YouVersion Logo
Search Icon

رُؤية 8

8
الخِتِم السابِع
1وَ وَكِتْ الْحَمَلْ فَكَّ الْخِتِمْ السَّابِعْ، كُلَّ شَيّءْ فِي السَّمَاوَاتْ سَكَتْ وَ قَعَدْ سَاكِتْ مِثِلْ نُصّ سَاعَةْ.
2وَ فِي الْبَكَانْ دَا، أَنَا شِفْت السَّبْعَةْ مَلَائِكَةْ الْوَاقْفِينْ قِدَّامْ اللّٰهْ. وَ أَنْطَوْهُمْ سَبْعَةْ بُرُنْجِي. 3وَ مَلَكْ آخَرْ جَاءْ وَ وَقَفْ قِدَّامْ الْمَدْبَحْ وَ شَايِلْ فِي إِيدَهْ مُخْبَرْ هَنَا دَهَبْ. وَ أَنْطَوْه بَخُورْ كَتِيرْ أَشَانْ يِقَدِّمَهْ لِلّٰهْ مَعَ صَلَاوَاتْ كُلَّ الصَّالِحِينْ وَ قَدَّمَهْ فِي الْمُخْبَرْ الدَّهْبِي الْقَاعِدْ قِدَّامْ الْعَرْش. 4وَ دُخَّانْ الْبَخُورْ قَمَّ مِنْ إِيدْ الْمَلَكْ مَعَ صَلَاوَاتْ الصَّالِحِينْ وَ طَلَعْ قِدَّامْ اللّٰهْ. 5وَ بَعَدْ دَا، الْمَلَكْ شَالْ مُخْبَرَهْ وَ مَلَاهْ بِجَمُرْ مِنْ الْمَدْبَحْ وَ دَفَّقَهْ فِي الْأَرْض. وَ رَعَدْ وَ حَرَكَةْ شَدِيدَةْ أَنْسَمَعَوْا وَ بَرَّاقَةْ شَلَعَتْ وَ كَانْ زِلْزَالْ.
ضرِبين السبْعة بُرُنْجي
6وَ خَلَاصْ، السَّبْعَةْ مَلَائِكَةْ الْعِنْدُهُمْ السَّبْعَةْ بُرُنْجِي، أَيِّ وَاحِدْ رَفَعْ الْبُرُنْجِي الْعِنْدَهْ وَ قَعَدْ جَاهِزْ لِيَضُرْبَهْ. 7وَ الْمَلَكْ الْأَوَّلْ ضَرَبْ الْبُرُنْجِي الْعِنْدَهْ. وَ خَلَاصْ، بَرَدْ وَ نَارْ مُخَلْبَطِينْ بِدَمّ دَفَّقَوْا فِي الْأَرْض. وَ تِلْت الْأَرْض حِرِقْ وَ تِلْت الشَّدَرْ حِرِقْ وَ الْقَشّ الْأَخْضَرْ كُلَ حِرِقْ.
8وَ الْمَلَكْ التَّانِي ضَرَبْ الْبُرُنْجِي الْعِنْدَهْ. وَ شُغُلْ مِثِلْ جَبَلْ كَبِيرْ هَنَا نَارْ رَمَوْه فِي الْبَحَرْ الْمَالِحْ. وَ خَلَاصْ، تِلْت الْبَحَرْ بِقِي دَمّ. 9وَ تِلْت الْحَيْوَانَاتْ الْعَايْشِينْ فِي الْبَحَرْ مَاتَوْا وَ تِلْت السُّفُنْ أَدَّمَّرَوْا مَرَّةْ وَاحِدْ.
10وَ الْمَلَكْ التَّالِتْ ضَرَبْ الْبُرُنْجِي الْعِنْدَهْ. وَ نَجْمَةْ كَبِيرَةْ بِلْحَيْن وَقَعَتْ مِنْ السَّمَاءْ مُوَلِّعَةْ نَارْ شَدِيدَةْ وَ وَقَعَتْ فِي تِلْت الْأَلْمِي الْقَاعِدْ فِي الْبُحُورْ وَ فِي عُيُونْ أَلْمِي. 11وَ أُسُمْ النَّجْمَةْ دِي أَمْ حَمْضَلْ. وَ خَلَاصْ، تِلْت الْأَلْمِي بِقِي مُرّ وَ نَاسْ كَتِيرِينْ شِرْبَوْا مِنَّهْ وَ مَاتَوْا أَشَانْ الْأَلْمِي بِقِي مُرّ مَرَّةْ وَاحِدْ.
12وَ الْمَلَكْ الرَّابِعْ ضَرَبْ الْبُرُنْجِي الْعِنْدَهْ. وَ تِلْت الْحَرَّايْ، ضَرَبَوْه وَ تِلْت الْقَمَرْ وَ تِلْت النُّجُومْ كُلَ ضَرَبَوْهُمْ. وَ خَلَاصْ، تِلْت ضَيُّهُمْ بِقِي مَا فِيهْ. وَ نُورْ بِقِي مَا فِيهْ فِي تِلْت النَّهَارْ وَ تِلْت اللَّيْل.
13وَ شِفْت بَتَّانْ وَ سِمِعْت حِسّ هَنَا صَقُرْ الْقَاعِدْ يِطِيرْ فِي السَّمَاءْ وَ بِحِسّ شَدِيدْ قَالْ: «عَذَابْ، عَذَابْ! عَذَابْ لِسُكَّانْ الْأَرْض! أَشَانْ التَّلَاتَةْ بُرُنْجِي الْفَضَّلَوْا، قَرِيبْ الْمَلَائِكَةْ يَضُرْبُوهُمْ.»

Currently Selected:

رُؤية 8: ع.د.ت19

Highlight

Share

Copy

None

Want to have your highlights saved across all your devices? Sign up or sign in