ROMA 1
1
Sa tukuni koya ko Paula, ni sai talatala i Jisu, ka via raici ira na lewe ni lotu mai Roma, 1-15. Sa qai tukuna sa ka ni Kalou nai tukutuku-vinaka sa vakatakilai kina ni sa vakadonui ira na Kalou era sa vakabauta, 16,17. Sa cudru na Kalou vei ira kecega era sai valavala ca; a sa vuqa na nodra i valavala ca na tamata, 18-32.
1Koi au ko Paula, nai talatala i Jisu Karisito, sa kacivi mei apositolo, ka lesi me'u tukuna nai tukutuku-vinaka ni Kalou, 2o koya sa yalataka eliu ko koya ka ra vosataka na nona parofita e nai Vola Tabu, 3e na vuku ni Luvena ko Jisu Karisito na noda Turaga, o koya sa sucu mai na kawa i Tevita me vaka na yagona; 4o koya sa vakatakilai vakaukauwa e na tu cake tale mai na mate, ni sa Luve ni Kalou, me vaka na yalona savasava: 5o koya keitou sa rawata talega kina na loloma kei na cakacaka vakaiapositolo, me ra vakabauta ka talairawarawa kina ko ira na lewe ni veivanua kecega, e na vuku ni yacana: 6dou sa kacivi oti vaka talega kina koi kemudou mo dou nei Jisu Karisito:
7Vei kemudou kecega sa tiko mai Roma, oi kemudou sa daulomana na Kalou, oi kemudou sa kacivi me yalosavasava: Me nomudou na loloma kei na vakacegu mai vua na Kalou ko Tamada, kei Jisu Karisito na Turaga.
8Me'u vakatekivu, ko Jisu Karisito ka'u sa vakavinavinaka kina vua na noqu Kalou e na vukumudou kecega, ni sa tukuni e vuravura taucoko na nomudou vakabauta. 9Ni sa noqu i vakadinadina na Kalou, o koya ka'u sa qarava e na vu ni yaloqu e nai tukutuku-vinaka ni Luvena, ni'u sa sega ni mudu ni cavuti kemudou e na veisiga e na noqu masu; 10ni'u sa daumasu, me dua na gauna me'u kalougata kina e na lewa ni Kalou me'u yaco yani vei kemudou. 11Ni'u sa gadreva vakalevu me'u raici kemudou, me'u solia vei kemudou nai solisoli vakayalo eso, mo dou vakataudeitaki kina; 12me da dui vakacegui e na vuku ni nomudou vakabauta kei na noqu talega.
13Ia, koi kemudou na veiwekani, ka'u sa sega ni vinakata mo dou lecava, ni'u sa nakita vakavuqa me'u lako yani vei kemudou, (ia ka'u sa tarovi ga ka yacova na siga oqo,) me dua na noqu yaga e na kemudou maliwa, me vaka talega e na kedra maliwa na veimatanitu tani. 14Sa dodonu vei au me'u sai talatala vei ira na kai Kirisi, vei ira talega na lewe ni veivanua wale; vei ira na vuku, vei ira talega era sa sega ni vuku. 15A sa vakakina, me vaka ka'u sa rawata sa yaloqu sara me'u vunautaka nai tukutuku-vinaka vei kemudou talega mai Roma.
16Ni'u sa sega ni maduataka nai tukutuku-vinaka kei Karisito: ni sai koya oqo na kaukauwa ni Kalou me vakabulai kina ko ira yadua era sa vakabauta: sa liu vei ira na Jiu, vei ira talega sa matanitu tani. 17Ni sa vakatakilai kina, ni sa vakadonui ira na Kalou e na vakabauta me ra sa vakabauta: me vaka na ka sa volai, Ena bula e na vakabauta ko koya sa yalododonu.
18Ni sa vakatakilai mai lomalagi na cudru ni Kalou ki na nodra i valavala ca kecega kei na nodra tawa-dodonu na tamata, era sa tarova nai vakavuvuli dina e nai valavala tawa-dodonu; 19ni sa rairai e na kedra maliwa na ka ni Kalou sa kilai rawa; ni sa vakaraitaka vei ira na Kalou: 20ni sa kune na veika ni Kalou e vuni tu, io, na nona kaukauwa tawa mudu kei na nona tu Vakalou, ni sa kilai oti e na veika sa buli, mai na gauna sa buli kina ko vuravura; o koya oqo sa sega kina na nodra ulubale. 21Io, ni ra sa kila tiko na Kalou, era sa sega ni vakarokorokotaka me vaka sa Kalou, se vakavinavinaka; ia sa lialia mai na nodra nanuma, a sa butobuto mai na yalodra sa sesewa. 22Ni ra sa kaya tiko era sa vuku, era sa lialia mai; 23a ra sa vakaisosomitaka na serau ni Kalou sa sega ni mate rawa, e na matakau me vaka na tamata sa ra mate wale, kei na manumanu vuka, kei na manumanu e yavai va, kei na veika sa qasi voli.
24O koya sa biuti ira kina na Kalou me ra qeleqelewa e na dodomo ni yalodra, me ra vakavelavelataka kina na yagodra vakai ira: 25ia era sa vakaisosomitaka nai vakavuvuli dina ni Kalou, e na ka e lasu wale, a ra sa soro kina ka qarava na ka sa buli ka segai ko koya sa bulia, o koya sa nona na vakarokoroko ka sega ni mudu. Emeni. 26O koya sa biuti ira kina na Kalou me ra muria na dodomo vakasisila; ni ra sa vakaisosomitaka ko ira na nodra yalewa nai valavala sa lesi e na dua tani e sega ni lesi: 27sa vaka talega kina ko ira na tagane, ni ra sa biuta nai valavala sa lesi vata kei na yalewa, sa waqa na nodra veidomoni vakai ira: a ra sa kitaka ko ira na tagane na ka velavela sara kei ira na tagane, a sa yaco kina vei ira nai sau dodonu ni nodra caka cala. 28Ia ni ra sa sega ni vinakata me ra kila tiko na Kalou, sa biuti ira na Kalou me ra lomavakatani, me ra kitaka na veika e sega ni kilikili kei ira; 29me ra sinai e na ka kecega e ca, e na yaloca, e na daukocokoco, e na dauveivakacacani; me ra sinai e na vuvu, e na laba, e na veileti, e na dauveivakaisini, e na yalocudrucudru; me ra dauvakasolokakana, 30me ra daukakase, me ra daucata na Kalou, me ra vosalevu, me ra viavialevu, me ra daudokai ira, me ra dauvakavuna na ca, me ra dautalaidredre kivei ira na nodra qase, 31me ra sega ni yalomatua, me ra yalayala ka lasu tale, ka ra sa caca veiwekani, era sega ni yalololoma: 32ia ni ra sa kila tiko na lewa ni Kalou, ni sa dodonu me mate ko ira era sa kitaka na veika vakaoqo, era sa sega ni kitaka walega ko ira, era sa dauvinakati ira talega era sa daukitaka.
Currently Selected:
ROMA 1: FOV
Highlight
Share
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific