لاوِيِّين 19
19
أبْقوا خاصِّيْن أشان اللّه قُدّوس
1وَ اللّٰهْ حَجَّى لِمُوسَى وَ قَالْ: 2حَجِّي لِكُلَّ مُجْتَمَعْ بَنِي إِسْرَائِيلْ وَ قُولْ لَيْهُمْ: «أَبْقَوْا خَاصِّيْن أَشَانْ أَنَا اللّٰهْ إِلٰـهْكُو قُدُّوسْ.
3«وَ أَيِّ وَاحِدْ مِنْكُو خَلِّي يِحْتَرِمْ أَمَّهْ وَ أَبُوهْ وَ أَحْفَضَوْا يَوْمِي هَنَا السَّبْت. وَ أَنَا بَسْ اللّٰهْ إِلٰـهْكُو.
4«مَا تِوَجُّهُوا عَلَيْ الْإِلٰـهَاتْ وَ تَصْنَعَوْا لَيْكُو أَصْنَامْ هَنَا حَدِيدْ. وَ أَنَا بَسْ اللّٰهْ إِلٰـهْكُو.
5«وَ كَنْ تِقَدُّمُوا لِلّٰهْ ضَحِيَّةْ سَلَامَةْ، وَاجِبْ تِقَدُّمُوهَا بِطَرِيقَةْ الْهُو يَرْضَى بَيْهَا. 6الضَّحِيَّةْ دِي تَاكُلُوهَا فِي الْيَوْم الْقَدَّمْتُوهَا فَوْقَهْ أَوْ أَمْبَاكِرْ. وَ الْيِفَضِّلْ مِنْهَا لَحَدِّي الْيَوْم التَّالِتْ، يِحَرُّقُوهْ فِي النَّارْ. 7وَ كَنْ يَاكُلُوهْ فِي الْيَوْم التَّالِتْ دَا، يَبْقَى مِثِلْ فَطِيسْ وَ اللّٰهْ مَا يَقْبَلَهْ. 8وَ الْيَاكُلَهْ يِلْحَمَّلْ نَتِيجَةْ خَطَايَهْ أَشَانْ هُو مَا أَحْتَرَمْ الْمُخَصَّصْ لِلّٰهْ. وَ النَّادُمْ دَا، وَاجِبْ يَفْصُلُوهْ مِنْ شَعَبَهْ.
9«وَ وَكِتْ تَقْطَعَوْا زِرَاعِتْكُو فِي كُلَّ أَرْضُكُو، فَضُّلُوا شِيَّةْ مِنْ طَرَفْ زِرَاعِتْكُو مَا تَقْطَعَوْه وَ الْكِشَّيْب كُلَ مَا تِلَقُّطُوهْ. 10وَ فِي جِنَيْنَاتْكُو هَنَا الْعِنَبْ، مَا وَاجِبْ تَقْطَعَوْا الْفَضَّلْ مِنْ الْعِنَبْ فِي الْعَنَاقِيدْ وَ لَا تِكَشُّبُوا الدَّفَّقْ فِي الْأَرْض. دَوْل وَاجِبْ تِخَلُّوهُمْ لِلْمِسْكِينْ وَ الْأَجْنَبِي. وَ أَنَا بَسْ اللّٰهْ إِلٰـهْكُو.
11«مَا تَسُرْقُوا. وَ مَا تَكْدُبُوا لِأَخُوكُو وَ لَا تُغُشُّوهْ. 12وَ مَا تَحَلْفُوا بِأُسْمِي بِكِدِبْ أَشَانْ بِالْحَلِيفَةْ دِي، إِنْتُو مَا تِحْتَرُمُوا أُسْمِي أَنَا إِلٰـهْكُو. وَ أَنَا بَسْ اللّٰهْ.
13«مَا تَظُلْمُوا جِيرَانْكُو وَ لَا تَسُرْقُوا. وَ مَا تَكُرْبُوا أُجْرَةْ الْخَدَّامْ لَحَدِّي أَمْبَاكِرْ. 14مَا تِعَيُّرُوا الطَّرْشَانْ وَ مَا تُخُطُّوا شَيّءْ قِدَّامْ الْعَمْيَانْ لِيِتَرْتِعَهْ. وَ بَيْدَا، تِوَصُّفُوا خَوْفكُو مِنِّي أَنَا إِلٰـهْكُو. وَ أَنَا بَسْ اللّٰهْ.
15«وَ فِي الشَّرِيعَةْ، مَا تِمَيُّلُوا وَ لَا تَنْصُرُوا الْقَادِرْ وَ لَا الضَّعِيفْ وَ لَاكِنْ أَحْكُمُوا أَمْبَيْن أَخْوَانْكُو بِالْعَدِلْ. 16مَا تَنْقُلُوا الْكَلَامْ أَمْبَيْنَاتْ شَعَبْكُو. بِكِدِبْ، مَا تَتْهَمَوْا جِيرَانْكُو بِجَرِيمَةْ التِّدَفِّقْ دَمَّهْ. وَ أَنَا بَسْ اللّٰهْ.
17«مَا تَكْرَهَوْا أَخْوَانْكُو مِنْ دَاخَلْ قُلُوبْكُو وَ لَاكِنْ لُومُوا رُفْقَانْكُو أَشَانْ مَا تِشَارُكُوا مَعَاهُمْ فِي ذُنُوبْهُمْ. 18مَا تِشِيلُوا تَارْ وَ مَا تَكُرْبُوا فِي قُلُوبْكُو لِعِيَالْ شَعَبْكُو. حِبّ أَخُوكْ مِثِلْ تِحِبّ نَفْسَكْ! وَ أَنَا بَسْ اللّٰهْ.
19«أَحْفَضَوْا قَوَانِينِي. مَا تِلِمُّوا بَهَايِمْ إِتْنَيْن النَّفَرْهُمْ شِقْ شِقْ لِتِوَلُّدُوهُمْ. وَ مَا تَزْرَعَوْا فِي زَرَعْ وَاحِدْ نَبَاتَاتْ إِتْنَيْن النَّفَرْهُمْ شِقْ شِقْ. وَ مَا تَلْبَسَوْا خَلَقْ مَصْنُوعْ مِنْ نَوْع تِنَيْن شِقْ شِقْ.
20«وَ كَنْ رَاجِلْ رَقَدْ مَعَ مَرَةْ وَ الْمَرَةْ دِي خَادِمْ وَ مَخْطُوبَةْ لِنَادُمْ آخَرْ وَ لَاكِنْ مَا فَدَوْهَا وَ لَا عَتَقَوْهَا، فِي الْبَكَانْ دَا يِكَفِّي الْخَسَارَةْ. وَ لَاكِنْ مَا يَكْتُلُوهُمْ أَشَانْ الْخَادِمْ دِي مَا عَتَقَوْهَا. 21وَ الرَّاجِلْ السَّوَّى الشَّيّءْ دَا يِجِيبْ لِلّٰهْ فِي مَدَخَلْ خَيْمَةْ الْإِجْتِمَاعْ كَبِشْ ضَحِيَّةْ لِكَفَّارَةْ الْخَطَا. 22وَ بِالْكَبِشْ دَا، رَاجِلْ الدِّينْ يِسَوِّي لَيَّهْ كَفَّارَةْ وَ يِقَدِّمْ ضَحِيَّةْ لِكَفَّارَةْ الْخَطَا لِلّٰهْ فِي شَانْ الذَّنِبْ الْهُو سَوَّاهْ. وَ خَلَاصْ يَلْقَى الْغُفْرَانْ.
23«وَ وَكِتْ تَدْخُلُوا فِي الْبَلَدْ وَ تِمَقُّنُوا أَيِّ شَدَرَةْ التَّلْدَ عِيَالْ، أَجْعَلَوْا عِيَالْهَا مُحَرَّمِينْ لَيْكُو لِمُدَّةْ تَلَاتَةْ سَنَةْ، مَا تَاكُلُوهُمْ. 24وَ فِي السَّنَةْ الرَّابْعَةْ، كُلَّ عِيَالْ الشَّدَرَةْ دِي تِخَصُّصُوهُمْ لِلّٰهْ فِي عِيدْ الشُّكُرْ. 25وَ فِي السَّنَةْ الْخَامْسَةْ، تَاكُلُوا عِيَالْ الشَّدَرْ. وَ بَيْدَا، إِنْتَاجْكُو يِزِيدْ لَيْكُو. وَ أَنَا بَسْ اللّٰهْ إِلٰـهْكُو.
26«مَا تَاكُلُوا أَيِّ شَيّءْ مَعَ الدَّمّ. وَ مَا تِشَوُّفُوا وَ لَا تِحَجُّوا بِعِلِمْ الْغَيْب. 27مَا تَقْطَعَوْا شَعَرْكُو مُدَوَّرْ وَ مَا تَقْطَعَوْا شَوَارِبْ دُقُونْكُو. 28مَا تِجَرُّحُوا جِسِمْكُو بِسَبَبْ نَادُمْ مَاتْ وَ تِسَوُّوا رَسِمْ الْمَا يِنْقَشَّ فِي جِسِمْكُو. وَ أَنَا بَسْ اللّٰهْ.
29«مَا تِوَدُّرُوا شَرَفْ بَنَاتْكُو بِالشَّرْمَطَةْ وَ دَا أَشَانْ الْبَلَدْ مَا تِشَّرْمَطْ وَ تِنْمَلِي بِالْفَسَالَةْ. 30أَحْفَضَوْا يَوْمِي هَنَا السَّبْت وَ أَحْتَرُمُوا بَيْتِي الْمُقَدَّسْ. وَ أَنَا بَسْ اللّٰهْ.
31«مَا تِوَجُّهُوا عَلَيْ النَّاسْ الْيِكَلُّمُوا مَعَ الْمَيْتِينْ وَ لَا الْجَنَّانِيِّينْ، مَا تِفَتُّشُوهُمْ وَ تِنَّجَّسَوْا بَيْهُمْ. وَ أَنَا بَسْ اللّٰهْ إِلٰـهْكُو.
32«قُمّ لِسِيَادْ الصُّوفْ الْأَبْيَضْ وَ أَحْتَرِمْ الشِّيَّابْ. وَ بَيْدَا، تِوَصِّفْ خَوْفَكْ مِنِّي أَنَا إِلٰـهَكْ. وَ أَنَا بَسْ اللّٰهْ.
33«وَ كَنْ نَادُمْ أَجْنَبِي جَاءْ سَكَنْ مَعَاكُو فِي بَلَدْكُو، مَا تَظُلْمُوهْ. 34وَ أَلْعَامَلَوْا مَعَ الْأَجْنَبِي السَّاكِنْ مَعَاكُو مِثِلْ مَعَ الْمُوَاطِنْ مِنْ بَنِي إِسْرَائِيلْ وَ حِبُّوهْ مِثِلْ تِحِبُّوا نُفُوسْكُو أَشَانْ إِنْتُو كُلَ بِقِيتُوا أَجَانِبْ فِي بَلَدْ مَصِرْ. وَ أَنَا بَسْ اللّٰهْ إِلٰـهْكُو.
35«مَا تِمَيُّلُوا فِي الشَّرِيعَةْ وَ مَا تُغُشُّوا فِي الْمَقَاسْ وَ لَا الْوَزِنْ وَ لَا الْمِكْيَالْ. 36خُطُّوا مِيزَانْ عَادِلْ وَ وَزِنْ عَادِلْ وَ كَوْرَوْ عَادِلْ وَ لِيتِرْ عَادِلْ. وَ أَنَا بَسْ اللّٰهْ إِلٰـهْكُو الْمَرَقْتُكُو مِنْ بَلَدْ مَصِرْ.
37«وَ أَحْفَضَوْا كُلَّ شُرُوطِي وَ كُلَّ قَوَانِينِي وَ طَبُّقُوهُمْ. وَ أَنَا بَسْ اللّٰهْ.»
Currently Selected:
لاوِيِّين 19: ع.د.ت19
Highlight
Share
Copy
Want to have your highlights saved across all your devices? Sign up or sign in
La Bible en arabe tchadien © Alliance biblique du Tchad, 2019
