ሉቃሳ 1
1
1-4ቦንቼቴዳ ቶፊሎሳ፥ ኮይሮ ባሬንቱ ኣይፊያን ቤዔዳዋንቱኔ ባሬንቱ ቃላን ማርካቴዳዋንቱ ኑሲ ኦዴዲኖ። ፃፌቴዳ ዬዉዋ ታ ባጋን ኡባ ፃጱዋፔ ቢዳ ፄሎዋፔ ጉዬ፥ ታሪኪያ ማራ ናጌዳ ኦጊያን ኔው ፃፋናው ሎዓ ጊዴዳዌ ታው ቤቴዳ።
ፃማቂያ ዮሃኒሳ ዬሌታይ ኮይሮ ኦዴቴዳ
5ዪሁዳ ጋዲያ ካቲያ ሄሮዲሳ ዎዲያን፥ #1፡5 ዪሁዳ፡ ሃዋኒ ዪሁዳ ጋዲያ ጌቴቴዳዌ ፊልስፄሜ ጋዲያ ኡባ ቤሲያዋ። ኣቢያ ቄሳቴ ኦሱዋ ባጋፔ ጊዴዳ ዛካራሳ ጌቴቲያ ኢቲ ቄሳይ ዴዔ። #1ኦድ 24፡10 ማቻታካ ኤልሳቤፆ ጌቴቲያ ኣሮኔ ያራፔ ዬሌቴዳዉኖ። 6ላዓቱካ ጎዳ ኣዛዙዋኔ ሴራ ዳሪሲዴ ናጊያዋንታኔ ካ ባንታን ፆሳ ሲንን ዴዒያ ፂላቱዋ። 7ጊዶፔ ኣቲን ኤልሳቤፃ ማን ጊዶ ዲራው፥ ዬሉ ኡንቱንቶ ባዋ። ላዓቱካ ላይ ሱጌዳዋንታ።
8ኢቲ ጋላሲ ዛካራሲ ባሬ ባጋ ካላን ፆሳ ሲንን ቄሳቴን ኦያ ዎዴ፥ 9ባሬ ቄሳቴ ዎጋ ዶያዳን ጌሻ ጎሊያ ጌሊዴ ኢፃና ጩዊሱዋ #1፡9 ኢፃና ጩዊሱዋ፡ ሃዋ ጉሳይ ጩዋይ ዎሳ ኮታ ፆሳኮ ጋኬ ጊዴ ዎንታኔ ኦማርሲ ዎዴ ጩዊሲያ ዎጋ። ሳማይ ኣ ጋኬዳ። 10ኢፃናይ ጩዊያ ዎዴ ኣሳይ ኡባይ ካሬን ኤቂዴ ዎሲ ዴዔ።
11ጎዳ ኪታንቻይ ኢፃና ያርሹዋሳፔ ኡሼቻና ኤቂዴ ኣው ቤቴዳ። 12ዛካራሲካ ቤዔዳ ዎዴ ዳጋሚዴ ያሻን ሚቴቴዳ። 13ኪታንቻይካ ቃሲ ያጌዳ፥ «ዛካራሳ፥ ያዮፓ፤ ኔ ዎሳይ ሲሴቴዳ፥ ኔ ማቻታ ኤልሳቤፃ ኣቱማ ናዓ ዬላናዉኑ። 14ኣ ዬሌታን ናሼታይኔ ኢሻሉ ኔው ሃናናዋ፤ ጮራቱካ ኢ ዬሌቶ ዲራው ሃሹ ጋናዋንታ፤ 15ኢካ ጎዳ ሲንን ዳራ ጊዳናዋ። ማዪያ ዎዪኒያ ኡሻ ጊዶ ሃራ ማዪያ ኡሻ ኣይኔ ኡሼና፤ ባሬ ዳይ ኡሉዋን ዴዒሺን ኣያና ጌሻይ ኣኒ ኩማናዋ። #ፓይ 6፡3
16«ኢስራዔሊያ ኣሳቱዋፔካ ጮራቱዋ ኡንቱንቱ ጎዳ ፆሳኮ፥ ኢ ዛራናዋ። 17ኢካ ጊጌና ኣሳ ጎዳው ጊጊሳናው፥ ኣዋቱዋ ዎዛና ናናቱዋኮ፥ ኣዛዜቴናዋንታካ ፂሎቴ ኤራኮ ዛራናው፥ ኤላሳ#1፡17 ኤላሳ፡ ሃዌ ጌቴቴዳዌ፥ ካሴ ኤጫ ጫቁዋ ማፃፋን ናቢያ ኤላስ ኦራባ ኦያ ዎልቃኒ ኤሬቴዳዋ ዲራሳ። ኣያናኒኔ ዎልቃን ጎዳፔ ሲንና ቤ።» #ሚል 4፡5፣ 6
18ዛካራሲካ ኪታንቻ፥ «ታኒ ጪማዲ፥ ታማቻታካ ባሬ ላይን ሱጌዳዉኖ፥ ሃዋ ታኒ ኣያን ኤራኒታ?» ጌዳ።
19ኪታንቻይካ ዛሪዴ፥ «ታኒ ፆሳ ሲንን ኤቂያ ጋብሬላ፤ ሃዋ ሚሺራቹዋ ኔው ኦዳናው ኔኮ ኪቴታዲ፤ #ዳን 8፡16፤ 9፡21 20ሄኮ ሄ ዎዲያን ሃናና ታ ቃላ ኔ ኣማና ቤና ዲራው፥ ሃ ዬዉ ሃናና ጋላሳይ ጋካናው ኔኒ ዱዴ ጊዳናሳ፤ ሃሳያናዉካ ዳንዳያካ» ጌዳ።
21ሄ ዎዴ ኣሳይ፥ ዛካራሲ ጌሻ ጎሊያፔ ኬሴናን ኣያው ጋሚዔዴንቶ ማላሌቲዴ ናጊኖ። 22ኬሴዳ ዎዲያንካ ሃሳያናው ዳንዳይቤና፤ ጌሻ ጎሊያን ሳፃ ኢ ቤዔዳዋ ኣኬኬዲኖ፤ ኢካ ሃሳያናው ዳንዳዪቤናዋ ፆርሲ ቤሲዴ፥ ዱዴ ጊዲዴ ዴዔዳ።
23ዛካራሲካ ባሬ ኦሱዋ ዎዲያ ዉርሶ ዎዴ፥ ባሬ ጎሌ ሲሜዳ። 24ሄዋፔ ጉዪያን ኣ ማቻታ ኤልሳቤፃ ሻሃራዴ ኢቼሹ ኣጌና ባሬና ጌንዱ። 25ኤልሳቤፃካ፥ «ታ ቶሺያ ኣሳ ጊዶፔ ዲጋናው#1፡25 ታ ቶሺያ ኣሳ ጊዶፔ ዲጋናው፡ ኣሲና ጌሌዳ ሚሺራታ ናዓ ዬሌናን ኣቶፔ፥ ኢሲራዔሊያ ኣሳ ቆፋን፥ «ፆሳይ ኢዞ ሙሪ ዴዔ» ያጌታው። ጎዳይ ባሬ ማሮቴን ታና ፄሎ ዎዴ፥ ሃዋዳን ታው ኦዳ» ጋዱ።
ዬሱሳ ዬሌታይ ካሴቲዴ ኦዴቴዳ
26ኡሱፑን ኣጌናን ፆሳ ኪታንቻ ጋብሬል ጋሊላ ጋዲያን ናዚሬቴ ካታማ 27ዳዊታ ያራፔ ጊዴዳ ዮሴፋ ጌቴቲያ ቢታኔው ኦሼታ ቃሼቴዳ ዎዶራቲኮ ፆሳ ማታፔ ኪቴቴዳ፤ ዎዶራቲ ሱንይካ ማይራሞ ጌቴቴ። #ማት 1፡18 28ኪታንቻይካ ማይራሚኮ ዪዴ፥ «ዳሪሳዴ ዶሴታዉኔ፥ ሳሮቴይ ኔው ጊዶ፤ ጎዳይካ ኔናና ጋ ዴዔ፤ ኔኒካ ማጫዋንቱ ጊዶን ኣንጄቴዳዉኖ» #1፡28 ኔኒካ ማጫዋንቱ ጊዶን ኣንጄቴዳዉኖ፡ ሃ ቆፋይ ቤኒ ጪሜዳ ግሪኪያ ማፃፋን ባይናዋ ጊዲያ ዲራው፥ ኢቲ ኢቲ ኢንጊሊዜዋኒኔ ኣማራዋ ማፃፋኒካ ባዋ። ያጌዳ።
29ማይራማካ ኣ ሃሳያፔ ዴንዶዋን ዳሪሳ ዳጋማዴ፥ «ሃዌ ኣያ ማላ ሳሮታ ጊዳኔ» ጋዴ ዬዉዋ ቆፓዱ። 30ኪታንቻይ ኢዞ፥ «ሃኔ ማይራሜ፥ ፆሳ ማታን ሳባ ዴማዳ ያዮፓ። 31ኔኒ ሻሃራዴ፥ ኣቱማ ናዓ ዬላናሳ፤ ኣ ሱንካ ዬሱሳ ጋናሳ። #ማት 1፡21 32ኢካ ዳራ ጊዳናዋ፤ ኡባፔ ቃ ፆሳ ናዓ ጌቴታና፤ ጎዳ ፆሳይ ኣ ኣቡ ዳዊታ ካዉቴ ኦይዲያ ኣው ኢማናዋ። 33ኢካ ያዪቆባ ጎሌን ሜናው ካዉታናዋ፤ ኣ ካዉቴዉካ ዉርሴይ ባዋ» ያጌዳ። #2ሳም 7፡12፣ 13፥ 16፤ ኢሳ 9፡7
34ማይራማካ ኪታንቻ፥ «ታኒ ዎዶራቶ ጊዶ ዲራው፥ ሃዌ ዎቲ ሃናናዌ?» ያጋዱ።
35ኪታንቻይካ ዛሪዴ ኢዚው፥ «ኣያና ጌሻይ ኔ ቦላ ያናዋ፤ ቃ ፆሳ ዎልቃይ ኔናን ሼምፓናዋ። ሄዋ ዲራው፥ ኔፔ ዬሌቲያዌ ጌሻ ፆሳ ናዓ ጌቴታና። 36ኔ ዳባታ ኤልሳቤፃ ባሬ ጪማቴ ዎዲያን ኣቱማ ናዓ ሻሃራዱ። ማን ጌቴቴዳዉና ኤልሳቤፃ ሻሃሮዴፔ ኡሱፑን ኣጌና ኦይቃዱ። 37ፆሳ ፆኒያ ዬዉ ባዋ» #ዶም 18፡14 ያጌዳ።
38ማይራማካ፥ «ታኒ ጎዳ ኣይላቶ፤ ኔኒ ጎዋዳን ሃኖ» ጋዱ። ሄዋፔ ጉዪያን ኪታንቻይ ኢዚ ማታፔ ቤዳ።
ማይራማካ ኤልሳቤፆ ኦቻናው ባዱ
39ማይራማካ ሄ ኣጌና ጊዶን ዴንዳዴ ኪሊ ዞዜቲያ ዪሁዳ ጋዴን ዴዒያ ኢቲ ካታማ ኤሌላ ኬሳዱ። 40ዛካራሳ ጎሌ ጌላዴ ኤልሳቤፆ ሳሮታዱ። 41ኤልሳቤፃካ ማይራሚ ሳሮታ ሲሴዳ ዎዴ፥ ኢዚ ኡሉዋን ዴዒያ ሻሃራይ ጉፔዳ፤ ኤልሳቤፃካ ኣያና ጌሻን ኩማዱ። 42ባሬ ኮሻካ ቁ ኦዴ፥ «ኔኒ ማጫዋንቱ ጊዶፔ ኣንጄቴዳዉኖ። ኔፔ ዬሌቲያዌካ ኣንጄቶዋ። 43ኔኒ ታ ጎዳ ዳያ ታኮ ያናው ታኒ ኦኔ? 44ሄኮ ኔ ሳሮታ ኮሻይ ታ ሃይን ሲሴቴዳ ዎዴ፥ ታ ኡሉዋን ዴዒያ ሻሃራይ ናሼቻን ጉፔዳ። 45ጎዳይ ፖሌቴ ጊዴ ኢዚው ኦዴዳዋ ኣማኔዳዉና ኢዛ ኣንጄቴዳዉኖ» ያጋዱ።
ማይራሚ ጋላታ ዬ
(1፡46-53)
46ማይራማካ፥
«ታ ሼምፓታ ታ ጎዳ ቦንቻው፥
47ታ ኣያናይካ ታ ፆሳ፥ ታ ሊያን
ሎይ ናሼታው።
48ኢካ ባሬ ኣይላቲ ቶሺያ
ፄሌዳ።
ሃቼፔ ዶሚዴ ዬሌታይ ኡባይ
ኣንጄቴዳዉኔ ጊኖ።
49ዎልቃማ ጊዴዳ ኢ ዳሮ
ዬዉዋ ታው ኦዳ፤
ኣ ሱንይካ ጌሻ።
50ኣ ማሮታይ ያዪያዋንቱሲ ዬሌታፔ ዬሌታይ
ጋካናው ዴዔ።
51ባሬ ዎልቃን ሚኖ ኪታ ኪቴቴዳ፤
ባሬንቱ ዎዛና ቆፋን ኦቶሬቲያዋንታ
ላሌዳ።
52ሞዲያዋንታ ካዉቴ ማታ ኦይዲያፔ ዎዳ፤
ኣሺካቱዋካ ቃሲ ቁ ቁ ኦዳ።
53ኮሻቴዳዋንታ ሎዖ ዬዉዋን ካሊሴዳ፤
ዱራቱዋ ቃሲ ሜላ ዬዴርሴዳ
54ባሬ ማሮቴ ቆፒዴ
ባሬ ኣይሊያ ኢስራዔሊያ ማዴዳ።
55ኑ ኣዋቶ ኢ ኦዴዳዋዳን
ኣብራሃሜዉኔ ኣ ያራው ጌዳዋ
ሜናው ናጋና ዲራሳ»
ያጋዱ።
56ማይራማካ ሄዙ ኣጌና ኬና ኤልሳቤፂ ማታን ጋሚዖዋፔ ጉዪያን ባሬ ጎሌ ሲማዱ።
ፃማቂያ ዮሃኒሳ ዬሌታ
57ኤልሳቤፂዉካ ዬሊያ ዎዲ ጋኪና፥ ኣቱማ ናዓ ዬላዱ። 58ኢዚ ሾራቱኔ ኢዚ ዳቦ ጊዴዳዋንቱ፥ ጎዳይ ማሮቴ ኢዚው ኦዳዋ ሲሲዴ ኢዚና ኢቲፔ ናሼቴዲኖ።
59ሆስፑን ጋላሳን ናዓ ቃፃራናው ዬዲኖ፤ ኣ፥ ኣዉዋ ሱንን ዛካራሳ ጊዴ ሱንናው ኮዬዲኖ። #ዎግ 12፡3 60ኣ ዳያ ቃሲ፥ «ሃኔና፥ ዮሃኒሳ ጌቴታናው ኮሼ» ያጋዱ።
61ኡንቱንቱካ ኢዞ፥ «ኔ ዳባቱዋፔ ሃቼ ጋካናው ኢቱካ ሃ ሱንን ፄሴቲቤና» ያጌዲኖ።
62ኣ ኣባ፥ ኦና ጊያ ሱንን ፄጌታናው ኮዪንቶ ፆርሲ ኦቼዲኖ።
63ኣ ኣቡካ ፃፊያባ ኦቺ ኣኪዴ፥ «ናዓ ሱንይ ዮሃኒሳ» ጊዴ ፃፊና፥ ኡባቱካ ዬዉዋን ማላሌቴዲኖ። 64ሄዋንካ ዛካራሳ ዶናይ ዶዬቴዳ፥ ኣ ኢንፃርሳይካ ቢሌቲና ሃሳያ ዶሜዳ፥ ፆሳካ ጋላቴዳ።
65ኣ ሾራቱካ ዴዒያሳ ኡባን ያሻን ኩሜዲኖ። ሃ ዬዉካ ዞዜቲያ ዪሁዳ ጋዲያ ኡባን ዳሪ ሃሳዬቴዳ። 66ሃዋካ ሲሴዳዋንቱ ኡባቱ፥ «ሃ ናዓይ ኣያ ጊዳኔሻ?» ያጊዴ ዬዉዋ ባሬንቱ ዎዛናን ኦይቄዲኖ፤ ፆሳይካ ኣናና ዴዒያዋ ኤሬዲኖ።
ዛካራሳ ጋላታኔ ቲምቢቲያ ኦዱዋ
67ዮሃኒሳ ኣቡ ዛካራሲ ኣያና ጌሻን ኩሚዴ ቲምቢቲያ ያጊ ኦዴዳ፡
68«ኢስራዔሊያ ጎዳይ ፆሳይ ኣንጄቶ፤
ዪዴ ባሬ ኣሳ ፆሞሴዳኔ ዎዜዳ።
69ባሬ ኣይሊያ ዳዊቴ ጎሊያን፤
ዎልቃማ ኣሺያዋ ኑሲ ጊጊሴዳ።
70ሃዌካ ቤኒ ጎዳ ጌሻ ናባቱዋ
ዶናን ኦዴቶዋዳን፥
71ኢ ኑና፥ ኑ ሞርኬቱዋፔኔ
ኑናና ኤቄቲያዋንቱ ኩሺያፔ ኣሻናሳ።
72ሃዋካ ኢ ኦዳዌ፥ ኑ ኣዋቶ
ማሮቴ ቤሳናሳኔ፥
ባሬ ጌሻ ጫቁዋ ዎዛና ኣናሳ።
73ኑ ኣዉዋ ኣብራሃሞሲ
ጫቄዳ ጫቁዋ ቆፓናው፥
74ኑ ሞርኬቱዋ ኩሺያፔ ኬሲዴ
ያሻይ ባንታን ኣው ኦናዳን
ማታ ኑሲ ኢሜዳ።
75ሃዌኔካ፥ ኑና ኑ ዎዲያ ኡባን
ጌሻቴኒኔ ፂሎቴን
ባሬ ሲንን ኤሳና ዲራሳ።
76ዛሪዴካ፥ ኔኖ፥ ታ ናዓው፥
ቃ ፆሳ ናቢያ
ጌቴታናሳ፤
ኦጊያ ጊጊሳናው ጎዳፔ ሲንና
ባናሳ።
77ኣሳ ናጋራ ማሪያ ኣቶቴ ኤራ
ኡንቱንቶ ኢማናሳ።
78ሄዌካ ኪሊፔ ዬዳ ፖዑ፥
ኑና ፆሞሴዳዌ ኑ ፆሳ ማሮቴኔ
ቃሬታ ጋሱዋና።
79ኣ ፖዑካ ማኒኔ ሃይቁዋ ኩዋን
ኡቴዳዋንቶ ፖዒሴ፤
ኑ ጌዲያካ ሳሮቴ ኦጊያን ሱሪሴ።»
80ናዓይካ ዲጪዴ፥ ኣያናን ሚኔዳ፤ ኢስራዔሊያ ኣሳው ቤቴዳ ጋላሳይ ጋካናው ሜላ ቢታን ዴዔዳ።
Currently Selected:
ሉቃሳ 1: dwrENT
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
Learn More About Ooratha Caaquwaa