رَوْمَا 15
15
1لَاكِنْ أَنِحْنَ الْقَوِيِّينْ فِي الْإِيمَانْ، وَاجِبْ نَحْمَلَوْا أَخْوَانَّا الْمَا قَوِيِّينْ فِي الْإِيمَانْ. وَ مَا وَاجِبْ نِسَوُّوا الشَّيّءْ الْيَعَجِبْنَا أَنِحْنَ بَسْ. 2خَلِّي أَيِّ نَادُمْ مِنِّنَا يِسَوِّي الشَّيّءْ الْيَعَجِبْ أَخُوهْ وَ دَا، لِخَيْرَهْ وَ لِيِقَوِّيهْ فِي الْإِيمَانْ. 3أَشَانْ الْمَسِيحْ ذَاتَهْ مَا شَالْ الدَّرِبْ الْيَعَجِبْ نَفْسَهْ، لَاكِنْ مَكْتُوبْ فِي الْكِتَابْ: <الْيِعَيُّرُوكْ، مُعْيَارْهُمْ وَقَعْ فَوْقِي أَنَا كُلَ.>#15:3 الكلام دا تلقوه في زَبُور 69:9. 4كُلَّ شَيّءْ الْكَتَبَوْه فِي الزَّمَنْ الْفَاتْ أَنْكَتَبْ لِيِعَلِّمْنَا. أَشَانْ بِالصَّبُرْ وَ الشَّجَاعَةْ الْعَلَّمْنَاهُمْ مِنْ الْكُتُبْ، نَمْشُوا قِدَّامْ بِعَشَمْ.
5اللّٰهْ يَنْطِي الصَّبُرْ وَ الشَّجَاعَةْ وَ خَلِّي يَنْطِيكُو كُلُّكُو فِكِرْ وَاحِدْ لِتِتَابُعُوا دَرِبْ الْمَسِيحْ عِيسَى 6لَحَدِّي كُلُّكُو تِمَجُّدُوا اللّٰهْ أَبُو رَبِّنَا عِيسَى الْمَسِيحْ بِنِيَّةْ وَاحِدَةْ وَ بِحِسّ وَاحِدْ.
بِشارة المسيح لكل الناس
7خَلَاصْ، أَقْبَلَوْا كُلَّ مُؤمِنْ بِالْمَسِيحْ مِثِلْ الْمَسِيحْ قِبِلَاكُو. وَ بِمِثِلْ دَا، تِمَجُّدُوا اللّٰهْ. 8وَ فِي شَانْ دَا، نُقُولْ لَيْكُو كَدَرْ الْمَسِيحْ بِقِي خَدَّامْ لِلْيَهُودْ أَشَانْ يِوَصِّفْ كَدَرْ اللّٰهْ صَادِقْ وَ يِتِمّ الشَّيّءْ الْوَاعَدْ بَيَّهْ جُدُودْهُمْ. 9وَ جَاءْ أَشَانْ النَّاسْ الْمَا يَهُودْ كُلَ يَشْكُرُوا اللّٰهْ فِي شَانْ رَحْمَتَهْ. مَكْتُوبْ فِي الْكِتَابْ: <بِسَبَبْ دَا، يَا اللّٰهْ، فِي أُسْط الْأُمَمْ نَشْكُرَكْ وَ بِغِنَيْ، نَمْدَحْ أُسْمَكْ.>#15:9 الكلام دا تلقوه في زَبُور 18:49. 10وَ بَتَّانْ بُقُولْ: <يَا الْأُمَمْ، أَفْرَحَوْا مَعَ شَعَبْ اللّٰهْ.>#15:10 الكلام دا تلقوه في تَثْنِية 32:43. 11وَ بَتَّانْ بُقُولْ: <يَا كُلَّ الْأُمَمْ، أَحْمُدُوا اللّٰهْ! يَا كُلَّ الشُّعُوبْ، مَجُّدُوهْ!>#15:11 الكلام دا تلقوه في زَبُور 117:1. 12وَ النَّبِي إِشَعْيَا قَالْ: <مِنْ ذُرِّيَّةْ يَسَّى#15:12 يَسَّى: هو أبو الملك دَاوُد. الكلام دا بُقول ملك أكْبر يجي من ذُرّية دَاوُد. و معنى الأُسُم المسيح، هو الملك العظيم الاللّه عزله. يَجِي نَادُمْ وَ يَبْقَى مَلِكْ فِي كُلَّ الْأُمَمْ. وَ الشُّعُوبْ الْآخَرِينْ يُخُطُّوا عَشَمْهُمْ فَوْقَهْ.>#15:12 الكلام دا تلقوه في إشَعْيا 11:10، حسب الترْجمة اليونانيّة.
13وَ اللّٰهْ الْأَنْطَاكُو عَشَمْ يَنْطِيكُو الْفَرْحَةْ وَ السَّلَامْ فِي الْإِيمَانْ أَشَانْ عَشَمْكُو فَوْقَهْ يِزِيدْ بِقُدْرَةْ الرُّوحْ الْقُدُّوسْ.
خِدْمة بُولُس في أُسْط الأُمم
14يَا أَخْوَانِي، أَنَا بِنَفْسِي مُؤَكِّدْ كَدَرْ إِنْتُو مَلَانِينْ بِالْخَيْر وَ بِالْعِلِمْ وَ قَادْرِينْ تِلْوَاصَوْا أَمْبَيْنَاتْكُو. 15لَاكِنْ فِي أَشْيَاءْ وَاحِدِينْ كَتَبْت لَيْكُو بِكَلَامْ قَوِي شِيَّةْ أَشَانْ دَوَّرْت نِذَكِّرْكُو بَيْهُمْ. وَ قِدِرْت كَتَبْت مِثِلْ دَا بِسَبَبْ النِّعْمَةْ الْاللّٰهْ أَنْطَاهَا لَيِّ 16لِنَبْقَى خَدَّامْ لِلْمَسِيحْ عِيسَى. وَ خِدِمْتِي هِي بَلِّغِينْ بِشَارَةْ اللّٰهْ لِلْأُمَمْ الْمَا يَهُودْ. أَنَا نَبْقَى مِثِلْ رَاجِلْ دِينْ وَكِتْ نِبَلِّغْ بِشَارَةْ اللّٰهْ لِلْأُمَمْ الْمَا يَهُودْ لِيَبْقَوْا مِثِلْ ضَحِيَّةْ الْاللّٰهْ يَرْضَى بَيْهَا. وَ الضَّحِيَّةْ دِي تَبْقَى خَاصَّة لِلّٰهْ بِقُدْرَةْ الرُّوحْ الْقُدُّوسْ. 17وَ أَشَانْ دَا، نِلْفَشَّرْ بِكُلَّ الْخِدْمَةْ السَّوَّيْتهَا لِلّٰهْ بِالْمَسِيحْ عِيسَى. 18وَ أَبَداً مَا نِدَوْر نِحَجِّي بِأَيِّ خِدْمَةْ إِلَّا الْخِدْمَةْ الْعِيسَى الْمَسِيحْ سَوَّاهَا بَيِّ أَشَانْ الْأُمَمْ يِطِيعُوا اللّٰهْ. هُو خَدَمْ بِكَلَامْ وَ بِفِعِلْ 19وَ بِقُدْرَةْ الْعَجَايِبْ وَ الْعَلَامَاتْ وَ بِقُدْرَةْ الرُّوحْ الْقُدُّوسْ. وَ مِثِلْ دَا، أَنَا بَلَّغْت بِشَارَةْ الْمَسِيحْ لِلنَّاسْ فِي كُلِّ بَكَانْ مِنْ مَدِينَةْ الْقُدُسْ لَحَدِّي بَلَدْ إِلِّرْكُونْ.
20وَ عِنْدِي نِيَّةْ دَايْماً أَشَانْ نِبَلِّغْ الْبِشَارَةْ فِي أَيِّ بَكَانْ اللِّسَّاعْ مَا بَلَّغَوْا فَوْقَهْ أُسُمْ الْمَسِيحْ. مَا نِدَوْر نَبْنِي فِي أَسَاسْ الْخَطَّاهْ نَادُمْ آخَرْ. 21نِدَوْر نِتَابِعْ الْكَلَامْ الْمَكْتُوبْ الْبُقُولْ: <النَّاسْ الْمَا حَجَّوْهُمْ بَيَّهْ يِشِيفُوهْ. وَ الْمَا سِمْعَوْا بَيَّهْ يَفْهَمَوْه.>#15:21 الكلام دا تلقوه في إشَعْيا 52:15، حسب الترْجمة اليونانيّة.
بُولُس يدَوْر يخْشى رَوْمَا
22وَ عِدَّةْ مَرَّاتْ، حَاوَلْت نَجِيكُو وَ مَا قِدِرْت أَشَانْ خِدِمْتِي دِي دَحَرَتْنِي. 23لَاكِنْ هَسَّعْ مَا فَضَّلْ لَيِّ بَكَانْ فِي الْمَنَاطِقْ دَوْل النِّبَشِّرْ فَوْقَهْ. وَ مِنْ سِنِينْ كَتِيرِينْ، نِدَوْر نَجِيكُو. 24وَ خَلَاصْ، نَقْدَرْ نَخْشَاكُو وَكِتْ نَمْشِي إِسْبَانِيَا. إِنْ شَاءْ اللّٰهْ، نَجِيكُو وَ نَقْعُدْ مَعَاكُو أَيَّامْ وَ دَا يَبْقَى لَيِّ حَلُو. وَ بَعَدْ دَا، تِسَاعُدُونِي أَشَانْ نِسَافِرْ قِدَّامْ.
25لَاكِنْ هَسَّعْ دَا، أَنَا مَاشِي مَدِينَةْ الْقُدُسْ أَشَانْ نِسَاعِدْ الصَّالِحِينْ. 26أَشَانْ الْمُؤمِنِينْ الْفِي مَقِدُونِيَةْ وَ الْيُونَانْ شَالَوْا نِيَّةْ أَمْبَيْنَاتْهُمْ أَشَانْ يِرَسُّلُوا مُسَاعَدَةْ لِلْمَسَاكِينْ الْقَاعِدِينْ أَمْبَيْن الصَّالِحِينْ فِي مَدِينَةْ الْقُدُسْ. 27وَ شَالَوْا النِّيَّةْ دِي بِفَرَحْ. وَ دَا مِثِلْ دَيْن فَوْقهُمْ أَشَانْ أَوَّلْ الْيَهُودْ قَسَّمَوْا بَرَكَاتْهُمْ اللِّقَوْهُمْ مِنْ اللّٰهْ مَعَ الْمَا يَهُودْ. وَ هَسَّعْ الْمَا يَهُودْ وَاجِبْ لَيْهُمْ يِسَاعُدُوا الْيَهُودْ بِالْبَرَكَاتْ الْأَرْضِيَّةْ اللِّقَوْهُمْ. 28وَ وَكِتْ الْخِدْمَةْ دِي تِكَمِّلْ وَ أَنَا أَنْطَيْتهُمْ كُلَّ شَيّءْ اللَّمَّوْه لَيْهُمْ، نِشِيلْ دَرِبْ هَنَا إِسْبَانِيَا وَ نَخْشَاكُو فِي رَوْمَا. 29وَ نَعَرِفْ كَدَرْ وَكِتْ نَلْحَقْ بَكَانْكُو دَا، نَجِيكُو مَلَانْ بِبَرَكَةْ الْمَسِيحْ الْخَاصَّة لَيْكُو.
30وَ هَسَّعْ يَا أَخْوَانِي، نَطْلُبْ مِنْكُو بِأُسُمْ رَبِّنَا عِيسَى الْمَسِيحْ وَ بِمَحَبَّةْ الرُّوحْ الْقُدُّوسْ أَشَانْ إِنْتُو تَسْأَلَوْا اللّٰهْ مَعَايِ بِشِدَّةْ. 31أَسْأَلَوْا لَيِّ اللّٰهْ أَشَانْ يَفْزَعْنِي مِنْ الْيَهُودْ الْمَا مَسِيحِيِّينْ فِي دَارْ الْيَهُودِيَّةْ. وَ أَسْأَلَوْا أَشَانْ الصَّالِحِينْ الْفِي مَدِينَةْ الْقُدُسْ يَرْضَوْا بِالْمُسَاعَدَةْ النِّجِيبْهَا لَيْهُمْ. 32وَ مِثِلْ دَا، إِنْ شَاءْ اللّٰهْ نَجِيكُو بِفَرَحْ وَ نِنْجَمَّ مَعَاكُو شِيَّةْ. 33اللّٰهْ رَبّ السَّلَامْ يُكُونْ مَعَاكُو كُلُّكُو. آمِينْ.
Currently Selected:
رَوْمَا 15: ع.د.ت19
Highlight
Share
Copy
Want to have your highlights saved across all your devices? Sign up or sign in
La Bible en arabe tchadien © Alliance biblique du Tchad, 2019
