JOPE 1
1
Sa yalododonu sara ka vutuniyau ko Jope, 1-3. Sa daumasulaki iratou na luvena, 4,5. Sa kerekere ko Setani me vakatovolei koya, 6-12. Sa yali na nonai yau kei na luvena, 13-19. Sa tagi, ka sa vakavinavinaka talega vua na Kalou, 20-22.
1Sa dua na tamata mai na vanua ko Usi, na yacana ko Jope; ia na tamata ko ya sa yalododonu ka daucaka dodonu, a sa rerevaka tiko na Kalou, ka sega ni torova na ca. 2Sa sucu e le vitu na luvena tagane ka le tolu na luvena yalewa. 3Ia na nonai yau sa vitu na udolu na sipi, ka tolu na udolu na kameli, ka dua na udolu na pulumokau, ka lima na drau na asa yalewa, ka sa ka tani na nona lewe ni vale; ka sa uasivi cake kina na tamata oqo vei ira kecega na lewe ni vanua mai na tu-i-cake.
4A sa lako ko iratou na luvena tagane, ka ia na kana vata e nodratou veivale yadua, e na nona siga; ka ratou sa talaki ka kaciva na ganedratou tolutolu me mai kana ka gunu vata kei iratou. 5Ia ni sa oti na veisiga ni kana magiti, sa qai talaki ko Jope ka vakasavasavataki iratou, ka sou e na mataka, ka vakacabora nai soro kama me vaka na kedratou i wiliwili kecega: ni sa kaya ko Jope, De sa cala ko iratou na luvequ, ka vosavakacacataka lo na Kalou e lomadratou. Ia sa daukitaka vakaoqo ko Jope.
6Ia sa dua na siga era sa lako mai kina na luve ni Kalou me vakaraitaki ira e na mata i Jiova, a sa lako talega mai kei ira ko Setani. 7Ka sa kaya vei Setani ko Jiova, Ko sa lako maivei? A sa kaya vei Jiova ko Setani, Au sa dauveilakoyaki e vuravura, ka gade voli kina. 8Ka sa kaya vei Setani ko Jiova, Ko sa vakanananu beka vua na noqu tamata ko Jope, ni sa sega e dua e tautauvata kaya e vuravura, a tamata yalododonu ka daucaka dodonu, ka sa rerevaka na Kalou, ka sega ni torova na ca? 9Sa qai kaya vei Jiova ko Setani, Sa sega li ni yaga vei Jope na nona rerevaka na Kalou? 10Ko ni sa sega beka ni viribaiti koya, kei na nona vale, kei na nona ka kece e na veiyasana kecega? ko ni sa vakalougatataka na cakacaka ni ligana, ka sa tubu kina me ka levu na nonai yau e na vanua. 11Ia mo dodoka mada na ligamuni, ka tara na nona ka kecega, ena qai vosavakacacataki kemuni ki matamuni. 12Ka sa kaya vei Setani ko Jiova, Raica, sa soli ki ligamu na nona ka kecega; ia mo kakua ni dodoka na ligamu mo tarai koya. A sa lako tani ko Setani mai na mata i Jiova.
13Ka sa dua na siga eratou sa kana kina ka gunu waini ko iratou na luvena tagane, kei na luvena yalewa e na vale nei tuakadratou ka ulumatua: 14a sa lako mai e dua na tamata vei Jope, ka kaya, Era a cuki were tu e nai sivi yara na pulumokau, a ra sa kana voleka kina na asa: 15ka sa sikiti ira ko ira na kai Sipa, ka kauti ira tani, a ra sa vakamatei ira na cauravou e nai seleiwau; ia koi au duaduaga ka'u sa dro bula me'u tukuna vei iko. 16Ni sa vosa tiko ko koya, sa lako mai e dua tani tale, ka kaya, Sa lutu mai lomalagi na bukawaqa ni Kalou, a sa vakama na sipi, kei ira na cauravou, io, sa kani ira sara; ia koi au duaduaga ka'u sa dro bula me'u tukuna vei iko. 17Ni sa vosa tiko ko koya, sa lako mai e dua tani tale, ka kaya, Era lesia e tolu na mataivalu ko ira na kai Kalitia, ka ra sikiti ira na kameli, ka kauta tani, ka ra sa yaviti ira na cauravou e nai seleiwau; ia koi au duaduaga ka'u sa dro bula me'u tukuna vei iko. 18Ni sa vosa tiko koya, sa lako mai e dua tani tale, ka kaya, Sa ra kana ka gunu waini ko iratou na luvemu tagane kei na luvemu yalewa mai na vale nei tuakadratou na ulumatua: 19ka raica, sa liwa e dua na cagi levu mai lekutu, a sa roba na tutu ni vale vava, a sa baleti ira na cauravou, ka ra sa mate; ia koi au duaduaga ka'u sa dro bula me'u tukuna vei iko.
20Sa qai tu cake ko Jope, ka dresulaka na nonai sulu, ka tasia na uluna, ka cuva ki na qele, ka lotu, 21ka kaya, Au a luvawale ni'u a lako mai na kete i tinaqu, au na luvawale talega ni'u sa suka ki kea: sa solia ko Jiova, ka sa kauta tani ko Jiova; me vakavinavinakataki ga na yaca i Jiova. 22E na ka kecega oqo sa sega ni cala kina ko Jope, se kaya ko koya ni sa cala na Kalou.
Currently Selected:
JOPE 1: FOV
Highlight
Share
Copy
Want to have your highlights saved across all your devices? Sign up or sign in
Vakavakadewa Makawa (Fijian Old Version) © Bible Society of the South Pacific