San Juan 17
17
Allempo Jesúspaꞌ maꞌyochampenana poeyochreshaxhno
1Allempoña ateth otwanet añexhno Jesúspaꞌ allentha kowaꞌ enonethpaꞌ, ñeñthpaꞌ ateth otan Pompor poemaꞌyocheñoth:
—Apachaꞌ, theꞌpaꞌ oꞌ xhapona allempoch etsota ñeñth nokop. Theꞌpaꞌ pekowentatonepaꞌch na tharroꞌmar Pechemer pepenen allochña napaꞌxhoꞌña nekowentatonaphchaꞌ phamha. 2Attho phapoen llesenspaꞌ alloña pomnaren nepeñña allowen acheñeneshaꞌ. Allochñapaꞌ allowen acheñ ñeñth phoꞌpatatenna, naña ñetpaꞌ napoenanetchaꞌ alloch ñetpaꞌ korretsetach poksheñeshokmañen thayotheñ eꞌñe errponañowen. 3Añmapaꞌ ñeñthña alloch ñetpaꞌ korretsetach thayotheñ eꞌñe errponañowen ñerraꞌm esempo eñoterrpet pha ñeñtheph phapoeth eꞌñe poꞌñoxh Yomporetets ñamha ñerraꞌm eñoterrnet na ñeñthen Jesucristo pha pellsensaren.
4‘Napaꞌ oꞌ eꞌñe nekowentatwonaph arr patsro. Oꞌ eꞌñe netsotwonaph ñamha petarwas ñeñth ateth photen. 5Theꞌña, Apachaꞌ, pekowentaterrnanepaꞌch eꞌñe alla pesho eꞌñe ateth allempo atarr aꞌkowentatarethen pesho awath allempo ama eñalletenaꞌ añ pats.
6‘Allowen acheñ ñeñth neyochreshaꞌ pephatenen nañapaꞌ añ neñotatenanet ñeñth ateth pepena pha tharroꞌmar ñetpaꞌ ñeñthet eꞌñe allpona phoꞌpatatna arr patsro. Ñetñapaꞌ pepaꞌtña oꞌpatenawet ñeñthchaꞌ neyochreshaꞌ pephaten namha. Theꞌña ñetpaꞌ eꞌñe ameꞌñerrnapet peñoñ. 7Ñamha ñetpaꞌ eꞌñe eñotweñet allowen ñeñth ateth neꞌñorenanet ñamha ñeñth es norrtatyenanetpaꞌ ñeñthpaꞌ eꞌñe ora peshothekma wena. 8Napaꞌ añña neꞌñorenanet ñeñth ateth photenen pha. Theꞌña ñetpaꞌ eꞌñe kowen ameꞌñennet. Ñamha eꞌñe poꞌñoxh eñoteñet napaꞌ eꞌñe peshoth nowapa, pha ñeñtheph nellsenserreꞌ.
9‘Theꞌña napaꞌ oꞌch nemaꞌyochampesnomanet ñet. Ama allowenakpayeꞌ acheñeneshaꞌ arr patsro nemaꞌyochenpho, eꞌñe añekpa nemaꞌyochenpha ñeñth neyochreshaꞌ pephatenen tharroꞌmar ñetpaꞌ ñeñthareta peyochreshaꞌ pepen phamha. 10Tharroꞌmar allowen ñeñth eꞌñe nokmapaꞌ phapaꞌxhoꞌña eꞌñe phokma. Ñeñthña eꞌñe phokmapaꞌ napaꞌxhoꞌña eꞌñe nokma. Ñetña theꞌpaꞌ eꞌñe kowentatapretennet.
11‘Theꞌña nokoppaꞌ oꞌ xherrmoch eꞌñech ñeñtheshaña añe patsroꞌtsenen tharroꞌmar napaꞌ oꞌch alla awerren pesho. Tharraña ñetpaꞌ alloꞌtsenaretach arr patsro. Pha Apa Partso, pekwamphsepaꞌch allowen ñeñth neyochreshaꞌ pephatenen. Pewamenkothchaꞌña pekwamphsanet. Allochña ñetpaꞌ oꞌch eꞌñe parrokmatet eꞌñe ateth yepena yamha. 12Allempotheñ eꞌñe parroꞌtseney phoña pewamenkoth nekwamphsaneteꞌth. Napaꞌ xhokma nemoñenanet. Ñeñthoꞌmarña amaꞌt poesheñarrotheta ñetpaꞌ ama naꞌchenkataneto, ñapthaña chenka añ ñeñth oꞌpatena chenkëñets. Ñeñthpaꞌ atthochña Apa etsoterra peñoñ ñeñth anwareth awathotheñ.
13‘Tharraña theꞌ napaꞌ oꞌch awerren pesho. Napaꞌ añekopña neñen añexhno añ patsro atthoch ñetpaꞌ atarrchaꞌ kosherret poeyoxhreto eꞌñe ateth nokshena na. 14Napaꞌ añ neꞌñoranaꞌtenanet ñeñth eꞌñe pho peñoñ. Acheñeneshaꞌña ñeñth ama ameꞌñetso añ patsro, ñetñapaꞌ xha eꞌmoñeꞌtenanet tharroꞌmar ñetpaꞌ ama alloꞌna parroꞌmarneshateneto ñeñth ama ameꞌñetso, ateth nepena namha ama neparroꞌmarneshatenaneto. 15Ama añeyeꞌ nenamoenpe atthoch phawenanetaꞌ añ patsroth, añña nenamoeneph oꞌch pekwamphsanet. Amach pemnatatsche oneñeth oꞌch alla aꞌpoerrataterranet. 16Ñetpaꞌ ama alloꞌna parroꞌmarneshateñeto ñeñth ama ameꞌñetso arr patsro ateth nepena namha ama neparroꞌmarneshatenaneto. 17Pameꞌñeñothet pha peñoñ phaꞌkowentamphsanetepaꞌch eꞌñe phokop. Pha peñoñpaꞌ ñeñthña eꞌñe poꞌñoxh ama shekëñtsoyaye. 18Attho pha pemñan na arr patsro, theꞌña napaꞌ oꞌch nemñanet ñamet atthoch serrpareꞌtatyeset acheñeneshaꞌ arr patsro. 19Ñeñthoꞌmarña ñokpoet nañapaꞌ oꞌ naꞌrroyerra phokop, atthochña ñetpaꞌxhoꞌña aꞌkowentatarethterretchaꞌ Partsokop. Ñeñthpaꞌ eꞌñe poꞌñoxh ateth photeney pha peñoñoth ama shekëñtsoyaye.
20‘Tharraña amach eꞌñe añekpa nemaꞌyocho ñeñth eꞌñe neyochreshaꞌ nepen theꞌ, añekpaꞌnachña nemaꞌyochampesnoma allowen ñeñthchaꞌ nameꞌñerraya tsapathoneth eꞌñe neyochreshaꞌ poꞌñoñoth. 21Allochña allowenetpaꞌ parrokmatetchaꞌ ateth pepena pha Apa eꞌñe peparrokmatennana ñamha napaꞌ eꞌñe neparrokmatennapha. Allochña ñetpaꞌ oꞌch eꞌñe parrokmaterryet eꞌñe parro epay. Atthochña acheñeneshaꞌña arr patsropaꞌ ñetñapaꞌ eñoteretchaꞌ pha ñeñtheph nellsenserreꞌ. 22Ateth pepena pha pekowentapretenna napaꞌxhoꞌña eꞌñe nekowentapretenanet ñet, atthothchaꞌña ñetpaꞌ eꞌñech parrokmatet ateth yepena yamha eꞌñe yeparrokmaten. 23Napaꞌ neparrokmatenanet, phañapaꞌ peparrokmatenna. Allochña allowenetpaꞌ eꞌñech parrokmatwenet eꞌñe poktakma. Atthoch acheñeneshaꞌ arr patsro ñetpaꞌ eñoteretchaꞌ phapaꞌ pha nellsenserreꞌ. Ñamha eñoteretepaꞌch phapaꞌ atarr pemorrentenanet eꞌñe ateth atarr pemorrentenna na.
24‘Apachaꞌ, allowen ñeñth peyochreshaꞌtatenna na, napaꞌ añ nemnen erroꞌtsenenchaꞌ ñetpaꞌxhoꞌña alloꞌtsenakmayepaꞌchña eꞌñe parro. Allochñapaꞌ atthoch enterrnanet nekowenña allo oꞌ alla pekowentaterren na, tharroꞌmar phapaꞌ pemorrentenna allempotheñ ama ayexhkatarethtenaꞌ añ patser. 25Apa, pha ñeñtheph eꞌñe pokteꞌ es pets, acheñeneshaꞌ ñeñth ama ameꞌñetso arr patsro ñetpaꞌ ama eñotenpeto. Nañapaꞌ eꞌñe poꞌñoxh neñoteneph. Añña ñeñth eꞌñe neyemtenaya ñetñapaꞌ eñotenpet phapaꞌ pha nellsenseneꞌ. 26Napaꞌ naña eꞌñe eñotatenawet ñet ñeñth ateth pepena pha. Ellopaꞌ allach neñotaterraneterr. Allochñapaꞌ ñetpaꞌxhoꞌña eꞌñech morrentannaꞌterret eꞌñe ateth pepena pha atarr pemorrentenna na. Atthochña napaꞌ eꞌñech neparrokmatenanet ñet. Ñeñthpaꞌ allowach nemaꞌyochapha, Nompore.
Currently Selected:
San Juan 17: ame
Highlight
Share
Copy
Want to have your highlights saved across all your devices? Sign up or sign in
© 2014, Wycliffe Bible Translators, Inc. All rights reserved.