رُؤية 15

السبعة وباء الأخيرين

1وَ أَنَا شِفْت عَلَامَةْ آخَرَةْ فِي السَّمَاءْ وَ هِي عَلَامَةْ عَجِيبَةْ وَ عَظِيمَةْ. شِفْت سَبْعَةْ مَلَائِكَةْ مَسْؤُولِينْ فِي سَبْعَةْ وَبَاءْ وَ بَعَدْ السَّبْعَةْ وَبَاءْ دَوْل، وَبَاءْ آخَرْ مَا فِيهْ أَشَانْ بَيْهُمْ غَضَبْ اللّٰهْ يِتِمّ. 2وَ شِفْت بَكَانْ يِشَابِهْ مِثِلْ بَحَرْ هَنَا أَلْمِي صَافِي الْبِرَارِي وَ هُو جَامِدْ وَ عِنْدَهْ نَارْ فِي لُبَّهْ. وَ النَّاسْ الْأَنَّصَرَوْا فِي الْحَيْوَانْ الْفَسِلْ وَ فِي صَنَمَهْ وَ فِي نِمْرَةْ أُسْمَهْ، هُمَّنْ وَاقْفِينْ جَنْب الْبَحَرْ. وَ أَيِّ وَاحِدْ عِنْدَهْ جِقِنْدِيَّةْ الْاللّٰهْ أَنْطَاهَا لَيَّهْ. 3وَ غَنَّوْا غِنَيْ هَنَا مُوسَى عَبْد اللّٰهْ وَ غِنَيْ هَنَا الْحَمَلْ. وَ قَالَوْا:

«يَا رَبِّنَا اللّٰهْ الْقَادِرْ،

كُلَّ شَيّءْ التِّسَوِّيهْ عَظِيمْ وَ عَجِيبْ.

يَا مَلِكْ الْأُمَمْ،

دَرْبَكْ دَايْماً عَدِلْ وَ حَقّ.

4يَا اللّٰهْ، كِكَّيْف نَادُمْ مَا يَخَافْ مِنَّكْ

وَ مَا يِمَجِّدْ أُسْمَكْ؟

أَشَانْ إِنْتَ وِحَيْدَكْ بَسْ قُدُّوسْ.

كُلَّ الْأُمَمْ يَجُوا وَ يَسْجُدُوا لَيْك

أَشَانْ شَافَوْا عَدَالْتَكْ

فِي الشَّيّءْ السَّوَّيْتَهْ.»

5وَ بَعَدْ دَا، أَنَا شِفْت بَيْت الْعِبَادَةْ أَنْفَتَحْ وَ دَا الْخَيْمَةْ الْفَوْقهَا لِيحَانْ الْمُعَاهَدَةْ الْفِي السَّمَاوَاتْ. 6وَ السَّبْعَةْ مَلَائِكَةْ الْعِنْدُهُمْ السَّبْعَةْ وَبَاءْ مَرَقَوْا مِنْ بَيْت الْعِبَادَةْ. وَ أَيِّ وَاحِدْ لَابِسْ خَلَقْ هَنَا قُمَاشْ كَتَّانْ أَصْلِي الْبِرَارِي وَ فِي صَدْرَهْ عِنْدَهْ حِزَامْ هَنَا دَهَبْ. 7وَ وَاحِدْ مِنْ الْأَرْبَعَةْ مَخْلُوقِينْ السَّمَاوِيِّينْ أَنْطَاهُمْ سَبْعَةْ كِيسَانْ هَنَا دَهَبْ. وَ السَّبْعَةْ كِيسَانْ مَلَانِينْ بِغَضَبْ اللّٰهْ الْحَيّ دَايْماً وَ إِلَى الْأَبَدْ. 8وَ قُدْرَةْ اللّٰهْ الْمَجِيدَةْ سَدَّتْ بَيْت الْعِبَادَةْ بِالدُّخَّانْ مَرَّةْ وَاحِدْ. وَ الدَّخُولْ فَوْقَهْ مَا فِيهْ لَحَدِّي السَّبْعَةْ مَلَائِكَةْ يِكَمُّلُوا السَّبْعَةْ وَبَاءْ.

Currently Selected:

رُؤية 15: ع.د.ت19

Highlight

Copy