أمْثال 31
31
وصيّة للملك لَمُوِيل
1دَاهُو كَلَامْ الْقَالَوْه لِلْمَلِكْ لَمُوِيلْ
وَ دِي الْوَصِيَّةْ الْأَمَّهْ أَنْطَتْهَا لَيَّهْ.
2«شُنُو نُقُولْ لَيْك، يَا وِلَيْدِي؟
شُنُو نُقُولْ لَيْك، يَا وِلَيْد مُصْرَانِي؟
شُنُو نُقُولْ لَيْك، يَا وِلَيْد نَتِيجَةْ مُعَاهَدَتِي؟
3يَا وِلَيْدِي، مَا تَنْطِي قُدُرْتَكْ لِلْعَوِينْ
وَ مَا تِخَلِّي الْيِوَدِّرَنْ الْمُلُوكْ يُقُودَنَّكْ.
4أَسْمَعْ، يَا لَمُوِيلْ.
الْخَمَرْ مَا عَدِيلْ لِلْمُلُوكْ
وَ الْمَرِيسَةْ مَا عَدِيلَةْ لِلسَّلَاطِينْ.
5أَشَانْ كَنْ شِرْبَوْا، يَنْسَوْا الْقَوَانِينْ
وَ يَقْلَعَوْا حُقُوقْ التَّعْبَانِينْ.
6وَ الْمَرِيسَةْ دِي تِوَافِقْ لِلْقَرِيبْ يُمُوتْ
وَ الْخَمَرْ لِلْحَيَاتَهْ مُرَّةْ.
7كَنْ يَشْرَبْهَا، يَنْسَى فَقْرَهْ
وَ أَبَداً مَا يِذَّكَّرْ تَعَبَهْ.
8أَفْتَحْ خَشْمَكْ وَ دَافِعْ لِلْأَبْكَمْ
وَ أَضْمَنْ حُقُوقْ هَنَا كُلَّ الضَّعِيفِينْ.
9أَفْتَحْ خَشْمَكْ وَ شَارِعْ بِالْحَقّ
وَ دَافِعْ لِحُقُوقْ الْفَقْرَانِينْ وَ التَّعْبَانِينْ.»
المرة العِنْدها شرف
10 # 31:10 في الشِعِر دا، رصّوا الآيات حسب نِظام الحُروف الهِجائيّة هنا اللُغّة الأصْليّة. و دا بترْتيب من الحرِف الأوّل لحدي الحرِف الأخير. الْمَرَةْ الْعِنْدَهَا شَرَفْ،
يَاتُو يَلْقَاهَا؟
قِيمِتْهَا زِيَادَةْ
مِنْ الدَّهَبْ الصَّافِي.
11رَاجِلْهَا مُؤآمِنْهَا مَرَّةْ وَاحِدْ
وَ مَعَاهَا هِي مَا يِقَصِّرْ لَيَّهْ شَيّءْ.
12هِي مَا تِسَوِّي لَيَّهْ شَيّءْ فَسِلْ إِلَّا الْخَيْر
فِي كُلَّ مُدَّةْ حَيَاتْهَا.
13هِي تِفَتِّشْ قُطُنْ وَ صُوفْ غَنَمْ
وَ بِنِيَّةْ وَاحِدَةْ تِتِرُّهُمْ.
14هِي مِثِلْ سَفِينَةْ التُّجَّارْ
دَايْماً هِي تِجِيبْ أَكِلْهَا مِنْ بَعِيدْ.
15تُقُمّ بِفَجُرْ بَدْرِي
وَ تِجَهِّزْ أَكِلْ لِنَاسْ بَيْتهَا
وَ تِقَسِّمْ الْعَمَلْ لِخَدَّامَاتْهَا.
16هِي تِفَتِّشْ زَرَعْ وَ تَشْرِيهْ
وَ بِقُرُسْهَا حَلَالْهَا،
تِمَقِّنْ جِنَيْنَةْ عِنَبْ.
17تَرْبُطْ صُلُبْهَا
وَ تِشَجِّعْ نَفِسْهَا فِي خِدْمِتْهَا.
18هِي مُؤَكِّدَةْ كَدَرْ تَرْبَحْ فِي تِجَارِتْهَا
وَ فَانُوسْهَا حَيّ لَحَدِّي أُسْط اللَّيْل.
19بِكَفَّيْنهَا تِتِرّ الْقُطُنْ
وَ بِأَصَابِعْهَا تِلِفّ الْمُتْرَارْ.
20هِي تِسَاعِدْ التَّعْبَانِينْ
وَ تِمِدّ إِيدْهَا لِلْمَسَاكِينْ.
21هِي مَا تِهِمّ لِنَاسْ بَيْتهَا مِنْ الْبَرِدْ
أَشَانْ أَيِّ وَاحِدْ لَابِسْ خَلَقْ تَخِينْ.
22هِي تِسَوِّي لِنَفِسْهَا غَطَّايَاتْ سَمْحِينْ
وَ تَلْبَسْ خُلْقَانْ هَنَا قُطُنْ غَالِيِّينْ.
23وَ رَاجِلْهَا مُكَرَّمْ فِي حِلِّتَهْ
وَكِتْ يَقْعُدْ مَعَ شُيُوخْ قَبِيلْتَهْ.
24وَ هِي تِخَيِّطْ خُلْقَانْ
وَ تِسَاوِقْهُمْ
وَ تَضْفُرْ كَرَّابَاتْ
وَ لِلتُّجَّارْ، تِبِيعْهُمْ.
25هِي مَعْرُوفَةْ بِالْعِزّ وَ الشَّرَفْ
وَ فَرْحَانَةْ أَشَانْ عِنْدَهَا عَشَمْ فِي الْمُسْتَقْبَلْ.
26تِحَجِّي بِحِكْمَةْ
وَ تِوَصِّي النَّاسْ بِالْخَيْر.
27دَايْماً تِرَاقِبْ فِي بَيْتهَا
وَ الْكَسَلْ أَبَداً مَا يَكْرُبْهَا.
28وَ عِيَالْهَا يُقُمُّوا وَ يُقُولُوا:
«مَبْرُوكْ عَلَيْكِ!»
وَ رَاجِلْهَا كُلَ يَشْكُرْهَا
وَ يُقُولْ:
29«كَتِيرْ مِنْ الْعَوِينْ وَصَّفَنْ شَرَفْهِنْ
وَ لَاكِنْ كُلِّهِنْ كَيْ، إِنْتِ فُتِّيهِنْ!»
30سَمَاحْ الْمَرَةْ يُغُشّ
وَ جَمَالْهَا يُزُولْ.
وَ لَاكِنْ الْخَايْفَةْ مِنْ اللّٰهْ،
هِي بَسْ يَشْكُرُوهَا.
31كَفُّوهَا تَعَبْهَا فِي شَانْ خِدْمِتْهَا
وَ أَشْكُرُوهَا قِدَّامْ نَاسْ حِلِّتْهَا.
Currently Selected:
أمْثال 31: ع.د.ت19
Highlight
Share
Copy
Want to have your highlights saved across all your devices? Sign up or sign in
La Bible en arabe tchadien © Alliance biblique du Tchad, 2019
