A LELE I JEREMAIA 1
1
Sa ca ko Jerusalemi e na vuku ni kenai valavala ca, 1-11. Sa tagicaka na rarawa ni yalona, 12-17; ka sa tukuna na lewa ni Kalou ni ka dodonu, 18-22.
1Isa na kena tiko duadua na koro, ka oso e na tamata!
Na kena yaco me tautauvata kei na yada!
Ko koya ka levu cake vei ira na veimatanitu, ka marama e na veivanua,
Sa qai yaco me koro qali!
2Sa tagi vakalevu ko koya e na bogi,
Sa tiko ga e baluna na wai ni matana;
Sa sega e dua vei ira kecega na wekana me vakacegui koya:
Ko ira kece na nonai tokani era sa lawakitaki koya,
Era sa vuki tale me nona meca.
3Sa kau tani vakabobula ko Juta e na vuku ni valavala kaukauwa, ka ni sa levu na dauveiveilavi:
Sa tiko ga ko koya e na veimatanitu, sa sega ni kunea na vakacegu:
Ko ira kece era vakasavi koya era sa vauci koya e na yasana qiqo.
4Sa tagi na sala ki Saioni, ni sa sega e dua sa lako mai ki na nona so levu tabu:
A nona matamata-ni-koro kecega sa lala, ko ira na nona bete era sa vutugu:
Ko ira na nona goneyalewa, era sa rarawa, io sa rarawa vakalevu sara ko koya.
5Ko ira sa vakacacani koya era sa liu; ko ira na nona meca era sa tiko vinaka;
Ni sa vakararawataki koya ko Jiova e na vuku ni nona cala sa vuqa:
Ko ira na nona gone lalai, era sa kauta tani vakabobula ko ira na meca.
6A sa takali vua na goneyalewa ni Saioni na nona totoka kecega;
Ko ira na nona turaga, era sa vaka na ati sa sega ni kunea rawa na vanua veico,
A ra sa lako tu ga ka sega na nodra kaukauwa e na mata i koya sa vakasava.
7Sa nanuma ko Jerusalemi e na gauna ni nona rarawa kei na nona tiko sese
Na nona ka domoni kecega ka tu vua eliu,
Ni ra sa tauri na nona tamata e ligana na dauvakacaca, ka sa sega e totaki koya,
Ni ra raici koya ko ira na meca, era sa dredrevaka na nona siga tabu.
8Sai valavala ca vakalevu ko Jerusalemi; o koya oqo sa vakasesei kina:
Ko ira kece ka dokai koya eliu era sa qai beci koya, ni ra sa raica na nona luvawale:
Io, sa vutugu ko koya, a sa vuki vakanadaku.
9A nona dukadukali sa tauva na bele ni nonai sulu; sa sega ni nanuma ko koya ki na nonai otioti;
O koya oqo sa ka ni veivakidacalataki na nona lako sobu: sa sega e dua me vakacegui koya.
Mo ni raica, Jiova, na noqu rarawa: ni sa vakalevulevui koya na meca.
10Sa dodoka na ligana na meca me taura na nona ka domoni kecega:
Ni sa raici ira na iceni ko koya ni ra sa curu ki na nona vale tabu,
Io ko ira ko a vakatatabuya me ra kakua ni curu ki na nomuni soqosoqo.
11Ko ira kece na nona tamata, era sa vutugu, era sa qara na kedra;
Era sa solia na nodra ka domoni mei voli ni kakana me vakabulabulataka mai na yalodra:
Mo ni raica, Jiova, ka vakananuma; ni'u sa velavela mai.
12Sa ka wale beka vei kemudou koi kemudou kece sa lako voli yani?
Dou mai raica, ka kila se dua na rarawa sa vaka na noqu rarawa, sa caka vei au,
Ni sa qai vakararawataki au ko Jiova e na siga ni nona cudru katakata.
13Sa tala maicake ko koya na bukawaqa ki na suiqu, a sa gumatua kina:
Sa tevuka na lawa me rawa na yavaqu, sa vakalesui au ki muri:
Sa lewa vei au me'u tiko taudua, me sa bibi na lomaqu e na veisiga.
14Sa vauca na wa ni savenaki ni noqu talaidredre na ligana:
Sa tobe vata, sa viribale ki domoqu; sa vakabalea na noqu kaukauwa:
Sa soli au ko Jiova ki na ligadra, au sa sega ni tu cake rawa.
15Sa vakawaletaka ko koya na Turaga na noqu qaqa kecega era tiko vei au:
Sa kaciva nai vavakoso vei au ko koya, me mai musuki ira na noqu cauravou:
Sa sikaraka na Turaga na goneyalewa ni Juta, me vaka nai keli-ni-waini.
16E na vuku ni ka oqo ka'u sa tagi kina; mai na mataqu, io mai na mataqu sa dave sobu na wai,
Ni sa yawa vei au ko koya na dauveivakacegui me na vakabulabulataka na yaloqu:
Era sa luveniyali ko ira na luvequ, ni sa gumatua na meca.
17Sa dodoka yani na ligana ko Saioni, a sa sega e dua me vakaceguya;
Sa vakarota ko Jiova e na vuku i Jekope, me ra vakavolivoliti koya ko ira na nona meca:
Sa tautauvata ko Jerusalemi kei na dua na ka velavela e na kedra maliwa.
18Sa yalododonu ko Jiova ni ka'u sa talaidredre ki na nonai vakaro:
Dou rogoca mada, koi kemudou na tamata kecega, ka mai raica na noqu rarawa:
Ko ira na noqu goneyalewa kei na noqu cauravou, era sa kau tani vakabobula.
19Au a kacivi ira mai na wekaqu, a ra sa lawakicataki au:
Ko ira na noqu bete kei na noqu qase, era sa ciba e loma ni koro,
Ni ra qara voli na kedra kakana me vakabulabulataka kina na yalodra.
20Mo ni rai mai, Jiova; ni'u sa vuturi; sa rise na bati ni ketequ;
Sa saumaki na yaloqu e lomaqu; ni'u sa talaidredre vakaca sara:
E tautuba, sa vakayali ira na tamata nai seleiwau;
E vale, sa vaka sa tiko kina ko mate.
21Era sa rogoca ni'u sa vutugu: ia sa sega e vakacegui au:
Ko ira kece na noqu meca era sa rogoca ni ka'u sa rarawa; ka ra sa marau ni kemuni sa cakava:
Ko ni na vakayacora na siga ko ni sa kacivaka, era na qai vakataki au.
22Me rairai e matamuni na nodra ca kece,
Ka mo ni cakava vei ira, me vaka ko ni sa cakava vei au e na vuku ni noqu dautalaidredre:
Ni sa ka levu na noqu vutugu, a sa bibi na lomaqu.
Currently Selected:
A LELE I JEREMAIA 1: FOV
Highlight
Share
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific