San Lucas 3
3
Allempo orrta Juan ñeñth serrpareꞌtosets all amayo
(Mt. 3.1-12; Mr. 1.1-8; Jn. 1.19-28)
1Ñewa, allempo xhap allempoch amhchaꞌtarethta ñamha ñeñth paꞌsoꞌcheñ Tiberio all Romo. Allempo xhap oꞌ amhchaꞌtarethta xharraꞌ poechena amnar char allempoña Judeopaꞌ añ amhchaꞌtarethtatsa ñamha Poncio Pilato. Galileoñapaꞌ añ amhchaꞌtarethtatsa Herodes. Paꞌmoꞌnasheñña Felipepaꞌ ñapaꞌ epa anetsokop amhchaꞌtarethta, ñeñthpaꞌ arr amhchaꞌtarethta Iturea ñamha Traconite. Lisaniasñapaꞌ arr amhchaꞌtarethta Abilinio. 2Ñewa, allempopaꞌ judioneshaꞌ añ poꞌkorneshar penet Anás ñamha Caifás, ñeñth poꞌkorneshar pen ora allowen kornaneshaxhno. Eꞌñe ñeñthe chararokma amhchaꞌtarethetyenet allemeñ anetsoꞌmar eꞌñe allempokma Yomporpaꞌ eñoranaꞌtana ñamha Juan ñeñth Zacarías poechemer ñeñth amayoꞌtsen. 3Ñeñthoꞌmarña Juan allempopaꞌ oꞌ chopeñeꞌchyes errakmañen Jordanasoꞌmar, all serrpareꞌtyesnom. Ñeñthpaꞌ ateth otyesnomanet:
—Theꞌpaꞌ oꞌch sokthapeꞌcherr eꞌñe ello kowen Yomporekop atthoch Yomporpaꞌ oꞌch peretnerrnas allowen soꞌchñar, allochñapaꞌ oꞌch sapatarethterra Yomporekop.
4Ñeñthpaꞌ añ serrpareꞌtatosanet atthoch etsoterra ñoñets ñeñth anareth ñeñth ateth eñoseꞌth awath Isaías ñeñth aꞌmhtayeꞌth Yompor poꞌñoñ. Ñeñth Isaías poꞌñoñ ñeñthpaꞌ ateth oten:
Eꞌmorrterrach poesheñarr poꞌñoñ all amayo allchaꞌña serrpareꞌtaterranña acheñeneshaꞌ. Poerranarothpaꞌ añchaꞌ tomaꞌntaterranet thoñ, ñeñthpaꞌ atethchaꞌ oterranet: “Theꞌpaꞌ oꞌch saꞌkowenetyes thoñ allchaꞌ oñmos Partseshaꞌ, oꞌch eꞌñe saꞌpaxharretyesoñ paꞌtheph.
5All rrapatseꞌtyen patspaꞌ oꞌch eꞌñe saꞌmoepñetyes, all pokmoꞌyaretyenapaꞌ oꞌch eꞌñe saꞌmoepñetwawe, all terepeꞌpharretyenapaꞌ oꞌch eꞌñe saꞌpaxharretyes, all arrorothetyena thoñpaꞌ oꞌch eꞌñe sepampaꞌwawe.
6Allempoña allowen acheñeneshaꞌpaꞌ enteretchaꞌ ñeñth oꞌ moeñerrnay Yompor ñeñthchaꞌ yaꞌkeshphaterreꞌ.” Arrpaꞌ allowa ñeñth ateth akellkareth awathotheñ Cristokop.
7Allempoñapaꞌ shonteꞌ acheñeneshaꞌ waxhaꞌtet Juanesho. Ñetpaꞌ tharroꞌmar waxhenet añ moenenet oꞌch apatapanet Juan Yomporekop. Juanña serrpareꞌtatapanetpaꞌ otapanet:
—Sapaꞌ ama kowenayayso atarr ashkarñathes, xha sottena ñerraꞌmrratheꞌ shechpha sompor sepen. Poꞌñoxhkaꞌ ama eseshayeꞌ sotenaye eꞌñech sapatarethteñotha oꞌch sekeshperra allochñapaꞌ amach koñchatwerrso Yompor allempoch yoroxhtatwer tsapathoneth. 8Napaꞌ añchaꞌña notapas oꞌch sorrtatyes ñeñth eꞌñe kowen enten Yompor ñeñth ateth pena ñeñth poꞌñoxh oꞌ kothapeꞌcherran ello kowen Yomporekop. Sapaꞌ xha soteneñ seyoxhro añoꞌ es sepallteno sapaꞌ añoꞌ eꞌñe seyemtena satañ Abraham. Tharraña napaꞌ oꞌch notas amach ateth sokthapeꞌchatsto tharroꞌmar ñeñthpaꞌ ama esoyeꞌ enteñe Yompor. Tharroꞌmar oꞌch notas ñerraꞌm Yompor moenetseñ amaꞌt añ mapoeꞌ ñeñth senten arr oꞌch aꞌpnasereñ Abraham poꞌmhreneñ. 9Ñeñthoꞌmarña napaꞌ oꞌch notas ñerraꞌm amach sokthapeꞌcherro kowen Yomporekop oꞌ mameshamha oꞌch xhaponasa atthoch koñchaterres Yompor. Oꞌch netmaꞌntatasa ateth ñerraꞌmrratheꞌ allempo oꞌch aꞌmatamochet tsach. Oꞌ eꞌñe onañchachet gach allchaꞌ tet eꞌñe allowa wañen poepallaktar. Ñeñth allowen tsachexhno ñeñth ama kowenayeꞌ meꞌtetsopaꞌ aꞌmataꞌtweretchaꞌ saprrochetchaꞌ all worten tsoꞌ allchaꞌ eꞌñe aꞌpoyatatweret.
10Allempoña acheñeneshaꞌpaꞌ aꞌphthoꞌtyeset Juan, ochet:
—Ñewa, ¿esoꞌtña poktetsaña yokop atthoch eꞌñe yorrtatyes ñeñth kowentetsa Yomporekop?
11Ñañapaꞌ anapanetpaꞌ otanet:
—Ñerraꞌm eseshas echeneꞌ epma seshtam oꞌch saph ñeñth ama echenaye ñeñthchaꞌ chorrena. Ñamha ñerraꞌm eseshas echeneꞌ serrar oꞌch saph ñeñth ama echenaye ñeñthchaꞌ rrenet.
12Allempoña waxhaꞌta ñamha acheñeneshaꞌ ñeñth poꞌtarwas peneꞌ attho cobrenan acheñeneshaꞌ kelle ñeñth gobiernokop. Ñetpaꞌxhoꞌña añekop wenet Juanesho oꞌch apatarethtet Yomporekop. Ñetpaꞌxhoꞌña oꞌ aꞌphthoꞌtoset Juan, ateth otoset:
—Yokop Nomporchaꞌ ¿esoꞌtña poktetsa atthoch yorrtatyes yamha ñeñth kowentetsa Yomporekop?
13Ñañapaꞌ anapanetpaꞌ ateth otanet:
—Ñeñth allpon kelle ñeñth eꞌñe allpona enamoen gobiernopaꞌ eꞌñech allpona secobreñña acheñeneshaꞌ, amachña alloꞌna atarr aton secobraꞌneñe acheñeneshaꞌ kelle ñeñth eꞌñech sokpaꞌna.
14Allempoña patantarr guardianeshaꞌ ñeñth alloꞌtsaꞌyenpaꞌ aꞌphthoꞌtoset ñamet, ñetpaꞌ ateth otet:
—Yokoppaꞌxhoꞌña ¿esoꞌtña poktetsa ñeñthchaꞌ atthoch yorrtatyes yamha ñeñth kowentetsa Yomporekop?
Ñaña anapanetpaꞌ ateth otanet:
—Sapaꞌ amach es seprratamphsatsche acheñeneshaꞌ eꞌñe seꞌmoeñokma ñamha saꞌmethampeñoth eꞌñe seshkëñothpaꞌxhoꞌña amach es seprratamphsatsto eꞌñe atthotha. Ñamha ñeñth allpon tsaꞌtenset gobierneshothpaꞌ eꞌñepaꞌchña ñeñtha kowen sokshena.
15Acheñeneshaꞌñapaꞌ attha koweñet, poeyoxhretoñapaꞌ attha kothapeꞌchyenet xha otenapoetañ Juanpaꞌ ñeñththeꞌña Cristotets ñeñth kowenet awathotheñ ñeñthchaꞌ moeñerranet Yompor. 16Juanñapaꞌ ateth otanet:
—Napaꞌ ama añeyayno ñeñth Cristotets, tharroꞌmar napaꞌ amaꞌt napatensoñ Yomporekop eꞌñe oñochaya napatenes. Tharraña Cristo ñeñthchaꞌ wapatsa chentaꞌpaꞌ ñapaꞌ añchaꞌña chorratossa Parets Poekamkëñ ñeñth ateth ñerraꞌm tsoꞌ. Ñapaꞌ ñeñth atarr awamenkatheshaꞌ, nañapaꞌ ama tama awamenkatheyayno. Ñapaꞌ ñeñthña atarr sherbets, nañapaꞌ ama es nesherbeno atthoch amaꞌt poꞌsapatrexhapaꞌ oꞌch nepyoñ.#3.16 Ñeñth ateth poꞌtarwas peꞌth awath esclavos oꞌch poeyan pamoꞌmteꞌ poꞌsapatrexh. 17Ñapaꞌ atarr awamenkath, ñapaꞌ ñach akrerreꞌ allowen acheñeneshaꞌ. Ñapaꞌ añ tomaꞌntena ñeñth orreneꞌ poeshoshnat alloch shoshnan poꞌtrigo oꞌch eꞌñe poeꞌllomhrochayamha. Ñeñthña poeꞌllomerpaꞌ oꞌch aꞌyapaxheꞌ oꞌch aññoꞌch allekma aññoꞌteñ eꞌñe kowen. Poeꞌsheꞌmarñapaꞌ oꞌch waporeꞌch tso allchaꞌ eꞌñe poywa. Ñeñthña tsoꞌpaꞌ ama emayaꞌpawo amaꞌt errponaña.
18Juanña allpaꞌ ateth serrpareꞌtatyenanet kowen ñoñets ñeñth wetsa Yomporeshoth alloch yekeshperra. Ellonethñapaꞌ shonteꞌ paꞌnamen serrpareꞌtatan acheñeneshaꞌ ñeñth ama pokteyeꞌ enteno Yompor.
Allempo apatarethta Jesús Yomporekop
(Mt. 3.13-17; Mr. 1.9-11)
19-22Allempoña oꞌ atarr apatarethta shonteꞌ acheñeneshaꞌ Yomporekoppaꞌ xho apatarethtatsa ñamha Jesús. Eꞌñe apatarethetwatsapaꞌ oꞌ maꞌyocha. Allempoña maꞌyochenapaꞌ enetñapaꞌ awepaꞌt atorarethta. Allothña eꞌñe sowaꞌnma Parets Poekamkëñ eꞌñe ateth entapet ñerraꞌmrratheꞌ yeph oꞌ sowaꞌnma entoth. Eꞌñe arr xhap Jesúsesho. Xha eꞌmorrtatsa ñoñets entoth ateth eñorena Yompor. Ñeñthña ñoñetspaꞌ ateth oten:
—Phapaꞌ ñeñtheph Nechemereph ñeñtheph atarr nemorrentena, pha atarr nanak nokshateneꞌ.
Allempoña amhchaꞌtareth Herodespaꞌ oꞌ yottamphsatan Juan tharroꞌmar Juanpaꞌ eñotach ama pokteyeꞌ enteñe ñeñth ateth phatseꞌtyena. Amaꞌt paꞌmoꞌnasheñ Felipe poethaporpaꞌ oꞌ yoramper. Amaꞌt shonteꞌ paꞌnamen ñeñth ateth phatseꞌtyena Herodespaꞌ elloñapaꞌ oꞌxhoꞌ yottamphsaterranerr ñamha Juan.
Arrpaꞌ all akellkareth allowen paꞌsoꞌchñexhno ñeñth paꞌtañneshañ pen Jesús
(Mt. 1.1-17)
23Ñewa, Jesúspaꞌ allempo orrta oꞌ thorraꞌmochana ñeñth poꞌtarwas pen Pomporekop, allempoña poꞌcharñapaꞌ ñatoꞌ oꞌtheꞌ xhap maꞌpoch xharraꞌ char. Acheñeneshaꞌñapaꞌ aña pompor phateñet ñeñth José. Ñewa, Josépaꞌ Elí poechemer, 24Elípaꞌ Matat poechemer, Matatpaꞌ Leví poechemer, Levípaꞌ Melqui poechemer, Melquipaꞌ Jana poechemer, Janapaꞌ José poechemer, 25Josépaꞌ Matatías poechemer, Matatíaspaꞌ Amós poechemer, Amóspaꞌ Nahum poechemer, Nawmpaꞌ Esli poechemer, Eslipaꞌ Nagai poechemer, 26Nagaipaꞌ Maat poechemer, Maatpaꞌ Matatías poechemer, Matatíaspaꞌ Semei poechemer, Semeipaꞌ José poechemer, Josépaꞌ Judá poechemer. 27Judápaꞌ Joana poechemer, Joanapaꞌ Resa poechemer, Resapaꞌ Zorobabel poechemer, Zorobabelpaꞌ Salatiel poechemer, Salatielpaꞌ Neri poechemer, 28Neripaꞌ Melqui poechemer, Melquipaꞌ Adi poechemer, Adipaꞌ Cosam poechemer, Cosampaꞌ Elmodam poechemer, Elmodampaꞌ Er poechemer, 29Erpaꞌ Josué poechemer, Josuépaꞌ Eliezer poechemer, Eliezerpaꞌ Jorim poechemer, Jorimpaꞌ Matat poechemer, 30Matatpaꞌ Leví poechemer, Levípaꞌ Simeón poechemer, Simeónpaꞌ Judá poechemer, Judápaꞌ José poechemer, Josépaꞌ Jonán poechemer, Jonánpaꞌ Eliaquim poechemer, 31Eliaquimpaꞌ Melea poechemer, Meleapaꞌ Mainán poechemer, Mainánpaꞌ Matata poechemer, Matatapaꞌ Natán poechemer, 32Natánpaꞌ David poechemer, Davidpaꞌ Isaí poechemer, Isaípaꞌ Obed poechemer, Obedpaꞌ Booz poechemer, Boozpaꞌ Salmón poechemer, Salmónpaꞌ Naasón poechemer, 33Naasónpaꞌ Aminadab poechemer, Aminadabpaꞌ Aram poechemer, Arampaꞌ Esrom poechemer, Esrompaꞌ Fares poechemer, Farespaꞌ Judá poechemer, 34Judápaꞌ Jacob poechemer, Jacobpaꞌ Isaac poechemer, Isaacpaꞌ Abraham poechemer, Abrahampaꞌ Taré poechemer, Tarépaꞌ Nacor poechemer, 35Nacorpaꞌ Serug poechemer, Serugpaꞌ Ragau poechemer, Ragaupaꞌ Peleg poechemer, Pelegpaꞌ Heber poechemer, Heberpaꞌ Sala poechemer, 36Salapaꞌ Cainán poechemer, Cainánpaꞌ Arfaxad poechemer, Arfaxadpaꞌ Sem poechemer, Sempaꞌ Noé poechemer, Noépaꞌ Lamec poechemer, 37Lamecpaꞌ Matusalén poechemer, Matusalénpaꞌ Enoc poechemer, Enocpaꞌ Jared poechemer, Jaredpaꞌ Mahalaleel poechemer, Mahalaleelpaꞌ Cainán poechemer, 38Cainánpaꞌ Enós poechemer, Enóspaꞌ Set poechemer, Setpaꞌ Adán poechemer, Adánpaꞌ Yompor poechemer.
Currently Selected:
San Lucas 3: ame
Highlight
Share
Copy
Want to have your highlights saved across all your devices? Sign up or sign in
© 2014, Wycliffe Bible Translators, Inc. All rights reserved.