San Lucas 6
6
Allempo Jesús poeyochreshaꞌ tasoꞌtampesyesnomoet trigo añe yethro allempokma amesen judioneshaꞌ
(Mt. 12.1-8; Mr. 2.23-28)
1Allempoña xherrerr allempo xhokma amesen judioneshaꞌ. Allempoña Jesúspaꞌ arr oñem chetsoꞌmar epoet poeyochreshaxhno. Allempo oñenet chetsoꞌmar poeyochreshaꞌñapaꞌ tasoꞌtampesyesnomoet poechmhaꞌtets trigo aꞌsheꞌchallmeꞌchyesnomet atthoth rrokllomeꞌchachet oꞌ rraꞌyesnomet. 2Ñeñthña patantaꞌtets fariseoneshaꞌpaꞌ cheꞌptareꞌtanet, ateth otarethtet:
—Esoꞌmareꞌtña ateth sepena ñeñth ama pokteyaye oꞌch ateth yepha tharroꞌmar theꞌpaꞌ añe yethro ñeñth ateth anareth awathotheñ allempokmach yamesen.
3Jesúsñapaꞌ otanet:
—Sapaꞌ amaꞌtrra selleyareña añ ñoñets all oten ñeñth ateth pha awath David allempo cheporraꞌnma epoet ñamha allowen ñeñth kotheneꞌ. 4Ña allempopaꞌ beꞌthosos Yompor paꞌpakllo, allñapaꞌ chetosan pan ñeñth atmaꞌntatareth ateth ñerraꞌmrratheꞌ ñeñth nenet all Partsokop. Ñewa, ñeñth panpaꞌ ama pokteyayñe oꞌch eseshaꞌ rreꞌ. Ñeñthpaꞌ añach ñapoeth rreneꞌ kornaneshaxhno; ñeñthpaꞌ eꞌñe ateth anwareth judioneshakop. Ñeñthña panpaꞌ oꞌ chetos David, rros, rratosan ñamha allowen ñeñth epoet.
5Allempoña alla oterraneterr Jesús, ñeñthpaꞌ ateth otanet:
—Ñeñthoꞌmarña theꞌpaꞌ oꞌch notas, na Ñeñthen Acheñetosets ñeñthen allsensarethen, nakaꞌye ateth otets estheꞌ poktetsaña ñeñthchaꞌ ateth yepha añe yethro allempokma yamesen.
Allempo Jesúspaꞌ aꞌkrraterran ñeñth chelletsa pot
(Mt. 12.9-14; Mr. 3.1-6)
6Allempoñapaꞌ xherrerr poꞌpocheño ñeñth yethñatsro allempokma amesenet. Jesúsñapaꞌ beꞌthoswenerr judioneshaꞌ poꞌprawo. Allñapaꞌ yexhatyeswenanerr acheñeneshaꞌ. Allñapaꞌ alloꞌtsen ñamha poesheñarr yakma ñeñth xha chellena pot poꞌkowenroth. 7Acheñeneshaꞌña ñeñth atarr etsotayenayeñ ñoñets ñeñth ateth anareth epoet ñamha fariseoneshaꞌ ñetña allpaꞌ Jesúsa atarr kowanaꞌtyenet atthoch enteñeterr ñatoꞌrraña oꞌch aꞌkrratenanerr acheñ añe yethro allempokma amesenet. Ñerraꞌm oꞌch aꞌkrratenanerr amaꞌt poesheñarra acheñ añe yethro allempo amesenet, allempoñapaꞌ eshekchaꞌ aꞌmethampeñetaꞌ amhchaꞌtarethesho. 8Jesúsñapaꞌ eñotanet ñeñth ateth kothapeꞌchatseꞌtyenet poeyoxhreto. Ñañapaꞌ ateth otan yakma ñeñth chelletsa pot:
—Aphon phathomos arrma.
Yakmaña wapapaꞌ oꞌ thomos all rroxho. 9Jesúsñapaꞌ ateth otanet:
—Ñewa, napaꞌ oꞌch naꞌphthoꞌtas: ¿Erraꞌtsenaꞌtña ñeñth eꞌñe pokteꞌ senten ñeñthchaꞌ ateth yepha añ yethro allempo yamesen? Ñatoꞌ oꞌch ateth yepeꞌ eꞌñe kowen poꞌpsheñeñ, amapaꞌ ñatoꞌ oꞌch ateth yepoñ ñeñth ama pokteyaye. Ñatoꞌ añtheꞌ pokteꞌ senten oꞌch yaꞌkrrach acheñ amapaꞌ añtheꞌ pokteꞌ senten amach yaꞌkrratatsche xhachña yemtsatach.
Ñetñapaꞌ amaꞌt poesheñarrothetapaꞌ ama eseshayeꞌ anapoenaye entaye.
10Ñañapaꞌ kowaꞌyesan allowen ñeñth anorrxhets all, allempoñapaꞌ otan ñeñth chelletsa pot:
—Theꞌpaꞌ oꞌch notaph: Petapoerr phot.
Eꞌñe otweꞌpaꞌ ñañapaꞌ allenthepaꞌtchaꞌ tapoerran pot, oꞌ eꞌñe kowenterra pot. 11Fariseoneshaꞌñapaꞌ ñeñthña atarr atsrreꞌmatawet. Allempoñapaꞌ kothapeꞌchatannaꞌtet, atarr oꞌpachet Jesús.
Allempo Jesúspaꞌ akran xharrasheña ñeñth poechetsa epsheña ñeñthchaꞌ llesensaꞌ
(Mt. 10.1-4; Mr. 3.13-19)
12Allempoña Jesúspaꞌ oꞌ alla awerrerr aꞌyo aspentho allchaꞌ maꞌyochenaꞌ. Allñapaꞌ arepen maꞌyochaya Pompor. 13Tsapathña poetarenpaꞌ agotaꞌmoenan allowen ñeñth poeyochreshaxhno pen. Allempo xhaxhaꞌtet ñeshopaꞌ ñañapaꞌ oꞌ akrapan ñeñth xharrasheña ñeñth poechetsa epsheña ñeñthchaꞌ llesensaꞌ ñeñthchaꞌ serrpareꞌtyetsaꞌ allemeñ anetsoꞌmar. 14Ñeñth llesensaꞌ ñeñthpaꞌ añexhno: Simón ñeñth socherr Pedro, allothpaꞌ ñamha paꞌmoꞌnasheñ Andrés, allothpaꞌ Jacobo#6.14 Jacobopaꞌ ñeñthara ñeñth sochenet Santiago. ñamha paꞌmoꞌnasheñ Juan, allothpaꞌ Felipe, ñamha Bartolomé, 15ñamha Mateo ñamha Tomás ñamha Jacobo ñeñth Alfeo poechemer, ñamha ñeñth poꞌpsheñeñ Simón ñeñth cananistaneshaꞌ ñeñth atarr thorratseꞌth paꞌnetsrekop, 16allothpaꞌ ñamha Judas#6.16 Judaspaꞌ ñeñthara sochenet Tadeo. ñeñth Jacobo paꞌmoꞌnasheñ, allothpaꞌ ñamha poꞌpsheñeñ Judas Iscariote ñeñthchaꞌ pomoerreꞌ tsapathoneth Jesús.
Allempo Jesúspaꞌ yexhatenan shonteꞌ acheñeneshaꞌ
(Mt. 4.23-25)
17Allempoña werra Jesús aspenthoth epoet poeyochreshaꞌ, thomxhaꞌtwerret all aspeneth pakñeꞌthpener poño poꞌmopñero. Allñapaꞌ oꞌ xhaxhaꞌt shonteꞌ poꞌpotantañ acheñeneshaꞌ ñeñth poeyochreshaꞌ pen. Ñamha alloꞌtsaꞌyen shonteꞌ acheñeneshaꞌ ñeñth waxhetsa allemeñ anetsoth —Judeoth ñamha Jerusaléñoth, ñamha saꞌpatophñoꞌmarneshaꞌ ñeñth wetsa Tiroth ñamha Sidónoth. Ñetpaꞌ añekopña waxhenet oꞌch eꞌmhñoteret ñamet Jesús ñeñth ateth serrpareꞌten ñamha añekpaꞌnaña waxhenet atthoch aꞌkrratyesapanet Jesús patsnañetheret. 18Amaꞌt ñamha allowen ñeñth moeroxhtatyen oneñeth ñañapaꞌ eꞌñe aꞌkrratyeswapanet. 19Allowenña acheñeneshaꞌpaꞌ atarr moeneñet oꞌch aꞌphlloset Jesús tharroꞌmar ñapaꞌ ña atarr awamenkatheshaꞌ, eꞌñe ña poꞌwamenkoth aꞌkrratyenan allowen acheñeneshaꞌ.
Attho atarr kosheñtsoꞌtsaꞌyen patantarr ñamha atarr llekëñtsoꞌtsaꞌyen poꞌpotantañ
(Mt. 5.1-12)
20Allempoña Jesúspaꞌ kowaꞌyesan ñeñth poeyochreshaꞌ pen, ñañapaꞌ ateth otanet:
—Ñeñthes atarr wokchañneshaꞌ entetsa ñeñtheschaꞌña atarrchaꞌ kosheñtsoꞌtsaꞌyenes tharroꞌmar sapaꞌ oꞌpataterrsach Yompor poꞌkowenña attho atarr ayochreshathtena ña.
21‘Ñamha sapaꞌ ñeñthes cheporrareꞌtyetsa theꞌ ñeñtheschaꞌña atarrchaꞌ kosheñtsoꞌtsaꞌyenes tharroꞌmar Yomporchaꞌña eꞌñe señmataterreꞌ.
‘Ñamha sapaꞌ ñeñthes yawetsa theꞌ eꞌñe sellkëñoth ñeñtheschaꞌña atarrchaꞌ kosheñtsoꞌtsaꞌyenes tharroꞌmar Yomporchaꞌña eꞌñe secheꞌtaterreꞌ soksheñoth.
22‘Ñamha sapaꞌ atarr kosheñtsoꞌtsaꞌyenes ñerraꞌm esempo eꞌmoñeꞌtenset noꞌmar ñerraꞌm esempo moeñoꞌtenset, ñerraꞌm esempo poesasareꞌteñothetas sochatseꞌtenset tharroꞌmar sapaꞌ na sameꞌñena Ñeñthen Acheñetosets. 23Allempo ateth penset ñeñth ama kowenayaye, sañapaꞌ sokshepaꞌch nanak ñamha señochepaꞌch shonteꞌ ñeñth oꞌpatatensa Yompor poeꞌntaño ñeñthchaꞌña atarr sokshaterreꞌ. Ñewa, ñetpaꞌ paꞌtañneshañpaꞌ atthekma moeroxhtatyeseteꞌth ñamha ñeñth aꞌmhtaꞌyesayeꞌth Yompor poꞌñoñ awath.
24‘Tharraña theꞌpaꞌ oꞌch notas sa ñeñthes atarr ekhllayorethes ñeñthes echeneꞌ ora allpon ñeñth eꞌñe sokpa. Sapaꞌ ñeñtheschaꞌña atarr llekëñtsoꞌtsaꞌyenes tharroꞌmar esempopaꞌ wañerrchaꞌ ñeñth sokshateneꞌ.
25‘Ñamha atarr llekëñtsoꞌtsaꞌyenes ñeñthes atarr esokmañen es echyets allo eꞌñe señmatena seyeteñoth. Xherrchaꞌ allempoch atarr sepallterra ñeñthchaꞌ serrar seperr.
‘Ñamha atarr llekëñtsoꞌtsaꞌyenes sa ñeñthes theꞌpaꞌ eꞌñe soksheñeshaꞌ secheꞌtatsetyena. Xherrchaꞌña allempoch seyawerra sellkëñoth.
26‘Ñamha atarr llekëñtsoꞌtsaꞌyenes ñerraꞌm esempo allowen acheñeneshaꞌ eꞌñech kowen entapretenset, eꞌñe kowen eñosyenet sokop. Tharroꞌmar ñetpaꞌ ateth peteꞌth paꞌtañneshañ awath, eꞌñe kowen eñosyeseteꞌth añ acheñreneshakop ñeñth amaꞌt ama Yomporeyeꞌ poꞌñoñ aꞌmhtaꞌyeseteꞌthe.
Attho Jesúspaꞌ yexhatosanet amorrentpoꞌch yeñch ñeñth yeꞌmoñeꞌtyeneꞌ
(Mt. 5.38-48; 7.12)
27‘Sa ñeñthes neꞌmhñoteneꞌ oꞌch notas ñeñthchaꞌ ateth sepha eꞌñe kowen, semoeryach amaꞌt ñeñth seꞌmoñeꞌteneꞌ. Oꞌch ateth sepeꞌ eꞌñe kowen. 28Ñamha amaꞌt erraꞌtsen ñeñth sarrnomareꞌtenaya sañapaꞌ oꞌch senamaterrñañ Yompor paꞌnateña. Ñamha ñeñth sesasareꞌteneꞌ sañapaꞌ oꞌch semaꞌyochampenanet. 29Newa, ateth ñerraꞌm esempo eseshaꞌ poeꞌmoñeꞌteñothetas oꞌch takllaset setsaꞌpo, sañapaꞌ poktepaꞌchña señch takllerrserrepaꞌ ñamha poꞌpshemhtañoth. Ñamha ñerraꞌm esempo eseshaꞌ seprratamphseꞌ seshtam, sañapaꞌ poktepaꞌchña señch poerratamphsasetepaꞌ seshtam ñeñth moenenet amaꞌt ñamha poꞌpmañ seshtam allo sepmatena. 30Ñerraꞌm eseshaꞌ es senamoeneꞌ sañapaꞌ sapepaꞌch amaꞌt esesha. Ñamha ñerraꞌm eseshaꞌ seyoratsreꞌtamphseꞌ sañapaꞌ amach alla senamatstere apoerrsetepaꞌ alla. 31Ñewa, ñerraꞌm erraꞌtsentheꞌ eꞌñe kowen senten ñeñth semnen sa ñeñthchaꞌ ateth phonas poꞌpsheñeñ, sapaꞌxhoꞌña eꞌñech atthekma sephanet samha.
32‘Ñamha sa ñerraꞌm aña semorrentena ñeñth atarr semorrentenaya samha, ñeñthpaꞌ amach eꞌñeyeꞌ sorrtatenoña ñeñth eꞌñe poꞌñoxh kowentetsa, tharroꞌmar ñeñth ama ameꞌñenayo Yompor ñetpa aña morrentenet ñeñth eꞌñe morrentenawet ñamet. Añña atarr kowentetsa amaꞌt ñeñth ama yemorrentenayepaꞌ oꞌch yemorreñcha eꞌñe kowen. 33Ñamha ñerraꞌm aña eꞌñe kowen seyenpaꞌyen ñeñth seyenpaꞌyeneꞌ samha, ñeñthpaꞌ ama eꞌñeyeꞌ sorrtatenoña ñeñth eꞌñe poꞌñoxh kowentetsa, tharroꞌmar ñeñth ama ameꞌñenayo Yompor ñetpaꞌ aña yenpaꞌyenet ñeñth yenpaꞌyenawet ñamet. 34Ñamha ñerraꞌm añekpa es sartannaꞌtyena atthoch ellopaꞌ oꞌch alla apoerrset samha, ñeñth ateth sepenapaꞌ ama eꞌñeyeꞌ sorrtatenoña ñeñth eꞌñe poꞌñoxh kowentetsa; añchaꞌña es saretyena poꞌpsheñeñ amaꞌt ñetpaꞌ amaꞌtchaꞌ ama apoerrseto amaꞌt koñeꞌtha, tharroꞌmar ateth pena ñeñth ama ameꞌñenayo Yompor ñerraꞌm eñoteñet oꞌch alla aparethterret ñamet eshekchaꞌña archet poꞌpsheñeñ. 35Tharraña napaꞌ oꞌch notas, sapaꞌ añeꞌnachña semorrentena amaꞌt ñeñth seꞌmoñeꞌteneꞌ. Ñamha sapaꞌ añeꞌnachña seyenpoen amaꞌt ñeñth ama seyenpoenaye. Ñamha sapaꞌ añeꞌnachña es saretyena amaꞌt ñeñthchaꞌ ama sapoerraye. Ñerraꞌm atethchaꞌ sepha Yomporñapaꞌ apoerreschaꞌ ello ñeñthchaꞌ atarr sokshatwerreꞌ. Ñapaꞌ allempoch eꞌñe poechemer perres, ñeñthara Yompor Ñeñth Nanak Parets. Tharroꞌmar ñapaꞌ añeꞌnaña moerena amaꞌt ñeñthchaꞌ ama koshaterraye ña, ñeñthara ñeñth ama kowenayeꞌ es petso. 36Sapaꞌxhoꞌña atarrepaꞌchña semoerannaꞌta eꞌñe ateth pena ñeñth Yeyomporer yepen atarr moerenya yamha.
Eꞌñe atthothapaꞌ amach yotteñeꞌchannaꞌtatsto
(Mt. 7.1-5)
37‘Sapaꞌ amach sotatsche poꞌpsheñeñ “ama pokteyaye ñeñth ateth sephaꞌyena”, allochñapaꞌ amach otwerrso samha Yompor ama pokteyaye ñeñth ateth sephaꞌyena samha. Ñamha eꞌñe atthothapaꞌ amach sottheñeꞌchatsche poꞌpsheñeñ allochñapaꞌ Yomporpaꞌxhoꞌña amach otteñeꞌchwerrso samha, xhochña eꞌñe kowen sephretnannena allochñapaꞌ Yomporpaꞌxhoꞌña eꞌñech kowen peretnaꞌwerres samha. 38Ñamha sapaꞌ eꞌñech kowen es sapannaꞌtyena allochñapaꞌ Yomporpaꞌxhoꞌña eꞌñech kowen es apoerres samha. Shonteꞌch nanak es apoerres, ateth ñerraꞌmrratheꞌ xho es eꞌchorratenset soshako ateth ñerraꞌm xhop eꞌchareth. Oꞌch chorrapaꞌ oꞌch aꞌrrapoet eshekchaꞌ eshaꞌtereterr poꞌpoñ, ñerraꞌm oꞌch chorrerrerrpaꞌ oꞌch paꞌshmoet atthoch eꞌñe aꞌthamoꞌyonaset. Ñeñthpaꞌ añ tomaꞌntena attho es apoeney Yompor nanak aton. Ñamha errponchaꞌ saph poꞌpsheñeñ, sapaꞌxhoꞌña eꞌñech allpon apoerres samha Yompor.
39Allempoña Jesúspaꞌ ateth tomaꞌntaterraneterr, ñeñthpaꞌ ateth otanet:
—Ñeñth aporoꞌyethpaꞌ ñapaꞌ amach errothenoth echaꞌnmano poꞌpsheñeñ ñeñth parro aporoꞌyethekmoet. Tharroꞌmar ñerraꞌm ateth penet, ñerraꞌm arrorothontha echaꞌnmannaꞌtnomoetpaꞌ epsheñoꞌmaret xhach shoraꞌnmoet arrorotho. Arrpaꞌ allowa ñeñth ateth tomaꞌntatanet ateth ñerraꞌm ya allempo ama yokthapeꞌcherraꞌ ñeñth kowentetsa Yomporekop amach errothenoth yokthapeꞌchache poꞌpsheñeñ ñeñth ama eñotenaye ñeñth kowen enten Yompor.
40‘Ñeñth ayxhatarethtetsapaꞌ amaꞌt poesheñarra amach errothenoth metanetoña ñeñth allpon eñoten ñeñth yexhateneꞌ. Amaꞌt allempo eꞌñe ayxhatarethtapaꞌ eꞌñech allpona yexhaꞌ ñeñth allpon eñoten ñamha ñeñth yexhateꞌ. 41-42Amach ateth sentatsche poꞌpotantañ ñerraꞌm ñetpaꞌ ama kowenayeꞌ es peneto amaꞌt sapaꞌ ama sentenoña ñeñth ateth sephaꞌyena sa; ñeñthpaꞌ ello semhtaneñña poꞌpotantañ ñeñth ateth es phaꞌyenet ñet. Ñerraꞌm ama kowenayeꞌ es sepeno samhapaꞌ amach sotatscheña poꞌpotantañ: “Masheñchaꞌ napaꞌ oꞌch nokthapeꞌchaterreph eꞌñe kowen.” Tharroꞌmar ñerraꞌm ateth sepenapaꞌ xha sommoꞌchena. Ñanomchaꞌña añ sewaporeꞌterr ñeñth ama kowenayeꞌ sepeno sa, allochñapaꞌ atthoch señoch kothapeꞌchateꞌ samoꞌts eꞌñe kowen. Ñeñthpaꞌ añ tomaꞌntena oꞌch senten poꞌpsheñeñ paꞌklloyoꞌtsen poepachña amaꞌt sa seklloyopaꞌ alloꞌtsen tsach; ñeñthñapaꞌ ama senteñe. Ñerraꞌm atethpaꞌ amach errothenoth socheña poꞌpsheñeñ: “Masheñchaꞌ napaꞌ oꞌch nechterrnaph peklloyoth pepachña.” Tharroꞌmar añ tsach ñeñth seklloyoꞌtsenpaꞌ xha aꞌnpoennasña atthoch eꞌñe kowen es sentyen. Ñanomchaꞌña añ sewaporeꞌterr tsach seklloyoth allochñapaꞌ atthoch eꞌñe kowen es sentyen. Atthochña eꞌñe kowen sechterrñañ poꞌpsheñeñ poepachña paꞌklloyoth.
Allowen acheñ ñeñth eꞌñe poꞌñoxh kowen acheñer, ñetñapaꞌ añchaꞌ orrtatyenet ñeñth eꞌñe kowenareꞌ
(Mt. 7.17-20; 12.34-35)
43‘Tharroꞌmar allowen acheñ ñeñth eꞌñe poꞌñoxh kowen acheñer, ñetñapaꞌ añchaꞌ orrtatyenet ñeñth eꞌñe kowenareꞌ. Tharraña poꞌpotantañ acheñeneshaꞌ ñeñth poꞌñoxh ama kowenayaye ñetñapaꞌ añach orrtatyenet ñeñth ama kowenayaye. Ñeñthpaꞌ atethchaꞌ netmaꞌntaterrsa: Ora allowen ñeñth eꞌñe kowen narmetsoch, poeꞌmerpaꞌxhoꞌña eꞌñech kowenareꞌ. Añña poꞌpchañexhno narmetsoch ñeñth ama kowenayayepaꞌ poeꞌmerpaꞌxhoꞌña amach eꞌñe kowenayaye. 44Ñeñthoꞌmarña atthoña yeñoten erraꞌtsentheꞌ ñeñth eꞌñe kowenareꞌ narmetsoch ñamha ñeñth ama kowenayaye, poeꞌmerothña eꞌñe yechmeꞌteñ. Ñamha yapaꞌ eꞌñe yeñoteñ ama arrotheyeꞌ yethokënoña lloꞌm ajchoth. Ñamha ama arrotheyeꞌ yethokënoña ap rrenagachoth.#6.44 Ñewa, Jesús añ tomaꞌntatanet uva ñamha higo ñeñth poenaremh penet all paꞌnyo. 45Amaꞌt erraꞌtsena acheñer ñeñth eꞌñe poꞌñoxh kowen, ñapaꞌ añchaꞌña orrtaten ñeñth eꞌñe kowenareꞌ kothapeꞌchen poeyoxhro tharroꞌmar poeyoxhro allña shonteꞌ kothapeꞌchenan ñeñth kowentetsa. Tharraña poꞌpoñ acheñer ñeñth poꞌñoxh ama kowenayaye, ñapaꞌxhoꞌña añach orrtaten ñeñth ateth kothapeꞌchen poeyoxhro ñeñth ama kowenayaye tharroꞌmar poeyoxhro allña shonteꞌ paꞌnamen kothapeꞌchenan sosyaꞌtsañ. Tharroꞌmar ñerraꞌm shonteꞌ yokthapeꞌchen yeyoxhro ñeñth kowentetsa, ñeñthpaꞌ eꞌñech ñeñtha kowen yeserrpareꞌten. Tharraña ñerraꞌm shonteꞌ yokthapeꞌchen ñamha yeyoxhro ñeñth ama kowenayayepaꞌ ñeñthpaꞌxhoꞌña eꞌñech ñeñtha yemnen oꞌch yeserrpareꞌteñ.
Attho Jesús tomaꞌntatana acheñ ñeñth eꞌñe eñoteneꞌ ñeñth poꞌñoxh sherbets ñamha ñeñth ama eñotenaye ñeñth sherbets
(Mt. 7.24-27)
46‘Sapaꞌ esoꞌmarwañakaꞌyeña sotenen napaꞌ Saꞌyochreshatheroꞌ sepenen, sapaꞌ amakaꞌ xhoyeꞌ sameꞌñenno ñeñth ateth oꞌ notwas. 47Allowen erraꞌtsenchaꞌ wapatsa nesho ñeñthchaꞌ nameꞌñenaya na ñamha ñerraꞌm eꞌmhñotennanet neñoñ ñeñth ateth kowen neyxhatenanet ñerraꞌm ateth eꞌñe penet, ñetñapaꞌ atarrchaꞌ eñotenet ñeñth eꞌñe poꞌñoxh sherbets. 48Ñeñth acheñer ñeñth ateth petsa oꞌch netmaꞌntacha ateth ñerraꞌmrratheꞌ poesheñarr yakma ñeñth atarr es eñotets ñeñth thomateneꞌ pokoll ñeñth eꞌñech echarr penan paꞌpakëll. Ñañapaꞌ atarrchaꞌ oꞌpono eñan pats atthoch eꞌñe echarr phan poꞌkellpach. Attheñapaꞌ oꞌ xhap allempo apellchena oñ, pokollñapaꞌ ama aꞌmato apellcheꞌ tharroꞌmar kellpachpaꞌ atarr womenk athomatareth. 49Tharraña poꞌpotantañ ñeñth eꞌmoeneꞌ neñoñ ñetña ñerraꞌm ama attheyeꞌ peneto ñeñth ateth notenanet, ñetñapaꞌ eꞌñech atthet ñerraꞌmrratheꞌ poesheñarr yakma ñeñth ama es eñoto. Ñapaꞌxhoꞌña oꞌ thomataneñ paꞌpakëll tharraña ñañapaꞌ ama atarr oꞌponoyeꞌ eñanoña pats atthoch eꞌñe echarr phan poꞌkellpach. Allempoñapaꞌ apellcha oñ apellcheꞌñapaꞌ xhepaꞌtchaꞌ aꞌmatamphsos paꞌpakëll. Pokollñapaꞌ eꞌñe poktakma moelloꞌtstosa.
Currently Selected:
San Lucas 6: ame
Highlight
Share
Copy
Want to have your highlights saved across all your devices? Sign up or sign in
© 2014, Wycliffe Bible Translators, Inc. All rights reserved.