Apocalipsis 4
4
Ri yacbal uk'ij ri Dios chila' chicaj
1Q'uisbal c'u re tak wa', xintzu'n chicaj y xinwil jun puerta jakatal che ruwa caj. Y ri Jun, ri cach'aw pacha' uch'awibal trompeta, xch'a't tanchi wuc', jewa' xubi'ij: «Chatak'ana lo wara y Ri'in canc'ut chawe sa' tak ri catajin lok we xic'ow tak wa' wa xbi'x chawe» xcha'. 2Xakic'ate't, ri'in xinc'oji' puk'ab ri Ruxlabixel ri Dios. Xinwil c'u jun tz'ulibal re takanic chila' chicaj y c'o Jun tz'ul chupa. 3Ri Jun tz'ul chupa jela' catzu'nic pacha' ri chomilaj abaj jaspe rubi' y pacha' ri chomilaj cak abaj cornalina rubi'. Ri tz'ulibal sututal rij ruc' jun arco iris lic cawonic jela' pacha' ri chomilaj abaj esmeralda rubi'. 4Yey wa tz'ulibal sutum rij ruc' veinticuatro tz'ulibal chic. Y xinwil veinticuatro nimak winak etz'ul pa ri veinticuatro tz'ulibal, quicojom quik'u' lic sak y c'o corona re oro che ri quijolom. 5Chupa c'u ri tz'ulibal quebel lo uyoc'bal uxe' caj y catataj uch'awibal jab caraklajic y cajininic. Chwach c'u ri tz'ulibal, lic cawolol wukub candil, wa' e ri wukub uwach Uxlabixel re ri Dios. 6Chwach ri tz'ulibal cayenen jun ya' jela' pacha' ri mar y cajuljut upa pacha' chi vidrio. Y ri tz'ulibal sutum rij cuma cajib c'o quic'aslemal pacha' e ángeles yey jela' quetzu'n pacha' awaj y c'o uq'uiyal quiwach chiquij y chiquiwach. 7Ri nabe jela' catzu'nic pacha' juna coj, ruca'm jela' catzu'nic pacha' juna mek', rupalaj rurox jela' catzu'nic pacha' upalaj winak y rucaj jela' catzu'nic pacha' juna águila caxiq'uiq'uic. 8Chiquijujunal wa cajib c'o wakitak quixic'. Y lic c'o uq'uiyal quiwach che ronoje ri quij y ruxe' ri quixic'. Yey na quecos ta c'u che ubi'xiquil chipak'ij chichak'ab:
«¡Lic Santo, Santo, Santo ri Dios Kajawxel,
ri c'o ronoje unimal chuk'ab puk'ab,
ri xex chi c'o lo wi, ri c'o wak'ij ora y ri c'o chikawach apanok!» quecha'.
9Ec'u ri cajib caquiyac uk'ij ri Dios, caquibixoj rubi' y caquiya quikasa'n re tioxibal che ri Jun tz'ul pa ri tz'ulibal re takanic, ri na jinta utakexic ruc'aslemal. 10Ec'uchiri' rique caqui'an wa', ri veinticuatro nimak winak caquixucuba' quib chwach ri Jun tz'ul pa ri tz'ulibal y caquilok'nimaj uk'ij ri na jinta utakexic ruc'aslemal yey caquesaj ri quicorona re oro che ri quijolom y caquiya chwach ri tz'ulibal y jewa' caquibi'ij:
11«Dios Kajawxel, xew Rilal takal che'la
cac'ul la ri yacbal k'ij
ruma lic sa'chi ri chomal la y ri chuk'ab la;
ma Lal x'anaw la re ronoje ri c'olic
y lic e rajawal c'u'x la ri quec'oji' tak wa'
yey ruma ne la' xe'an tak la» quecha'.
Currently Selected:
Apocalipsis 4: acrT
Highlight
Copy
Compare
Share
Want to have your highlights saved across all your devices? Sign up or sign in
© 2009, Wycliffe Bible Translators, Inc. All rights reserved.
