رُؤية 10
10
المكتوب الفاتِح
1وَ فِي الْبَكَانْ دَا، أَنَا شِفْت بَتَّانْ مَلَكْ آخَرْ نَازِلْ مِنْ السَّمَاءْ وَ هُو قَادِرْ. وَ هُو لَابِسْ سَحَابَايْ مِثِلْ خَلَقْ وَ عِنْدَهْ حَجَّازْ الْمَطَرْ فِي رَاسَهْ. وَ وِجْهَهْ يِرَارِي مِثِلْ الْحَرَّايْ وَ رِجِلَيْنَهْ يِشَابُهُوا مِثِلْ عَمُودْ هَنَا نَارْ. 2وَ عِنْدَهْ فِي إِيدَهْ مَكْتُوبْ صَغَيَّرْ وَ الْمَكْتُوبْ دَا فَاتِحْ. وَ خَطَّ رِجْلَهْ الزَّيْنَةْ فِي رَاسْ الْبَحَرْ وَ رِجْلَهْ الْإِسْرَةْ فِي التُّرَابْ. 3وَ حَجَّى بِحِسّ شَدِيدْ مِثِلْ قَرْقَرَانْ الدُّودْ. وَ وَكِتْ هُو حَجَّى، السَّبْعَةْ رَعَدْ كَلَّمَوْا. 4وَ وَكِتْ السَّبْعَةْ رَعَدْ دَوْل كَلَّمَوْا خَلَاصْ، أَنَا دَوَّرْت نَكْتِبْ كَلَامْهُمْ. لَاكِنْ سِمِعْت حِسّ مِنْ السَّمَاءْ قَالْ لَيِّ: «مَا تِكَلِّمْ لِأَيِّ نَادُمْ بِالْكَلَامْ الْقَالَوْه السَّبْعَةْ رَعَدْ دَوْل. وَ مَا تَكْتِبَهْ.»
5وَ الْمَلَكْ الشِّفْتَهْ وَاقِفْ رِجْلَهْ الْوَاحِدَةْ فِي الْبَحَرْ وَ رِجْلَهْ الْآخَرَةْ فِي التُّرَابْ رَفَعْ إِيدَهْ الزَّيْنَةْ لِلسَّمَاءْ. 6وَ هُو حَلَفْ بِاللّٰهْ الْحَيّ إِلَى الْأَبَدْ، خَالِقْ السَّمَاوَاتْ وَ الْأَرْض وَ كُلَّ شَيّءْ الْفَوْقهُمْ وَ الْبَحَرْ وَ كُلَّ شَيّءْ الْفَوْقَهْ وَ قَالْ: «الْوَكِتْ تَمَّ. 7وَ وَكِتْ الْمَلَكْ السَّابِعْ يَضْرُبْ الْبُرُنْجِي الْعِنْدَهْ، خَلَاصْ اللّٰهْ يِتِمّ الشَّيّءْ الْهُو قَدَّرَهْ الْهُو وِحَيْدَهْ يَعَرْفَهْ مِثِلْ أَوَّلْ كَلَّمْ بَيَّهْ لِعَبِيدَهْ الْأَنْبِيَاء.»
8وَ فِي الْبَكَانْ دَا، الْحِسّ الْأَنَا سِمِعْتَهْ الْجَايِ مِنْ السَّمَاءْ كَلَّمْ لَيِّ بَتَّانْ وَ قَالْ: «أَمْشِي شِيلْ الْمَكْتُوبْ الْفَاتِحْ الْقَاعِدْ فِي إِيدْ الْمَلَكْ الْوَاقِفْ رِجْلَهْ الْوَاحِدَةْ فِي الْبَحَرْ وَ رِجْلَهْ الْآخَرَةْ فِي التُّرَابْ.»
9وَ خَلَاصْ، أَنَا مَشَيْت لِلْمَلَكْ وَ طَلَبْت مِنَّهْ الْمَكْتُوبْ الصَّغَيَّرْ. وَ هُو حَجَّى لَيِّ وَ قَالْ: «شِيلَهْ وَ آكُلَهْ. وَ أَكِيدْ بَعَدَيْن قَلْبَكْ يَوْجَعَكْ وَ لَاكِنْ فِي الْأَوَّلْ يَبْقَى حَلُو مِثِلْ الْعَسَلْ فِي خَشْمَكْ.»
10وَ أَنَا شِلْت الْمَكْتُوبْ الصَّغَيَّرْ مِنْ إِيدَهْ وَ أَكَلْتَهْ. وَ هُو بِقِي لَيِّ حَلُو مِثِلْ الْعَسَلْ فِي خَشْمِي لَاكِنْ وَكِتْ زَرَطْتَهْ، قَلْبِي وَجَعَانِي.
11وَ قَالَوْا لَيِّ: «وَاجِبْ تِتْنَبَّأْ بَتَّانْ بِكَلَامْ الْبُخُصّ نَاسْ كَتِيرِينْ مِنْ الشُّعُوبْ وَ الْأُمَمْ وَ اللُّغَّاتْ وَ مُلُوكْهُمْ.»
Currently Selected:
رُؤية 10: ع.د.ت19
Highlight
Share
Copy
Want to have your highlights saved across all your devices? Sign up or sign in
La Bible en arabe tchadien © Alliance biblique du Tchad, 2019
