1 Juan 4

Ru'anic caketa'maj we juna c'utunic petinak ruc' ri Dios

1Hermanos, lic e q'ui ri k'alajisanelab xa e socoso'nel ebenak pa tak ri tinamit che ruwachulew re caqui'an c'utunic. E uwari'che macoj alak ruch'a'tem junok xew ruma cubi'ij c'o uk'alajisam lo ri Ruxlabixel ri Dios che. Ri 'ana alak e lic ch'obo alak we wa cubi'ij pakatzij wi re ri Dios. 2¿Su'anic caketa'maj we ruc'utunic junok petinak ruc' ri Ruxlabixel ri Dios? Petinak ruc' ri Dios we e cujiquiba' wa': «Ri Jesucristo e Rucha'o'n lo ri Dios yey xu'an achi echiri' xc'un che ruwachulew.» 3No'j we junwi ri cubi'ij, k'alaj c'u ri' ruc'utunic na ruc' ta ri Dios petinak wi, ma e petinak ruc' ri jun cabi'x “anticristo” che; wa' e ri tom chi alak cac'unic yey wo'ora cachacun chi ne che ruwachulew.

4Alak walc'o'al chupa rubi' ri Dios, ralak alak re ri Dios y ch'ijom chi alak quichuk'ab wa' wa k'alajisanelab xa e socoso'nel; ma ri Uxlabixel c'o uc' ralak más c'o uchuk'ab chwa ri jun c'o che ruwachulew. 5Ma rique xa e re ruwachulew, e uwari'che xa re ruwachulew ri caquic'utu; yey tak c'u ri winak re ruwachulew e lic caquitakej ri quic'utunic rique. 6Pero ri'oj oj re ri Dios, yey ri queta'am uwach ri Dios e caquitakej ri kac'utunic ri'oj, no'j tak ri na e ta re ri Dios na caquitakej ta ri kac'utunic ri'oj. Jela' c'u ri' caketa'maj we juna c'utunic petinak ruc' ri Uxlabixel re ri K'ijsak o petinak ruc' ri jun xa socoso'nel.

Ri Dios e aj rutzil c'u'xaj

7Hermanos, lic chirajawaxic wi c'ax kana'a kib chikawach, ma ri rutzil c'u'xaj ruc' ri Dios cape wi. E junok c'o rutzil c'u'xaj ruc', ri' alaxinak pa rubi' ri Dios yey reta'am uwach ri Dios; 8no'j e junok na jinta rutzil c'u'xaj ruc', ri' na reta'am ta uwach ri Dios, ma ri Dios e aj rutzil c'u'xaj. 9Ri rutzil uc'u'x ri Dios xk'alajinic echiri' xutak lo che ruwachulew ri lic xew Uc'ajol ri', cha' ruma Rire cac'oji' kac'aslemal. 10Ri sakil rutzil c'u'xaj cak'alajinic na ruma ta e ri'oj ri c'ax xojna'w re ri Dios, ma e Rire ri c'ax xna'w ke ri'oj nabe y xutak lo Ruc'ajol cha' colu'ya'a rib pakac'axel re tojbal ri kamac.

11Hermanos, ri Dios xu'an wa', c'utubal re ri rutzil uc'u'x chike; ruma c'u ri' chirajawaxic ri'oj c'ax kana'a kib chikawach. 12Na jinta junok iliyom uwach ri Dios; pero we c'ax cakana' kib chikawach, ri' cak'alajinic jekel ri Dios pa kanima' y pa sakil wi c'o ri rutzil uc'u'x Rire pa kanima'. 13Caketa'maj c'u ri', oj c'o puk'ab ri Dios yey Rire jekel pa kanima', ma Rire uya'om ri Ruxlabixel chike.

14Yey ri'oj#4:14 “Ri'oj”: Wa' e ri Juan cuc' ri jujun chic xqueta'maj uwach ri Jesús echiri' Rire xc'oji' wara che ruwachulew. kilom y cakak'alajisaj ri xu'an ri Kakaw: Rire xutak lo Ruc'ajol re quebucolobej conoje ri ticawex. 15E junok cuk'alajisaj: «Ri Jesús e Uc'ajol ri Dios», ri' jekel ri Dios pa ranima' yey rire c'o puk'ab ri Dios. 16Ri'oj keta'am y kacojom ri Dios lic c'ax cojuna'o. Ri Dios e aj rutzil c'u'xaj; ec'u junok c'o ri rutzil c'u'xaj pa ranima', ri' c'o puk'ab ri Dios yey ri Dios jekel pa ranima' rire. 17We ri rutzil uc'u'x ri Dios pa sakil wi c'o pa kanima', ri' lic cubul kac'u'x y na cakaxi'ij ta kib chwa ruk'ijol ri k'atbal tzij, ma jela' pacha' rubinic ri Jesús, jec'ula' cojbin ri'oj wara che ruwachulew. 18We ri rutzil uc'u'x ri Dios c'o pa kanima', na jinta cakaxi'ij kib che, ma ri sakil rutzil uc'u'x ri Dios caresaj ri xi'in ib chike. Pero we junok cuxi'ij rib, e ruma cuna'o cape k'atbal tzij puwi'. E uwari'che we junok c'a cuxi'ij rib, ri' c'amaja' cumaj usuc' pa sakil wi ri rutzil uc'u'x ri Dios.

19Ri'oj c'ax cakana' ri Dios ma e Rire c'ax xna'w ke ri'oj nabe. 20We c'o junok cubi'ij: «Ri'in c'ax canna' ri Dios,» yey tzel caril ri ratz-uchak', ri' xa aj rak'ul. Ma e junok na c'ax ta cuna' ri ratz-uchak' ri caril uwach, ¿su'anic c'u ri' c'ax cuna' ri Dios ri na rilom ta uwach? 21E ri Dios ya'yom wa' wa takanic chike: «E junok c'ax cuna' ri Dios, lic chirajawaxic c'ax chebuna'a ri ratz-uchak'.»#Mt. 22:37-39; Mr. 12:29-31

Currently Selected:

1 Juan 4: acrT

Highlight

Copy

Compare