Tito 1
1
Attho Pablopaꞌ kellkan carta Titokop
1-4Masheñe Tito ñeñtheph eꞌñe parro yameꞌñeñoth eꞌñe ateth nenteneph ñerraꞌmrratheꞌ eꞌñe nechemer nepeneph, na Pablon pekellkëneꞌña añ carta ñeñthen nanak thorretsa Yomporekop. Ñamha napaꞌ ñeñthen Jesucristo poellsensaren. Ñapaꞌ attho llesenserren atthoch nach ameꞌñaterreꞌña allowen acheñeneshaꞌ ñeñth akreꞌth Yompor awathotheñ atthochña ñetpaꞌ oꞌch ameꞌñeret. Ñamha añekop llesensaꞌn atthoch nach eñotaterrawet ñeñth eꞌñe poꞌñoxh ateth poktetsa Partsokop, ñamha nach eñotaterrawet eꞌñe yeyemteñoth ña yañapaꞌ korretsayach yoksheñeshokmañen thayotheñ eꞌñe errponañowen. Tharroꞌmar ñeñthpaꞌ ateth oteney Yompor amaꞌt awathotheñ ñeñthchaꞌ ateth phonay, ñamha yapaꞌ yeñoteñ Yomporpaꞌ ama poenesho poꞌñoñ. Ñeñthoꞌmarña theꞌpaꞌ oꞌ xherr allempo eꞌñe pokteꞌ enteñ ña oꞌch eñotaterrey ña poꞌkowenña. Ñeñthoꞌmarña napaꞌ oꞌ llesenserren Yompor ñeñth Yaꞌkeshphatañer yepen, nach serrpareꞌterreꞌ poꞌñoñ ñeñth ateth otenen. Theꞌpaꞌ eꞌñe newomhchaꞌteñothephpaꞌ oꞌch notaph: Yomporepaꞌchña pebensareꞌtampeneꞌ ñeñth atarr Parets epoet Poechemer Jesucristo ñeñth Yepartseshar yepen ñeñthara Yaꞌkeshphatañer yepen. Ñetepaꞌchña pemoerenaya. Ñetepaꞌchña phokshateneꞌ eꞌñe pha peyoxhro.
Ñeñth poꞌtarwas phaꞌ Tito Yomporekop all anetso Creto
5Theꞌpaꞌ oꞌch notaph, napaꞌ attho nenaꞌnmaph awaña Creto atthoch phach aꞌpoktatyeseꞌ ñeñth palltaꞌyetsa, ñamha phach akraꞌyeseꞌ poesheñaꞌtets ñeñthchaꞌ penaꞌyes allemeñ anetsoꞌmar ñeñthchaꞌ pomporneshaꞌ phaꞌyes ñeñth ameꞌñetsa. Añmapaꞌ ñeñthña ateth notnomoeph awañmoꞌcha. 6Ñeñthchaꞌ pomporneshaꞌ phaꞌyesetpaꞌ añchaꞌ penaꞌyes acheñ ñeñth eꞌñe kowenareꞌ es phaꞌyets, ñeñth amach eñalle atthoch thanmareꞌteña acheñeneshaꞌ. Ñamha ñeñthchaꞌ pomporneshaꞌ phaꞌyesetpaꞌ añchaꞌ penaꞌyes erraꞌtsentheꞌ penten eꞌñe pathrra poethapor pen (ñerraꞌm athaporeth), ñamha erraꞌtsentheꞌ penten amaꞌt poechemereshaꞌpaꞌ eꞌñech ameꞌñaꞌwenet, ñamha poechemereshetpaꞌ amach attheyeꞌ enteñe acheñeneshaꞌ ateth phaꞌyena poꞌpoñexhno acheñeneshaꞌ ñeñth attha koshatseꞌtyenet, ñamha ñeñth ama athpareꞌtetso poechemereshaꞌ. 7Tharroꞌmar ñeñthchaꞌ paꞌmhchaꞌtarether phaꞌ ñeñth ameꞌñetsapaꞌ añchaꞌ penaꞌyes acheñ ñeñth eꞌñe kowenareꞌ es phaꞌyets, ñeñth amach eñalle atthoch thanmareꞌteña acheñeneshaꞌ, tharroꞌmar ñapaꞌ anareth ñach aꞌpoktatyeneꞌ paꞌnamen ñeñth poktetsa Yomporekop. Ñamha ñeñthchaꞌ paꞌmhchaꞌtarether phaꞌyes ñeñth ameꞌñetsapaꞌ amach añeyaye acheñer ñeñth añach pokteꞌ enten oꞌch xhokma phatanet ñeñth ateth moenen eꞌñe ña, ñamha amach xha atsrreꞌmoxhen entweno, ñamha ñeñth ama posaꞌtareꞌtetso, ñamha ñeñth amach orroñatheyaye, ñamha ñeñth ama nanak yeꞌchapretetso kelle ñeñth apenkoxhenoth oꞌch gana. 8Añña eꞌñe pokteꞌ oꞌch amhchaꞌtarethta ñeñth eꞌñe kowen agëneꞌ acheñeneshaꞌ paꞌpakllo, ñamha ñeñth nanak moeneneꞌ oꞌch eꞌñe kowenareꞌ es phaꞌyes, ñamha ñeñth eꞌñe eñoteneꞌ ñeñth kowentetsa, ñamha ñeñth eꞌñe pokteꞌ es phaꞌyets acheñeneshakop ñamha Partsokop, ñamha ñeñth eꞌñech poetpara es phaꞌyen. 9Ñamha ñeñthchaꞌ paꞌmhchaꞌtarether phaꞌyes ñeñth ameꞌñetsapaꞌ eꞌñech yemtenana poktakma añ ñoñets ñeñth eꞌñe poꞌñoxh Yompor poꞌñoñ ñeñth ateth yexhateñet. Allochñapaꞌ ñapaꞌxhoꞌña eꞌñech atthekma yexhatan ñamha poꞌpotantañexhno ñeñth eꞌñe paxharr kothaphñats, ñamha ñeñth eñoteneꞌ atthoch anapoenan eꞌñe kowenakma ñeñth achmhareꞌteneꞌ Yompor poꞌñoñ atthoch ñetpaꞌ amach errothenoth anapeto.
10Tharroꞌmar eñall shonteꞌ ñeñth athpareꞌtets, ñamha ñeñth eꞌñe orrena otatseꞌtyets, ñamha ñeñth shekareꞌtyets. Poꞌñoxh ñeñthpaꞌ ateth pena shonteꞌ judioneshaꞌ. 11Ñeñthoꞌmarña añ palltetsa oꞌwañchaꞌ yexhatyenet poꞌpoñeꞌttsokma kothaphñats. Tharroꞌmar ñetpaꞌ attha nanak moññeꞌtateñet acheñeneshaꞌ pokthaphña; ama poesheñaꞌttsayaya ateth petso amaꞌt allowen ñeñth parro yexhaꞌyenet. Ñetpaꞌxhoꞌña aña yexhatenet ñeñth ama pokteyaye. Ñamha añekpa yexhatenet atthoch ganet kelle, tharraña ñeñthpaꞌ apenkoxhena.
Ñeñth ateth pena kretoꞌmarneshaꞌ
12Poesheñarr kretoꞌmarneshaꞌ ñeñth nanak etsoteneꞌ eꞌñe ñañeñeta pokthaphñetpaꞌ ñeñthña acheñer ama pokteyeꞌ entenano pamoꞌtseshaꞌ ñeñthoꞌmarña ateth oten pamoꞌtseshakop: “Allowen namoꞌts kretoꞌmarneshaꞌpaꞌ ñetpaꞌ xhokma nanak tomaꞌtampeñet pamoꞌtseshaꞌ, ñamha ñetpaꞌ nanak atsrreꞌmñathet eꞌñe atthet ñerraꞌmrratheꞌ berr ñeñth nanak bellak, ñamha nanak kellañtsareret, atarr arakët ama ayetñatheto.” 13Ñeñth ateth aꞌmethampenan pamoꞌts ñeñthpaꞌ eꞌñe poꞌñoxh ateth. Ñeñthoꞌmarña oꞌch notaph, theꞌpaꞌ phach otawet, “theꞌpaꞌ amach alloꞌna ateth sephannaꞌtneno.” Allochñapaꞌ atthoch alloꞌna ameꞌñaꞌnmoet añ kothaphñats ñeñth eꞌñe paxharr, 14ñamha allochñapaꞌ amach alloꞌna eꞌmhñotneññañeto ñeñth poeserrparña peꞌth awathnaneshañ judioneshaꞌ, ñamha allochñapaꞌ amach alloꞌna eꞌmhñotneñe acheñeneshaꞌ ñeñth ateth yexhatyenanet ñeñthchaꞌ ateth pet, tharroꞌmar ñetpaꞌ xhach athpareꞌtenet ñoñets ñeñth eꞌñe poꞌñoxh Yompor poꞌñoñ.
15Ñamha oꞌch señoch: Ñeñth acheñer eꞌñe kowenareꞌ es kothapeꞌchen poeyoxhro Yomporekoppaꞌ ñokoppaꞌ ama es eñalle atthoch sosey enteñ Parets. Tharraña ñeñth nanak sosey kothapeꞌchets poeyoxhro ñamha ñeñth ama ameꞌñetsopaꞌ ñokoppaꞌ ama eñalle ñeñth kowen enten ña. Tharroꞌmar pokthaphñetpaꞌ atarr sosey. Ñeñthoꞌmarña ñetpaꞌ amach xhapaneto poeyoxhro amaꞌt esempo oꞌ phowet ñeñth ama pokteyeꞌ enteno Yompor. 16Ñeñth ateth acheñpaꞌ amaꞌt otenetañ eñoteñetoꞌ Yomporpaꞌ tharraña ñeñth ateth phatseꞌtyenetpaꞌ yeñoteñ ñeñthpaꞌ ama attheyaye. Ñeñth Yomporpaꞌ ama pokteyeꞌ entapretenaneto, tharroꞌmar ñetpaꞌ ama es otapaweto, ñamha ñetpaꞌ ama es sherbeneto amaꞌt mamesha.
Currently Selected:
Tito 1: ame
Highlight
Share
Copy
Want to have your highlights saved across all your devices? Sign up or sign in
© 2014, Wycliffe Bible Translators, Inc. All rights reserved.