زَبُور 107
107
الجُزُء الخامِس هنا الزَبُور
1أَشْكُرُوا اللّٰهْ أَشَانْ هُو رَحِيمْ
وَ رَحْمَتَهْ دَايْمَةْ إِلَى الْأَبَدْ.
2إِنْتُو الْفَدَاكُو اللّٰهْ،
قُولُوا الْكَلَامْ دَا!
إِنْتُو الْفَدَاكُو
مِنْ إِيدْ الْخُصْمَانْ.
3إِنْتُو الْهُو لَمَّاكُو مِنْ كُلَّ الْبُلْدَانْ
مِنْ صَبَاحْ وَ غَرِبْ
وَ مُنْشَاقْ وَ وَطِي.
4وَاحِدِينْ مِنْ جُدُودْنَا وَدَّرَوْا
فِي الْخَلَاءْ فِي الصَّحَرَاء
وَ مَا لِقَوْا دَرِبْ الْيِوَدِّيهُمْ
لِحِلَّةْ يَسْكُنُوا فَوْقهَا.
5مَيْتِينْ مِنْ الْجُوعْ وَ عَطَشْ
هُمَّنْ ضِعْفَوْا وَ غِمْرَوْا.
6هُمَّنْ شَحَدَوْا اللّٰهْ فِي ضِيقِتْهُمْ
وَ مِنْ تَعَبْهُمْ، هُو نَجَّاهُمْ.
7هُو قَادَاهُمْ فِي دَرِبْ عَدِيلْ
لِيَمْشُوا لِلْحِلَّةْ الْيَسْكُنُوا فَوْقهَا.
8خَلِّي يَشْكُرُوا اللّٰهْ فِي شَانْ رَحْمَتَهْ
وَ عَجَايْبَهْ السَّوَّاهُمْ لِلْإِنْسَانْ.
9أَشَانْ هُو زَقَى الْعَطْشَانِينْ
وَ شَبَّعْ الْجِيعَانِينْ.
10وَاحِدِينْ مِنْهُمْ سَكَنَوْا فِي الضَّلَامْ الْهَالِكْ
أَيْوَى، هُمَّنْ مَسَاجِينْ فِي التَّعَبْ وَ الْجَنَازِيرْ.
11أَشَانْ هُمَّنْ عِصَوْا كَلَامْ الرَّبّ
أَيْوَى، حَقَرَوْا وَصِيَّةْ اللّٰهْ الْعَالِي.
12هُو عَيَّبَاهُمْ بِالتَّعَبْ
وَ هُمَّنْ أَتَّرْتَعَوْا
وَ مَا فِي نَادُمْ الْيَفْزَعْهُمْ.
13هُمَّنْ شَحَدَوْا اللّٰهْ فِي ضِيقِتْهُمْ
وَ مِنْ تَعَبْهُمْ، هُو نَجَّاهُمْ.
14هُو مَرَقَاهُمْ مِنْ الضَّلَامْ الْهَالِكْ
وَ قَطَّعْ قُيُودْهُمْ.
15خَلِّي يَشْكُرُوا اللّٰهْ فِي شَانْ رَحْمَتَهْ
وَ عَجَايْبَهْ السَّوَّاهُمْ لِلْإِنْسَانْ.
16أَشَانْ هُو كَسَّرْ بِيبَانْ النَّحَاسْ
وَ دَمَّرْ حَوَادِرْ الْحَدِيدْ.
17وَاحِدِينْ مِنْهُمْ مُنَافِقِينْ شَالَوْا دَرِبْ الْعِصْيَانْ
وَ تِعِبَوْا بِسَبَبْ خَطَاهُمْ.
18نُفُوسْهُمْ حَرَّمَوْا كُلَّ الْأَكِلْ
لَحَدِّي دَقَّوْا فِي بَابْ الْمَوْت.
19هُمَّنْ شَحَدَوْا اللّٰهْ فِي ضِيقِتْهُمْ
وَ مِنْ تَعَبْهُمْ، هُو نَجَّاهُمْ.
20هُو رَسَّلْ كَلَامَهْ لِيَشْفِيهُمْ
وَ لِيِنَجِّيهُمْ مِنْ الْمَوْت.
21خَلِّي يَشْكُرُوا اللّٰهْ فِي شَانْ رَحْمَتَهْ
وَ عَجَايْبَهْ السَّوَّاهُمْ لِلْإِنْسَانْ.
22خَلِّي يِقَدُّمُوا ضَحَايَا شُكُرْ
وَ يِحَجُّوا وَ يَفْرَحَوْا بِأَعْمَالَهْ.
23وَاحِدِينْ مِنْهُمْ مَشَوْا فِي الْبَحَرْ بِسُفُنْ
وَ سَوَّوْا خِدْمِتْهُمْ فِي الْأَلْمِي الْكَتِيرْ،
24هُمَّنْ دَوْل شَافَوْا أَعْمَالْ اللّٰهْ
وَ عَجَايْبَهْ فِي الْأَلْمِي الْغَرِيقْ.
25هُو كَلَّمْ وَ رِيحْ أَمْ زَوْبَعَانَةْ قَمَّتْ
وَ قَوَّمَتْ مَوْج الْبَحَرْ.
26الْمَوْج وَدَّى النَّاسْ فَوْق فِي السَّمَاءْ
وَ نَزَّلَاهُمْ تِحِتْ فِي قَعَرْ الْأَلْمِي
وَ عُضَامْهُمْ مَاعَوْا مِنْ الْخَوْف.
27هُمَّنْ يِمَيُّلُوا وَ يِتَّرْتَعَوْا مِثِلْ السَّكَّارَى
وَ كُلَّ حِكْمِتْهُمْ وَدَّرَتْ.
28هُمَّنْ شَحَدَوْا اللّٰهْ فِي ضِيقِتْهُمْ
وَ مِنْ تَعَبْهُمْ، هُو نَجَّاهُمْ.
29هُو غَيَّرْ الْأَمْ زَوْبَعَانَةْ بِرِيحْ خَفِيفَةْ
وَ الْمَوْج سَكَتْ.
30هُمَّنْ فِرْحَوْا
أَشَانْ أَلْمِي الْبَحَرْ بِقِي هَادِي بَتَّانْ
وَ هُو قَادَاهُمْ لِلْمَوْقَفْ
الدَّوَّرَوْه فِي خَشُمْ الْبَحَرْ.
31خَلِّي يَشْكُرُوا اللّٰهْ فِي شَانْ رَحْمَتَهْ
وَ عَجَايْبَهْ السَّوَّاهُمْ لِلْإِنْسَانْ.
32فِي مُجْتَمَعْ الشَّعَبْ، خَلِّي يِعَظُّمُوهْ
وَ فِي مَجْلَسْ الْكُبَارَاتْ، خَلِّي يَحْمُدُوهْ.
33هُو يِغَيِّرْ الْبُحُورْ بِصَحَرَاء
وَ عُيُونْ أَلْمِي بِبَلَدْ عَطَشْ
34وَ الْأَرْض الْعَدِيلَةْ بِأَرْض مِلِحْ.
وَ دَا بِسَبَبْ فَسَالَةْ سُكَّانْهَا.
35هُو يِغَيِّرْ الصَّحَرَاء بِرُهُودْ
وَ الْأَرْض الْجَفَافْ بِعُيُونْ أَلْمِي.
36هُو يِسَكِّنْ فَوْقهَا الْجِيعَانِينْ
وَ هُمَّنْ يَبْنُوا مَدِينَةْ وَ يَسْكُنُوهَا.
37هُمَّنْ يِتَيْرُبُوا زِرَاعَةْ
وَ يِمَقُّنُوا جِنَيْنَاتْ عِنَبْ
وَ يَقْطَعَوْا إِنْتَاجْهُمْ.
38هُو يِبَارِكْهُمْ
وَ هُمَّنْ يَبْقَوْا كَتِيرِينْ
وَ بَهَايِمْهُمْ كُلَ مَا يَنْقُصُوا.
39لَاكِنْ الْآخَرِينْ يَنْقُصُوا
وَ ضُهُورْهُمْ يِنْكَسْرُوا
بِسَبَبْ الْمُضَايَقَةْ وَ الْفَسَالَةْ وَ الْحِزِنْ.
40هُو يِجِيبْ الْحُقْرَةْ أَمْبَيْنَاتْ الْحُكَّامْ
وَ يِوَدِّرْهُمْ فِي صَحَرَاء بَلَا دَرِبْ.
41لَاكِنْ هُو يَمْرُقْ الْمَسَاكِينْ مِنْ التَّعَبْ
وَ يِكَتِّرْ الْقَبَايِلْ مِثِلْ غَنَمْ.
42النَّاسْ الْعَدِيلِينْ يِشِيفُوا وَ يَفْرَحَوْا
وَ أَيِّ ظَالِمْ يَسْكُتْ.
43يَاتُو يِدَوْر يَبْقَى حَكِيمْ؟
خَلِّي يَحْفَضْ كُلَّ الْكَلَامْ دَا.
وَ بَيْدَا، يَفْهَمْ رَحْمَةْ اللّٰهْ!
Currently Selected:
زَبُور 107: ع.د.ت19
Highlight
Share
Copy
Want to have your highlights saved across all your devices? Sign up or sign in
La Bible en arabe tchadien © Alliance biblique du Tchad, 2019
