يَعْقُوب 2

المُؤمِن المِسْكين و الغني

1يَا أَخْوَانِي، إِنْتُو مُؤمِنِينْ بِرَبِّنَا الْمَجِيدْ عِيسَى الْمَسِيحْ وَ فِي دَرْبَهْ هُو، مَا وَاجِبْ تِشِيفُوا الْوَاحِدْ أَخَيْر مِنْ الْآخَرْ. 2مَثَلاً، فِي جَمَاعِتْكُو الْمُؤمِنِينْ، جَاءْ نَادُمْ وَاحِدْ سِيدْ مَالْ لَابِسْ خُلْقَانْ سَمْحِينْ مَرَّةْ وَاحِدْ وَ عِنْدَهْ خَاتِمْ هَنَا دَهَبْ. وَ جَاءْ آخَرْ مِسْكِينْ لَابِسْ خَلَقْ وَسْخَانْ وَ مُشَرَّطْ. 3وَ إِنْتُو تِكَرُّمُوا سِيدْ الْمَالْ الْخُلْقَانَهْ سَمْحِينْ وَ تُقُولُوا لَيَّهْ: «أَلْفَضَّلْ قِدَّامْ، يَا السَّيِّدْ» وَ تُقُولُوا لِلْمِسْكِينْ: «هَايْ إِنْتَ دَا، يَلَّا أَقْعُدْ تِحِتْ هِنَاكْ!» 4وَ مِثِلْ دَا، خَلَاصْ إِنْتُو شِفْتُوا الْوَاحِدْ أَخَيْر مِنْ الْآخَرْ وَ حَقَرْتُوا الْمِسْكِينْ. وَ كَنْ تِسَوُّوا مِثِلْ دَا، سَوَّيْتُوا نُفُوسْكُو مِثِلْ حُكَّامْ الْقُلُوبْهُمْ فَسْلِينْ.

5يَا أَخْوَانِي النِّحِبُّكُو، أَسْمَعَوْا كَلَامِي. اللّٰهْ عَزَلْ النَّاسْ الْمَسَاكِينْ فِي الدُّنْيَا دِي أَشَانْ يَلْقَوْا إِيمَانْ زِيَادَةْ وَ يَوْرُثُوا الْمَمْلَكَةْ الْاللّٰهْ وَاعَدْ بَيْهَا النَّاسْ الْيِحِبُّوهْ. 6لَاكِنْ إِنْتُو حَقَرْتُوا الْمِسْكِينْ دَا. يَاتُمَّنْ الْيَظُلْمُوكُو؟ يَاتُمَّنْ الْيَكُرْبُوكُو وَ يَتْهَمَوْكُو قِدَّامْ الشَّرِيعَةْ؟ مَا سِيَادْ الْمَالْ وَلَّا؟ 7دَوْل هُمَّنْ بَسْ الْيِعَيُّرُوا الْأُسُمْ الْكَرِيمْ هَنَا رَبُّكُو.

8بِالصَّحِيحْ، دَا عَدِيلْ كَنْ إِنْتُو قَاعِدِينْ تِتَابُعُوا شُرُوطْ التَّوْرَاةْ هَنَا مَمْلَكَةْ اللّٰهْ الْقَاعِدِينْ فِي الْكِتَابْ الْبُقُولُوا: <حِبّ أَخُوكْ مِثِلْ تِحِبّ نَفْسَكْ.>#2‏:8 الكلام دا تلقوه في لاوِيِّين 19‏:18. 9وَ لَاكِنْ كَنْ إِنْتُو قَاعِدِينْ تِشِيفُوا الْوَاحِدْ أَخَيْر مِنْ الْآخَرْ، إِنْتُو قَاعِدِينْ تَذْنُبُوا. وَ شُرُوطْ التَّوْرَاةْ دَوْل يَحْكُمُوا فَوْقكُو أَشَانْ إِنْتُو خَاطِيِّينْ.

10تَعَرْفُوا كَدَرْ النَّادُمْ التَّابَعْ كُلَّ الشُّرُوطْ وَ لَاكِنْ خَالَفْ شَرْط وَاحِدْ، هُو مِثِلْ خَالَفْ كُلَّ الشُّرُوطْ. 11أَشَانْ اللّٰهْ قَالْ: <مَا تَزْنَى> وَ بَتَّانْ قَالْ: <مَا تَكْتُلْ دِمَّةْ.>#2‏:11 الكلام دا تلقوه في خُروج 20‏:13‏-14. وَ كَنْ إِنْتَ كَتَلْت دِمَّةْ وَ لَاكِنْ مَا زَنَيْت، خَلَاصْ حَسَبْ الشُّرُوطْ دَوْل، إِنْتَ خَاطِي. 12حَجُّوا كَلَامْ عَدِيلْ وَ سَوُّوا عَمَلْ عَدِيلْ وَ أَبَداً مَا تَنْسَوْا كَدَرْ اللّٰهْ يِحَاسِبْكُو حَسَبْ وَصَايَا اللّٰهْ الْيَنْطُوا الْحُرِّيَّةْ. 13كَنْ نَادُمْ مَا يَرْحَمْ النَّاسْ، اللّٰهْ كُلَ مَا يَرْحَمَهْ فِي يَوْم الْحِسَابْ. وَ لَاكِنْ النَّادُمْ الْيَرْحَمْ النَّاسْ، مَا يَخَافْ مِنْ يَوْم الْحِسَابْ.

الإيمان و العمل

14يَا أَخْوَانِي، وَيْن الْفَايْدَةْ كَنْ نَادُمْ بُقُولْ هُو مُؤمِنْ لَاكِنْ مَا يِوَصِّفْ إِيمَانَهْ بِعَمَلَهْ؟ إِيمَانْ نَفَرْ دَا يَقْدَرْ يِنَجِّيهْ وَلَّا؟ 15مَثَلاً، أَكُونْ شِفْتُوا أَخْوَانْكُو وَلَّا أَخْوَاتْكُو مَا عِنْدُهُمْ لُبَاسْ وَ مَا عِنْدُهُمْ شَيّءْ هَنَا أَكِلْ 16وَ تُقُولُوا لَيْهُمْ: «أَمْشُوا عَافَيْ، اللّٰهْ يَفْتَحْ لَيْكُو». وَ شُنُو الْفَايْدَةْ كَنْ إِنْتُو مَا تَنْطُوهُمْ الشَّيّءْ الْهُمَّنْ حَوْجَانِينْ لَيَّهْ؟ 17وَ خَلَاصْ، كَنْ نَادُمْ بُقُولْ هُو عِنْدَهْ إِيمَانْ لَاكِنْ مَا يِوَصِّفَهْ بِعَمَلْ الْخَيْر، إِيمَانَهْ دَا مَا يَنْفَعْ مَرَّةْ وَاحِدْ!

18لَاكِنْ أَكُونْ نَادُمْ يُقُولْ: «إِنْتَ عِنْدَكْ إِيمَانْ وَ لَاكِنْ أَنَا عِنْدِي عَمَلْ الْخَيْر.» أَنَا نُرُدّ لَيَّهْ وَ نُقُولْ: «إِنْتَ مَا تَقْدَرْ تِوَصِّفْ لَيِّ إِيمَانَكْ كَنْ مَا عِنْدَكْ عَمَلْ الْخَيْر. وَ كَنْ لَيِّ أَنَا، نِوَصِّفْ لَيْك إِيمَانِي بِالْعَمَلْ الْخَيْر النِّسَوِّيهْ.» 19إِنْتَ مُؤمِنْ كَدَرْ اللّٰهْ وَاحِدْ. دَا سَمَحْ. حَتَّى الشَّوَاطِينْ كُلَ مُؤمِنِينْ كَدَرْ اللّٰهْ وَاحِدْ وَ لَاكِنْ يَرْجُفُوا وَ يَخَافَوْا مِنْ الْعَذَابْ الْيَجِي فَوْقهُمْ.

20إِنْتَ الْفِكْرَكْ بَاطِلْ، أَنَا نِوَصِّفْ لَيْك كَدَرْ الْإِيمَانْ بَلَا عَمَلْ مَا يَنْفَعْ. 21فَكُّرُوا فِي أَبُونَا إِبْرَاهِيمْ. اللّٰهْ جَعَلَهْ صَالِحْ بِسَبَبْ الْعَمَلْ الْهُو سَوَّاهْ. هُو قَصَّدْ يِقَدِّمْ وِلَيْدَهْ إِسْحَاقْ ضَحِيَّةْ فِي الْمَدْبَحْ. 22شِيفُوا، إِبْرَاهِيمْ إِيمَانَهْ بِقِي كَامِلْ أَشَانْ هُو سَوَّى الشَّيّءْ الْاللّٰهْ يِدَوْرَهْ. 23بِمِثِلْ دَا بَسْ، تَمَّ الشَّيّءْ الْمَكْتُوبْ فِي الْكِتَابْ الْبُقُولْ: <إِبْرَاهِيمْ آمَنْ بِكَلَامْ اللّٰهْ وَ فِي شَانْ إِيمَانَهْ، اللّٰهْ جَعَلَهْ نَادُمْ صَالِحْ.>#2‏:23 الكلام دا تلقوه في تكوين 15‏:6. وَ اللّٰهْ جَعَلَهْ خَلِيلَهْ. 24شِيفُوا، اللّٰهْ يَجْعَلْ النَّاسْ صَالِحِينْ بِعَمَلْهُمْ وَ مَا بِالْإِيمَانْ وِحَيْدَهْ.

25بِقِي مِثِلْ دَا لِرَاحَابْ الشَّرْمُوطَةْ كُلَ. اللّٰهْ جَعَلَاهَا صَالْحَةْ بِسَبَبْ الشَّيّءْ الْهِي سَوَّتَهْ. وَ دَا وَكِتْ هِي لَبَّدَتْ الْمُرَسَّلِينْ وَ مَرَقَتْهُمْ بِدَرِبْ آخَرْ.#2‏:25 رَاحَابْ الشَّرْمُوطَةْ: التاريخ دا تلقوه في يَشُوع 2. 26خَلَاصْ، تَعَرْفُوا كَدَرْ جِلِدْ بَلَا رُوحْ مَا يَنْفَعْ. وَ مِثِلْ دَا، إِيمَانْ بَلَا عَمَلْ خَيْر كُلَ مَا يَنْفَعْ.

Currently Selected:

يَعْقُوب 2: ع.د.ت19

Highlight

Copy