رَوْمَا 13

المُؤمِنين و الحكومة

1خَلِّي أَيِّ نَادُمْ يَسْمَعْ كَلَامْ الْحَكُومَةْ أَشَانْ مَا فِي حَكُومَةْ إِلَّا بِإِذِنْ اللّٰهْ وَ أَيِّ حَكُومَةْ الْقَاعِدَةْ، اللّٰهْ أَسَّسَاهَا. 2أَشَانْ دَا، أَيِّ نَادُمْ الْيِخَالِفْ الْحَكُومَةْ، يِخَالِفْ الشَّيّءْ الْاللّٰهْ أَسَّسَهْ. وَ النَّادُمْ الْيِخَالِفْ، حُكُمْ اللّٰهْ يَنْزِلْ فَوْقَهْ. 3أَشَانْ النَّادُمْ الْحَالَهْ عَدِيلَةْ مَا يَخَافْ مِنْ الْحُكَّامْ إِلَّا النَّادُمْ الْحَالَهْ فَسْلَةْ، هُو يَخَافْ مِنْهُمْ. كَنْ تِدَوْر مَا تَخَافْ مِنْ الْحَاكِمْ، خَلَاصْ سَوِّي الْخَيْر وَ الْحَاكِمْ يَشْكُرَكْ. 4الْحَاكِمْ هُو خَدَّامْ اللّٰهْ لِخَيْرَكْ. لَاكِنْ كَنْ إِنْتَ مُجْرِمْ، لَابُدَّ تَخَافْ مِنَّهْ أَشَانْ الْحَاكِمْ عِنْدَهْ السَّيْف وَ مَا يِشِيلَهْ سَاكِتْ. هُو خَدَّامْ اللّٰهْ أَشَانْ يِنَزِّلْ غَضَبْ اللّٰهْ فِي الْمُجْرِمْ. 5فِي شَانْ دَا، وَاجِبْ تَسْمَعَوْا كَلَامْ الْحَكُومَةْ. وَ دَا مَا لِتَخَافَوْا مِنْ غَضَبْ اللّٰهْ بَسْ لَاكِنْ لِتَلْقَوْا نِيَّةْ مُخْلِصَةْ.

6وَ أَشَانْ دَا، وَاجِبْ تِكَفُّوا الْمِيرِي كُلَ. الْحُكَّامْ هُمَّنْ خَدَّامِينْ اللّٰهْ وَ يِشْتَغُلُوا بِالْخِدْمَةْ الْأَنْطَاهَا لَيْهُمْ دِي. 7أَنْطُوا أَيِّ نَادُمْ الشَّيّءْ الْوَاجِبْ لَيَّهْ. وَ النَّادُمْ الْوَاجِبْ لَيَّهْ تِكَفُّوا الْمِيرِي، كَفُّوهْ لَيَّهْ. وَ النَّادُمْ الْوَاجِبْ لَيَّهْ تِكَفُّوا جَمَارِكْ، كَفُّوهْ لَيَّهْ. وَ النَّادُمْ الْوَاجِبْ لَيَّهْ إِحْتِرَامْ، أَحْتَرُمُوهْ. وَ النَّادُمْ الْوَاجِبْ لَيَّهْ الْإِكْرَامْ، كَرُّمُوهْ.

المحبّة هي واجْبة

8مَا تِخَلُّوا الدَّيْن يَقْعُدْ فَوْقكُو. دَيْن وَاحِدْ بَسْ قَاعِدْ فَوْقكُو وَ هُو الْمَحَبَّةْ أَمْبَيْنَاتْكُو. وَ النَّادُمْ الْيِحِبّ أَخُوهْ، هُو طَبَّقْ شُرُوطْ التَّوْرَاةْ خَلَاصْ. 9أَشَانْ الْوَصَايَا بُقُولُوا: <مَا تَزْنَى وَ مَا تَكْتُلْ دِمَّةْ وَ مَا تَسْرِقْ وَ مَا تَطْمَعْ>#13‏:9 الكلام دا تلقوه في خُروج 20‏:13‏-17 و تَثْنِية 5‏:17‏-19. وَ وَصَايَا آخَرِينْ كُلَ. وَ كُلَّ الْوَصَايَا دَوْل، زِبْدِتْهُمْ هِي الْوَصِيَّةْ التُّقُولْ: <حِبّ أَخُوكْ مِثِلْ تِحِبّ نَفْسَكْ.>#13‏:9 الكلام دا تلقوه في لاوِيِّين 19‏:18. 10النَّادُمْ الْيِحِبّ أَخُوهْ أَبَداً مَا يِسَوِّي لَيَّهْ شَيّءْ فَسِلْ. وَ بِمِثِلْ دَا، النَّادُمْ الْيِحِبّ النَّاسْ يِطَبِّقْ شُرُوطْ التَّوْرَاةْ بِصَحِيحْ.

11وَ خَلَاصْ، تَعَرْفُوا الْوَكِتْ الْأَنِحْنَ قَاعِدِينْ فَوْقَهْ. الْوَكِتْ تَمَّ خَلَاصْ. وَ هَسَّعْ، وَاجِبْ تُقُمُّوا مِنْ نَوْمكُو أَشَانْ يَوْم النَّجَاةْ قَرِيبْ لَيْنَا مِنْ وَكِتْ أَنِحْنَ آمَنَّا. 12اللَّيْل قَرِيبْ يِكَمِّلْ وَ النَّهَارْ جَايِ قَرِيبْ. خَلَاصْ، وَاجِبْ نِخَلُّوا مِنِّنَا كُلَّ فِعِلْ الضَّلَامْ وَ نِجَهُّزُوا نُفُوسْنَا أَشَانْ نِعِيشُوا فِي النُّورْ. 13خَلِّي حَالْنَا تُكُونْ حَالْ هَنَا عِيَالْ النُّورْ. وَ خَلِّي مَا نَمْشُوا فِي السَّفَاهَةْ وَ السَّكَرْ، وَ لَا فِي الزِّنَى وَ الْفَسَادْ، وَ لَا فِي الدُّوَاسْ وَ الْحُسُدْ. 14وَ فِي بَدَلْ الذُّنُوبْ دَوْل، أَرْبُطُوا صُلُبْكُو وَ خُطُّوا فِي عُقُولْكُو إِنْتُو خَدَّامِينْ لِرَبِّنَا عِيسَى الْمَسِيحْ. وَ آبَوْا مَا تِشْتَغُلُوا بِشَهْوَاتْ الْإِنْسَانْ.

Currently Selected:

رَوْمَا 13: ع.د.ت19

Highlight

Copy