2 Corintios 1
1
Attho Pablopaꞌ alla kellkërranerr carta añekop ñeñth ameꞌñetsa anetso Corinto
1Masheñneshachaꞌ ñamha noxhaneshachaꞌ ñeñthes allowenes ameꞌñenaya Yompor ñamha eꞌñe sameꞌñeñoth xhokma sapxhena Yomporekop all anetso Corinto. Ñamha añ cartapaꞌ añekpaꞌnaña nekellkëñ allowenakop ñeñth oꞌ poeyochreshaꞌ perranet Parets ñeñth apxhaꞌyetsa allemeñ anetso Acayoꞌmar. Na Pablon oꞌch alla nekellkërrnaserr poꞌpoñ carta epan masheñ Timoteo. Napaꞌ ñeñthen Jesucristo poellsensaren tharroꞌmar ateth moenen Yompor. 2Theꞌpaꞌ eꞌñe newomhchaꞌteñothes sa napaꞌ oꞌch notas: Yomporepaꞌchña sebensareꞌtampeneꞌ ñeñth nanak Parets epoet Poechemer Jesucristo ñeñth Yepartseshar yepen. Ñetepaꞌchña sokshateneꞌ eꞌñe sa seyoxhro allowenes.
Yomporpaꞌ ñachña xhokma yokshateneꞌ allempo es yewenoya
3Ayeꞌchoxhtaterrapoꞌch Yompor, ñeñthara ñeñth Pompor pen Yepartseshar Jesucristo. Ñeñthara Yompor ñeñth atarr amoeraña, ñeñthchaꞌ xhokma yokshaterreꞌ allempo es yellkateneꞌ yeyoxhro. 4Ñerraꞌm esempo wennaya paꞌnamen ñeñth amoeroxhtatañtetsa ñapaꞌ ñachña xhokma yokshaterreꞌ. Tharroꞌmar oꞌ koshaterrey Yompor, allochña yapaꞌxhoꞌña atthoch yeñoteñ oꞌch yokshater yamha masheñneshaꞌ ñerraꞌm esempo wapanet ñamet ñeñthchaꞌ moeroxhtatawet. Añ poktetsa oꞌch yokshaterranet ñet attho Yomporpaꞌ oꞌ koshaterrey yamha. 5Attho nanak yemoeroxhtapreteña Cristo tharraña ñachña ello atarr yokshaterreꞌ. 6Ñeñthoꞌmarña theꞌpaꞌ oꞌch notas, ñerraꞌm esempo nemoeroxhtena na, ñeñthpaꞌ eꞌñe poꞌñoxh sokop, tharroꞌmar ñerraꞌm esempo nemoeroxhtena napaꞌ ñeñthpaꞌ alloch soksherra samha atthothchaꞌña sekeshperra. Ñamha ñerraꞌm esempo koshaterren Yompor ñeñthpaꞌxhoꞌña alloch nokshaterres samha. Allochñapaꞌ eꞌñe soksheñeshokmañen xhokmach saꞌwanten allowen moeroxhteñets ñeñth ateth nepena na. 7Ñeñthoꞌmar napaꞌ neñotenes xhokmach saꞌwantaꞌ ñeñth echarr senten. Tharroꞌmar napaꞌ neñoteñ ñerraꞌm allpon semoeroxhtapretna, elloña allempopaꞌ oꞌch alla eꞌñe sokshapreterrna attho Yomporpaꞌ ñachña xhokma yokshaterreꞌ.
8Ñewa, theꞌpaꞌ nemneñ oꞌch masheñneshachaꞌ señoten ñeñth ateth nemoeroxhtosa awaña all anetso Asia. Allempopaꞌ napaꞌ atarr nanak nellkëna. Napaꞌ notapañ xhach nerroma, amach erroth nepe oꞌch naꞌkeshphata nañeña. 9Poꞌñoxh napaꞌ neñoteñ neyoxhro theꞌpaꞌ oꞌ xhapona ñeñth nokop allempoch nerroma. Tharraña añekpa wapona echarrteñets ateth, allochñapaꞌ atthoch eꞌñe neñoteñ Yomporchaꞌña neyemtena. Amachña nañeña yemtetso. Tharroꞌmar Yompor poꞌwamenkoth amaꞌt arromñathpaꞌ xhokmach tantater. 10Tharraña amaꞌt moeneꞌ nerromañ Yomporpaꞌ allorokma tantaterren poꞌwamenkoth atthoch ama nerromo. Ñeñthoꞌmarña napaꞌ neñoteñ Yomporpaꞌ xhokmach aꞌkeshphaterrey. Ñeñthoꞌmarña theꞌpaꞌ ñachña xhokma neyemtena. Neñoteñ alloꞌna sen naꞌkeshphatneneꞌ ñerraꞌm esempo es nowerroyerr ñeñth atarr echarr. 11Ñamha añ poktetsa oꞌch semaꞌyochampenna atthoch seyenpaꞌn. Ñamha shonteꞌ acheñeneshaꞌ ñerraꞌm esempo eñotennet attho Yomporpaꞌ xhokma aꞌnatenna eꞌñe poemaꞌyocheñothet ñet, allempopaꞌ xhokmach parasyosoꞌteñet Yompor attho aꞌnatenna.
Attho Pablopaꞌ ama eñotenano poeshkëñ
12Ñewa, theꞌpaꞌ oꞌch notas poꞌpoñ ñeñth ateth nokthapeꞌchen. Napaꞌ ñeñthña atarr nokshateneꞌ nanak. Napaꞌ neñotena neyoxhro poꞌñoxh arr patsropaꞌ xhokma nokthapeꞌchen ñeñth ateth pokteꞌ enten Parets. Eꞌñe nameꞌñeñoth Yompor, napaꞌ ama nemno oꞌch eseshaꞌ neshkaꞌyes amaꞌt mamesha. Elloña sapaꞌ ama nemno oꞌch neshkas amaꞌt eꞌñe mamesha. Ama aña neyemteno ñeñth ateth yokthapeꞌchen ya acheñey arr patsro, añchaꞌña neyemteñoth Yompor atthoch ñach neyenpoeneꞌ. Eꞌñe poemoereñoth ñachña neñotateneꞌ ñeñth kowen enten ña. 13Ñewa, sapaꞌ xhatheꞌ sotapañ napaꞌ atthatheꞌ neshkënes ñeñth notenes necartoth. Tharraña ñeñth allpon notenes necartothpaꞌ, oꞌch selleyeꞌ allochñapaꞌ eshekchaꞌ señoch ñeñthpaꞌ eꞌñe poꞌñoxh ateth, añ ñoñetspaꞌ ama shekëñtsoyaye. Napaꞌ nekwenes esempowañen oꞌch eꞌñe seyemtenna eꞌñe poktakma, oꞌch eꞌñe señoch ñeñth ateth notenes necartoth ñeñthpaꞌ eꞌñe poꞌñoxh ateth. Napaꞌ ama xhoyeꞌ neshkënso. 14Amaꞌt theꞌpaꞌ ama eꞌñe poktakmayeꞌ seyemtenno, tharraña ñerraꞌm seyemtenna eꞌñe poktakma, allempoñapaꞌ ñerraꞌm esempoch werra Yepartseshar Jesúspaꞌ attho sokshenna na, napaꞌxhoꞌña allempopaꞌ noksherrsach samha.
Attho Pablopaꞌ sechenañ oꞌch emoꞌtenanaꞌ corintoꞌmarneshaꞌ
15-16Napaꞌ notenapañ xhokmatheꞌ seyemtenna, tharroꞌmar napaꞌ ama xhoyeꞌ neshkënso. Ñeñthoꞌmar napaꞌ awaña nesechena oꞌch awen Macedonio, napaꞌ nokthapeꞌcheñ oꞌch nemoꞌtnomoes. Xhonchaꞌña metats ñamha Macedonio, allempoña nokthapeꞌcheñ oꞌch nerr Macedoniothpaꞌ oꞌch alla nemoꞌtnerrserr. Atthoch poepocheño oꞌch nokshaterres, ñamha atthoch seyenpaꞌn samha oꞌch alla awerren Judeo. 17Tharraña amaꞌt ateth nokthapeꞌcheneñ oꞌch nemoꞌterrsañpaꞌ tharraña ama neseno oꞌch nabhcherrsaꞌ; ñeñthoꞌmarña sapaꞌ xhatheꞌ sotenapañ napaꞌ epwotheꞌ nokthapeꞌchen kowen. Sapaꞌ atthatheꞌ sentenen ateth ñerraꞌm acheñ ñeñth atthach es poexhena arr patsro. Amaꞌtchaꞌ otenan acheñeneshaꞌ ñeñthchaꞌ ateth pha, tharraña poeyoxhroñapaꞌ kothapeꞌchenayach poꞌpoñ. 18Tharraña napaꞌ ama attheyeꞌ nokthapeꞌcheno. Ñerraꞌm es notenes ñeñthchaꞌ ateth nephapaꞌ neyoxhroñapaꞌ ama esoyeꞌ nokthapeꞌcheno poꞌpoñ. Tharroꞌmar Yompor ñerraꞌm es oteney ñeñthchaꞌ ateth phonaypaꞌ atethchaꞌxhoꞌ pennay tharroꞌmar ñapaꞌ ama poenesho poꞌñoñ. 19Ñamha Yompor Poechemer ñeñthara Cristo Jesús ñerraꞌm es oteney ñeñthchaꞌ ateth phonaypaꞌ atethchaꞌxhoꞌ pennay, xhokmach orrtateñ eꞌñe poꞌñoxh, tharroꞌmar ñapaꞌxhoꞌña ama poenesho poꞌñoñ. Ñeñthara Jesucristo ñeñth xhokma yeserrpareꞌtatenes epan masheñ Silvano ñamha masheñ Timoteo. 20Tharroꞌmar allowen ñeñth allpon ateth oteney Yompor ñeñthchaꞌ ateth perrnay, Poechemerña ñeñth Cristo Jesús ñaña eꞌñe etsotatweneꞌ poꞌñoñ. Ñeñthoꞌmar ñerraꞌm esempo yoten “atthetepaꞌch Yompore yokop” yeñoteñ Cristopaꞌ ñaña eꞌñe etsotatweneꞌ Pompor poꞌñoñ yokop. Allochñapaꞌ atthoch eꞌñe kowen yaꞌyeꞌchoxhtateññañ Yompor. 21Ñeñthara Yompor ñeñth awamenkath peneꞌ alloweney yeyoxher eꞌñe yameꞌñeñoth Poechemer Cristo. Ñeñthara Yompor ñeñth yellsenseneꞌ atthoch yethorraꞌyesa ñokop. 22Ñamha ñapaꞌ awoꞌt apoerrey atthoch yeñoter oꞌ poechemer perrey ña. Ñeñthpaꞌ ñatoꞌ oꞌch netmaꞌntacha ateth ñerraꞌmrratheꞌ aynatwarethey Yomporekop. Ñamha awoꞌt apoerrey Poekamkëñ ñeñthchaꞌ yexherrtsa yeyoxhro ñeñthpaꞌ ñeñthchaꞌña yeñotateneꞌ orameñ shonteꞌ ñeñth oꞌpatatenya Yompor.
23Theꞌpaꞌ oꞌch neñotaterrserr ñeñth ateth nokthapeꞌchen ñeñthoꞌmarña ama nemoꞌterrso awaña. Yomporpaꞌ eñotenen ñeñthchaꞌ ateth notas ñeñthpaꞌ eꞌñe poꞌñoxh ateth. Eꞌñe nemorrenteñothes sapaꞌ ama nexherro all seyxhena Corinto. Tharroꞌmar ama neto, ñerraꞌm netañ oꞌch nexhap seshopaꞌ xhatheꞌ moeneꞌ necheꞌptareꞌtyesoses eꞌñe sa sathpareꞌteñothen. Ñerraꞌm atethpaꞌ xhatheꞌ alla nellkaterres. Ñeñthoꞌmar theꞌpaꞌ oꞌch notas eꞌñe nemorrenteñothes sapaꞌ atthothña ama nexherro sesho. Ñerraꞌm poꞌñoxhtheꞌ ama attheyeꞌ notensopaꞌ Yomporepaꞌchña naꞌchenkaterreꞌ. 24Ama añekpayeꞌ notenso atthoch sapaꞌ oꞌch saꞌmhchaꞌtarether seperren na, ñeñthes ameꞌñenaya Yompor. Añchaꞌña nethorrapretasa atthoch neyenpas. Amaꞌt attho oꞌ womenk sameꞌñeñañ Yompor, napaꞌ xhokmach nethorrena sokop allochñapaꞌ atthoch señmañeshokmañen sokther Yompor eꞌñe poktakma.
Currently Selected:
2 Corintios 1: ame
Highlight
Share
Copy
Want to have your highlights saved across all your devices? Sign up or sign in
© 2014, Wycliffe Bible Translators, Inc. All rights reserved.