Apocalipsis 14

Ri ciento cuarenta y cuatro mil ticawex caquibixoj jun c'ac' bix

1Tec'uchiri', xinwil ri K'apoj Bexex tac'al chwi ri juyub Sion y ruc' Rire e c'o ciento cuarenta y cuatro mil ticawex, yey che rucurusil ri quipalaj tz'ibital rubi' Rire y rubi' Rukaw. 2Y xinta jun ch'awibal re chila' chicaj catatajic pacha' utza'm ya' echiri' cac'unic y uch'awibal unimal jab; y ri ch'awibal xinto e pacha' uq'uiyal ticawex e ri' caquich'awisaj ri qui arpas. 3Y caquibixoj jun c'ac' bix chwach ri Jun tz'ul chupa ri tz'ulibal re takanic, chiquiwach ri cajib c'o quic'aslemal pacha' e ángeles#Ap. 4:6-8 y chiquiwach ri nimak winak.#Ap. 4:4 Yey ri emajayom re wa bix xew e ri ciento cuarenta y cuatro mil xecolobetaj chiquixo'l ri winak che ruwachulew, ma xew chique rique ya'tal wi caquimaj wa jun bix. 4E tak achijab wa' na xquimin ta quib cuc' ixokib. Rique e queterej chirij ri K'apoj Bexex tob pachawi que'ec wi. Wa' e ri xecolobetaj chiquixo'l ri winak che ruwachulew re quebu'an pacha' ri nabe kasa'n chwach ri Dios y chwach ri K'apoj Bexex. 5Yey na jinta c'ana rak'ubal xtataj chiquichi' ma lic chom ri quibinic quisilabic chwach ri Dios.

Ri caquitzijoj roxib ángeles

6Tec'uchiri', xinwil jun chic ángel caxiq'uic' chicaj. Rire uc'amom lo ri Utzilaj Tzij na jinta utakexic cha' cutzijoj wa' chique conoje ri winak e c'o che ruwachulew, chique conoje tak ri tinamit y conoje ruq'uiyal quiwach tak ri ticawex che ronoje ruq'uiyal uwach ch'a'temal. 7Ri ángel jewa' casiq'uin che ubi'xiquil: «Chixi'ij iwib chwach ri Dios y chilok'nimaj uk'ij ma xopon ru orayil ri k'atbal tzij cu'ano; chiyaca c'u uk'ij ri x'anaw re ruwa caj, ruwachulew, ri mar y tak rac'al pa calax wi lo ri ya'» cacha'.

8Tec'uchiri', xc'un ruca'm ángel jewa' cubi'ij: «¡E la' xtzakic! E la' xtzak ri nimalaj tinamit Babilonia, ri xebuk'abarisaj conoje tak ri tinamit y xebumin pa mac cha' ruc' ri quirayibal caquetz'abej quik'ij cuc' jujun chic na quic'ulel taj» cacha'.

9Tec'uchiri', xc'un rurox ángel y casiq'uin che ubi'xic: «We c'o junok culok'nimaj uk'ij ri nimalaj itzel chicop y ri jun uc'axwach u'anom yey cuc'ul ri retalil che rucurusil rupalaj o che ruk'ab, 10ri' cutij na ri c'axc'obic cape ruma ri royowal ri Dios; y cac'ak c'u bi pa ri ak' cajinow ruc' azufre.#14:10 “Azufre”: Wa' echiri' caporoxic, lic chu ri ruxlab y quebuya pa yabil o pa camic ri ticawex quesikow re. Yey ca'an wa' che chiquiwach tak ri santowilaj ángeles y chwach ri K'apoj Bexex. 11Rusibol wa c'axc'obic cabuklanic quel chicaj y na jinta chi q'uisbal re. Ec'u ri caquilok'nimaj uk'ij ri nimalaj itzel chicop ruc' ri jun uc'axwach u'anom yey caquic'ul ri retalil rubi', chique c'u rique na jinta c'ana uxlanem chipak'ij chichak'ab» cacha'. 12E uwari'che chirajawaxic che rutinamit ri Dios, wa' e ri quitakem Rutzij Upixab ri Dios y lic cubul quic'u'x ruc' ri Kanimajawal Jesucristo, caquichuk'ubej quib chwach tak ri c'axc'obic.

13Ec'uchiri', xinta jun kulaj xch'aw lo chila' chicaj, jewa' cubi'ij lo chwe: «Chatz'ibaj: Chwi c'u wo'ora, lic nim quik'ij calaxic ri quecam chupa rubi' ri Kanimajawal Jesucristo» cacha'.

«Katzij,» cacha ri Ruxlabixel ri Dios, «ma rique quebuxlan che tak ri quichac, yey ronoje ri utzilaj chac qui'anom na casach ta uwach ma caquic'ul rajil uc'axel chila' chicaj» cacha'.

Ri k'atbal tzij cape che ruwachulew

14Tec'uchiri', xinwil jun sutz' lic sak y chwi c'u ri' wa' c'o Jun tz'ulic, quilitajic e Ralaxel Chiquixo'l Ticawex.#Dn. 7:13 Che c'u rujolom c'o jun corona re oro y puk'ab ruc'a'am jun jos#14:14 “Jos”: Wa' que'elok “hoz” pa caxtila. lic c'o re'. 15Chupa c'u ri Rocho Dios xel lo jun chic ángel, jewa' ri casiq'uin pan che ubi'xiquil che ri Jun tz'ul chwi ri sutz': «Cojo la ri jos che tak ri tico'n c'o che ruwachulew ma ya xri'job ruwach; 'ana c'u la ri molonic ma ruk'ijol wa' ya xoponic» cacha'. 16Ec'u ri Jun tz'ul chwi ri sutz' xucoj rujos che tak ri tico'n c'o che ruwachulew y jela' xu'an ri molonic.

17Chupa c'u ri Rocho Dios chila' chicaj xel lo jun chic ángel ruc'a'am jun jos lic c'o re'. 18Xel c'u lo jun chic ángel chwa raltar; rire ya'tal puk'ab catakan puwi ri ak'.#14:18 Wa jun ángel laj e ri cuchajij ri ak' chwi raltar o e ángel ya'tal puk'ab cuya pa c'ax ruwachulew ruc' ak'. Ap. 16:8 Lic co c'u xsiq'uin pan che ri jun c'o ri jos lic c'o re' puk'ab, jewa' cubi'ij pan che: «Chachapa rajos lic c'o re' y chak'ata ri jutak chuya'j uvas che tak ri tico'n re uvas c'o che ruwachulew, ma lic k'an chic» cacha'. 19Ri ángel xuchap rujos y xuk'at ri jutak chuya'j uvas che tak ri rakan uvas c'o che ruwachulew yey xumol uchi' pa capuch' wi; wa' que'elok e pa cuk'at wi tzij ri Dios paquiwi ri ticawex. 20Xpuch'i' c'u ri uva chupa ri puch'ubal c'o lo naj che ri tinamit yey chupa wa' xel lo quic'. Ri quic' xel che, xu'an pacha' ya' cayenenic. Runajtijil rakan ri quic' xumaj trescientos kilómetros yey ruchoyil upa e jun metro ruc' nic'aj.#14:20 “Jun metro ruc' nic'aj”: Pa ri ch'a'tem griego cubi'ij: “Ri quic' xopon ne c'a xe' que' tak ri cawayu', c'a pa cac'oji' wi ri preno chique”.

Currently Selected:

Apocalipsis 14: acrT

Highlight

Copy

Compare