San Lucas 13
13
Añ poktetsa yokop oꞌch yokthapeꞌcherr ello kowen Yomporekop
1Allempo wapa poesheñaꞌtets acheñeneshaꞌ Jesúsesho, ñetñapaꞌ serrpareꞌtatoset Jesús ateth entenet ñet; ñeñthpaꞌ ateth otoset:
—Allponsheña ñeñth galileoꞌmarneshaꞌ alloꞌtsaꞌyenet allekma moetsatenet berr ñeñth Yomporekop. Allempoñapaꞌ wapanet ñeñth moeñen amhchaꞌtareth Pilato ñetñapaꞌ xha moetsanatosanet eꞌñe all allempo moetsatenet berr ñeñth Yomporekop. Atthoña ñetpaꞌ allña atsetatseꞌtatarethtet ñet poꞌrras epoet poeberroret poꞌrras.
2Jesúsñapaꞌ ateth otanet:
—Sapaꞌ xhatheꞌ sotenapañ ñeñth galileoꞌmarneshaꞌ allempo ateth apharethtet ñatoꞌ ñetpaꞌ atarrtheꞌ nanak ochñathet ellotheꞌ metanaꞌtweñet allowen poꞌpotantañ galileoꞌmarneshaꞌ poꞌchñaret. Xhatheꞌ sotenapañ ñeñthoꞌmartheꞌña ateth apharethtet ñeñth atarr sosey apenkoxhen. 3Tharraña napaꞌ oꞌch notas: Amaꞌt allowenes samha ñerraꞌm amach eꞌñe kowen sokthapeꞌcherro ello Yomporekop, sapaꞌxhoꞌña atthekmach seperra sechenkaꞌwerrach eꞌñe poktakma. 4Ñamha ñeñth xharraꞌ ñeñth poechetsa posoksheña ñeñth kollaꞌwatsa awaña ñeñth aꞌtpetseꞌt pokoll torrepoꞌ allempo mataꞌnerr Jerusaléño eꞌñe all oteñet Siloé. Ñewa, sapaꞌ xhatheꞌ sotenapañ ñeñth aꞌkllaterr torrepaꞌ ñetpaꞌ atarrtheꞌ athparñathet ellotheꞌ metanaꞌtweñet allowen poꞌpotantañ ñeñth attho athpareꞌtena jerusaléñoꞌmarneshaꞌ. 5Tharraña napaꞌ oꞌch notas: Amaꞌt allowenes samha ñerraꞌm amach eꞌñe kowen sokthapeꞌcherro ello Yomporekop, sapaꞌxhoꞌña atthekmach seperra sechenkaꞌwerrach eꞌñe poktakma.
Arrpaꞌ all tomaꞌntatanet Jesús ateth pena partech ñeñth ama meꞌtetso
6Allempoña Jesúspaꞌ alla tomaꞌntaterraneterr poꞌpocheño, ñeñthpaꞌ ateth oterraneterr:
—Poesheñarr acheñ all poenaremhmopaꞌ allñapaꞌ awañmoꞌchotheñ nareꞌtatenan ñamha poecharr partech.#13.6 Ñewa, Jesús añ tomaꞌntatanet higo ñeñth poenaremh penet all paꞌnyo. Attheñapaꞌ xhap allempo wapa eꞌnosñañ poeꞌmer. Tharraña amaꞌt poemharrapaꞌ ama entosñañe poeꞌmer. Partayechpaꞌ ama meꞌteno. 7Allempoñapaꞌ ateth otan ñeñth kowampeneꞌ poenaremhmaꞌ: “Theꞌpaꞌ oꞌ met maꞌpa char xhokma nowena eꞌneneꞌ partech poeꞌmer. Themeꞌttsen amaꞌt poemharra poeꞌmerpaꞌ ama nenteññañe. Theꞌpaꞌ oꞌch phaꞌmater tharroꞌmar eꞌñe orrena kexhkareꞌtennay yepatseñ attho ama yenareꞌteno poꞌpoñ narmets all.” 8Tharraña ñeñth kowampeneꞌ narmetspaꞌ ateth otan pamoꞌmteꞌ: “Allach nomporchaꞌ añ char ñeñth oꞌ werrerrpaꞌ napaꞌ oꞌch naꞌmoeñtsetampes pats oꞌch nenoñ amar. 9Ñatoꞌrraña ateth nepeꞌpaꞌ oꞌch kowen meꞌt tsapath charo. Tharraña ñerraꞌm ama meꞌtopaꞌ pokteꞌñaxhoꞌ allempopaꞌ oꞌch phaꞌmatater.”
Attho Jesúspaꞌ aꞌkrraterran koyaneshaꞌ ñeñth attha moꞌkëtsa amaꞌt añe yethro allempokma amesenet
10Allempo xhapaꞌmoenerr allempo amesenet, Jesúsñapaꞌ yexhatenanet judioneshaꞌ poꞌpraweto. 11Allñapaꞌ alloꞌtsen poesheñarr koyaneshaꞌ ñeñth xha moꞌkëna, ama eshkayeꞌ paxharrteno. Ñeñthpaꞌ oneñeth ateth phateneꞌ. Awathotheñ attha pena oꞌ xharren char poechena posok attha moꞌkëna. 12Jesúsñapaꞌ all eñchpaꞌ oꞌ xhoreꞌtospaꞌ ateth och:
—Noxha theꞌpaꞌ pasaterrephchaꞌ ñeñth attho atarr pemoeroxhtena.
13Allempoñapaꞌ aꞌphllamkoꞌch. Aꞌphllamkoꞌtweꞌpaꞌ allorokma eꞌñe kowen paxharrterra. Ñañapaꞌ atarr ayeꞌchoxhtaterran Yompor. 14Allempoña ñeñth amhchaꞌtarethtetsa all judioneshaꞌ poꞌprawo, ñapaꞌ allempo entan ateth oꞌ aꞌkrratan Jesús atsnañeth, ñañapaꞌ ñeñtha atarr atsrreꞌmateꞌ. Amaꞌt mameshapaꞌ ama pokteyeꞌ eñche oꞌch aꞌkrratan acheñ ñeñthe yethro allempo amesenet. Ñeñthoꞌmarña ñapaꞌ ateth otan acheñeneshaꞌ:
—Eñall pechapmat yeth allempo pokteꞌ oꞌch yetarwasen. Ñeñthpaꞌ pokteꞌ oꞌch sewapa allempo atthoch saꞌkrrater atsnañeth. Tharraña añ yethro allempo yamesen amach sewapatsto aꞌkrrateꞌ atsnañeth.
15Partseshaꞌñapaꞌ ateth och:
—Sapaꞌ ñeñthes eꞌñe sommoꞌcheñothpaꞌ atarr seshkareꞌten. Sapaꞌxhoꞌña amaꞌt añe yethro allempokma yamesen xhokma setarwasen samha. Sepyampeñ sewaksher, sashanor allekma serrateñ oꞌch sanemh ñamha oño allchaꞌ sonayeñ oñ. 16Añ koyaneshaꞌ amaꞌt ñeñth poꞌmhreneñ pen yatañ Abraham amaꞌt xharraꞌ poechena posok char ñeñth allponmat oꞌ wankër oneñeth, pokteꞌkaꞌye oꞌch yaꞌrroyatater amaꞌt añe yethro allempo yamesen.
17Acheñeneshaꞌ allowen ñeñth eꞌmoñeꞌteneꞌ ñetpaꞌ ñeñthña atarr penkatawet. Poꞌpotantañña acheñeneshaxhnopaꞌ ñetñapaꞌ atarr nanak koshenet. Atarr nanak kowen entenet ñeñth ateth pha Jesús.
Attho Jesúspaꞌ tomaꞌntaterranet ateth pena poeꞌllomer ñeñth otenet mostazllomh
(Mt. 13.31-32; Mr. 4.30-32)
18Ñeñthoꞌmarña allempopaꞌ alla oterraneterr:
—Añ Yompor poꞌkowenña ñeñth attho ayochreshathtena ña, ñanompaꞌ eꞌñech poesheñaꞌttsa ameꞌñaꞌyestsa, allempotheññapaꞌ alloꞌnach sen atonetnomtsa ñeñthchaꞌ ameꞌñerrtsa atthochña eꞌñe epaꞌwerra errakmañen Yompor poꞌkowenña. Ñeñthña theꞌpaꞌ oꞌch netmaꞌntatasa ñeñth ateth pena ña. 19Ñewa, ñeñthpaꞌ ateth pena ñerraꞌmrratheꞌ poeꞌllomer ñeñth atarr añetholleshallmerr ñeñth otenet mostazllomh. Ñeñth poeꞌllomhrethollpaꞌ poesheñarrñapaꞌ oꞌ anemh paꞌmro allchaꞌ nareꞌteñaꞌ. Eꞌñe allponmatatsapaꞌ oꞌ chop, ñeñthñapaꞌ alloꞌna sen rrorranmats eꞌñe kowen atarrchetnom. Ñeñthña narmetsocherpaꞌ oꞌch waxhaꞌtoña othexhno ñeñthchaꞌ amaꞌtanatyesosets poetakroꞌmar.
Attho Jesúspaꞌ tomaꞌntaterranet ñeñth ateth pena chaseꞌ
(Mt. 13.33)
20Elloña alla oterraneterr:
—Poꞌpoñoneth oꞌch netmaꞌntatasa ñeñth ateth pena Yompor poꞌkowenña ñeñth attho atarr ayochreshathtena ña. Ñeñthpaꞌ amaꞌtchaꞌ añetholla ñeñthchaꞌ ñanom orrtatsa tharraña eꞌñe ña poꞌwamenkothpaꞌ mamethollapaꞌ oꞌch eꞌñe epaꞌwa ora errapharen.
21Ñeñthpaꞌ añ tomaꞌntaterraneterr ateth pena chaseꞌ:
—Ñeñth chaseꞌpaꞌ allo tsetenan koyaneshaꞌ harinaꞌ ñeñth oñetsetstaten atthoch aꞌchasatan harinaꞌ eshekchaꞌ eꞌñe aꞌmoesatwe. Ñeñthña chaseꞌpaꞌ amaꞌtchaꞌ añetholla net, amaꞌtchaꞌ aton harinaꞌ ñeñth maꞌpa arroga, mamethollapaꞌ oꞌch eꞌñe aꞌmoesatwanña amaꞌt atarr aton harinaꞌ.
Attho Jesúspaꞌ tomaꞌntaterraneterr ñerraꞌmrratheꞌ yetarrothollo yebeꞌthen eshekchaꞌ yexhap Yomporesho
(Mt. 7.13-14, 21-23)
22All oñemyen Jesús eꞌñe ora aswawanom allowen anetsoꞌmar all shontaꞌyena acheñeneshaꞌ amaꞌt ñamha all ama tama eñalleyaye acheñeneshaꞌ. Allña eꞌñe serrpareꞌtatyesnomanet. Allempo oñemyen allemeñ anetsoꞌmar ñapaꞌ arr sen Jerusaléño all sechena. 23All oñen thoñopaꞌ allempoña poesheñarrpaꞌ aꞌphthoꞌtnomh, ateth och:
—Ayochreshathe, ñeñthchaꞌ allpon aꞌkeshphatarethterrtsapaꞌ taꞌm ñetpaꞌ ¿poesheñaꞌttsetatheꞌ ñatoꞌ amapaꞌ atarrchaꞌ shonteꞌ?
Jesúsñapaꞌ ateth och:
24—Sapaꞌ añchaꞌña eꞌñe kowen semaꞌyoxhrena ñeñth kowen enten Yompor atthochña seswanom ñeñth ama kowenayeꞌ enteno ña. Ñeñthpaꞌ oꞌch netmaꞌntacha ateth ñerraꞌmrratheꞌ allchaꞌ yebeꞌthos eshekchaꞌ yexhap ñesho ñeñthpaꞌ atarr añetholl, atarr thorrapoꞌ oꞌch yebeꞌthos all. Ñamha oꞌch notas esempowañen amaꞌtchaꞌ shonteꞌ acheñeneshaꞌ ñeñthchaꞌ atarr moenatseñ oꞌch beꞌtherretañ all atthoch xherretañ Yomporesho tharraña allempopaꞌ amach eshek beꞌtherreto atthoch xherret all tharroꞌmar allempopaꞌ oꞌch wañerr attho atarr koweney Yompor. 25Ñeñthpaꞌ oꞌch netmaꞌntacha ateth ñerraꞌmrratheꞌ esempo oꞌch xhen ñeñth apakllatheshaꞌ ñañapaꞌ oꞌch tantwena oꞌch eꞌñe echarr yottampeswena. Allempopaꞌ amaꞌt eꞌñe eseshapaꞌ amach eshek beꞌthosoña all. Allempoña amaꞌtchaꞌ shonteseñ oꞌch sewaxhaꞌta all petothach sechorros allothchaꞌ sexhoreꞌtos apakllatheshaꞌ. Allña sapaꞌ atethchaꞌ sotos: “Ayochreshathe petoramphsapoey.” Ñapaꞌ atethchaꞌ otapas: “Napaꞌ ama nentarso, erroththeꞌ sewenaña sa.” 26Sañapaꞌ atethchaꞌ sotererr: “Amaꞌt parrokma yerrallmeꞌchyeseꞌtheña awañmoꞌcha ñamha amaꞌt ya yaꞌnetsroꞌmar allekma chopeñeꞌchyenet allkaꞌyeña peyxhatyeseꞌth.” 27Tharraña ñapaꞌ atethchaꞌ oterrserr: “Theꞌpaꞌ oꞌch notas, napaꞌ amakaꞌye poꞌñoxh nentarso, erroththeꞌ sewenaña sa. Theꞌpaꞌ orrerres arroth neshoth allowenes ñeñthes maꞌyoxhrenaya ñeñth ama pokteꞌ enteno Yompor.” 28Oꞌch awes all ñeñth oꞌpatatenset sa. Allñapaꞌ allchaꞌ seyawanrrortosa, sanmoeñoth atserrpaꞌ serrasoꞌtyesoschaꞌ sas. Allothchaꞌña sentosña satañneshaxhno —Abraham ñamha Isaac ñamha Jacob ñamha allowen ñeñth aꞌmhtaꞌyesayeꞌth Yompor poꞌñoñ. Ñetñapaꞌ eꞌñe Yomporeshoꞌtsaꞌyenet all amhchaꞌtarethtena ña. Sañapaꞌ chaꞌpetothaña waporeꞌtenset. 29Allñapaꞌ allemhatheñchaꞌ waxhaꞌta shonteꞌ ñeñth ama judioneshayaye ñeñthchaꞌ anorrxhaꞌtyesosets all eꞌñe Yomporesho all amhchaꞌtarethtena ña allchaꞌ rrallmeꞌchoset all eꞌñe kowentena Yompor. 30Theꞌpaꞌ señochchaꞌ eñall acheñeneshaꞌ ñeñth ama asherbenayeꞌ senteno sa theꞌ tharraña allempoña ñetpaꞌ atarrchaꞌ asherben enterranet Yompor. Ñamha eñall acheñeneshaꞌ ñeñth atarr asherben sentyen sa theꞌ, tharraña allempoña ñetpaꞌ amach asherbenayeꞌ enterraneto Yompor.
Attho Jesúspaꞌ poellkëñothan jerusaléñoꞌmarneshaꞌ atarr yaꞌnaꞌtenanet
(Mt. 23.37-39)
31Eꞌñe ñeñthe yethrokma allempo waxhaꞌtoña patantarr fariseoneshaꞌ. Ñetñapaꞌ ateth otoset Jesús:
—Theꞌpaꞌ oꞌch peyeta arroth tharroꞌmar amhchaꞌtareth Herodespaꞌ oꞌpatenpha awoꞌch moetsataph.
32Jesúsñapaꞌ ateth otapanet:
—Oꞌch awerrespaꞌ atethchaꞌ sotwer Herodes ñeñth atarr eñoteneꞌ shekëñets: “Theꞌpaꞌ oꞌch peñoch, napaꞌ attherach nekaxhpatateññañ acheñeneshaꞌ poꞌneñether ñamha attherach shonteꞌ naꞌkrratyes ñeñth atsnaꞌtyets. Ateth nepena theꞌ, tsapathonethpaꞌxhoꞌña atthekmach nepena, oꞌchña tsapathontherrerrpaꞌ oꞌch eꞌñe netsotatwe allowen.” 33Nokoppaꞌ añ poktetsa xhokmach nesen amaꞌt theꞌ, amaꞌt tsapathonethpaꞌxhoꞌña, amaꞌt ñamha oꞌch tsapathontherrerrpaꞌ xhokmach nesen. Atthothach nexherr Jerusaléño, tharroꞌmar allpaꞌ allekma xhokma moetsayeseteꞌth ñeñth aꞌmhtaꞌyesayeꞌth Yompor poꞌñoñ.
34Allempoña Jesús eꞌñe poellkëñoth judioneshaꞌpaꞌ ateth eñorena ñokpoet, ñeñthoꞌmarña ateth otanet:
—Sa jerusaléñoꞌmarneshachaꞌ ñeñthes moetsanatyesayeꞌth ñeñth aꞌmhtaꞌyesayeꞌth Yompor poꞌñoñ, sa ñeñthes rrollapechyesayeꞌth ñeñth amñareth sesho. Atarr atonocheꞌtats nemneñeñ oꞌch naꞌyapaxhaꞌwerrsoñ allowenes nesho atthoch eꞌñe kowen nekwampensoñ. Nemneñeñ oꞌch naꞌyapaxhaꞌwerres ateth ñerraꞌmrratheꞌ atollop aꞌyapaxheneꞌ poechoyoreshaꞌ oꞌch eꞌñe setoꞌtwanet. Tharraña sañapaꞌ amaꞌt eꞌñe mameshapaꞌ amaña semno. 35Theꞌñapaꞌ all seyxhena sa, Yomporñapaꞌ oꞌch aꞌypoꞌñerres. Tharroꞌmar theꞌpaꞌ oꞌch alla noterrserr: Na poꞌpocheñopaꞌ amach alla senterrno theꞌ. Esempowañenñapaꞌ senterrenchaꞌ allempoñapaꞌ atethchaꞌ soterren: “Ayeꞌchoxhtatpawepaꞌch Jesucristo ñeñth wapatsa ñeñth llesensen Yeyomporer.”
Currently Selected:
San Lucas 13: ame
Highlight
Share
Copy
Want to have your highlights saved across all your devices? Sign up or sign in
© 2014, Wycliffe Bible Translators, Inc. All rights reserved.