1 Tesalonicenses 2
2
Ateth pha Pablo allempo Tesalónicoꞌtsen
1Oꞌch, masheñneshachaꞌ ñamha noxhaneshachaꞌ, notas: Saña poꞌñoxhpaꞌ eꞌñe señoteñ awañmoꞌcha eꞌñe kowen sagapapoey, ama orrena yemoꞌtenso. 2Ellonethpaꞌ eꞌñe señoteñ amaꞌt epayeꞌ moeroxhtatyeteꞌth Filiposo, amaꞌt errothwanen phaꞌyetañeꞌth, tharraña Yomporña atarr awamenkath phaꞌyeꞌth attho yapaꞌ eꞌñe yeyemteñoth ña yeserrpareꞌtatas samha añ kowen ñoñets ñeñth wetsa Yomporeshoth. Amaꞌt alloꞌtsaꞌyen ñamha ñeñth nanak epatarñathetyetsa, yañapaꞌ xhokmaña yeserrpareꞌtataseꞌth. 3Ñeñthpaꞌ ama panteñtsotheyeꞌ yokthapeꞌchataso, ñamha ama sosyaꞌtsañeyeꞌ yokthapeꞌchataso, ñamha ama eꞌñe ya yeshkëñoth yokthapeꞌchataso. 4Elloña ya Yomporpaꞌ eꞌñe pokteꞌ enteney ñeñthoꞌmar llesensaꞌy yach aꞌpotherreꞌ poꞌñoñ ñeñth eꞌñe poꞌñoxh kowen ñoñets alloch aꞌkeshphaterrey. Ñeñth ateth yeꞌñorenapaꞌ ama añekpayaye oꞌch eꞌñe orrena yokshach acheñeneshaꞌ, yapaꞌ añekopña yeꞌñorena atthoch yokshateñ Yompor ñeñth eꞌñe yentweneꞌ ñeñth ateth yokthapeꞌchyen yeyoxhro. 5Ñeñthoꞌmarña sapaꞌ señoteney ya amaꞌt awathapaꞌ ama eꞌñe ya yeñoñoth yokshatenso atthoch eꞌñe kowen sentweney. Ñamha amaꞌt awathapaꞌ ama erra yeshkënso atthoch sapaꞌ oꞌch sapoey ñeñth yemnapretenes. Ñeñthpaꞌ amaꞌt Yomporpaꞌ eꞌñe pokteꞌ entapreteney ñeñth ateth yepenes. 6Ñamha amaꞌt awatha ama añeyeꞌ yellkëno atthoch sapaꞌ oꞌch sekowentatennay amaꞌt ñamha allowen poꞌpotantañexhno. Ñamha yapaꞌ amaꞌt Cristo yellsensenayeñ ñeñthoꞌmarña yokoppaꞌ eꞌñe pokteñ oꞌch ateth yepennaseñ ñeñth ateth pena amhchaꞌtareth, tharraña yapaꞌ amaña yemno oꞌch ateth yepennasa. 7Tharroꞌmar yapaꞌ yemoereñothes sapaꞌ eꞌñe kowen es yorrtatyennas. Eꞌñe ateth yentenes ñerraꞌmrratheꞌ cheshatholleshaꞌ eꞌñech kowen moereña pachor. 8Atarr nanak yemorrentensa ñeñthoꞌmarña ama eꞌñe ñaptha kowen ñoñets yapoenso ñeñth Yompor poꞌñoñ. Elloña yokoppaꞌxhoꞌña pokteꞌ yenteñ oꞌch yeswanom ñeñth eꞌñe yokpa atthoch yeyenpas samha tharroꞌmar sapaꞌ atarr yemorrentensa. 9Ñeñth ateth yepena ya, amatheꞌ masheñneshachaꞌ xha sepsenye attho nanak yetarwaseꞌth yetho eꞌñe tsapomeꞌtets allempo alloꞌtseney sesho. Ñeñthpaꞌ añekop atarr yetarwaseꞌth allochñapaꞌ atthoch sa amaꞌt poesheñarrothesapaꞌ amach xha yaꞌtsrreꞌmoxhtanaꞌtaso allempo yeserrpareꞌtataseꞌth kowen ñoñets ñeñth Yompor poꞌñoñ.
10Sapaꞌ eꞌñe sentyeꞌth, Yomporpaꞌxhoꞌña eꞌñe enteney attho yapaꞌ eꞌñe kowen yorrtatyes sokop ñeñthes ameꞌñetsa all. Ñeñthpaꞌ eꞌñe kowen yorrtatyen Partsokop ñeñth eꞌñe pokteꞌ enten ña allochñapaꞌ atthoch amach errothenoth otenyeto “ama pokteyaye ñeñth ateth sepena.” 11Sapaꞌ señoteñ yapaꞌ eꞌñe ateth yentenes ñerraꞌmrratheꞌ eꞌñe yechemereshaꞌ yephowenes. Ñeñthoꞌmarña eꞌñe kowen yokthapeꞌchataseꞌth eꞌñe poesheñaꞌttsos. Eꞌñe kowen yokshaterres, eꞌñe kowen yokthapeꞌchataseꞌth 12poꞌñoxh sapaꞌ eꞌñepaꞌchña kowen sorrtatyen ñeñth ateth poktetsa añekop ñeñth poꞌñoxh ameꞌñenaya Yompor tharroꞌmar ñapaꞌ oꞌ waꞌñerres oꞌch soꞌpatapretera all amhchaꞌtarethtena ña, atthochña sekowentapretera samha.
13Ñeñthoꞌmarña añekop xhokma yeparasyosoꞌteñ Yompor ñamha attho sapaꞌ allempo yeꞌmhñotaterres Yompor poꞌñoñ sañapaꞌ eꞌñe kowen sagërrñañ poꞌñoñ. Amaꞌt ya seserrpareꞌtatosayeñ ama acheña poꞌñoñ senteñe, ñeñthpaꞌ Yomporoña poꞌñoñ sentña allempo. Ñewa, ñeñthpaꞌ eꞌñe poꞌñoxh Yompor poꞌñoñ. Theꞌña sa ñeñthes oꞌ sameꞌñerra, Yomporña poꞌñoñ oꞌ kothapeꞌchaterres eꞌñe kowen seyoxhro oꞌ eꞌñe wenaterres ñeñth ateth xhokma sephatseꞌtyeseꞌth awath; theꞌña sapaꞌ añ sorrtatyen ñeñth eꞌñe kowen enten Yompor. 14Sapaꞌxhoꞌña masheñneshachaꞌ eꞌñe ateth saꞌmoeroxhtatarethtena Yomporekop eꞌñe ateth peꞌth ñeñth ñanom apxhatsa Yomporekop ñeñth Judeoꞌtsaꞌyen. Ñetpaꞌ eꞌñe poeyemteñothet Cristo Jesús, judioneshaꞌña ñeñth eꞌñe pamoꞌts penetpaꞌ atarr moeroxhtatenanet. Sapaꞌxhoꞌña eꞌñe seyemteñoth Cristo atarr moeroxhtatenes samha samoꞌtseshaꞌ. 15Ñeñthara judioneshaꞌ ñeñth moetseꞌ Yepartseshar Jesús ñamha ñet moetsanateteꞌth ñeñth aꞌmhtaꞌyesayeꞌth awath Yompor poꞌñoñ. Amaꞌt theꞌ yapaꞌxhoꞌña poeꞌmoñeꞌteñothetay oꞌ kothareꞌterryeterr yamha. Ñeñthoꞌmarña Yomporpaꞌ amaꞌt eꞌñe mameshapaꞌ ama kowenayeꞌ entenaneto tharroꞌmar ñetpaꞌ añeꞌna eꞌmoñeꞌtenet allowen paꞌnamen acheñeneshaꞌ. 16Ñetpaꞌ atarr epatareꞌtenyet atthoch yeserrpareꞌtach poꞌpoñ acheñ ñeñth ama judioneshayaye atthoch ñetpaꞌxhoꞌña oꞌch aꞌkeshphatarethterret. Atthoña ñetpaꞌ atarr nanak yorenet poꞌchñaret. Tharraña theꞌña Yomporpaꞌ oꞌ entatwerrmochanet poꞌyoroxhenña.
Secherra Pablo oꞌch abhcherranetaꞌ
17-18Ñamha oꞌch, masheñneshachaꞌ ñamha noxhaneshachaꞌ, notas: Yaña poꞌñoxh allempo xhaꞌnmataterryet seshoth allempotheñña amaꞌt esempapaꞌ ama yabhchannaꞌterro eꞌñe themeꞌttsen. Chemerrña theꞌ yapaꞌ oꞌ eꞌñe yapthamerra. Tharraña amaꞌt ama allameꞌttsa yabhchannenopaꞌ yeyoxhroñapaꞌ eꞌñe parrokmatetsey. Yapaꞌ xhokma yesechenañ oꞌch yabhcherrsaꞌ amaꞌt napaꞌ allponocheꞌtats nesechenañ. Tharraña oneñethñapaꞌ xhokma epatareꞌteney. 19-20Tharroꞌmar sapaꞌ saña ñeñthes atarr yokshateneꞌ. Amaꞌt allempoch werra Yepartseshar Jesucristo sapaꞌ saña ñeñtheschaꞌ atarr yeyemterra, ñeñtheschaꞌ atarr yokshaterreꞌ allempo, tharroꞌmar sapaꞌ ñeñtheschaꞌ yapataterreꞌ ñeñthchaꞌ atarr yokshateneꞌña ya allempo.
Currently Selected:
1 Tesalonicenses 2: ame
Highlight
Share
Copy
Want to have your highlights saved across all your devices? Sign up or sign in
© 2014, Wycliffe Bible Translators, Inc. All rights reserved.