(Evangelio según San Juan) 4
4
Jesús Galilea weaku jiinkimu
(Mt. 4.12; Lc. 4.14)
1Jesús antuku fariseo aidau dekawaje Jesús yamiamua nu Juagká jintintaiji aidau nagkaesau kaweawai tuinawai tabaun. 2(Jesusak yamijattsaig niina jintintaiji aidau yamijatuinaig tuidau.) 3Nuna Jesús dekaa, Judeanak ukuak ataktú Galilea weuwai.
Jesús Samarianmaya nuwajai igkunikbau
4Nunik Samaria nugkanum nagkaemak, 5Samaria nugkanum yaakat Sicar tutainum, Jacob ni uchijí Josen nugká susauwa nui tikiju jegauwai. 6Nuwi au Jacob nugka tai yumi chigkamu aajakua nu. Jesús miná minakua pimpikiu asa, nugka tai yumi chigkamunum ayaumas ekeemsauwai, etsa tajiastatak wegai. 7Nuniai samarianmaya nuwa yumin shikiak tantamtai, Jesús chichajak:
—Minash machik yumi ajamjusta uwagtajai, tau. 8Jintintaiji aidauk yaakat yutain sumaktasag wegaju ai.
9Tujash judío aidauk samarianmaya aidaujaig dakitdayin asag, nuwa ayaak:
—¿Wagka ame judiowaitkumesh, wi samarianmaya nuwa aish, yumi ajamjusta tusamesh segatme? tau.
10Tama Jesús ayaak:
—Apajuí anentag awemamua nu yumin segapa nu dekakmek, dekas tajame, ameshkam segamainaitme, dutikamak nigka yumi iwakua nuna amamainai, tiu.
11Tutai nuwa chichaak:
—Apuh, yumi shikitai takaktsum aniaumesh, yumishkam initka nunin aish, ¿tuwiya yumi iwakush sujustatme? 12¿Ame ii muunji Jacob aajakua nunú nagkaesaukaitam? Ii muunji Jacob aajakua nu junak nugká tai yumin chigká ukugtamkiuwai. Niishkam junak ashí ni uchijijai umujakui, tagkujinashkam junak suujakui, tau.
13Tama Jesús ayaak:
—Ashí ju yumia juna umuidauk tuke kitabiagtin ainawai, 14untsu wi yumí susattag nuna uwajuk, tuke kitaagchatin ainawai, ayatak wi yumí susattag nunú niiní yumi pukuni jiinama imaní au asa, pujut tuke atina nu ajitnai, tiuwai.
15Tama nuwa ayaak:
—Apuh, minash nunú yumi sujustá, kitamchau atajai, nuigtú yumí shikiaknush minichu atajai, tiuwai.
16Tutai Jesús chichajak:
—Weme aishum jukim, jui taata, tau.
17Tama nuwa ayaak:
—Wika aishinchauwaitjai, tiuwai.
Tutai Jesús ayaak:
—Dekas tame aishinchauwaitjai tame duka; 18tujash cinco aishum ajutjamajakui, tuja yamai ajutjama dushakam aishumchauwai. Duwi dekas tiume, tau.
19Nunú tama nuwa chichaak:
—Apuh, profeta diyajame; 20iina muunji aajakajua nu Apajuí emematujakbauk au muja auwai, tujash judío aidautigmek, Apajuí emematmainuk imá Jerusalegka nuigki tinu ainagme, tau.
21Tutai Jesús ayaak:
—Nuwah, dekaskeapi tujutta, hora jegawai imá ju muja juig, imá Jerusalegkak Apagnak emematchagtata nu. 22Atumek dekachiatkujum emematjume; tujash jutiik ya emematji duka dekainaji, wagki uwemtikagtinuk judionmaya minitin asamtai. 23Yamaik horak jegawai, duka yamaiya juiki, dekaskenum Apajun emematin aidauk, Wakan tawa dutiksag dekaskenum emematiagtata nu. Mina Apajuk nunú aidaun emematjitnume tusa egawai. 24Apajuik Wakani, nunin asamtai niina emematuidauk, wakan tawa dutiksag dekaskenum emematmain ainawai, tau.
25Tutai nuwa ayaak:
—Dekajai Mesías#4.25 Hebreo chichamnum “Mesías” tai, griego chichamnum “Cristo” tawai, nunak “Apajuí Apu atinun etegka awemamu” tawa nunak taku tuinawai. Cristo daagtin taatna nunak, ni taak ashí wají aidaunak ujapaktinai, tau.
26Tutai Jesús ayaak:
—Nunak wi amijai chichag nuuwaitjai, tiuwai.
27Nuna aatus chichaak pujai, jintintaiji aidau kaunawajui, nunikag anentai jegagchajui makichik nuwajai chichaak pujau asamtai. Nunikajash makichkish ¿wají iniame? nuniachkush ¿wají pachismea chichame? tusagkesh iniaschajui. 28Nunik nuwak yumi shikitaijin ukuak, yaakat weuwai. Nunik jegaa aents aidaun ujaak:
29—Awi aents pujuma nu ashí wi nunikbaugnak tujutmae, atumesh miní diistajum ¿Cristuchuashit? tau.
30Tutai yaaktanmaya aidauk jiinjag, Jesús pujamunum weajui. 31Nuna nuninai, jintintaiji aidau:
—Maestro, amesh yuwata, tuidau.
32Tama ni ayaak:
—Wi yumainuk ajutui, atumek duka dekatsjume, tau.
33Tutai ditak pempeemtunikiag:
—Tikichiash yuwatnunash itajuawagma, tudayinau.
34Tiagtai Jesús chichajak:
—Mina yutaijua duka, mina awetiuwa nu wakejamuji umigkata tabau nuigtú ni takatji ashimjukta tabauwa nuuwai. 35Atumek: Ajak juutak eke ipaksumat nantu awai, tinu ainagme. Tujash wi tajime: Pagkai diistajum, ajak ajakbauk uminag saigká, juumain wajas awai. 36Ajak juwaamunum takaa duka akiam auwai, nu ajak juukbauwa duka pujut nagkanchaunum atina nuuwai; ajakbauwa nu, juwá nujai shiig aneastinme tabaunum. 37Wagki ju tibauwa juka dekaske: Makichkia nu ajakmawai, tikichia nu juwaawai, tawa nu. 38Wi atumnak, makichkish atum takaschamu aig, juuktajum tusan ishiakbaijime; tikich takaak waittsau ainawai, nuniku aig, atum nu takasbauwa nuiya juukbaijume, tiuwai.
39Nuniai Kuashat samarianmaya nunú yaaktanum pujuidauk, dekaskeapi tiajui, nuwa etsejak: “Wi nunikbaugnak ashí tujutmae”, tiu asamtai. 40Nunikag samarianmaya Jesusan kautuawag, jui jutiijai juwakta tusag segajui. Tima nui jimag tsawan pujusui. 41Nui pujus chichatai niina chichamen antuinak, nuní kuashat dekaskeapi tiajui. 42Nunikag nuwan chichajuinak: Ame timaum duikik dekaskeapi tatsuji, wagki jutiishkam ni chichamuk shiig antugkaji, nuniku asá niimpapita dekas ashí nugkanmayan uwemtijatnuk tusa dekainaji, tiajui.
Suntajá apuji Capernaumnumia uchijin Jesús etsagagbau
43Jimag tsawan pujusá, Jesús Galilea weuwai. 44Wagki Jesús nigki etsegkauwai, “profetak niina nugkenigkik eme anentamak achauwai”, tusa. 45Nunik Galilea jegamtai, nuiya aidauk shiig anentus jukiajui, Jesús Jerusalén pujus fiesta Pascuatin ashí dutikamujin ditashkam fiestatin jegawag wainkaju asag.
46Ataktú Jesús Caná Galilea awa nui jegauwai, ni yumin vino emamua nui. Nuniai Capernaúm pujau makichik rey oficialji, nuna uchijí jaak tepau. 47Nunú, Jesús Judeanmaya Galilea tae tabaun dekaa, jegajua segau, mina uchig ashí jakama nu, jegajui taam etsaentujata tusa. 48Tama Jesús ayaak:
—Aents dutikmainchau iwainamu waintsukek kakajus dekaskeapi tumaitsume, tiuwai.
49Tutai oficial ayaak:
—Apuh, mina uchig jaatsaig jegaami, tau.
50Tama Jesús chichaak:
—Jeemin wakitkita, uchigmik tsagaje, tiuwai.
Tutai dekaskeap Jesusak tawa tusa wakitkiuwai. 51Nunik jeen wakettatman, ni inake aidau igkugkag: —Uchigmik tsagagmae, tusag ujaidau.
52Tiagtai wají horatinia tsagagmae tusa inidau. Tama dita aiinak:
—Yau a la una ai tsuweamunak bichatjame, tuidau.
53Tama uchí apajishkam adeaju, nunú horatin Jesús chichajak: Uchigmik tsagaje, tibauwa nuna.
Nunik nigka ashí ni patayí aidaujai, Jesusai dekaskeapi tiajui.
54Ju jimaja juna wainchatain iwainakua nunak, Jesús Judeanmaya jiinki Galilea jegaa dutikauwai.
Currently Selected:
(Evangelio según San Juan) 4: AGR
Highlight
Share
Copy
Want to have your highlights saved across all your devices? Sign up or sign in
© 2020, Wycliffe Bible Translators, Inc.