مَتَّى 18
18
ياتو النادم المُهِمّ؟
1وَ فِي الْوَكِتْ دَا، التَّلَامِيذ جَوْا لِعِيسَى سَأَلَوْه وَ قَالَوْا: «يَاتُو يَبْقَى النَّادُمْ الْمُهِمّ فِي مَمْلَكَةْ اللّٰهْ؟» 2وَ عِيسَى نَادَى وِلَيْد صَغَيَّرْ وَ خَطَّاهْ فِي أُسُطْهُمْ. 3وَ عِيسَى قَالْ: «نُقُولْ لَيْكُو الْحَقّ، كَنْ إِنْتُو مَا تِبَدُّلُوا فِكِرْكُو وَ كَنْ مَا تَبْقَوْا مِثِلْ عِيَالْ دُقَاقْ، مَا تَدْخُلُوا فِي مَمْلَكَةْ اللّٰهْ. 4النَّادُمْ الْيِسَوِّي نَفْسَهْ صَغَيَّرْ وَ يَبْقَى مِثِلْ الْوِلَيْد دَا، هُو بَسْ الْمُهِمّ فِي مَمْلَكَةْ اللّٰهْ. 5وَ أَيِّ نَادُمْ الْيَقْبَلْ بِأُسْمِي وِلَيْد صَغَيَّرْ مِثِلْ دَا، يَقْبَلْنِي.
6«وَ أَيِّ نَادُمْ الْيِتَلِّفْ إِيمَانْ هَنَا وَاحِدْ مِنْ الْعِيَالْ الدُّقَاقْ الْمُؤمِنِينْ بَيِّ دَوْل، الْعَذَابْ الْيَرْجَاهْ شَدِيدْ لَحَدِّي أَخَيْر لِلنَّادُمْ دَا كَنْ يَرْبُطُوا مُرْحَاكَةْ كَبِيرَةْ فِي رَقَبَتَهْ وَ يَزْقُلُوهْ فِي لُبّ بَحَرْ الْغَرِيقْ. 7عَذَابْ يَرْجَى نَاسْ الدُّنْيَا أَشَانْ يِسَوُّوا مَشَاكِلْ لِلْمُؤمِنِينْ. لَابُدَّ أَشْيَاءْ وَاحِدِينْ يَبْقَوْا وَ بِسَبَبْهُمْ نَاسْ وَاحِدِينْ يَمُرْقُوا مِنْ الدَّرِبْ وَ لَاكِنْ الْعَذَابْ يَرْجَى النَّادُمْ الْيِسَبِّبْ الْأَشْيَاءْ دَوْل.
8«وَ كَنْ إِيدَكْ وَلَّا رِجْلَكْ تِدَوْر تَمُرْقَكْ مِنْ الدَّرِبْ الْعَدِيلْ، أَقْطَعْهَا وَ أَزْقُلْهَا بَعِيدْ مِنَّكْ. أَخَيْر لَيْك كَنْ بِقِيتْ مَعْضُورْ وَ تَدْخُلْ فِي الْحَيَاةْ الْأَبَدِيَّةْ مِنْ يَزْقُلُوكْ فِي النَّارْ الْأَبَدِيَّةْ بِإِيدَيْنَكْ وَ رِجِلَيْنَكْ. 9وَ كَنْ عَيْنَكْ تِدَوْر تَمُرْقَكْ مِنْ الدَّرِبْ الْعَدِيلْ، سِلَّهَا وَ أَزْقُلْهَا بَعِيدْ مِنَّكْ. أَخَيْر لَيْك تَدْخُلْ فِي الْحَيَاةْ الْأَبَدِيَّةْ بِعَيْن وَاحِدَةْ بَسْ مِنْ يَزْقُلُوكْ فِي نَارْ جَهَنَّمْ بِعُيُونَكْ الْإِتْنَيْن.
مَثَل الغنماي الودّرت
10«أَنْقَرْعُوا مَا تَحْقُرُوا أَيِّ وَاحِدْ مِنْ الصُّغَارْ دَوْل أَشَانْ نُقُولْ لَيْكُو مَلَائِكَتْهُمْ فِي السَّمَاءْ دَايْماً حَاضْرِينْ مَعَ أَبُويِ اللّٰهْ. 11وَ أَنَا إِبْن الْإِنْسَانْ جِيتْ أَشَانْ نِنَجِّي النَّاسْ الْهَلْكَانِينْ. 12فِكِرْكُو شُنُو؟ نَادُمْ عِنْدَهْ 100 غَنَمْ وَ غَنَمَايْ وَاحِدَةْ وَدَّرَتْ. مَا يِخَلِّي التِّسْعَةْ وَ تِسْعِينْ فِي الْكَدَادَةْ وَ يَمْشِي يِفَتِّشْ الْمُوَدِّرَةْ وَلَّا؟ 13وَ نُقُولْ لَيْكُو الْحَقّ، كَنْ يَلْقَاهَا هُو يَبْقَى فَرْحَانْ زِيَادَةْ بِالْوَاحِدَةْ الْوَدَّرَتْ مِنْ بِالتِّسْعَةْ وَ تِسْعِينْ الْمَا وَدَّرَوْا. 14وَ سَوَا سَوَا مِثِلْ دَا، أَبُوكُو اللّٰهْ كُلَ مَا يِدَوْر وَاحِدْ مِنْ الصُّغَارْ دَوْل يَهْلَكْ.
كن أخوك سوّى فَوْقك خطا
15«وَ كَنْ أَخُوكْ مُؤمِنْ سَوَّى فَوْقَكْ خَطَا، أَمْشِي وَ حَجِّي مَعَ أَخُوكْ دَا وِحَيْدكُو وَ وَصِّفْ لَيَّهْ خَطَايَهْ. وَ كَنْ يَسْمَعْ كَلَامَكْ، خَلَاصْ إِنْتُو أَخْوَانْ. 16وَ كَنْ أَخُوكْ يَابَى مَا يَسْمَعْ كَلَامَكْ، أَمْشِي لَيَّهْ بَتَّانْ وَ شِيلْ مَعَاكْ وَاحِدْ وَلَّا إِتْنَيْن مِنْ الْأَخْوَانْ أَشَانْ التُّهْمَةْ مَا تَثْبِتْ إِلَّا بِشَهَادَةْ هَنَا نَاسْ إِتْنَيْن أَوْ تَلَاتَةْ.#18:16 الكلام دا تلقوه في تَثْنِية 19:15. 17وَ كَنْ هُو يَابَى مَا يَسْمَعْ كَلَامْهُمْ، جِيبْ الْكَلَامْ دَا لِجَمَاعَةْ الْمُؤمِنِينْ. وَ كَنْ أَبَى مَا يَسْمَعْ كَلَامْ جَمَاعَةْ الْمُؤمِنِينْ كُلَ، أَجْعَلَهْ مِثِلْ نَادُمْ مَا مُؤمِنْ وَلَّا مِثِلْ نَادُمْ الْيِشِيلْ الْمِيرِي.
18«أَشَانْ نُقُولْ لَيْكُو الْحَقّ، أَيِّ شَيّءْ الْجَعَلْتُوهْ حَرَامْ فِي الْأَرْض، اللّٰهْ فِي السَّمَاءْ كُلَ يَجْعَلَهْ حَرَامْ وَ أَيِّ شَيّءْ الْجَعَلْتُوهْ حَلَالْ فِي الْأَرْض، اللّٰهْ فِي السَّمَاءْ كُلَ يَجْعَلَهْ حَلَالْ. 19وَ بَتَّانْ نُقُولْ لَيْكُو الْحَقّ، كَنْ نَاسَيْن مِنْكُو فِي الْأَرْض أَسْتَفَقَوْا فِي أَيِّ شَيّءْ الْيِدَوْرُوهْ، أَبُويِ اللّٰهْ الْفِي السَّمَاءْ يِسَوِّيهْ لَيْهُمْ. 20وَ أَيِّ بَكَانْ الْيِلِمُّوا فَوْقَهْ النَّاسْ بِأُسْمِي، كَنْ هُمَّنْ إِتْنَيْن أَوْ تَلَاتَةْ كُلَ، أَنَا ذَاتِي قَاعِدْ فِي أُسُطْهُمْ.»
مَثَل الخدّام الما سامح
21وَ بُطْرُسْ جَاءْ لِعِيسَى وَ سَأَلَهْ وَ قَالْ: «سَيِّدْنَا، كَنْ أَخُويِ يِسَوِّي خَطَا فَوْقِي كَتِيرْ، كَمْ مَرَّةْ نِسَامِحَهْ؟ نِسَامِحَهْ لَحَدِّي سَبْعَةْ مَرَّاتْ وَلَّا؟» 22وَ عِيسَى رَدَّ لَيَّهْ وَ قَالْ: «مَا تِسَامِحَهْ لَحَدِّي سَبْعَةْ مَرَّاتْ بَسْ. لَاكِنْ سَامِحَهْ سَبْعِينْ لَحَدِّي سَبْعَةْ مَرَّاتْ!
23«أَيْوَى، مَمْلَكَةْ اللّٰهْ هِي مِثِلْ كَيْ. نَادُمْ وَاحِدْ مَلِكْ وَ دَوَّرْ يِسَوِّي حِسَابْ مَعَ خَدَّامِينَهْ. 24وَ وَكِتْ بَدَا الْحِسَابْ مَعَاهُمْ، جَابَوْا لَيَّهْ خَدَّامْ وَاحِدْ. وَ النَّادُمْ دَا، الْمَلِكْ عِنْدَهْ فَوْقَهْ مَالْ كَتِيرْ مَرَّةْ وَاحِدْ. 25وَ الْخَدَّامْ مَا عِنْدَهْ شَيّءْ الْيِكَفِّي بَيَّهْ الدَّيْن الْفَوْقَهْ. وَ سِيدَهْ الْمَلِكْ قَالْ وَاجِبْ يِبِيعُوا الْخَدَّامْ مَعَ مَرْتَهْ وَ عِيَالَهْ وَ كُلَّ شَيّءْ الْعِنْدَهْ فِي سُوقْ الْعَبِيدْ أَشَانْ يِكَفِّي دَيْنَهْ. 26وَ لَاكِنْ الْخَدَّامْ وَقَعْ قِدَّامَهْ وَ قَالْ: ‹يَا سِيدِي، أَصْبُرْنِي وَ نِكَفِّيكْ الْعِنْدَكْ فَوْقِي كُلَّ كَيْ.› 27وَ سِيدْ الْخَدَّامْ دَا حَنَّ فَوْقَهْ وَ عَفَا لَيَّهْ الدَّيْن وَ خَلَّاهْ مَشَى.
28«وَ فِي الْبَكَانْ دَا، الْخَدَّامْ مَرَقْ مِنْ قِدَّامْ الْمَلِكْ وَ مَشَى عَجَلَةْ لِنَادُمْ آخَرْ وَ هُو كُلَ مِنْ خَدَّامِينْ الْمَلِكْ. وَ عِنْدَهْ فِي أَخُوهْ دَا دَيْن شِيَّةْ بَسْ. وَ كَرَبَهْ وَ بَدَا يَخَنْقَهْ وَ قَالْ: ‹كَفِّينِي الْعِنْدِي فَوْقَكْ!› 29وَ أَخُوهْ الْخَدَّامْ وَقَعْ قِدَّامَهْ وَ شَحَدَهْ وَ قَالْ: ‹أَصْبُرْنِي وَ نِكَفِّيكْ كُلَّ كَيْ!› 30وَ الْخَدَّامْ أَبَى وَ مَشَى دَسَّاهْ فِي السِّجِنْ لَحَدِّي يِكَفِّي الدَّيْن الْعِنْدَهْ فَوْقَهْ.
31«وَ أَخْوَانَهْ خَدَّامِينْ الْمَلِكْ شَافَوْا الشَّيّءْ الْبِقِي دَا وَ بَرْجَلَوْا بِلْحَيْن. وَ مَشَوْا أَوْرَوْا سِيدْهُمْ بِكُلَّ شَيّءْ الْبِقِي. 32وَ سِيدْهُمْ نَادَاهْ لِلْخَدَّامْ دَا وَ قَالْ لَيَّهْ: ‹يَا الْخَدَّامْ الْفَسِلْ! إِنْتَ شَحَدْتِنِي وَ أَنَا سَامَحْت لَيْك الدَّيْن الْكَتِيرْ دَا كُلَّ كَيْ. 33مَا وَاجِبْ لَيْك تِحِنّ فِي أَخُوكْ مِثِلْ أَنَا حَنَّيْت فَوْقَكْ إِنْتَ وَلَّا؟› 34وَ سِيدَهْ زِعِلْ فَوْقَهْ بِلْحَيْن وَ سَلَّمَهْ لِلْعَسْكَرْ أَشَانْ يِعَذُّبُوهْ فِي السِّجِنْ لَحَدِّي يِكَفِّي دَيْنَهْ.
35«وَ أَبُويِ اللّٰهْ يِسَوِّي مِثِلْ دَا كَنْ أَيِّ نَادُمْ مِنْكُو مَا يِسَامِحْ أَخُوهْ مِنْ قَلْبَهْ.»
Currently Selected:
مَتَّى 18: ع.د.ت19
Highlight
Share
Copy
Want to have your highlights saved across all your devices? Sign up or sign in
La Bible en arabe tchadien © Alliance biblique du Tchad, 2019