndaŋgee ɓa el. Meem to yel gə mba kaw koo sí ɓó gə kula sí ta gə tam ja̰-ja̰ ya mba kar rɔlel lə sí ɔr ne njal ya. 13Ŋgalə kɔnani gə́ dené gə́ to dəw gə́ to gə kəmee lé rai lapia tɔ.
Currently Selected:
2 Ja̰ 1: SBA2015
Highlight
Share
Copy
Want to have your highlights saved across all your devices? Sign up or sign in
Ngambai Bible © Alliance Biblique du Tchad 1989, 2015.