1 Timoteo 6

Pixabanic chique raj chac e c'o paquik'ab quipatrón

1Conoje raj chac e c'o puk'ab juna patrón#6:1 “Raj chac e c'o puk'ab juna patrón”: Quil “esclavo” pa vocabulario. e lic quilok'oj uk'ij ri quipatrón che ronoje ri caqui'ano, cha' jela' na jinta junok tzel cach'a't chirij rubi' ri Dios y chirij ri sakil c'utunic. 2Yey we juna aj chac c'o upatrón ucojom chi rubi' ri Cristo, much'obo: «Na chirajawaxic taj can'an ri caraj ri nupatrón ma junam kawach kachak' kib chwach ri Dios.» Na ube taj cuch'ob rakan wa'; ri lic usuc' e chu'ana más chi utz ruchac ma ri cunimaj e jun ucojom rubi' ri Cristo y takal c'u ri' che c'ax cana'ic. Wa' e c'utunic y pixabanic cha'ana ri'at chique ri e aj chac.

Tak ri que'ec quic'u'x ruc' ri beyomal xa re ruwachulew

3We c'o junok junwi ri cuc'utu y na junam ta runa'oj ruc' ri sakil c'utunic re ri Kanimajawal Jesucristo y ruc' ri sakil binic chwach ri Dios, 4ri' na jinta reta'am tob cuch'obo lic c'o una'oj. E ne lic que'ec una'oj chwi tak ch'a'tem na jinta uchac, xa re sachibal na'oj. Y tak wa' cuc'am lo retzelal c'u'x, ch'a'oj, c'axlaj ch'a'tem chiquij jujun chic y na'oj na ube taj chiquij jujun chic. 5Ruma c'u wa', e tak ri winak sachinak quina'oj y na jinta ri K'ijsak cuc', xaki caquitzucuj ch'a'oj chiquiwach. Rique caquich'obo, ri c'aslemal chwach ri Dios e re cu'an beyomab chique. Ma'an c'u awe'at cuc'.

6Pakatzij wi lic c'o cutikoj ri kac'aslemal chwach ri Dios, pero xew we cojqui'cot ruc' ri c'o kuc'. 7Ma na jinta kuc'a'am lok echiri' cojalax wara che ruwachulew y pakatzij wi na jinta cakac'am bi echiri' cojcamic. 8E uwari'che we c'o kawa y c'o kak'u', e chojqui'cota ruc' wa'. 9No'j tak ri lic caquirayij quebu'an e beyomab, ri' lic na c'ayew ta chique quetzak puk'ab ritzel y quechapataj ruma uq'uiyal rayinic na jinta uchac. Yey wa' xew cuc'am lo uq'uiyal c'axc'obic paquiwi rique wo'ora y chikawach apanok. 10Ma ri rayinic re ri puak e cuc'am lo uq'uiyal tak mac. E c'o ne jujun lic e benak quic'u'x ruc' ri puak y ruma wa' quiya'om can ri cubulibal quic'u'x ruc' ri Cristo, y jec'ula' quituquel quiya'om quib pa c'axc'obic.

Pixabanic che ri Timoteo

11No'j ri'at Timoteo, at jun raj chac ri Dios, chatanimaja c'u chwach ronoje tak ri na utz taj. E chatijoj awib che u'anic ri jusuc' y ri utz chwach ri Dios, cubula ac'u'x ruc', chac'utu ri rutzil c'u'xaj, c'ola unimal c'u'xaj awuc' y cha'ana ch'uti'n che awib. 12Chachuk'ubej awib chi utz chupa ri Utzilaj Tzij acojom y e chatoc il che ri c'aslemal na jinta utakexic, ma ruma wa' xatusiq'uij ri Dios y ruma wa' chiquiwach uq'uiyal ticawex xak'alajisaj ri cubulibal ac'u'x ruc' ri Cristo. 13Chupa c'u rubi' ri Dios, ri aj ya'l c'aslemal che ronoje tak ri c'olic, y chupa rubi' ri Kanimajawal Jesucristo, ri na xuxi'ij ta rib che uk'alajisaxic ri K'ijsak echiri' c'o chwach ri aj k'atal tzij Poncio Pilato,#Jn. 18:37; 19:10-11 catintak che wa': 14Cha'ana c'u chi jusuc' janipa ri catutak ri Dios che cha' na jinta c'ana mac carikitaj chawe echiri' cac'un tanchi lo ri Kanimajawal Jesucristo.

15Cac'un c'u ri Jesús chupa ri k'ij cha'tal chi lo ruma ri Dios.

Lic nim uk'ij ri Dios Kajawxel,

ri c'o ronoje takanic puk'ab,

ri Takanel paquiwi conoje ri takanelab,

ri Cajawal que conoje ri e aj wach.

16Xew Rire na jinta jekebal re y na jinta q'uisbal re,

ma ruc'aslemal na jinta utakexic.

Rire jekel pa K'ijsak y ruma ruwonibal na jinta junok cakib ruc'.

Na jinta juna ticawex iliyom uwach y na jinta junok cach'ijow rilic uwach.

Xew c'u che Rire lic takalic cayac uk'ij

y xew puk'ab Rire c'o wi cu'an takanic na jinta utakexic. ¡Amén!

17Chabi'ij c'u chique conoje tak ri beyomab che ruwachulew maqui'an nim che quib, macubi' quic'u'x ruc' ri quibeyomal ma wa' xa caq'uisic; e cubula quic'u'x ruc' ri Dios c'aslic, ri caya'w re ronoje ri cajawax chike cha' cojqui'cot ruc'. 18Chebataka che qui'ana ri utz cha' jela' cac'oji' quibeyomalil chwach ri Dios. Qui'ana c'u uq'uiyal chomilaj tak chac, chesipanok y chequito'o ri na jinta c'o cuc'. 19Jec'ula' ri' e quetajin che uc'olic chila' chicaj ri beyomalil na caq'uis taj, yey lic jiquil uwach caquic'ul wa' chikawach apanok y caquirik quic'aslemal na jinta utakexic.

Q'uisbal uch'a'tem ri Pablo che ri Timoteo

20Timoteo, chachajij chi utz janipa ri ya'tal pak'ab; maya axiquin che tak ch'a'tem na jinta c'o cutikoj che rabinic asilabic chwach ri Dios y maya axiquin che c'utunic cabi'x che lic cuya na'oj tob na e ta c'u ri'. 21Ma e c'o jujun ruma quicojom tak wa', e xquiya can ri be re ri K'ijsak.

Chic'ulu iwonoje ri'ix ri unimal rutzil uc'u'x ri Dios. Amén.

Currently Selected:

1 Timoteo 6: acrT

Highlight

Copy

Compare