JUTA 1
1
Sa vakarota vei ira na tamata lotu ko Juta me ra gumatua, 1,2. Sa qai tukuni ira na tamatai vakavuvuli ca, kei na ka ca ena yaco vei ira, 3-16. Sa vakavulici ira tale na tamata lotu dina, a sa tinia na nonai vola, 17-25.
1O Juta, nai talatala i Jisu Karisito, kei na taci i Jemesa, vei ira era sa tu ga e na loloma ni Kalou na Tamada, a ra sa maroroi me ra sa nei Jisu Karisito, era sa kacivi: 2Me vakalevutaki vei kemudou na yalololoma, kei na vakacegu, kei na loloma.
3Oi kemudou sa lomani, ni'u a gumatua me'u vola vei kemudou e na vuku ni bula sa noda kecega, sa rawai au na via volavola vei kemudou, ka vakarota mo dou gumatua sara me maroroya na vakabauta sa soli eliu vei ira sa lotu. 4Ni sa curu lo mai na tamata eso, era sa volai eliu me ra cudruvi kina, a tamata tawa-lotu, era sa vakatanitaka na loloma ni Kalou me ra ia kina na ka vakasisila, a ra sa cakitaki koya na Turaga na Kalou duaduaga, kei na noda Turaga ko Jisu Karisito.
5O koya oqo ka'u na vakauqeta kina na lomamudou, mo dou nanuma, ia dou a kila eliu, ni sa vakabulai ira na tamata mai Ijipita na Turaga, sa qai vakarusai ira emuri era sa sega ni vakabauta. 6O ira talega na agilose era sa sega ni tu dei e na nodra i tutu vakaturaga, a ra sa biuta na nodra i tikotiko, sa tauri ira ko koya e na sinucodo tawa mudu, e na butobuto, me yaco mada na siga ni lewa. 7Sa vakakina ko Sotoma kei Komora, kei na veikoro voleka era vakakina, ni ra sa soli ira me ra dauyalewa, a ra sa muria na lewe tani, era sa viritu kina mei vakarau, ni ra sa vakararawataki ni ra sa cudruvi tiko e na bukawaqa tawa mudu.
8Sa vaka talega kina ko ira oqo na dautadra era sa vakadukadukalitaka na yagodra, era sa bese ni lewai, a ra sa vosavakacacataki ira na turaga. 9Io ko Maikeli na agilose ka uasivi, ni sa veileti tiko kei na tevoro, ka veiletitaka na yago i Mosese, sa sega ni doudou me vosavakacacataki koya, sa kaya ga, Me cudruvi iko na Turaga. 10Ia ko ira oqo, era sa vosavakacacataka na ka era sa lecava; ia na ka era sa kila vakai ira, me vaka na manumanu sa sega ni vakayalo, e na veika oqo era sa vakacacani ira. 11Ena ca ko ira! ni ra sa muria na sala i Keni, a ra sa muria e na marau ca na caka cala i Pelami me ra vakaivoli kina, a ra sa rusa e na vosa ni veivorati i Kora.
12O ira oqo na duka e na nomudou kana veilomani, ni ra sa kana vata kei kemudou, a ra sa vakani ira ka sega ni rere; o ira oqo na o sa sega kina na wai, sa veikauyaki e na cagi; a kau sa malai na vuana, sa sega ni vua, sa mate vakarua, sa cavu sara na wakadra: 13a ua ni waitui sa cudrucudru, sa vusolaka na nodra ka e veivakamaduataki; a kalokalo sa veilakoyaki, sa tu ga me nodra na butobuto loaloa sa sega ni mudu.
14Ia ko Inoki talega, nai kavitu sa taravi Atama sa parofisaitaki ira oqo, ka kaya, Raica, sa lako vata mai na Turaga, kei na nona yalosavasava era udolu vakatini: 15me cudruvi ira kecega, ka vunauci ira kecega era sa sega ni lotu, e na vuku ni nodra i valavala kecega era sa kitaka ni ra sa sega ni rerevaka na Kalou, kei na nodra qaqa era sa vosavakacacataki koya kina ko ira era sega ni rerevaka na Kalou. 16O ira oqo na dauvosakudrukudru, na daudidi, era sa muria na nodra gagadre ca; (a sa vosataka na vosa vakaviavialevu sara na gusudra), a ra sa daudokai ira na tamata eso me ra vakaiyau kina vei ira.
17Ia koi kemudou sa lomani, dou nanuma na vosa era sa tukuna eliu ko ira nai apositolo ni noda Turaga ko Jisu Karisito; 18ni ra sa tukuna vei kemudou sa na so na dauveivakasewasewani e na gauna emuri, era na daumuria ga na nodra gagadre ca era sa tawa-lotu. 19Sai ira oqo sa tawasei ira tani, era sa dauvakayalomakawa, a sa sega ni tu vei ira na Yalo Tabu.
20Ia koi kemudou sa lomani, dou veivakatataki kemudou cake vakai kemudou e na nomudou vakabauta savasava sara, dou masu ga e na Yalo Tabu, 21dou maroroi kemudou mo dou tu ga e na loloma ni Kalou, ka nuitaka na loloma ni noda Turaga ko Jisu Karisito ki na bula tawa mudu. 22Ia dou lomani ira sara eso, ni ra sa lomalomarua: 23ia ko ira eso, vakabulai ira ni dou sa kaliraki ira mai na bukawaqa; ka so mo dou lomani ira ni dou sa rere; ni dou sa cata nai sulu sa dukadukali e na yalomakawa.
24Me qai ia vua sa rawata me tauri kemudou mo dou kakua ni bale, me vakaraitaki kemudou talega e na matana vakaiukuuku e na marau vakaidina sara ni dou sa sega ni cala, 25me ia vua na Kalou na nodai Vakabula duaduaga, e na vuku ni noda Turaga ko Jisu Karisito na vakarokoroko kei na ka Vakaturaga, kei na lewa kei na kaukauwa, e na gauna kecega sa oti yani, edaidai talega, ka sega ni mudu. Emeni.
Currently Selected:
JUTA 1: FOV
Highlight
Share
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific