2 Corintios 6
6
1E uwari'che ri'oj, ri oj aj chac re ri Dios, lic cakapixabaj alak: Ma'an alak ri pacha' na il ta uwach ri unimal rutzil uc'u'x ri Dios uc'utum chiwach alak. 2Ma jewa' ubi'im can ri Dios pa Ruch'a'tem:
Chupa ruk'ijol echiri' xajawax to'bal awe, xatinto'o;
Chupa ri k'ij re colobetajic, xatincolobej Is. 49:8
cacha ri Dios.
Cambi'ij c'u che alak: E uk'ijol wa' echiri' ri Dios cubi'tisij ruto'bal; wo'ora e k'ij re colobetajic chique ri ticawex.
Ri kabinic kasilabic ri oj aj chac re ri Dios
3Cakachajij c'u kib chi utz che ri caka'ano cha' na oj ta latz'anel chique jujun chic y jela' na jinta junok cac'akaw bi uk'ij ruchac ri Dios caka'ano. 4Ruc' ronoje ri caka'ano e cakac'utu oj aj chac re ri Dios. Cakacuy c'u ronoje ruc' unimal kac'u'x, tob oj c'o pa c'ax, pa niba'il o pa bis; 5tob cabalac'ux kapa o cojc'am bi pa cárcel, tob caquiyac quib ruq'uiyal winak chikij; tob cakatij c'axlaj chac, cakacuy waram o cakatij numic.
6Yey cakac'utu oj aj chac re ri Dios ma chom ri kabinic, c'o runa'oj ri Dios kuc', c'o unimal kac'u'x y c'axna'bal kac'u'x, c'o ri Santowilaj Ruxlabixel ri Dios kuc' y c'ax quekana' conoje ruc' ronoje kac'u'x.
7Cak'alajinic oj aj chac re ri Dios ma cakatzijoj ri sakil c'utunic, c'o ruchuk'ab ri Dios kuc' y caka'an ri lic usuc' y jec'ula' cakach'ij quichuk'ab conoje ri queyactaj chikij.#Ef. 6:16-17
8Kac'ulum yacbal kak'ij y c'akibal bi kak'ij; e c'o ri chom quech'a't chikij y e c'o ri tzel quech'a't chikij. Cabi'x chike oj aj rak'ul, tob na jinta rak'ubal caka'ano. 9Tob e q'ui queta'am oj aj chac re ri Dios; na ruc' ta c'u ri', e c'o jujun caqui'an pacha' na queta'am ta wa'. Xtewun ne ri camic pakawi'; na ruc' ta c'u ri', c'a oj c'aslic. Tob lic xojya' pa c'ax, pero na oj caminak taj. 10C'o k'ij oj ya'om pa bis; na ruc' ta c'u ri', xaki cojqui'cotic. Na oj ta beyom; na ruc' ta c'u ri', kaya'om rubeyomalil ri Dios chique uq'uiyal ticawex. Wara che ruwachulew na jinta c'o kuc'; na ruc' ta c'u ri', e ri Dios uya'om ronoje ri cajawax chike.
11Alak ka hermanos aj Corinto, ronoje xkak'alajisaj lo chiwach alak, na jinta c'ana xkewaj chiwach alak. Lic kac'utum che alak ri c'axna'bal kac'u'x c'o pa kanima'. 12Eta'am alak ri'oj lic kac'utum ri rutzil kac'u'x che alak, no'j ralak na je ta la' ca'an alak chike ri'oj. 13Ec'u wo'ora quinch'a't uc' alak pacha' alak walc'o'al: Jela' pacha' ri'oj lic kac'utum ri rutzil kac'u'x che ralak, jec'ula' 'ana alak chike ri'oj.
Ka'ana chom che ri kabinic kasilabic ma oj rocho ri Dios
14Hermanos, mac'ulaj ib alak cuc' ri na quicojom ta rubi' ri Cristo, ma ri jusuc' na cuc'ulaj ta rib ruc' ri na jusuc' taj y ri k'ijsak na cuc'ulaj ta rib ruc' ri k'eku'm. 15¿Yey ri Cristo ruc' ri Belial#6:15 “Belial”: Wa' e jun ubi' ritzel winak. c'o nawi utzil chiquiwach? ¿O sa' ri utz curik junok ucojom rubi' ri Cristo che junok na ucojom taj? 16Ri rocho ri Dios na cuc'ulaj ta rib ruc' tak ri tiox. Jec'uri'la' ralak na jinta chi e alak cuc' ri tiox, ma ralak alak rocho ri Dios c'aslic. E pacha' rubi'im Rire:
Quinjeki' cuc' y chiquixo'libal rique quimbin wi.
In c'u Ri'in qui Dios y rique e nutinamit#1 Co. 3:16; 6:19 Lv. 26:12; Ez. 37:27
xcha'.
17E uwari'che ri Dios jewa' cubi'ij pa Ruch'a'tem:
Chixel chiquixo'libal ri e aj mac y chiwesaj iwib cuc'.
Mich'ulaj iwib ruc' ri na chom taj chwach ri Dios,
y jela' Ri'in quixinc'ul chi utz. Is. 52:11; Ez. 20:41
18Quinu'an c'u Ikaw ri',
yey ri'ix quixu'an ix walc'o'al 2 S. 7:14
cacha ri Kajawxel, ri c'o ronoje unimal chuk'ab puk'ab.
Currently Selected:
2 Corintios 6: acrT
Highlight
Copy
Compare
Share
Want to have your highlights saved across all your devices? Sign up or sign in
© 2009, Wycliffe Bible Translators, Inc. All rights reserved.
