زَبُور 101
101
مَزْمُورْ لِدَاوُدْ
1أَنَا نِدَوْر نِغَنِّي بِرَحْمَتَكْ وَ عَدَالْتَكْ.
وَ لَيْك إِنْتَ، يَا اللّٰهْ، أَنَا نِغَنِّي.
2أَنَا نِدَوْر نَمْشِي قِدَّامَكْ بِالتَّمَامْ.
مَتَى تَجِي لَيِّ؟
فِي بَيْتِي، نَعَرِفْ كِكَّيْف نَمْشِي
بِقَلِبْ تَمَامْ.
3أَبَداً مَا نُخُطّ فِي رَاسِي الْكَلَامْ الْمَا نَافِعْ
وَ نَكْرَهْ حَالْ سِيَادْ الشَّرّ
وَ مَا نَرْبُطْ نَفْسِي لَيْهَا.
4الْقَلِبْ الْأَزْرَقْ يِبَعِّدْ مِنِّي
وَ أَنَا مَا نِدَوْر نَعَرِفْ الْفَسَالَةْ.
5الْيِعَيِّرْ جَارَهْ بِعَشِيرْ،
أَنَا نِسَكِّتَهْ.
وَ الْيِشِيفْ بِحُقْرَةْ وَ قَلْبَهْ مُتَكَبِّرْ،
أَنَا مَا نَحْمَلَهْ.
6عُيُونِي فِي النَّاسْ الْعِنْدُهُمْ أَمَانْ فِي الْبَلَدْ
لِيَسْكُنُوا مَعَايِ
وَ الْيَمْشِي عَدِيلْ
يُكُونْ فِي خِدِمْتِي.
7لَاكِنْ الْغَشَّاشْ مَا يَقْعُدْ فِي بَيْتِي
وَ الْيُقُولْ الْكِدِبْ كُلَ مَا يَقْعُدْ قِدَّامِي.
8كُلِّ فَجُرْ، أَنَا نِسَكِّتْ كُلَّ الْعَاصِيِينْ هَنَا الْبَلَدْ
وَ نَطْرُدْ مِنْ مَدِينَةْ اللّٰهْ كُلَّ الْيِسَوُّوا الظُّلُمْ.
Currently Selected:
زَبُور 101: ع.د.ت19
Highlight
Share
Copy
Want to have your highlights saved across all your devices? Sign up or sign in
La Bible en arabe tchadien © Alliance biblique du Tchad, 2019
