ዮሃኒሳ 20
20
ዬሱሲ ሃይቁዋፔ ዴንዴዳ
(ማት 28፡1-8፤ ማር 16፡1-8፤ ሉቅ 24፡1-12)
1ዎጋ ጋላሲ ጉራን፥ ቢሮ ዳቢዳቢያዋን፥ ማግዳላ ጌቴቲያ ካታማፔ ዬዳ ማይራማ ዬሱሲ ሞጌቴዳ ዱፉዋኮ ባዴ ሹቻይ ሄ ጎንጎሉዋ ዶናፔ ዴንዲኪቼዳዋ ቤዓዱ። 2ሲሞኒ ጴፂሮሳኮኔ ዬሱሲ ሲቂያ ዮኮ ካሊያዋኮ፥ ኢዛ ዎፃዴ ባዴ፥ «ዱፉዋፔ ጎዳ ኣፊዲጌዲኖ፤ ሃቃን ኣ ዎዲኖንቶኔ ኑኒ ኤሮኮ» ያጋዱ።
3ሄዋ ዲራው፥ ጴፂሮሲኔ ዮኮ ካሊያዌ ኣጊዴ፥ ዱፉዋኮ ቤዲኖ። 4ላዑካ ኢቲፔ ዎፄዲኖ፤ ሺን ዮኮ ካሊያዌ ጴፂሮሳፔ ኣ ካሴቲዴ፥ ሄ ዱፉዋኮ ጋኬዳ። 5ሄ ካሊያዌ ሆኪዴ፥ ሞጉዋ ኣፊላ ቤዔዳ፤ ሺን ጊዶ ጌሊቤና። 6ሲሞኒ ጴፂሮሴ ኣ ካሊ ዪዴ፥ ዱፉዋ ጊዶ ጌሌዳ። ያቲዴ ሞጉዋ ኣፊላይ ሄዋን ዴዒያዋ ቤዔዳ፤ 7ቃሲ ዬሱሳ ሁጲያን ፃፄቲ ኡቴዳ ኣፊላይ ሄ ፃፄቴዳዋዳንካ ዱማ ኢቲ ሳዓን ዴዒያዋ ቤዔዳ፤ ሄ ኣፊላይ ዱማ ዴዔፔ ኣቲን፥ ሞጉዋ ኣፊላና ኢቲፔ ዴዔና። 8ሄ ዎዴ፥ ካሴቲዴ ጎንጎሉዋኮ ጋኬዳ ዮኮ ካሊያዌ ጌሊ ቤዒዴ ኣማኔዳ። 9ዬሱሲ ሃይቁዋፔ ዴንዳናው ቤሲያዋ ኦዲያ ፆሳ ማፃፋ ኡንቱንቱ ቢሮ ኣኬኪቤይኪኖ። 10ሄዋፔ ጉዪያን፥ ካሊያዋንቱ ባሬንቱ ጎሌ ሲሚዴ ቤዲኖ።
ዬሱሲ ማግዳላ ማይራሚው ቤቴዳ
(ማት 28፡9-10፤ ማር 16፡9-11)
11ሺን ማይራማ ሄ ዱፉዋ ዶናን ኤቃዴ ዬካዴ ሆካዴ ዱፉዋ ጊዶ ፄላዱ። 12ቦ ማዩዋ ማዬዳ ላዑ ኪታንቻቱ ዬሱሳ ኣኃይ ጊሴዳ ሳዓን ኢቱ ሁጲሳና ኢቱ ጌዲሳና ኡቴዳዋንታ ቤዓዱ። 13ኡንቱንቱ ኢዞ፥ «ሚሺራቴ፥ ኣዪሲ ዬካይ?» ያጊዴ ኦቼዲኖ።
ኢዛ፥ «ኣሳቱ ታ ጎዳ ኣፊዲጌዲኖ፤ ኡንቱንቱ ሃቃን ዎዲኖንቶኔ ታኒ ኤሪኬ» ያጋዱ።
14ሄዋ ጌዳዋፔ ጉዪያን፥ ጉዬ ሲማ ፄላዴ፥ ዬሱሲ ኤቄዳዋ ቤዓዱ። ሺን ኢ ዬሱሳ ጊዴዳዋ ኣኬካቤይኩ። 15ዬሱሲ ኢዞ፥ «ሚሺራቴ፥ ኣዪሲ ዬካይ? ኦና ኮያይ?» ያጊዴ ኦቼዳ።
ማይራማ ኣቲኪልቲያ ናጊያዋ ጋዴ፥ «ጎዳው፥ ኔኒ ኣኬዳዋ ጊዶፔ፥ ኣ ሃቃን ዎዲንቶ፥ ታው ኦዳሪኪ፤ ታኒ ኣ ኣካና» ያጋዱ።
16ዬሱሲ ኢዞ፥ «ማይራሜ» ያጌዳ።
ኣ ኣኮ ሲማዴ፥ ኢብራዪስፄ ቃላን «ራቡኒ» ያጋዱ፤ ሄዋ ቢሌይ «ታማሪሲያዎ» ጊያዋ።
17ዬሱሲ ኢዞ፥ «ታኒ ቢሮ ታ ኣዉዋኮ ባቤና ዲራው፥ ታና ቦቾፓ፤ ሺን ታ ኢሻቱዋኮ ባዴ፥ ‹ታኒ ታ ኣዉዋኮኔ ሂንቴንቱ ኣዉዋኮ፥ ታ ፆሳኮኔ ሂንቴንቱ ፆሳኮ፥ ፑዴ ባይ ጌዳ› ጋዴ ኡንቱንቱሲ ኦዳ» ያጌዳ።
18ማግዳላ ጌቴቲያ ካታማፔ ዬዳ ማይራማ ጎዳ ቤዔዳዋኔ ኢዚው ኢ ሄዋ ኦዴዳዋ ባዴ ካሊያዋንቱሲ ኦዳዱ።
ዬሱሲ ባሬ ካሊያዋንቶ ቤቴዳ
(ማት 28፡16-20፤ ማር 16፡14-18፤ ሉቅ 24፡36-49)
19ሄ ዎጋ ጋላሲ ኦማርሲ፥ ካሊያዋንቱ ኣዪሁዳቱው ያዬዳ ዲራው፥ ፔንጊያ ጎርዲዴ፥ ሺቂ ኡቲ ዴዒሺን፥ ዬሱሲ ዪዴ፥ ኡንቱንቱ ጊዱዋን ኤቂዴ፥ «ሳሮቴይ ሂንቴንቱሲ ጊዶ» ያጌዳ። 20ሄዋ ጌዳዋፔ ጉዪያን፥ ባሬ ኩሺያኔ ባሬ ሚዪያ ኡንቱንታ ቤሴዳ፤ ካሊያዋንቱ ጎዳ ቤዔዳ ዎዴ ሎይ ናሼቴዲኖ። 21ዬሱሲ ላዔንዋ ኡንቱንቱሲ፥ «ሳሮቴይ ሂንቴንቱሲ ጊዶ፤ ታ ኣቡ ታና ኪቴዳዋዳን፥ ታኒካ ሂንቴንታ ኪታይ» ያጌዳ። 22ሄዋ ጌዳዋፔ ጉዪያን፥ ኡንቱንቱ ቦላ ኡፉ ጊዴ ሼምፔዳ፤ ቃሲ፥ «ጌሻ ኣያና ኣኪቴ። 23ሂንቴንቱ ኣቶ ጌዳ ኣሳ ናጋራይ ኣቶ ጌቴታናዋ፤ ሂንቴንቱ ኣቶ ጌናዋንቱ ናጋራይ ኣቶ ጌቴቴና» ያጌዳ።
ዬሱሳኔ ቶማሳ
24ሺን ታማኔ ላዑ ካሊያዋንቱፔ ኢቱ፥ ማንቲያ ጊያ ቶማሲ፥ ዬሱሲ ዬዳ ዎዴ ኡንቱንቱና ባዋ። 25ሄዋ ዲራው፥ ዮኮ ካሊያዋንቱ ቶማሳው፥ «ኑኒ ጎዳ ቤዔዶ!» ያጌዲኖ።
ሺን ቶማሲ ኡንቱንቱሲ፥ «ሚሲማሪያን ኢ ጫዴቴዳ ኣ ኩሺያን ዴዒያ ማላ ቤዔናኒኔ ሄ ማላ ታ ቢራያን ቦቼናን፥ ቃሲ ታ ኩሺያ ኣ ሚዪያን ዬዳ ቤዔናን ታኒ ኣማኒኬ» ያጌዳ።
26ሳሚንታፔ ጉዪያን፥ ዬሱሳ ካሊያዋንቱ ቃሲካ ጎሌን ሺቂ ኡቴዲኖ፤ ቶማሲካ ኡንቱንቱና ዴዔ። ፔንጊ ቃሼቲ ኡቲ ዴዒሺን፥ ዬሱሲ ዪዴ፥ ኡንቱንቱ ጊዱዋን ኤቂዴ፥ «ሳሮቴይ ሂንቴንቱሲ ጊዶ» ያጌዳ። 27ሄዋፔ ጉዪያን፥ ዬሱሲ ቶማሳ፥ «ኔ ኩሺያ ሃ ኣሃዴ፥ ታ ኩሺያ ቤዓ፥ ቃሲ ኔ ኩሺያ ሃ ኣሃዴ፥ ታ ሚዪያን ዬዳ ቤዓ፥ ኔኒ ኣማኒያዋ ጊዳፔ ኣቲን፥ ኣማኔናዋ ጊዶፓ!» ያጌዳ።
28ቶማሲ ዛሪዴ፥ «ታ ጎዳው፥ ታ ፆሳው!» ያጌዳ።
29ዬሱሲ፥ «ኔኒ ታና ቤዔዳ ዲራው ኣማናዳ፤ ቤዔናን ኣማኔዳዋንቱ ኣንጄቴዳዋንታ» ያጌዳ።
ሃ ማፃፋ ቆፋ
30ዬሱሲ ሃ ማፃፋን ፃፌቲቤና ሃራ ዳሮ ማላታቱዋ ባሬና ካሊያዋንቱ ሲንን ኦዳ። 31ሺን ዬሱሲ፥ ኢ ኪሪስቶሳ፥ ፆሳ ናዓ ጊዲያዋ ሂንቴንቱ ኣማናና ማላኔ፥ ቃሲ ኣ ኣማኒዴ ኣ ሱንን ዴዑዋ ሂንቴንቱ ዴማና ማላ፥ ሃዌ ፃፌቴዳ።
Currently Selected:
ዮሃኒሳ 20: dwrENT
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
Learn More About Ooratha Caaquwaa