RUCI 1
1
Sa lako ko Elimeleki me tiko mai Moapi e na vuku ni dausiga, 1,2. A rau veiwatini na luvena kei rau na goneyalewa ni Moapi, 3-5. Ai tukutuku kei Neomai kei na watidrau na luvena, 6-22.
1Ia e na gauna era sa lewa kina ko ira na dauveilewai, sa dausiga na vanua. A sa lako e dua na kai Pecileema mai Juta me tiko vulagi e na vanua ko Moapi, ko koya, kei na watina, kei na luvena tagane ruarua. 2Ia na yaca ni tamata ko ya ko Elimeleki, kei na yaca ni watina ko Neomai, kei na yacadrau na luvena, ko Maloni kei Kilioni, eratou kai Efiraca mai Pecileema mai Juta. A ratou sa yaco ki na vanua ko Moapi, a ratou sa tiko kina.
3A sa mate ko Elimeleki, na wati i Neomai; a sa vo ga ko koya kei na luvena tagane ruarua. 4A rau sa kauta me watidrau e le rua na yalewa ni Moapi; a yacana e dua ko Oripa, kei na yacana na kenai karua ko Ruci: a ratou sa tiko maikea ka yabaki tini beka. 5A rau sa mate ruarua talega, ko Maloni kei Kilioni; a sa vo ga na yalewa, ka sa yali na luvena ruarua, kei na watina.
6A sa cavu tu ko koya kei rau na vugona, me lesu mai na vanua ko Moapi, ni sa rogoca ko koya e na vanua ko Moapi ni sa talevi ira na nona tamata ko Jiova, ka solia vei ira na kakana. 7A sa lako yani ko koya mai na tikina ka tiko kina, kei rau na vugona. Ia eratou sa lako tu e na sala me ratou lesu ki na vanua ko Juta. 8A sa kaya vei rau na vugona ko Neomai, Drau lako, drau dui lesu yadua ki na vale nei tinamudrau: ka me caka vinaka vei kemudrau ko Jiova, me vaka drau a cakava vei rau sa mate, vei au talega: 9me solia vei kemudrau ko Jiova, mo drau dui kunea na vakacegu e na vale i na watina. A sa reguci rau ko koya; a ratou sa tagi vakadomoilevu cake. 10A rau sa kaya vua, E segai, Keirau na lesu vata vakaidina kei iko kivei ira na kai nomu. 11A sa kaya ko Neomai, Drau lesu yani, na luvequ; a cava drau na lako vata kina kei au? sa vo tiko li na luvequ tagane e ketequ, me rau watimudrau? 12Drau lesu tale, na luvequ drau lako ga yani, ni'u sa rui qase ka sa sega ni rawa kina na noqu vakawati. Kevaka ka'u na kaya, Au sa nuinui tiko; io, kevaka ka'u sa vakawati e na bogi edaidai, ka sa vakasucuma talega eso na gonetagane, 13drau na wawa li vei rau me rau cauravou mada? drau na kua kina ni vakawati oqo? me kakua ga, na luvequ; ni'u sa rarawa vakalevu e na vukumudrau, ni sa bikai au na liga i Jiova. 14A ratou sa veitagicaki vakadomoilevu sara: a sa reguca na vugona ko Oripa, a sa kabiti koya ko Ruci.
15A sa kaya ko koya, Raica, sa lesu tale na dauvemu vei ira na kai nona, kei na nona kalou; mo lesu talega mo muria na wekamu yalewa. 16A sa kaya ko Ruci, Mo kakua ni cikevi au me'u laivi iko, ka me'u lesu me'u kua ni muri iko; ni'u na lako ki na vanua ko sa lako kina; ia na vanua ko tiko kina ka'u na tiko talega kina: ia na kai nomu era na kai noqu, na nomu Kalou talega ena noqu Kalou: 17e na vanua ko mate kina, ka'u na mate kina, ka'u na bulu talega kina: me cakacaka vakaoqo vei au ko Jiova, ka vakaikuritaka talega, kevaka sa tawasei kedaru e dua na ka tani, na mate duaduaga. 18Ia ni sa raica ko koya sa dei tiko na lomana me rau lako vata kaya, sa cegu ni vosa vua.
19A rau sa lako tu yani ka yaco ki Pecileema. Ia ni rau sa yaco ki Pecileema, sa yavala na lewe ni koro taucoko e na vukudrau, a ra sa kaya, Oqo ko Neomai, se segai? 20A sa kaya vei ira ko koya, Dou kakua ni vakatokai au ko Neomai [Marau]; dou vakatokai au ga ko Mara [Rarawa]: ni sa cakacaka vakararawa vei au ko Koya na kaukauwa: 21au a sinai tu ni'u a lako yani; ia ka'u sa lala tu ni sa vakalesui au mai ko Jiova: a cava dou sa vakatokai au kina ko Neomai, ni sa beitaki au oti ko Jiova, a sa vakararawataki au oti ko Koya na kaukauwa?
22A sa lesu ga ko Neomai, ka sa lesu vata kaya ko Ruci na yalewa ni Moapi, na vugona, mai na vanua ko Moapi: a rau sa yaco ki Pecileema ni sa qai ia na tamusuki parile.
Currently Selected:
RUCI 1: FOV
Highlight
Share
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific