إشَعْيا 5
5
بني إسرائيل مِثِل جِنَيْنة العِنب
1خَلِّي نِغَنِّي لِمَحْبُوبِي.
وَ دَا غِنَيْ لِمَحْبُوبِي
وَ لِجِنَيْنِتَهْ هَنَا الْعِنَبْ.
مَحْبُوبِي عِنْدَهْ جِنَيْنَةْ عِنَبْ
فِي قَوْز الْيِقَوِّمْ عَدِيلْ.
2هُو حَرَتْ الْأَرْض وَ مَرَقْ حُجَارْهَا
وَ شَالْ أَحْسَنْ مَقَنْ وَ مَقَّنَهْ.
وَ بَنَى بَيْت طَوِيلْ لِلْمُرَاقَبَةْ
فِي لُبّ الْجِنَيْنَةْ
وَ فِي الْحَجَرْ، سَوَّى عَصَّارَةْ.
عِنْدَهْ عَشَمْ يَلْقَى عِنَبْ عَدِيلْ
وَ لَاكِنْ جِنَيْنِتَهْ أَنْتَجَتْ إِلَّا عِنَبْ تَلْفَانْ.
3خَلَاصْ، قَالْ:
«هَسَّعْ دَا، يَا سُكَّانْ مَدِينَةْ الْقُدُسْ!
وَ يَا نَاسْ يَهُوذَا!
أَحْكُمُوا بَيْنِي أَنَا
وَ بَيْن جِنَيْنِتِي هَنَا الْعِنَبْ.
4شُنُو نَقْدَرْ نِسَوِّيهْ لِجِنَيْنِتِي
زِيَادَةْ مِنْ السَّوَّيْتَهْ؟
أَنَا قَاعِدْ نَرْجَى بِعَشَمْ عِنَبْ عَدِيلْ
وَ مَالَا هِي أَنْتَجَتْ عِنَبْ تَلْفَانْ؟
5«وَ هَسَّعْ نِأَوْرِيكُو
النِّسَوِّيهْ لِجِنَيْنِتِي.
أَنَا نَمْرُقْ الزَّرِيبَةْ
وَ الْبَهَايِمْ يَاكُلُوهَا
وَ نِقِدّ خُرْمَةْ فِي الدُّرْدُرْ
لِيَدْخُلُوا يِفَجُّقُوهَا.
6الْجِنَيْنَةْ دِي، أَنَا نَخْرِبْهَا
وَ لَا نِعَدِّلْهَا وَ لَا نِجَنْكِبْهَا
وَ الشَّوْك وَ أَنْدِرَيْسَةْ
يُقُمُّوا فَوْقهَا.
وَ نَنْطِي أَمُرْ لِلسَّحَابْ
مَا يِنَزِّلْ الْمَطَرَةْ فَوْقهَا.»
7أَشَانْ جِنَيْنَةْ اللّٰهْ الْقَادِرْ،
هِي ذُرِّيَّةْ بَنِي إِسْرَائِيلْ.
وَ نَاسْ يَهُوذَا،
هُمَّنْ مَقَنْ الْهُو يِحِبَّهْ.
بِعَشَمْ هُو يَرْجَى مِنْهُمْ الْعَدَالَةْ
وَ لَاكِنْ لِقِي الظُّلُمْ.
هُو يَرْجَى مِنْهُمْ الصَّلَاحْ
وَ لَاكِنْ سِمِعْ صِرَاخْ الْمَظْلُومْ.
سِتّة وباء في كُبارات يَهُوذَا
8الْعَذَابْ لِلْيِلِمُّوا
بَيْت فِي بَيْت وَ زَرَعْ فِي زَرَعْ
لَحَدِّي يِشِيلُوا كُلَّ الْبَكَانْ
وَ يَسْكُنُوا وِحَيْدهُمْ فِي أُسْط الْبَلَدْ.
9بِأُدْنَيِّ، أَنَا سِمِعْت
حَلِيفَةْ اللّٰهْ الْقَادِرْ،
هُو قَالْ: «عَدَدْ كَبِيرْ هَنَا بُيُوتْ يَخْرَبَوْا
أَيْوَى، هُمَّنْ بُيُوتْ كُبَارْ وَ سَمْحِينْ
وَ يَبْقَوْا فَاضِيِينْ مِنْ سُكَّانْهُمْ.
10وَ 10 حَبِلْ هَنَا جِنَيْنَةْ عِنَبْ
يَنْتِجْ إِلَّا 10 كَوْرَوْ هَنَا عَصِيرْ
وَ الْيِتَيْرِبْ 100 كَوْرَوْ هَنَا قَمَحْ
يَلْقَى 10 كَوْرَوْ بَسْ.»
11الْعَذَابْ لِلْيُقُمُّوا بَدْرِي
وَ يِفَتُّشُوا الْمَرِيسَةْ
وَ لِلْيِدَفُّوا جِسِمْهُمْ
بِالْخَمَرْ فِي آخِرْ اللَّيْل.
12الْجِقِنْدِيَّةْ وَ أَمْ سِبَيْبَةْ
وَ التَّنْبَلْ وَ الصُّفَّارَةْ،
هُمَّنْ دَوْل يِشَجُّعُوا سَكَرْهُمْ.
لَاكِنْ النَّاسْ دَوْل،
مَا قَاعِدِينْ يِفَكُّرُوا فِي عَمَلْ اللّٰهْ
وَ لَا يِشِيفُوا شَيّءْ السَّوَّتَهْ إِيدَهْ.
13فِي شَانْ قِلَّةْ الْمَعْرَفَةْ،
شَعَبِي يِوَدُّوهُمْ فِي الْغُرْبَةْ.
وَ الْعِنْدُهُمْ شَرَفْ،
يُمُوتُوا مِنْ الْجُوعْ
وَ كَتِيرِينْ مِنْ نَاسْ الْحِلَّةْ
يُمُوتُوا مِنْ الْعَطَشْ.
14وَ فِي شَانْ دَا،
الْهَاوِيَةْ تِوَسِّعْ حَلْقُومْهَا
وَ خَشُمْهَا،
تَفْتَحَهْ وَسِيعْ بَلَا حَدّ.
وَ يَنْزُلُوا فَوْقهَا الْعِنْدُهُمْ شَرَفْ
وَ كَتِيرِينْ مِنْ نَاسْ الْحِلَّةْ
وَ حَرَكَتْهُمْ هَنَا الْفَرْحَةْ كُلَ
تَنْزِلْ مَعَاهُمْ.
15وَ كُلَّ النَّاسْ يِدَنْقُرُوا
وَ أَيِّ رَاجِلْ يِلْمَسْكَن
وَ الْيِشِيفُوا بِإِسْتِكْبَارْ
يِدَلُّوا رُوسَيْهُمْ.
16وَ اللّٰهْ الْقَادِرْ يِبَيِّنْ عَدَالْتَهْ،
أَيْوَى، الْإِلٰـهْ الْقُدُّوسْ
يِوَصِّفْ عَدَالْتَهْ.
17الْحُمْلَانْ يَسْرَحَوْا فِي الْحِلَّةْ الْخَرْبَانَةْ
مِثِلْ فِي مَرْعَاهُمْ
وَ الْغَنَمْ السُّمَانْ
يَاكُلُوا فِي بَكَانْهَا الْخَرَابْ.
18الْعَذَابْ لَيْهُمْ!
هُمَّنْ الْيُكُرُّوا خَطَاهُمْ
بِحُبَالْ الْكِدِبْ مِثِلْ كَارَّوْ،
يُكُرُّوا وَرَاهُمْ ذُنُوبْهُمْ.
19وَ يُقُولُوا:
«خَلِّي اللّٰهْ يِسَوِّي خِدِمْتَهْ عَجَلَةْ
أَشَانْ نِشِيفُوهَا!
وَ قُدُّوسْ إِسْرَائِيلْ، خَلِّي يِقَرِّبْ
وَ يِحَقِّقْ نِيّتَهْ
أَشَانْ نَعَرْفُوهَا!»
20الْعَذَابْ لِلنَّاسْ
الْيُقُولُوا الشَّرّ خَيْر
وَ الْخَيْر شَرّ!
وَ يِسَوُّوا الضَّلَامْ نُورْ
وَ النُّورْ ضَلَامْ.
الْيِسَوُّوا الْمُرّ حَلُو
وَ الْحَلُو مُرّ.
21الْعَذَابْ لِلْيِشِيفُوا نُفُوسْهُمْ حَكِيمِينْ
وَ يَجْعَلَوْا نُفُوسْهُمْ فَاهِمِينْ!
22الْعَذَابْ لِلْيَعَرْفُوا شَرَابْ الْخَمَرْ
أَيْوَى، الْعِنْدُهُمْ خِبْرَةْ فِي خَلْبِطِينْ الْمَرِيسَةْ!
23هُمَّنْ يِبَرُّوا الْخَاطِي فِي شَانْ الرَّشْوَةْ
وَ مَا يَنْطُوا حَقّ لِلصَّالِحْ فِي الشَّرِيعَةْ.
24فِي شَانْ دَا، هُمَّنْ يَبْقَوْا
مِثِلْ قَشّ التَّاكُلَهْ النَّارْ
وَ مِثِلْ عَقَيْق الْيِوَدِّرْ فِي أَمْ بَلْبَالَةْ.
وَ عُرُوقْهُمْ يِعَفُّنُوا
وَ نُوَّارْهُمْ يَبْقَوْا مِثِلْ عَجَاجْ.
أَشَانْ هُمَّنْ مَا طَبَّقَوْا
تَوْرَاةْ اللّٰهْ الْقَادِرْ
وَ حَقَرَوْا
كَلَامْ قُدُّوسْ إِسْرَائِيلْ.
اللّه نزّل غضب ضِدّ شعبه
25وَ بِسَبَبْ دَا، غَضَبْ اللّٰهْ يَنْزِلْ
ضِدّ شَعَبَهْ.
هُو يَرْفَعْ إِيدَهْ ضِدُّهُمْ
لِيَضْرُبْهُمْ.
وَ الْجِبَالْ يَرْجُفُوا
وَ جَنَازَاتْ شَعَبَهْ يَبْقَوْا
مِثِلْ وَسَخْ فِي أُسْط الشَّوَارِعْ.
لَاكِنْ بَيْدَا كُلَ، مَا خَلَّى زَعَلَهْ
وَ إِيدَهْ قَاعِدَةْ مَرْفُوعَةْ لِلْعِقَابْ.
26هُو يَرْفَعْ رَايَةْ لِأُمَمْ بَعِيدِينْ
وَ يِصَفِّرْ لِيِنَادِي الْقَاعِدِينْ فِي آخِرْ الْأَرْض.
دَاهُو! هُمَّنْ يُقُمُّوا عَجَلَةْ
وَ يَجُوا بِسُرْعَةْ.
27وَ النَّاسْ دَوْل
وَ لَا يَعَيَوْا وَ لَا يِتَّرْتَعَوْا
وَ لَا يَنْعَسَوْا وَ لَا يُنُومُوا.
هُمَّنْ وَ لَا يِحِلُّوا حِزَامْهُمْ
وَ لَا يِفَرْتُقُوا نِعْلَيْهُمْ.
28نَشَاشِيبْهُمْ طُرَانْ
وَ نُبَّالْهُمْ جَاهِزْ لِيَزُرْقُوا.
ضَلَافَيْ خَيْلهُمْ مِثِلْ الْحُجَارْ
وَ رِجْلَيْ عَرَبَاتْهُمْ عَجِيلِينْ
مِثِلْ أَمْ زَوْبَعَانَةْ.
29وَ يَبْكُوا مِثِلْ الدُّودْ
أَيْوَى، يَبْكُوا مِثِلْ فُرُوخْ الدُّودْ.
يَبْكُوا وَ يَكُرْبُوا فَرِيسِتْهُمْ
وَ مَا فِي نَادُمْ الْيِنَجِّيهَا مِنْهُمْ.
30وَ لَاكِنْ فِي الْيَوْم دَا،
هُمَّنْ يِكِرُّوا ضِدّ فَرِيسِتْهُمْ
مِثِلْ حِسّ الْبَحَرْ الْيُقُمّ.
وَ فِي الْأَرْض، دَاهُو فِيَّهْ إِلَّا الضَّلَامْ وَ الضِّيقَةْ
وَ النُّورْ يَبْقَى ضَلَامْ بِسَبَبْ الْغَمَامْ.
Currently Selected:
إشَعْيا 5: ع.د.ت19
Highlight
Share
Copy
Want to have your highlights saved across all your devices? Sign up or sign in
La Bible en arabe tchadien © Alliance biblique du Tchad, 2019
