Apocalipsis 18

Rutzakibal ri tinamit Babilonia

1Q'uisbal c'u re wa', xinwil chi jun chic ángel xkaj lo chicaj ruc' unimal uchuk'ab; y ruchomalil ruwonibal xutzij uwi ruwachulew. 2Lic co xsiq'uin che ubi'xiquil:

«¡E la' xtzakic! ¡Xtzak na ri nimalaj tinamit Babilonia! Y wo'ora u'anom quiluwar itzelilaj uxlabixel, quijul ch'ulilaj uxlabixel y quisoc ch'ulilaj tz'iquin ki'tzel quetzu'nic. 3Ma conoje tak ri jujun chic tinamit che ruwachulew ek'abarinak ruma wa tinamit, ri xebumin chupa uq'uiyal mac ruc' rayibal. Conoje c'u ri takanelab che ruwachulew emacuninak ruc'; y conoje tak raj c'ay che ruwachulew ebeyomarinak ma ri tinamit Babilonia ruma ri unimal urayibal lic c'o xulok' chique» xcha'.

4Tec'uchiri' xinta jun chic kulaj xch'aw lo chicaj, jewa' cubi'ij:

«Chixelubi chupa ri tinamit Babilonia, ri'ix ix nutinamit, cha' na qui'an ta iwe'ix cuc' rique y jela' na catzak ta piwi ri'ix ri c'axc'obic cape puwi rire. 5Ma na xa ta jubik' rumac, e tak wa' xaki ule'om chi rib elinak bi c'a chicaj. Yey ri na utz taj u'anom, lic c'o chuc'u'x ri Dios. 6Chitzelej uc'axel che e chirij tak ri na utz taj u'anom chique ri jujun chic; chicalajij ri c'ax puwi' ruma rumac u'anom;#Jer. 50:29 chupa c'u ri copa pa xuyijba' wi ri ya' lic c'a chique jujun chic, ri'ix chicalajij ruc'ayul wa' y chiya'a che. 7Rire lic xu'an nim che rib y lic xuya rib che tak rurayibal; ec'u wo'ora lic chiya'a pa c'ax y pa ok'ej; ma jewa' ri cubi'ij pa ranima': “Ri'in in tz'ulic pacha' in juna reina, yey na in ta malca'n y na cantij tane c'ana ok'ej” cacha'. 8Ruma c'u ri', xa pa jun k'ij cape ri c'axc'obic puwi': wa' e camic, ok'ej y numic; yey ruc' ne ak' caporoxic, ma ri Dios Kajawxel, ri cuk'at tzij puwi', lic c'o uchuk'ab» cacha'.

9Tak ri takanelab che ruwachulew emacuninak ruc' rixok, yey junam ruc' rire quiya'om quib che rukusil ruwachulew y jec'ula' quitz'ilo'm ri quibinic ruc'. Ec'u rique quebok'ic y quetunan puwi rixok echiri' caquil rusibol rire cac'atic. 10Lic chinimanaj quec'oji' pan che utzutzu'xic rixok ruma ruxibriquil ri c'axc'obic c'o wi y jewa' caquibi'ij:

«¡Tok'o' awach! ¡Tok'o' awach at nimalaj tinamit Babilonia, ri lic c'o achuk'ab, ma xa pa jok'otaj xc'un ri k'atbal tzij pawi'!» quecha'.

11Conoje tak raj c'ay che ruwachulew quebok' na y lic caquibisoj ri nimalaj tinamit ma na jinta chi c'o calok'ow re ruq'uiyal quic'ay. 12Wa' e oro, plata, chomilaj tak abaj y perlas; chom tak c'ul lino, chom tak c'ul morato,#18:12 “Morato”: Quil “púrpura” pa vocabulario. chom tak c'ul xela#18:12 “Xela”: Pa caxtila “seda” rubi'. y chom tak c'ul cak; uq'uiyal uwach che' qui' ruxlab; tak ri 'anatal ruc' marfil, ruc' chom tak che', ruc' bronce, ruc' ch'ich' y ruc' abaj mármol; 13yey quic'ay re incienso y cunabal qui' ruxlab, pacha' canela, mirra y olíbano; vino, aceite, harina y trigo; quic'ay que awaj quebekanic, que bexex, que cawayu' y re careta; yey quic'ay ne ticawex e aj chac.

14Jec'uwa' caquibi'ij che ri tinamit: «Ronoje tak ri xarayij uwach na jinta chi awuc'; ronoje tak ri beyomalil lic xe'ec ac'u'x ruc', xsach uwach y na carik ta chi q'uenok» quecha'.

15Ec'u ri e aj c'ay re tak wa', ri lic ebeyomarinak ruma wa tinamit, lic chinimanaj quec'oji' pan che utzutzu'xic wa tinamit ruma ruxibriquil ri c'axc'obic petinak puwi'. Ewi lic cacok'ej lok, 16jewa' caquibi'ij:

«¡Tok'o' uwach! ¡Tok'o' uwach ri nimalaj tinamit, ri pacha' juna ixok uwikom rib ruc' chomilaj uk'u' 'anatal ruc' lino, ruc' c'ul morato y cak; wikital ruc' oro, ruc' chomilaj tak abaj y perlas! 17Ma xa pa jok'otaj xsach uwach ruq'uiyal ubeyomalil» quecha'.

Conoje c'u ri e c'amal uwach barcos, ri quebin pa barcos, ri quechacun pa barcos y tak ri quec'ayin ruc' barcos, chinimanaj quec'oji' wi lo che. 18Ec'uchiri' caquil rusibol wa tinamit cac'atic, lic co quesiq'uin che ubi'xic: «¿C'o nawi juna chic tinamit cajunimax ruc' wa nimalaj tinamit? ¡Na jintaj!» quecha'.

19Y ri winak caquipuc' ulew chwi quijolom ruma quibis, quebok'ic y co quesiq'uinic, jewa' caquibi'ij:

«¡Tok'o' uwach! ¡Tok'o' uwach ri nimalaj tinamit! Ma conoje ri c'o barcos cuc' lic xebeyomar ruc' wa tinamit; yey xa c'u pa jok'otaj xsach uwach ronoje. 20Ri'ix ri ix jekel chila' chicaj, chixqui'cota ruma ri xuc'ulumaj wa tinamit. Chixqui'cot iwonoje ri'ix ri iya'om iwib puk'ab ri Dios, ri ix utako'n y ri ix k'alajisanelab, ma Rire e xk'ataw tzij puwi wa nimalaj tinamit ruma ri xu'an chiwe» quecha'.

21Tec'uchiri', jun ángel lic c'o uchuk'ab xuyac jun nimalaj abaj, runimal wa' e pacha' juna nimalaj ca', y xuc'ak bi chupa ri mar, jewa' cubi'ij:

«Jela' ruwulixic bi ri nimalaj tinamit Babilonia y na quilitaj ta chi uwach.

22»Awuc' ri'at Babilonia, na catataj ta chi uch'awibal arpa, uch'awibal que aj música, uch'awibal su' yey uch'awibal trompeta; na quebilitaj ta chi ne aj chac y na catataj ta chi ne uch'awibal ri ca' cakilowic. 23Na jinta chi ne c'ana ak' cawonic, na catataj ta chi ne c'ana nimak'ij re c'ulaniquil. Ma e tak raj c'ay xec'oji' awuc', e más nim ri quitakanic che ruwachulew. Ruma tak ri itz xa'ano, xesocotaj conoje tak ri tinamit che ruwachulew. 24Yey ri winak re wa tinamit xequicamisaj tak ri k'alajisanelab re ri Dios y rutinamit ri Dios, y xequicamisaj ne uq'uiyal ticawex che tak ronoje ri tinamit re ruwachulew» cacha'.

Currently Selected:

Apocalipsis 18: acrT

Highlight

Copy

Compare