نشيد 3
3
1وَ بِاللَّيْل، فِي سَرِيرِي،
أَنَا فَتَّشْت الْقَلْبِي بِرِيدَهْ،
أَنَا فَتَّشْتَهْ وَ مَا لِقِيتَهْ.
2أَنَا قَمَّيْت وَ حَوَّقْت الْمَدِينَةْ
فِي الشَّوَارِعْ وَ فِي أَيِّ بَكَانْ.
أَنَا فَتَّشْت الْقَلْبِي بِرِيدَهْ،
أَنَا فَتَّشْتَهْ وَ مَا لِقِيتَهْ.
3وَ الْحُرَّاسْ الْبُرُوغُوا الْحِلَّةْ
بِاللَّيْل لِقَوْنِي
وَ أَنَا قُلْت:
«مَا شِفْتُوا الْقَلْبِي بِرِيدَهْ؟»
4وَ مِنْ فُتّْ مِنْهُمْ،
أَنَا لِقِيتْ الْقَلْبِي بِرِيدَهْ.
حَضَنْتَهْ وَ مَا خَلَّيْتَهْ
لَحَدِّي وَدَّيْتَهْ فِي حَوْش أَمِّي
وَ دَخَّلْتَهْ فِي بَيْت هَنَا الْوِلْدَتْنِي
لَحَدِّي فِي الْغُرْفَةْ.
5يَا بَنَاتْ مَدِينَةْ الْقُدُسْ،
نَحَلِّفْكَنْ بِجَمَالْ الْغُزْلَانْ
وَ أَرَايِلْ الْكَدَادَةْ
كَدَرْ مَا تِقَوِّمَنْ
وَ لَا تِوَعَّنْ الْحُبّ قَبُلْ وَكْتَهْ.
كلام المحْبوبة
6يَاتُو الْجَايِ مِنْ الصَّحَرَاءْ
وَ عَجَاجَهْ مِثِلْ دُخَّانْ الطَّالِعْ؟
يَاتُو الْمُعَطَّرْ بِصَنْدَلْ وَ لُبَانْ
وَ بِكُلَّ دُخَّانْ التُّجَّارْ؟
7أَيْوَى، دَا سُلَيْمَانْ الرَّاكِبْ
فِي بَاصُورْ عُطْفِتَهْ.#3:7 عُطْفَةْ: دا بيت طويل اليبْنوه في باصور الجمل و يجمُّلوه و نادم العِنْده شرف يرْكب فَوْقه.
مُحَوِّقِينَهْ 60 رُجَالْ فُرَّاسْ
مِنْ أَحْسَنْ فُرَّاسْ بَنِي إِسْرَائِيلْ.
8كُلُّهُمْ شَايْلِينْ سُيُوفْ
وَ هُمَّنْ نَاسْ مُحَارِبِينْ.
أَيِّ وَاحِدْ سَيْفَهْ فِي صُلْبَهْ
جَاهِزْ لِأَيِّ خَطَرْ الْيَجِي بِاللَّيْل.
9الْمَلِكْ سُلَيْمَانْ عِنْدَهْ عُطْفَةْ
السَّوَّوْهَا بِحَطَبْ لُبْنَانْ.
10وَ عَمَدْهَا مُجَمَّلِينْ بِفُضَّةْ
وَ بَاصُورْهَا بِدَهَبْ.
وَ فُرَاشْهَا لَوْنَهْ قَرَضِي
وَ بَنَاتْ مَدِينَةْ الْقُدُسْ عَدَّلَنْ دَاخِلْهَا
وَ جَمَّلَنَّهْ بِمَحَبَّةْ.
11أَمُرْقَنْ، يَا بَنَاتْ صَهْيُون!
تَعَالَنْ شِيفَنْ الْمَلِكْ سُلَيْمَانْ!
عِنْدَهْ تَاجْ الْأَمَّهْ خَطَّتَهْ لَيَّهْ فِي يَوْم عَرِيسَهْ
وَ دَا يَوْم الْفَرَحْ مَلَا قَلْبَهْ.
Currently Selected:
نشيد 3: ع.د.ت19
Highlight
Share
Copy
Want to have your highlights saved across all your devices? Sign up or sign in
La Bible en arabe tchadien © Alliance biblique du Tchad, 2019
