1 ቆሮንቶሳ 1
1
1ታኒ፥ ፆሳ ሼኒያን ዬሱሲ ኪሪስቶሲ ኪቴዳዋ ጊዳናው ፄሴቴዳ ጳዉሎሲኔ፥ ኑ ኢሻ ሶስቴኒሲ፥ 2ቆሮንቶሳን ዴዒያ ፆሳ ኣማኒያ ኣሳቱዋሲ፥ ዬሱሲ ኪሪስቶሳን ጌዬዳዋንቱሲኔ፥ ኑሲ ጎዳ ጊዲያ ኑ ጎዳ ዬሱሲ ኪሪስቶሳ ሱን ኡባ ሳዓን ፄሲያ ኡባቱዋና ጌሻ ጊዳናው ፄሴቴዳዋንቱሲ ሃ ዳቢዳቢያ ፃፌቶ።
3ፆሳይ፥ ኑ ኣዉኔ ኑ ጎዳይ ዬሱሲ ኪሪስቶሲ ሂንቴንቱሲ ኣ ኬካቴኔ ሳሮቴ ኢሞ።
ፆሳ ጋላቱሳ
4ፆሳይ ኪሪስቶሳ ዬሱሳ ባጋና ሂንቴንቱሲ ኢሜዳ ኣ ኬካቴ ዲራው፥ ታኒ ኡባ ዎዴ ሂንቴንቱሲ ፆሳ ጋላታይ። 5-6ታኒ ኪሪስቶሳሲ ማርካቲያዌ ሂንቴንቱን ሚኔዳ ዲራው፥ ሂንቴ ኡባባኒ፥ ሃሳያ ኡባን ኤራቴ ኡባን፥ ኣኒ ዱሬቴዲታ። 7ሃዋዳን ሂንቴ ኑ ጎዳ ዬሱሲ ኪሪስቶሳ ዩሳ ናጊሺን፥ ኣያና ኢሞታፔ ሃራይ ኣቶ ኢቱኔ ሂንቴንቱሲ ፓጬና። 8ቃሲ ኑ ጎዳ ዬሱሲ ኪሪስቶሳ ጋላሳን ሂንቴ ካ ባይናዋንታ ጊዳናዳን፥ ዉርሴይ ጋካናው ኢ ሂንቴንታ ሚኒሳናዋ። 9ባሬ ናዓ ኑ ጎዳ ዬሱሲ ኪሪስቶሳ ኢቲፔቴው ሂንቴንታ ፄሴዳ ፆሳይ ኣማኔቴዳዋ።
ኣማኒያ ኣሳ ጊዶን ሻኮቴይ ሜቶፖ
10ሺን ታናዳን ኣማኒያዋንቶ፥ ኢቲ ዎዛናኒኔ ኢቲ ቆፋን ኢቲፔ ጊዳናፔ ኣቲን፥ ሻኮቴይ ሂንቴ ጊዶን ዴዔና ማላ፥ ሂንቴ ኡባይ ኢቲ ሃሳያ ሃሳያናዳን፥ ኑ ጎዳ ዬሱሲ ኪሪስቶሳ ሱንን ታኒ ሂንቴንታ ዎሳይ። 11ኣዪሲ ጎፔ፥ ታናዳን ኣማኒያዋንቶ፥ ቃሎዓ ሶይ ኣሳይ ሂንቴንቱባ፥ ሂንቴ ጊዶን ዋላሳይ ዴዒያዋ፥ ታው ኦዴዲኖ። 12ታኒ ጊያዌ ሃዋ፤ ሂንቴንቱ ሁጲያን ሁጲያን፥ «ታኒ ጳዉሎሳዋ። ታኒ ኣጲሎሳዋ። ታኒ ኬፋዋ። #1፡12 ኬፋ፡ ሃዌ ግሪኬ ሱን ጊዲዴ፥ ቢሌይ ዛላ ጊያዋ። ሃራ ጌሻ ማፃፋቱዋን ኬፋ ሱንይ ጴፂሮሳ። ታኒ ኪሪስቶሳዋ» ያጊታ። 13ኪሪስቶሲ ሻኬቴዴ? ሂንቴንቱ ዲራው፥ ማስቃሊያ ቦላ ሚሲማሪያን ሼቲዴ ካቄቴዳዌ ጳዉሎሴ? ዎይ ሂንቴ ጳዉሎሳሲ ጊዳናው ፃማቄቴዲቴ?
14ታኒ ቃሪሲጶሳፔኔ ጋዮሳፔ ኣቲን፥ ሂንቴንቱፔ ኦናኔ ፃማቃቤና ዲራው፥ ፆሳ ጋላታይ። 15ሄዋ ዲራው፥ ኦኒኔ ሂንቴንታ ታው ጊዳናዳን ፃማቄቴዲታ ጋናው ዳንዳዬና። 16ቃሲ፥ ኤ፥ ኢስፂፋኖሳ ሶይ ኣሳካ ታኒ ፃማቃዲ። ሺን ሃራ ጉጃዴ ፃማቃዲታንቶኔ ዎዛና ኣኬ። 17ኣዪሲ ጎፔ፥ ኪሪስቶሲ ታና ሚሺራቹዋ ቃላ ኦዳና ማላ ኪቴዳፔ ኣቲን፥ ፃማቃና ማላ ኪቲቤና፤ ቃሲ ኪሪስቶሲ ማስቃሊያ ቦላ ሃይቄዳዌ ሜላ ጊዴና ማላ፥ ታኒ ኣሳ ኣዳ ኤራቴ ቃላን ታማሪሲኬ።
ኪሪስቶሲ ፆሳ ኣዳ ኤራኔ ዎልቃ
18ኣዪሲ ጎፔ፥ ኪሪስቶሲ ማስቃሊያ ቦላ ሃይቄዳዋ ኦዲያ ቃላይ ዪያዋንቱሲ ኤያቴ። ሺን ኑሲ ኣቲያዋንቱሲ ፆሳ ዎልቃ። 19ፆሳ ማፃፋይ፥
«ታኒ ኤራንቻቱዋ ኣዳ ኤራቴ
ባዪዛና፤
ቃሲ ኣኬካንቻቱዋ ኣኬካካ ዪሳና»
ያጌ። #ኢሳ 29፡14 20ኣዳ ኤራንቻይ ሃቃን ዴዒ? ሂጊያ ታማሪሲያዌ ሃቃን ዴዒ? ዎይ ሃ ኣላሚያ ፆናናው ፓሉሜቲያዋንቱ ዋናንዲኖሻ? ፆሳይ ሃ ሳዓ ኣ ኤራቴይ ኤያቴ ጊዲያዋ ቤሴዳ! #ዮብ 12፡17፤ ኢሳ 19፡12፤ 33፡18፤ 44፡25
21ኣዪሲ ጎፔ፥ ኣሳይ ባሬ ሁጴ ኣ ኤራቴን ባሬና ፆሳ ኤሬና ማላ፥ ፆሳይ ባሬ ኣ ኤራቴን ዲጊዴ፥ ኑኒ ኦዲያ ኤያ ቃላን ኣማኒያዋንታ ኣሻናው ቆፔዳ። 22ኣዪሁዳቱ ማላታ ኦቺኖ። ቃሲ ጊሪኬ ኣሳቱ ኣ ኤራቴ ዎልቃማ ኮሻ ኮዪኖ። 23ሺን ኑኒ ማስቃሊያ ቦላ ሚሲማሪያን ሼቲዴ ካቄቴዳ ኪሪስቶሳባ ኦዴቶ። ሄዌ ኣዪሁዳቱዋሲ ቦ፤ ቃሲ ኣዪሁዳ ጊዴናዋንቱሲ ኤያቴ። 24ሺን ፆሳይ ፄሴዳዋንቱሲ ኣዪሁዳቱሲካ ጊሪካቱሲካ ኑኒ ኦዲያ ፆሳ ዎልቃይኔ ኣ ኣ ኤራቴይ ኪሪስቶሳ። 25ኣዪሲ ጎፔ፥ ፆሳ ኤያቴይ ኣሳ ኣዳ ኤራቴፔ ኣ፤ ቃሲ ኣ ላፋቴ ጌቴቲያዌካ ኣሳ ሚኖቴፔ ሚኔ።
26ሲሚ ታናዳን ኣማኒያዋንቶ፥ ፆሳይ ሂንቴንታ ፄሲያ ዎዴ ሂንቴ ዎይሳ ማላ ኣሴንቶ ቆፒቴ። ኣሳ ቆፋን ሂንቴ ጊዶን ኣ ኤራንቻቱ፥ ዎልቃማቱኔ ቃ ሼሻቱ ዳራ ጊዲኪኖ። 27ሺን ፆሳይ ኣዳ ኤራንቻቱዋ ዬላያናው፥ ኣላሚያን ዴዒያ ኤያቱዋ ዶሬዳ፤ ቃሲ ሚናቱዋ ዬላያናው፥ ኣላሚያን ዴዒያ ላፋቱዋ ዶሬዳ። 28ፆሳይ ሃ ኣላሚያን ዎልቃማባ ጊዴ ቆፒያዋ ዪሳናው፥ ሃ ኣላሚያ ማዴናባ ካቶባኔ ሃኒቤናባ ዶሬዳ። 29ሄዋ ዲራው፥ ኦኒኔ ፆሳ ሲንን ጬቄታናው ቤሴና። 30ሺን ፆሳይ ሂንቴንቱሲ ኪሪስቶሲ ዬሱሳ ዴዑዋ ኡዲ ኢሜዳ። ኪሪስቶሲ ኑሲ ኣ ኤራቴ፥ ፂሎቴ፥ ጌሻቴኔ ኣቶቴ ጊዴዳ። 31ሄዋ ዲራው፥ ፆሳ ማፃፋይ፥
«ጬቄቲያ ኡራይ
ኦኒኔ ጎዳይ ኦዳዋን ጬቄቶ»
ያጌ። #ኤርም 9፡24
Currently Selected:
1 ቆሮንቶሳ 1: dwrENT
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
Learn More About Ooratha Caaquwaa